Unit 1: Day 2

Ang Plano sa Kaluwasan

Pasiuna

Ang atong Langitnong Amahan mihatag kanato, nga Iyang mga anak, og usa ka plano nga gituyo sa pagdala kanatong tanan ngadto sa mahangturon nga kalipay ug kahimayaan. Ang pinakasentro sa Iyang plano mao ang Pag-ula ni Jesukristo. Ang Pag-ula nagbuntog sa mga epekto sa Pagkapukan ug naghimo niini nga posible alang kanato sa paghinulsol ug malimpyuhan sa atong mga sala aron kita unta makaangkon og hingpit nga kalipay niini nga kinabuhi ug sa kahangturan.

Christus statue

Kini nga leksyon mohatag kanimo og mubo nga kinatibuk-ang pagpasabut sa plano sa Langitnong Amahan bahin sa kaluwasan. Kini makatabang kanimo sa pagtan-aw kon sa unsang paagi nga ang mga kamatuoran sa ebanghelyo nga imong makat-unan karong tuiga may kalabutan sa usag usa ug sa imong katuyoan sa yuta. Samtang motubo ang imong pagsabut sa plano sa kaluwasan, ang imong pagtuo sa Dios ug sa Iyang Anak, nga si Jesukristo, molambo, ingon man usab ang imong abilidad sa pagtuman sa imong bahin diha sa plano. Ang plano sa kaluwasan mao “ang kahingpitan sa ebanghelyo ni Jesukristo, gihimo aron sa pagpahinabo sa pagka-imortal sa tawo ug sa kinabuhi nga dayon. Kini naglakip sa Paglalang, Pagkapukan, ug Pag-ula, uban sa tanan nga mga balaod, mga ordinansa, ug mga doktrina, nga gihatag sa Dios. Kini nga laraw naghimo niini nga mahimo nga sayon alang sa tanan nga mga katawhan nga pagahimayaon ug magpuyo sa kahangturan uban sa Dios” (Ang Giya ngadto sa mga Kasulatan, “Laraw sa Katubsanan,” scriptures.lds.org).

Ang Plano Nagtabang Kanato sa Pagsabut sa Atong Katuyoan sa Mortalidad

Ang plano sa atong Langitnong Amahan bahin sa kaluwasan nagtubag sa daghang mga pangutana nga gihunahuna usahay sa kadaghanan sa mga tawo sa ilang mga kinabuhi. Nakapamalandong ba ikaw og mga pangutana sama sa: “Diin ako gikan? “Nganong ania man ako dinhi?” “Asa ko paingon human niini nga kinabuhi?”

Sa wala pa kita matawo dinhi sa yuta, nagpuyo kita sa presensya sa atong Langitnong Amahan isip Iyang espiritu nga mga anak. Kita sa literal Iyang mga anak, ug nahigugma Siya kanato. Ang Iyang plano sa kaluwasan mao ang dalan alang sa matag usa kanato aron mamahimo nga sama Kaniya ug makatagamtam sa tanan Niyang mga panalangin. Kita nakasabut ug midawat sa Iyang plano sa wala pa kita moanhi sa yuta.

Ang Basahon ni Mormon adunay mahinungdanong bahin sa atong pagsabut sa plano sa kaluwasan. Ang mga propeta sa Basahon ni Mormon migamit og daghang nagkalain-laing mga termino kon mohisgot sa plano.

1. Basaha ang mga kasulatan nga nalista sa ubos, ug ilha ang pangalan sa matag bersikulo nga gigamit alang sa plano sa Langitnong Amahan. Sa imong scripture study journal, isulat ang pangalan tupad sa reference sa kasulatan. Ang una giila alang nimo.

   1. 2 Nephi 9:6 “Ang maloloy-on nga laraw sa makagagahum nga Tiglalang”

   2. 2 Nephi 11:5

   3. Alma 12:25

   4. Alma 24:14

   5. Alma 42:8

   6. Alma 42:15

Mga pulong sama sa manggiloy-on, pagluwas, kaluwasan, kalipay, ug katubsanan mihatag og gibug-aton sa doktrina nga ang plano sa Langitnong Amahan gihimo aron pagdala sa Iyang mga anak sa mahangturon nga kaluwasan ug kalipay.

Mga Scripture Study Journal

Atol sa imong kasinatian sa home-study makaangkon ikaw og kahigayunan sa pagtubag sa mga pangutana ug mopakigbahin sa imong mga ideya uban sa imong magtutudlo diha sa scripture study journal. Ang pagrekord sa imong mga hunahuna ug impresyon, ingon man usab ang pagsulat sa mga tubag sa mga pangutana gikan sa manwal, makadapit og pagpadayag ug makatabang kanimo sa pagsabut sa piho nga mga kasulatan. Dad-a ang imong scripture study journal ngadto sa imong sinemana nga klase sa home-study aron makaandam ka sa paghisgot sa unsay imong nakat-unan ug ipakita sa imong magtutudlo ang imong nabuhat.

2. Tubaga ang mosunod nga pangutana diha sa imong scripture study journal: Sa unsang paagi nga ang pagkahibalo nga ang Langitnong Amahan adunay plano alang sa imong kalipay ug kahimayaan makahimo og kalainan sa imong kinabuhi?

Ang Tahas sa Kabubut-on ug ang Pagkapukan ni Adan ug Eva sa Plano sa Kaluwasan

Si Adan ug Eva mao ang unang mga anak sa Langitnong Amahan nga mianhi dinhi sa yuta. Iya silang gibutang sa Tanaman sa Eden ug mihatag kanila sa ilang kabubut-on—“ang kahanas ug kahigayunan … sa pagpili ug sa pagbuhat alang sa ilang mga kaugalingon” (Ang Giya ngadto sa mga Kasulatan, “Kabubut-on,” scriptures.lds.org). Iya silang gisugo sa dili pagkaon sa bunga sa kahoy sa kahibalo sa maayo ug sa dautan. Ang pagtuman niini nga sugo nagpasabut nga sila mahimong magpabilin sa tanaman, apan dili sila makauswag pinaagi sa pagsinati og oposisyon sa mortalidad. Dili sila mahibalo unsa ang hingpit nga kalipay tungod kay dili sila makasinati og kasubo ug kasakit.

Basaha ang 2 Nephi 2:17–20 ug pangitaa kon unsay nahitabo ni Adan ug Eva human sila mipili sa dili pagtuman sa sugo sa Dios. Diha sa luna nga gihatag, ihulagway unsa ang gipili nga buhaton ni Adan ug Eva ug duha ka epekto niadto nga pagpili—sagad gitawag nga ang Pagkapukan—diha kanila:

Basaha ang 2 Nephi 2:22–26 ug ilha ang dugang nga mga sangputanan sa pagpili nga gihimo ni Adan ug Eva. Markahi ang imong mga kasulatan og dugang nga mga kamatuoran nga imong nakat-unan bahin sa mga epekto sa Pagkapukan.

3. Sa imong scripture study journal, tiwasa ang mosunod nga paragraph pinaagi sa paghulagway sa personal nga mga epekto diha kanimo sa Pagkapukan ni Adan ug Eva. Paglakip og mga ideya bahin sa mga pagpili, kabubut-on, pisikal nga mga lawas, kamatayon, mga anak, ug sala.

   “Tungod sa kalapasan ni Adan ug Eva, ako usab anaa sa kahimtang sa pagkapukan ug …”

Ang Tahas sa Pag-ula ni Jesukristo diha sa Plano sa Kaluwasan

resurrected Christ at tomb

Ang sala ug kamatayon mobulag kanato gikan sa presensya sa atong Amahan sa Langit. Dili kita makabalik ngadto sa presensya sa Dios kon walay balaan nga tabang. Kinahanglan gayud natong sabton ang tahas ni Jesukristo ug ang Iyang Pag-ula diha sa plano sa kaluwasan aron kita makabaton og hugot nga pagtuo diha Kaniya ug mosunod sa plano sa Langitnong Amahan. Tun-i ang Mosiah 3:17–19, nga mangita og mga pulong nga naghulagway sa unsang paagi nga ang Pag-ula ni Jesukristo nakabuntog sa mga epekto sa Pagkapukan ug nagtabang kanato nga makaangkon og kalipay ug makabalik ngadto sa atong Langitnong Amahan. I-summarize kini nga mga bersikulo sa imong kaugalingon nga mga pulong:

Ang usa ka baruganan nga atong nakat-unan mao: si Jesukristo mao ang labing mahinungdanon nga tawo sa plano sa kaluwasan, ug ang Iyang Pag-ula mao ang nakapalihok nga plano alang sa tanang anak sa Dios.

4. Basaha ang mosunod nga mga tudling sa kasulatan: 2 Nephi 2:8; Mosiah 3:7–11; 16:4–8; Alma 34:9, 15–16; Mormon 9:13–14. Diha sa imong scripture study journal, pagsulat og paragraph nga nagpasabut sa unsay ilang gitudlo mahitungod sa mahinungdanong tahas sa Pag-ula ni Jesukristo diha sa plano sa kaluwasan. Mahimo nimong linyahan ang mga pulong nga makahuluganon kanimo.

Ang Atong Responsibilidad diha sa Plano sa Kaluwasan

Ang Langitnong Amahan naghatag sa Iyang hingpit nga plano alang sa atong mahangturon nga kalipay ug kahimayaan uban Kaniya ug sa atong mga gimahal. Si Jesukristo nakatuman sa Iyang tahas sa plano, mibuntog sa kamatayon ug mihimo niini nga posible alang kanato sa pagbuntog sa sala ug mobalik aron mopuyo pag-usab uban sa atong Amahan sa Langit. Bisan pa niana, kini wala magwagtang sa atong responsibilidad diha sa plano.

5. Sa imong scripture study journal, isulat Ang uban sa akong mga responsibilidad diha sa plano sa kaluwasan, ug ilista unsa ang gitudlo sa matag mosunod nga mga kasulatan bahin sa atong personal nga responsibilidad aron sa pagdapit sa gahum sa Pag-ula ngari sa atong kinabuhi ug hingpit nga moambit sa mga panalangin sa plano sa kaluwasan:

   1. 2 Nephi 2:25–27

   2. Mosiah 3:12–13

   3. Alma 12:24–25, 32–34

   4. 3 Nephi 27:13–14, 20–22, 27

Kini nga mga kasulatan makatabang kanato sa pagsabut nga sa atong pagpili sa pagpuyo sa ebanghelyo ni Jesukristo ug pagsunod sa plano sa Dios, kita nag-andam sa pagdawat og kinabuhing dayon pinaagi sa Pag-ula sa Manluluwas.

6. Kon ikaw gihangyo sa paghatag og pakigpulong sa simbahan bahin sa plano sa kaluwasan. Gamit ang unsay imong nakat-unan gikan sa mga kasulatan sa gihatag nga assignment sa ibabaw, isulat sa imong scripture study journal unsay imong isulti bahin sa atong personal nga responsibilidad diha sa plano sa Langitnong Amahan.

Pamalandungi unsay imong mabuhat aron mas matuman ang imong responsibilidad diha sa plano sa Langitnong Amahan ug sa pagdapit sa gahum sa Manluluwas diha sa imong kinabuhi. Ikonsiderar ang pagpakigbahin sa imong mga hunahuna sa usa sa imong mga ginikanan, igsoon, o suod nga higala.

Ang Plano sa Kaluwasan Naghatag og mga Tubag ug Direksyon

Ang pagsabut sa plano sa kaluwasan makagiya kanimo sa paghimo og mga desisyon ug pagpangita og mga tubag sa mga pangutana nga atubangon nimo o sa uban.

7. Sa imong scripture study journal, tubaga ang usa sa mga pangutana nga naa sa ubos pinaagi sa pagsulti kon sa unsang paagi nga ang pagsabut sa plano sa kaluwasan naghatag og giya ug mga tubag:

   1. Sa unsa nga paagi nga ang pagkasayud nga ikaw usa ka anak nga lalaki o anak nga babaye sa Dios makaapekto sa imong mga pagbati sa bili sa kaugalingon?

   2. Sa unsang paagi ikaw motubag sa usa ka tawo nga moingon, “Ako ning kinabuhi—mobuhat ko sa akong gusto nga buhaton”?

   3. Sa unsang paagi nga ang pagsabut sa plano sa kaluwasan makatabang og usa ka tawo sa pagbuntog og mga pagbati nga ang kinabuhi mao ra gyud ang paglingaw-lingaw ug pagtagbaw sa atong kaugalingong mga tinguha alang sa kalipay?

   4. Sa unsang paagi nga imong magamit ang imong kahibalo sa plano sa kaluwasan aron pagtabang og usa ka tawo kinsa nagsinati og mga pagsulay ug mibati nga tungod kini kay wala siya higugmaa sa Dios?

Ang pagsabut sa plano sa kaluwasan makatabang kanimo sa pagsunod sa mga sugo sa Dios tungod kay kini nagpasabut nganong kita kinahanglang mosunod niini (tan-awa Alma 12:32).

8. Basaha ang 2 Nephi 2:25, ug i-summarize ang katuyoan sa plano sa kaluwasan pinaagi sa pagtubag sa mosunod nga pangutana diha sa imong scripture study journal: Sa unsang paagi nga ang plano sa kaluwasan nakahatag og kalipay kanimo ug sa imong pamilya?

9. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang “Plano sa Kaluwasan” ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: