Unit 23: Day 2

Helaman 11–12

Pasiuna

Ang Helaman 11–12 nagsaysay bahin sa 14 ka tuig sa kasaysayan sa Nephite ug nagpakita sa mga tawo agi sa cycle sa pagkamatarung ug pagkadautan. Tungod sa ilang garbo, ang mga tawo nagdumili sa paghinulsol sa ilang pagkadautan. Gisilyuhan ni Nephi ang kalangitan, nga maoy nakaingon sa huwaw ug kagutom. Ang huwaw ug kagutom nakapahimo sa mga tawo nga mapainubsanon, ug naghinulsol sila ug mibalik ngadto sa Ginoo. Tungod kay wala sila mopili nga magmapainubsanon, sayon kaayo nga nakalimot ang mga tawo sa Ginoo nga ilang Dios hangtud nga nakaamgo sila nga nagkinahanglan gayud sila sa Iyang tabang. Sa Iyang kalooy, gipanton sa Dios ang Iyang katawhan aron sila maghinulsol ug maluwas.

Helaman 11

Ang mga Nephite miagi sa cycle sa pagkamatarung ug pagkadautan

1. Drowinga ang mosunod nga cycle sa pagkamatarung ug pagkadautan diha sa imong scripture study journal. Kini nga cycle sa kasagaran naila nga ang “cycle sa garbo.” Timan-i nga ang ikaupat nga elemento sa cycle wala diha sa diagram. Unsa kaha sa imong hunahuna ang gikinahanglan sa paghaw-as og katawhan gikan sa kalaglagan ug pag-antus ngadto sa pagkamatarung ug kauswagan? Samtang imong tun-an ang Helaman 11, tan-awa ang impormasyon nga makatabang nimo sa pagsulat niini nga lakang diha sa cycle.

   Rightous Cycle

Samtang basahon nimo ang Helaman 10, ang mga tawo dili maminaw sa pulong sa Dios nga gitudlo ni propeta Nephi. Ribyuha ang Helaman 10:18, ug hibaloi kon asa sa imong hunahuna ang mga Nephite diha sa cycle sa garbo nianang higayuna (sa katapusan sa ika-71 nga tuig sa paghari sa mga maghuhukom).

Ang mosunod nga kalihokan sa kasulatan makatabang nimo nga makakita niini nga cycle sa pagkamatarung ug pagkadautan sa mga tawo sa Basahon ni Mormon sa tibuok 14 ka tuig sa ilang kasaysayan. Sa mosunod nga tsart, basaha ang mga pakisayran sa kasulatan gikan sa Helaman 11, pagsulat og mubo nga deskripsyon sa kondisyon sa mga Nephite, ug isulat diha sa mga numero nga magpakita asa nimo kini ibutang diha cycle sa garbo. Duha ka mga ehemplo ang gihatag alang nimo. Tan-awa ang mga pulong nga makatabang nimo sa pagsulat sa nawala nga ikaupat nga lakang diha sa cycle nga imong gidrowing sa imong scripture study journal.

Tuig sa Paghari sa mga Maghuhukom	Helaman 11	Mubo nga Deskripsyon sa Kondisyon sa mga Nephite	Posisyon diha sa Cycle
72–73	mga bersikulo 1–2	Nagkadako ang panagbingkil ug panaggubat; ang tinago nga pundok sa mga tulisan mipahigayon sa buhat sa kalaglagan.	2, 3
73–75	mga bersikulo 3–6
75	mga bersikulo 7, 9–12
76–77	mga bersikulo 17–18, 20–21	Ang mga tawo nagmaya ug naghimaya sa Dios; sila matarung ug miuswag pag-usab.	4, 1
78–79	mga bersikulo 22–23
80	mga bersikulo 24–26
80–81	mga bersikulo 27–30, 32–35
82–85	mga bersikulo 36–37

Sumala sa gipakita sa kalihokan sa kasulatan, ang elemento 4 sa cycle sa garbo mao ang “pagpaubos ug paghinulsol.” Isulat kini sa tsart diha sa imong scripture study journal.

2. Ang cycle sa garbo dili lang repleksyon sa usa ka katilingban. Makita usab kini sa kinabuhi sa usa ka pamilya o sa usa ka indibidwal. Ang pagsabut kon sa unsang paagi kini mahitabo makatabang nato nga makalikay niini. Isulat sa imong scripture study journal unsa sa imong hunahuna ang gikinahanglan aron makalikay ka nga masulod sa “garbo ug pagkadautan” o sa “kalaglagan ug pag-antus” nga mga bahin sa cycle.

Mahimo nimong isulat ang mosunod nga baruganan diha sa imong mga kasulatan sa Helaman 11: Pinaagi sa pagpaubos ug paghinulsol, makalikay kita sa garbo ug kalaglagan. Mahimo nimong markahan ang Helaman 11:4 unsay gilauman ni Nephi nga ikahatag sa kagutom alang sa iyang katawhan.

Hunahunaa ang mga tubag sa mosunod nga mga pangutana:

• Ang katilingban, pamilya, o indibidwal kinahanglan bang mosunod sa cycle sa garbo?

• Unsa sa imong hunahuna ang kinahanglang buhaton katilingban, sa pamilya, o indibidwal aron makalikay nga mahitumpawak sa cycle sa garbo?

Si Elder Richard G. Scott sa Korum sa Napulog Duha ka mga Apostoles misulti sa mosunod kabahin sa pag-ampo ni Nephi: “Ang Ginoo nakadungog sa pangamuyo sa Iyang sulugoon [sa Helaman 11:10–14] ug mihimo nga ang kagutom mohunong, apan sa mosunod nga tuig pa. Kini nga hitabo naghulagway nga ang Ginoo maminaw sa atong mga pangamuyo diha-diha apan motubag dayon kanus-a, diha sa Iyang kaalam, nga kita labing makabenepisyo sa Iyang tubag” (“Nephi, Son of Helaman,” sa Heroes from the Book of Mormon [1995,] 154.)

Si Presidente Ezra Taft Benson mitudlo mahitungod sa unsay atong mabuhat sa paglikay nga mahitumpawak sa cycle sa garbo:

President Ezra Taft Benson

“Ang Dios makabaton og mapainubsanon nga katawhan. Mahimo nga kita mopili ba nga magmapainubsanon o pugson kita nga magmapainubsanon. Miingon si Alma, ‘Bulahan sila kinsa magpaubos sa ilang mga kaugalingon nga wala pugsa sa pagpaubos.’ (Alma 32:16.)

“Pilion nato nga mahimong mapainubsanon.

“Kita makapili nga magmapainubsanon sa atong kaugalingon pinaagi sa pagbuntog sa pagdumot [kasilag] sa atong mga kaigsoonan, itratar sila sama sa pagtratar sa atong kaugalingon, ug ibayaw sila sa sama kataas o mas taas pa kay kanato. …

“Kita makapili nga magmapainubsanon sa atong kaugalingon pinaagi sa pagdawat og tambag ug pagpanton. …

“Kita makapili nga magmapainubsanon sa atong kaugalingon pinaagi sa pagpasaylo niadtong nakasilo kanato. …

“Kita makapili nga magmapainubsanon sa atong kaugalingon pinaagi sa pagserbisyo nga dili maghunahuna og balos. …

“Kita makapili nga magmapainubsanon sa atong kaugalingon pinaagi sa pagmisyon ug pagsangyaw sa pulong nga makapahimo sa uban nga mapainubsanon. …

“Kita makapili nga magmapainubsanon sa atong kaugalingon pinaagi sa pag-adto sa templo kanunay.

“Kita makapili nga magmapainubsanon sa atong kaugalingon pinaagi sa pagkumpisal ug pagbiya sa atong mga sala ug magbag-o diha sa Dios. …

“Kita makapili nga magmapainubsanon sa atong kaugalingon pinaagi sa paghigugma sa Dios, pagtugyan sa atong kabubut-on ngadto sa Iya, ug ibutang Siya og una diha sa atong kinabuhi. …

“Pilion nato nga mahimong mapainubsanon. Kita makahimo niini. Nasayud ko nga makahimo kita” (“Beware of Pride,” Ensign, Mayo 1989, 6–7).

Helaman 12

Gipasabut ni Mormon ngano nga ang Ginoo mopanton sa katawhan

Hunahunaa nga ikaw si propeta Mormon ug nakahuman sa pagsulat sa 14 ka tuig sa kasaysayan sa Nephite nga makita sa Helaman 11. Unsaon nimo sa pagkompleto sa mosunod nga pamahayag: “Ug sa ingon kita makakita .”

Basaha ang Helaman 12:1, ug ilha unsay gusto ni Mormon nga atong makita. Hunahunaa unsa kahay gipasabut ni Mormon sa “pagkadili makanunayon sa mga kasingkasing sa mga katawhan.”

Tun-i ang Helaman 12:2–3, ug ilha ang ubang mga leksyon nga gusto ni Mormon nga atong makat-unan. Bantayi pag-ayo ang mga pulong nga “kita mahimo nga makakita” (bersikulo 2) ug “sa ingon kita makakita” (bersikulo 3).

3. Tubaga ang mosunod nga mga pangutana diha sa imong scripture study journal:

   1. Ngano sa imong hunahuna nga sayon ra kaayo niadtong nagmauswagon sa paghikalimot sa Ginoo?

   2. Unsa nga mga ehemplo sa kasayon ug kauswagan sa atong panahon nga maoy hinungdan nga ang usa ka tawo makalimot sa Dios?

   3. Unsa nga mga sitwasyon ang imong nahibaloan diin ang usa ka tawo o grupo nakalimot sa Ginoo diha sa ilang kauswagan?

Pipila ka mga leksyon nga gusto ni Mormon nga makat-unan sa iyang mga tigbasa mao ang: Kon dili kita magbantay, ang atong kauswagan maoy makaingon nga kita makalimot sa Ginoo, ug ang Ginoo mopanton sa Iyang katawhan aron sila makahinumdom Kaniya.

Elder D. Todd Christofferson

Si Elder D. Todd Christofferson sa Korum sa Napulog Duha ka mga Apostoles mitudlo nganong ang Ginoo mopanton kanato:

“Bisan tuod nga sa kanunay lisud kining antuson, sa pagkatinuod angay kita nga malipay nga ang Dios mikonsiderar kanato nga angayan sa Iyang panahon ug kahasol aron sa pagkorihir kanato.

“Ang balaanon nga pagpanton adunay labing minos tulo ka mga katuyoan: (1) aron sa pag-awhag kanato sa paghinulsol, (2) aron sa paglimpyo ug sa pagbalaan kanato, ug (3) usahay aron sa pagpasubay kanato og balik sa dalan sa kinabuhi sa unsay nahibaloan sa Dios nga mas maayo nga dalan” (“Ako Nagabadlong ug Nagapanton sa Akong Gihigugma,” Ensign o Liahona, Mayo 2011, 98).

Hain niadtong mga katuyoan sa imong hunahuna ang nagpakita sa intensyon sa Ginoo sa pagpanton sa mga Nephite ug mga Lamanite sa Helaman 11–12? Unsa nga mga katuyoan ang Iyang gigamit sa pagpanton sa imong kinabuhi?

4. Tubaga ang mosunod nga mga pangutana diha sa imong scripture study journal:

   1. Basaha ang Helaman 12:4–6, ug pangitaa ang dugang nga mga deskripsyon niadtong nakalimot sa Dios. Unsa ang personal nga mga kinaiya nga makapugong sa mga indibidwal sa paghinumdom sa Dios?

   2. Basaha ang Helaman 12:7–13. Ngano nga si Mormon miingon nga “[ang] mga katawhan … anaa sa ubos nga kahimtang kay sa abug sa yuta”? Unsa ang mabuhat sa abug nga usahay dili andam nga buhaton sa mga tawo?

Si Jehova Milalang sa Yuta

President Joseph Fielding Smith

Si Presidente Joseph Fielding Smith mitudlo: “Karon kini si propeta [Mormon] wala mag-ingon nga ang Ginoo mas dunay dakong pagpakabana ug gugma sa abug sa yuta labaw kay sa iyang mga anak. … Ang punto nga iyang gihimo mao nga ang abug sa yuta masulundon. Kini mosunod bisan asa sumala sa sugo sa Ginoo. Ang tanang mga butang nahiuyon sa iyang mga balaod. Ang tanan sa universe nagsunod sa balaod nga gihatag ngadto niini, sa akong nahibaloan, gawas sa tawo. Bisan asa kamo motan-aw makita ninyo ang balaod ug kahusay, ang mga elemento mosunod sa balaod nga gihatag ngadto niini, matinud-anon sa tawag niini. Apan ang tawo mirebelde, ug niining pagkabutanga ang tawo ubos pa sa abug sa yuta tungod kay iyang gisalikway ang mga tambag sa Ginoo” (sa Conference Report, Abr. 1929, 55).

Nakasabut si Mormon nga ang mga tawo nga mihimo sa Dios nga maoy ilang giya mas labaw pa kay sa abug sa yuta. Ang iyang pagtandi mao ang pagkuha sa atensyon niadtong mapagarbuhon ug misalikway sa tingog sa Ginoo ug kinsa dunay dili makanunayon nga mga kasingkasing. Sumala sa narekord sa Helaman 12:9–20, si Mormon mipahinumdom nato sa dakong gahum sa Ginoo sa pisikal nga mga elemento—kining tanan molihok sumala sa Iyang sugo. Pamalandunga sa makadiyot ang imong kaugalingong pagkamasulundon sa mga sugo sa Ginoo. Sa unsa nga paagi nga ang imong pagkaandam sa pagsunod sa Iyang mga sugo nagpakita og pagkamapainubsanon? Sa unsa nga paagi nga ang paggamit sa atong kabubut-on sa pagsupak sa Iyang mga sugo nagpakita og garbo?

5. Isulat ug humana ang mosunod nga mga pulong diha sa imong scripture study journal:

   1. Ug sa ingon akong nakita sa Helaman 11–12 …

   2. Busa, ako mo …

Kon kita mahinumdom sa Ginoo, maminaw sa Iyang tingog, ug maghinulsol, gipakita nato ang atong pagkamapainubsanon ug ang atong hugot nga pagtuo Kaniya. Sa ingon, tumanon Niya ang Iyang saad nga mopanalangin ug mopauswag nato, sa katapusan mohatag nato og kinabuhing dayon.

6. Isulat ang mosunod nga pahinumdom sa ubos sa mga buluhaton karong adlawa diha sa imong scripture study journal:

   Akong natun-an ang Helaman11–12 ug nahuman kini nga leksyon niadtong (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: