Mormon 7:1–8:11

Pasiuna

Human sa katapusang gubat tali sa mga Nephite ug mga Lamanite, si Mormon misulat sa umaabut nga mga kaliwatan sa katawhan sa Basahon ni Mormon bahin sa kaimportante nga masayud kon si kinsa sila ug unsay kinahanglan gayud nilang buhaton aron maluwas. Uban sa dakong gugma alang sa umaabut nga mga kaliwatan sa iyang mga kaaway, si Mormon mitudlo sa kaimportante sa pagsunod sa ebanghelyo ni Jesukristo, nga aron kini “mahimo nga maayo diha kaninyo sa adlaw sa paghukom” (Mormon 7:10). Human namatay si Mormon, nabiyaan si Moroni nga nag-inusara sa pagsulat bahin sa kalaglagan sa iyang katawhan.

Mormon 7

Sa katapusang pagpamatuod ni Mormon, iyang giawhag ang mga kaliwat sa mga Lamanite nga motuo kang Jesukristo ug mosunod sa Iyang ebanghelyo

Nanamilit si Mormon ngadto sa usa ka Kanhi Bantugan nga Nasud

Diha sa Mormon 6 imong nakat-unan nga dunay 230,000 ka Nephite nga mga namatay sa katapusang gubat batok sa mga Lamanite. Hunahunaa nga naluwas ka sa usa ka dakong gubat sama niini, apan ang imong mga higala ug pamilya wala. Unsay imong bation bahin sa mga kaliwatan sa katawhan nga mipatay sa imong mga minahal ug misakop sa inyong nasud? Basaha ang Mormon 7:1–4, ug pangitaa kon unsay gisulat ni Mormon ngadto sa mga kaliwatan sa mga Lamanite.

Tubaga ang mosunod nga mga pangutana diha sa imong scripture study journal:
1. Unsa ang gusto ni Mormon nga mahibaloan sa mga Lamanite ug sa ilang mga kaliwatan?
2. Sa unsang paagi kini matandi kon unsa kaha ang imong bation bahin sa mga kaliwatan sa katawhan nga mipatay sa imong mga higala ug pamilya sa gihunahuna nga sitwasyon?
3. Unsa nga kinaiya sa Manluluwas ang imong nakita sa reaksyon ni Mormon ngadto sa yang mga kaaway?

Mipadayon si Mormon sa pagsulat ngadto sa mga kaliwatan sa mga Lamanite. Basaha ang Mormon 7:5-7, ug markahi ang dili mominos sa tulo ka kamatuoran nga giawhag ni Mormon ngadto sa mga kaliwatan sa mga Lamanite nga tuohan bahin sa Manluluwas, nga si Jesukristo.

Pagpili og usa sa mga kamatuoran bahin ni Jesukristo nga imong natino, ug isulat sa imong scripture study journal kon sa unsang paagi nga ang pagtuo niana nga doktrina nakaapekto sa imong kinabuhi.

Si Mormon mibati tingali nga dunay katarungan sa pagsulat og mga pulong sa pagpanghimaraut ngadto sa mga Lamanite nga mipatay sa daghan kaayo sa iyang katawhan, apan tungod sa iyang kahibalo bahin sa kamatuoran, misulat siya aron sa pagtudlo kanila kon unsay kinahanglan gayud nga buhaton nila (ug nato) aron mahimong walay sala sa atubangan sa hukmanan sa Dios. Basaha ang Mormon 7:8–10, ug hibaloi kon unsay gipamatud-an ni Mormon nga kinahanglang buhaton gayud sa tawo. Mahimo nimong markahan ang unsay imong nahibaloan diha sa imong mga kasulatan.

Kini nga mga bersikulo nagtudlo nga ang Ginoo nagtanyag og kaluwasan sa tanan ug motubos niadtong modawat sa mga baruganan ug mga ordinansa sa Iyang ebanghelyo. Mahimo nimong isulat kining baruganan diha sa imong mga kasulatan. Hibaloi nga nagtudlo si Mormon nga ang paagi nga atong mahibaloan kon unsaon sa pagsunod niining baruganan mao ang pinaagi sa pagtuon sa mga kasulatan (tan-awa sa Mormon 7:8). Mahimong makatabang nga masabtan nga ang mga pulong nga “kini nga talaan” nagpasabut sa Basahon ni Mormon, ug “sa talaan usab nga modangat ngadto sa mga Hentil gikan sa mga Judeo” nagpasabut sa Biblia. Sa samang paagi, ang “niini” sa Mormon 7:9 nagpasabut sa Basahon ni Mormon, ug ang “niana” nagpasabut sa Biblia. Mahimo nimong markahan kini nga mga kalainan diha sa imong mga kasulatan.

Sa imong pagtapos sa Mormon 7, paggahin og panahon sa pagpamalandong sa ehemplo ni Mormon bahin sa gugmang putli ug sa Kristohanong kalooy sa pagsulat sa maong mensahe sa paglaum ug pag-awhag sa mga kaliwatan niadtong higpit niya nga mga kaaway.

Sa imong scripture study journal, irekord ang imong mga hunahuna bahin sa mosunod nga pangutana: Unsaon man nako pagsunod ang ehemplo ni Mormon ug pagtratar sa uban, lakip niadtong tingali dili maayo og tinagdan nako, sa paagi nga mopakita sa ilang mahangturong bili?

Mormon 8:1–11

Nagsulat si Moroni bahin sa kamatayon sa iyang amahan, sa pagkalaglag sa iyang katawhan, ug sa iyang pagpabiling nag-inusara

Hunahunaa ang usa ka panahon sa dihang nag-inusara ka. Unsay imong gibati bahin sa pag-inusara? Hunahunaa nga mag-inusara sulod sa daghang katuigan.

Tan-awa ang mga petsa diha sa mga summary sa kapitulo sa ubos sa mga pahina sa Mormon 7 ug 8. Pila man ka tuig ang milabay tali sa panahon nga gisulat ni Mormon ang iyang katapusang mga pulong diha sa kapitulo 7 ug sa panahon nga nagsugod si Moroni sa pagsulat sa mga palid diha sa kapitulo 8?

Basaha ang Mormon 8:1–2, ug pangitaa kon unsay nahitabo human sa dakong gubat sa Cumorah. Basaha dayon ang Mormon 8:3–9 ug markahi ang mga pulong nga naghulagway sa mga kahimtang ni Moroni human sa pagkalaglag sa iyang katawhan. Pamalandunga kon unsay imong bation kon ikaw anaa sa susama nga mga kahimtang.

Hunahunaa ang usa ka panahon dihang mibati ka nga nag-inusara sa imong mga gituohan o mga sumbanan. Ang imong determinasyon nga mosunod sa Manluluwas ug motuman sa Iyang mga sugo atol nianang panahona milambo ba, mao ra gihapon, o mikunhod? Ngano man?

Tan-awa pag-usab ang Mormon 8:1, 3 aron makita kon unsay gidesisyunang buhaton ni Moroni bisan unsa pa man ang iyang mga kahimtang. Ang ehemplo ni Moroni nagpakita nga bisan kon ikaw nag-inusara, makapili ka nga magpabiling matinud-anon. Mahimo nimong isulat kining kamatuoran diha sa imong mga kasulatan.

Dunay uban diha sa Basahon ni Mormon kinsa, sama ni Moroni, nagpabiling matinud-anon bisan sa panahon nga nag-inusara. Si Abinadi mibarug ug mipamatuod nga nag-inusara atubangan ni Haring Noah ug sa iyang mga pari (tan-awa sa Mosiah 12–17). Si Alma mao lamang ang pari nga mituo sa mga pulong ni Abinadi ug misulay sa pagpanalipod niya (tan-awa sa Mosiah 17:1–4).

Si Elder Richard G. Scott mipakigbahin sa mosunod nga istorya bahin sa usa ka batan-ong lalaki nga mipili nga magmatinud-anon bisan kon nag-inusarang nagbarug:

“Ikonsiderar ang ehemplo [niining] batan-ong lalaki. Sa mga katuigan akong nakita kon giunsa siya pagtudlo sa iyang mga ginikanan gikan sa pagkamasuso ngadto sa dili mapaling-paling nga pagsunod sa mga sugo sa Dios. Pinaagi sa ehemplo ug lagda, sila miamuma niya, uban sa lain pang mga anak, diha sa kamatuoran. Ilang giawhag ang paglambo sa disiplina ug sakripisyo aron makab-ot ang takus nga mga tumong. Kining batan-ong lalaki mipili sa swimming aron masilsil sa iyang kinaiya kadtong mga hiyas. Ang sayo sa buntag nga mga sesyon sa pagpraktis nagkinahanglan og disiplina ug sakripisyo. Sa kadugayan nahimong siyang batid niana nga sport.

“Dayon miabut ang mga hagit—pananglitan, usa ka championship nga sangka sa swimming ang mahitabo og Dominggo. Moapil ba siya? Mangatarungan ba siya og eksepsyon sa iyang lagda nga dili mag-swimming og Dominggo aron tabangan ang iyang team nga makadaug sa championship? Dili, dili siya monunot, bisan ubos sa grabe kaayo nga peer pressure. Gibugal-bugalan siya, gani pisikal nga giabuso Apan wala siya monunot. Ang pagsalikway sa mga higala, ang kaguol, ug ang pressure nagdala og kasubo ug mga luha. Apan wala siya monunot. Nakakat-on siya kon unsay kinahanglan gayud nga masayran sa matag usa kanato, ang katinuod sa tambag ni Pablo ngadto ni Timoteo, “Pagalutuson gayud hinoon ang tanan nga nagatinguha sa diosnon nga pagkinabuhi diha kang Kristo Jesus” (2 Timoteo 3:12). Sulod sa mga katuigan kining makanunayong sumbanan sa matarung nga pagpakabuhi—nga napalambo gikan sa gatusan ka husto nga mga desisyon, ang uban atubangan sa dakong hagit—nakaugmad og kinaiya sa kalig-on ug kapasidad. Karon, isip usa ka misyonaryo, gidayeg siya sa iyang mga kaubanan tungod sa iyang abilidad nga motrabaho, sa iyang kahibalo sa kamatuoran, sa iyang dili mapaling-paling nga debosyon, ug sa iyang determinasyon nga mopakigbahin sa ebanghelo. Ang usa ka tawo nga gisalkway sa una sa iyang mga kaubanan karon tinahud na nga lider sa iyang mga kaubanan (“First Things First,” Ensign, Mayo 2001, 8).

Basaha ang Mormon 8:10–11, ug hibaloi ang usa ka paagi nga gipaluyohan sa Ginoo sila si Moroni ug Mormon (sa wala pa ang iyang kamatayon) panahon sa lisud nga mga kahimtang nga ilang giatubang. Ang mosunod nga pag-awhag ni Presidente Thomas S. Monson makatabang nimo sa imong pagdesisyon nga magpabiling matinud-anon bisan kon nag-inusara ka:

“Sa atong pagpakabuhi matag adlaw, dili kapugngan nga ang atong pagtuo hagiton. Tingali usahay makita nato ang atong kaugalingon nga gilibutan sa uban ug sa gihapon nagbarug nga gamay ra o gani nagbarug nga nag-inusara kabahin sa unsay mahimong dawaton ug unsay dili. Aduna ba kitay moral nga kaisug sa pagbarug nga lig-on alang sa atong mga gituohan, bisan kon ang pagbuhat sa ingon nagkinahanglan nga magbarug kita nga mag-inusara? …

“… Hinaut nga magmaisugon kita ug andam sa pagbarug sa unsay atong gituohan, ug kon kinahanglan kitang magbarug nga mag-inusara diha sa proseso, hinaut nga maisugon nato kanang buhaton, gilig-on sa kahibalo nga sa pagkatinuod wala kita mag-inusara kon magbarug uban sa atong Amahan sa Langit” (“Magmaisugon sa Pagbarug nga Mag-inusara,” Ensign ug Liahona, Nob. 2011, 60, 67).

Sa imong scripture study journal, isulat ang mga tubag sa mosunod nga mga pangutana:
1. Kinsa pa man ang imong nailhan nga usa ka ehemplo sa pagbarug nga matinud-anon bisan kon nagbarug nga nag-inusara?
2. Sa unsang paagi nga ang pamahayag ni Presidente Thomas S. Monson makatabang nimo sa imong pagdesisyon nga magpabiling matinud-anon bisan kon nag-inusara ka:
Isulat ang mosunod diha sa ubos sa mga buluhaton karong adlawa sa imong scripture study journal:

Akong natun-an ang Mormon 7:1–8:11 ug nahuman kini nga leksyon niadtong (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: