Human marekord ang mga panagna ni Isaias (2 Nephi 12–24), si propeta Nephi mihatag og gibug-aton sa kaimportante niini nga mga panagna ug mipasabut nga kadtong adunay espiritu sa pagpanagna mahimong makasabut ug mohatag og bili sa mga pulong ni Isaias (2 Nephi 25). Mipasabut siya nga ang tuyo sa iyang pagsulat mao ang “pagdasig sa among mga anak, ug usab sa among mga kaigsoonan, sa pagtuo kang Kristo, ug aron makig-uli sa Dios” (2 Nephi 25:23). Gidapit niya ang tanan sa pagtuo kang Jesukristo ug “mosimba kaniya uban sa tanan ninyo nga gahum, hunahuna, ug kusog, ug sa tibuok ninyo nga kalag” (2 Nephi 25:29).
Si Nephi nagtudlo nga makahimo kita sa pagsabut sa mga pulong ni Isaias kon aduna kitay espiritu sa panagna
Imahe
lock and key
Ang mga tawo kasagaran mogamit og mga kandado aron sa pagpanalipud sa bililhong mga kabtangan. Tingali sila ra ang maghupot sa bugtong yawe sa kandado, o tingali ilang hatagan og kopya sa yawe ang usa ka sinaligan nga higala o sakop sa pamilya. Si Nephi nasayud nga ang mga panagna ni Isaias “bililhon kaayo” (2 Nephi 25:8), ug gusto niya nga makasabut ang tanan niini. Mihatag siya og yawe ni bisan kinsa nga gustong moabli sa kahulugan sa mga pulong ni Isaias.
Basaha ang unang sentence sa 2 Nephi 25:4, ug pangitaa ang yawe sa pagsabut sa mga pulong ni Isaias. Unsay gipasabut sa pagbaton sa “espiritu sa panagna”? Sa unsang paagi kaha nga ang espiritu sa panagna makatabang nimo nga mas makasabut sa mga kasulatan, ilabi na sa mga pulong ni Isaias?
Ang espiritu sa panagna nagpasabut ngadto sa espiritu sa pagpadayag. Kini nagpasabut nga kon makugihon ug mainampoon ka nga magtuon sa mga kasulatan ug magtinguha sa pagsabut sa kahulugan niini, makaangkon ka sa espiritu sa pagpadayag, ug ang Espiritu Santo molamdag sa imong hunahuna ug sa imong panabut. Usab, ang mga kasulatan nagtudlo nga “ang pagpanghimatuod ni Jesus mao man ang espiritu sa propesiya” (Pinadayag 19:10). Samtang maglambo ka sa imong kahibalo ug pagpamatuod sa Manluluwas, ang imong pagsabut sa mga kasulatan—lakip ang mga pagtulun-an ni Isaias—motubo ug mas masabtan nimo og maayo kon sa unsang paagi ang mga pagtulun-an may kalabutan kanimo.
Si Nephi mipakigbahin og ubang mga ideya nga makapalambo sa atong pagsabut sa mga pulong ni Isaias. Siksika ang mosunod nga mga kasulatan, ug ilha ang tulo ka dugang nga mga yawe sa pagsabut sa mga pulong ni Isaias:
Hinumdumi nga ang simbolismo ug balaknon nga pinulongan kasagaran nga gigamit sa karaang mga panagna sa mga Judeo (tan-awa sa 2 Nephi 25:1). Usab, ang pagtuon sa kultura, kasaysayan, ug hiyograpiya sa karaang Israel makatabang kanimo nga makasabut sa mga pulong ni Isaias (tan-awa sa 2 Nephi 25:5–6). Ang pagpuyo sa katapusang mga adlaw ug pagkakita sa katumanan sa daghang mga panagna makatabang usab kanato nga makasabut sa Isaias (tan-awa sa 2 Nephi 25:7–8).
Sumala sa narekord sa 2 Nephi 25:9–19, si Nephi nanagna mahitungod sa mga Judeo ug sa ilang yutang natawhan sa Jerusalem ug sa palibut nga mga dapit. Siya miingon nga ang mga Judeo nga gibihag ngadto sa Babelon human sa pagkalaglag sa Jerusalem mobalik ngadto sa “yuta sa ilang kabilin” (tan-awa sa 2 Nephi 25:9–11). Si Jesukristo, ang Mesiyas, mopuyo taliwala kanila, apan daghan ang mosalikway Kaniya ug molansang Kaniya sa krus (tan-awa sa 2 Nephi 25:12–13). Human sa kamatayon ug Pagkabanhaw sa Manluluwas, ang Jerusalem pagalaglagon pag-usab, ug ang mga Judeo pagakatagon ug silotan pinaagi sa uban nga mga nasud (tan-awa sa 2 Nephi 25:14–15). Sa katapusan sila motuo kang Jesukristo ug sa Iyang Pag-ula, ug ang Ginoo mopahiuli kanila “gikan sa ilang pagkawala ug pagkapukan nga kahimtang” (tan-awa sa 2 Nephi 25:16–19).
Hunahunaa kon unsaon nimo pagtubag ang usa ka tawo nga nag-ingon nga ang mga Santos sa Ulahing mga Adlaw wala motuo ni Jesukristo. Samtang magtuon ka sa 2 Nephi 25, pangitaa ang mga tudling nga mahimo nimong ipakigbahin sa ingon nga sitwasyon.
Dalia pagtan-aw ang 2 Nephi 25:20–30, ug ikonsiderar ang pagmarka sa ngalan nga “Kristo” matag higayon nga makita kini.
Basaha ang 2 Nephi 25:28–29, ug hibaloi kon unsa ang gisulti ni Nephi nga “ang matarung nga paagi.” Siksika ang 2 Nephi 25:23–26 alang sa mga rason nganong ang pagtuo kang Jesukristo mao “ang matarung nga paagi.” (Timan-i nga ang 2 Nephi 25:23, 26 usa ka scripture mastery passage. Mahimo nimo kining markahan sa lahi nga paagi aron makit-an nimo kini sa umaabut.) I-rekord ang imong mga tubag diha sa imong scripture study journal.
Ang pulong nga makig-uli sa 2 Nephi 25:23 nagpasabut nga ipahiuyon ngadto sa Dios. Ang “grasya” sa Ginoo sa katapusan mao ang paagi nga mahitabo ang pakig-uli ngadto sa Dios. Basaha ang mosunod nga pagpasabut sa grasya sa Ginoo:
“Ang pulong nga grasya, ingon nga gigamit diha sa mga kasulatan, nagpasabut og una ngadto sa balaanong panabang ug kalig-on nga atong madawat pinaagi sa Pag-ula ni Ginoong Jesukristo. …
Pinaagi sa grasya, nga nahimong magamit pinaagi sa maulaong sakripisyo sa Manluluwas, tanang mga tawo mabanhaw ug makadawat og pagka-imortal. [Apan aron kita mokwalipay alang sa kinabuhing dayon diha sa presensya sa Dios, kinahanglan kitang malimpyuhan gikan sa atong mga sala pinaagi sa Iyang grasya.]
“Ang hugpong sa mga pulong nga ‘human sa tanan nga atong mabuhat’ [2 Nephi 25:23] nagtudlo nga ang paningkamot gikinahanglan sa atong bahin aron makadawat sa kahingpitan sa grasya sa Ginoo ug mahimong takus nga mopuyo uban Kaniya. Ang Ginoo mimando kanato sa pagtuman sa Iyang ebanghelyo, nga naglakip sa pagbaton og hugot nga pagtuo diha Kaniya, paghinulsol sa atong mga sala, pagpabunyag, pagdawat sa gasa sa Espiritu Santo, ug paglahutay hangtud sa katapusan. …
“Agig dugang sa panginahanglan og grasya alang sa imong kaluwasan sa katapusan, nagkinahanglan ka niining makaabag nga gahum matag adlaw sa imong kinabuhi. Samtang magpaduol ka sa imong Langitnong Amahan diha sa kakugi, kamapainubsanon, ug kaaghup, Siya mobayaw ug molig-on kanimo pinaagi sa Iyang grasya” (Matinud-anon sa Tinuhoan: Usa ka Pakisayran sa Ebanghelyo [2004], 43–44).
Sa imong scripture study journal, isulat ang mga tubag sa mosunod nga mga pangutana:
Unsa ang relasyon tali sa grasya sa Ginoo ug sa atong mga paningkamot sa pagsunod sa ebanghelyo?
Unsay kahulugan niini kanimo nga maluwas pinaagi sa grasya?
Unsay kahulugan kanimo sa mga pulong nga “tanan nga atong mabuhat”?
Pamalandungi ang mosunod nga kamatuoran: Tungod ni Jesukristo, mahimo kitang maluwas pinaagi sa grasya human sa tanan nga atong mabuhat. Paghunahuna og higayon sa dihang gibuhat nimo ang tanan nga imong mabuhat ug napanalanginan og balaanong tabang ug kalig-on.
Laing kamatuoran nga gitudlo ni Nephi (tan-awa sa 2 Nephi 25:26) mao ang: Pinaagi sa Pag-ula sa Manluluwas, makadawat kita og kapasayloan sa atong mga sala.
Ikonsiderar ang pagsulat ngadto sa usa ka higala o sakop sa pamilya mahitungod sa imong pagtuo diha ni Jesukristo o pagpamatuod kabahin sa imong pagtuo diha sa miting sa pagpamatuod o uban pang angay nga mga sitwasyon.
Basaha pag-usab ang 2 Nephi 25:26, ug dayon tubaga ang mosunod nga mga pangutana diha sa imong scripture study journal:
Sa unsang mga paagi nga nagsimba o nagtahud ka ni Jesukristo? Unsa nga mga kalihokan ang nagpakita sa uban nga nagtuo ug nagsimba ka ni Jesukristo?
Unsay imong mabuhat aron mas maayo nimong masimba ang Manluluwas uban sa tanan nimong gahum, hunahuna, ug kusog?
Gamita ang mosunod nga format aron sa pagtabang kanimo nga masag-ulo ang 2 Nephi 25:26:
“Ug kami naghisgot kang Kristo,
kami nalipay diha kang Kristo,
kami nagsangyaw kang Kristo,
kami nanagna kang Kristo,
ug kami nagsulat sumala sa among mga panagna,
nga ang among mga anak mahimo nga masayud
sa unsa nga tinubdan sila mahimo nga mangita
alang sa kapasayloan sa ilang mga sala.”
Human balikon ang tudling sa pipila ka higayon, tabuni ang ibabaw nga linya sa imong kamot ug sulayi kini pag-usab. Dayon tabuni ang laing linya, ug ipadayon hangtud nga imong bation nga nasag-ulo na nimo ang tudling.
Imahe
young woman bearing testimony
I-recite ang 2 Nephi 25:26 ngadto sa usa ka sakop sa pamilya, ug isulat nga imo na kining nasag-ulo diha sa imong scripture study journal.
Isulat ang mosunod sa ubos sa mga assignment karong adlawa dilha sa imong scripture study journal:
Akong natun-an ang 2 Nephi 25 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: