Alma 30

Pasiuna

Human sa grabe kaayo nga pakig-away batok sa mga Lamanite, ang kalinaw misanap sa tibuok yuta sa Zarahemla. Taliwala niining kapanahunan sa kalinaw, ang tawo nga ginganlan og Korihor nagsugod sa pagsangyaw nag-ingon nga walay Kristo. Ang sayop niyang mga pagtulun-an naghatud nga ang uban mituo kaniya ngadto sa pagpakasala. Namulong siya batok sa mga lider sa Simbahan, nag-ingon nga nagtudlo sila og “binuang nga mga tradisyon” (Alma 30:27). Si Korihor gidala sa atubangan ni Alma, kinsa mitudlo kaniya nga ang tanang butang nagpamatuod kang Kristo. Sa katapusan, mitug-an si Korihor nga ang iyang mga gibuhat giniyahan sa yawa.

Alma 30:1–29

Si Korihor, ang anti-Kristo, mibugal-bugal sa doktrina ni Kristo

Hunahunaa nga dunay tawo nga miandam og pagkaon para kanimo. Ingon ug lami kining simhuton, apan dihang mikaon ka, nagkasakit ka sa hilabihan. Hunahunaa sa makadiyot sa unsang paagi kaha ang sayop nga mga pagtulun-an tingali susama sa gitanyag nga pagkaon nga daw lamian apan sa tago makahilo diay.

Sa miagi imong gitun-an ang mahitungod sa anti-Kristo nga si Sherem (tan-awa sa Jacob 7) ug si Nehor (tan-awa sa Alma 1). Hinumdumi nga ang usa ka depinisyon sa anti-Kristo mao kini “si bisan kinsa o bisan unsa nga mahasupak sa tinuod nga ebanghelyo sa laraw sa kaluwasan nga sa dayag o sa tinago misupak kang Kristo” (Giya ngadto sa mga Kasulatan, “Anti-Kristo,” scriptures.lds.org). Karon makat-unan nimo ang mahitungod sa laing tawo kinsa kaaway ni Kristo ug kansang sayop nga mga pagtulun-an milingla sa uban ug midala nila sa pagpakasala. Daghan sa kalibutan karon mihimo og mga argumento nga susama kang Korihor nga mibatok niadtong mga namahayag nga mituo sa Dios.

Si Korihor nagsugod sa pagsangyaw sa mga Nephite. Basaha ang Alma 30:6, 12, ug pangitaa ang hugpong sa mga pulong nga nagpasabut nga si Korihor usa ka anti-Kristo.

Basaha ang Alma 30:12–18, ug itugma ang sayop nga mga pagtulun-an sa unsay ipasabut niini.

Pipila ka mga Pagtulun-an ni Korihor, nga Anti-Kristo	Posibling mga Interpretasyon ug may Kalabutan sa Sayop nga mga Pagtulun-an
Alma 30:13–14	Gawas kon ikaw dunay pisikal nga ebidensya sa relihiyusong kamatuoran, dili ka angayang motuo ni Jesukristo o sa Iyang ebanghelyo. Walay butang nga gitawag og personal nga pagpadayag pinaagi sa Espiritu Santo.
Alma 30:15	Walay butang nga gitawag og sala. Walay kinatibuk-ang sumbanan kon unsa ang sakto o unsay sayop.
Alma 30:16	Ang mga tawo mouswag pinaagi lang sa kaugalingon nilang mga paningkamot. Wala kinahanglana ang Dios sa mga kalihokan sa tawo.
Alma 30:17 (“ang matag tawo makasinati …”)	Ang pulong sa mga propeta ug sa mga kasulatan dili tinuod, mao nga dili angay nga tuohan nimo kini nga mga panagna.
Alma 30:17 (“bisan unsa ang buhaton sa tawo …”)	Walay butang nga giingon nga paglimpyo sa mga sala. Wala kinahanglana ang pagtinguha og tabang pinaagi sa Pag-ula tungod kay walay butang nga gitawag og Pag-ula.
Alma 30:18	Walay kinabuhi human sa kamatayon, mao nga walay angayang kabalak-an mahitungod sa paghukom human niining kinabuhia.

(Ang mga tubag niining matching exercise anaa dapit sa katapusan niini nga leksyon.)

Ang Alma 30:18 nagtudlo sa baruganan nga: Gamiton ni Satanas ang sayop nga mga doktrina aron sa pag-agni kanato sa pagpakasala.

Si Presidente Boyd K. Packer, Presidente sa Korum sa Napulog Duha ka mga Apostoles, mitudlo:

Imahe

President Boyd K. Packer

“Ang atong kinaiya wala kontrolaha sa hingpit sa natural nga mga tinguha. Ang kinaiya nagsugod usab sa unsay gituohan.

“Ang mga gituohan mamugna gikan sa mga pilisopiya, o mga doktrina. Ang mga doktrina mamahimong espiritwal o sekular, maayo o makadaot, sakto o sayop. …

“Ang tinuod nga doktrina, kon masabtan, mopausab sa mga kinaiya ug pamatasan” (“Little Children,” Ensign, Nob. 1986, 17).

Pagpili og duha o mas daghan nga sayop nga mga pagtulun-an ni Korihor nga gilista diha sa tsart nga matching exercise. Sa imong scripture study journal, isulat unsa ang tinuod nga mga doktrina ug isulti sa unsang paagi ang pagkahibalo sa kamatuoran makaapekto sa imong mga kinaiya ug batasan.

Human sa iyang kalampusan sa yuta sa Zarahemla, si Korihor miadto sa yuta sa Jershon sa pagsangyaw sa katawhan ni Ammon. Basaha ang Alma 30:19–20, ug hibaloi kon gidawat ba nila ang iyang sayop nga mga pagtulun-an.

Ang katawhan ni Ammon “labaw pa nga maalamon kay sa kadaghanan sa mga Nephite” ug “siya kinahanglan dad-on gawas sa yuta” (Alma 30:20–21). Gikan sa unsay imong nakat-unan mahitungod sa katawhan ni Ammon, ngano kaha nga wala man sila motuo sa mga pagtulun-an ni Korihor?

Ang Alma 30:21–29 naghisgot sa unsang paagi si Korihor miadto sa yuta sa Gideon, “ug dinhi siya wala makaangkon og daghan nga kalampusan” (Alma 30:21). Ang pipila sa mga argumento ni Korihor batok sa Simbahan ug sa mga pagtulun-an niini makita sa Alma 30:24, 27, diin ang duha mao kini: (1) kadtong motuo sa Dios anaa sa pagkaulipon ug (2) ang relihiyon motangtang sa mga kagawasan. Kini nga mga argumento gigamit gihapon sa mga kaatbang nga relihiyon karon.

Si Presidente Henry B. Eyring sa Unang Kapangulohan mitudlo nga ang atong hugot nga pagtuo sa Dios naghatag kanato og kagawasan: “Nakiglalis si Korihor, sama sa gilalisan sa mga kalalakin-an ug mga kababayen-an sa sayop nga paagi sa pagsugod sa panahon, nga ang pagsunod sa tambag nga gikan sa mga sulugoon sa Dios mao ang pagtahan sa hinatag sa Dios nga katungod sa pagkagawasnon. Apan ang gilalisan sayop tungod kay dili ensakto ang pagpasabut niini sa reyalidad. Kon atong isalikway ang tambag nga gikan sa Dios, wala kita mopili nga mahimong gawasnon sa impluwensya sa gawas. Mipili kita og laing impluwensya. Atong gisalikway ang proteksyon sa usa ka hingpit, mahigugmaon, makagagahum sa tanan, maalamon nga Amahan sa Langit, kansang kinatibuk-ang katuyoan, sama sa Iyang Hinigugmang Anak, mao ang paghatag og kinabuhing dayon, paghatag sa tanan nga anaa Kaniya, ug pagdala kanato balik sa panimalay diha sa mga pamilya sa mga bukton sa Iyang gugma. Sa pagsalikway sa Iyang tambag, gipili nato ang impluwensya sa laing gahum, kansang katuyoan mao ang paghimo kanato nga alaot ug kansang tinguha mao ang kapungot. Aduna kitay moral nga kabubut-on isip gasa sa Dios. Kay sa katungod sa pagpili aron mahimong gawasnon sa impluwensya, usa ka hinatag sa Dios nga katungod ang pagtugyan sa atong kaugalingon sa bisan asa niana nga gahum ang atong pilion” (“Finding Safety in Counsel,” Ensign, Mayo 1997, 25).

Isulat sa imong scripture study journal kon unsay imong irekomendar nga buhaton sa usa ka tawo aron maproteksyunan ang iyang kaugalingon nga tuohan ang sayop nga mga doktrina sama sa gitudlo ni Korihor.

Alma 30:30–60

Si Korihor midemanda og usa ka timailhan gikan ni Alma ug siya naamang pinaagi sa gahum sa Dios

Sa katapusan, si Korihor gidala sa atubangan ni Alma. Basaha ang Alma 30:30–31, ug tan-awa ang mga akusasyon nga gihimo ni Korihor batok ni Alma ug sa ubang mga lider sa Simbahan. Ang “pagpatagbaw sa mga kaugalingon diha sa mga kahago niini nga mga katawhan” nagsugyot nga si Alma ug ang uban nangahimong adunahan tungod sa ilang pagserbisyo sa Simbahan. Hunahunaa ang tubag sa mosunod nga mga pangutana:

Gikan sa imong kasinatian uban sa imong mga lider sa Simbahan, nganong sayop man kini nga mga akusasyon?
Sa unsang paagi kaha nimo tubagon ang mga akusasyon ni Korihor kon ikaw pa si Alma?

Basaha ang Alma 30:32–35, ug hibaloi ang tubag ni Alma kang Korihor. Hunahunaa kon sa unsang paagi nimo nakita ang pagkatinuod sa mga tubag ni Alma sa kinabuhi niadtong nangulo sa imong ward o branch o ubang mga miyembro sa Simbahan nga imong ginadayeg.

Kon mahimo, dapita ang usa ka higala o sakop sa pamilya sa pagbasa sa Alma 30:37–45 dungan nimo. Ang usa ninyo mobasa sa mga pulong ni Alma, ug ang usa sa mga pulong ni Korihor. Samtang magbasa kamong duha, pangitaa unsay gisulti ni Alma isip ebidensya sa pagkaadunay Dios. (Kon walay tawo nga ikauban nimo sa pagbasa, hunahunaa ang pagtinubagay tali sa duha ka tawo samtang magbasa ka.)

Kompletuha ang mosunod nga mga assignment diha sa imong scripture study journal:
1. Isulat kon asa niini nga ebidensya ang gisulti ni Alma ang makahuluganon kaayo nga saksi diha nimo kabahin sa pagkaanaa sa Dios ug ngano nga usa man kini ka lig-on nga saksi sa Iyang pagkaanaa.
2. Pagsulat og pinakaminos tulo ka laing mga ebidensya nga imong nakita sa kinabuhi nga “nagpakita nga adunay Dios” (Alma 30:44), ug ipasabut sa minubo nga paagi sa unsang paagi ang matag usa nakalig-on sa imong pagtuo sa Dios.

Ang usa ka doktrina nga anaa sa mga bersikulo nga imong gitun-an mao: Ang tanang butang nagpamatuod mahitungod sa Dios isip Gamhanang Tiglalang. Hunahunaa kon unsay mahitabo sa imong pagtuo kon pilion nimo ang pagpangita ug paghinumdom niini nga mga saksi ug mga pagpamatuod.

Timan-i kon unsay gihimo sa propeta nga si Alma dihang gitubag niya si Korihor: iyang gikorihian ang sayop nga mga pagtulun-an (tan-awa sa Alma 30:32–35), mipamatuod siya sa kamatuoran (tan-awa sa Alma 30:37–39), iyang gibalhin ang responsibilidad sa pagprubar ngadto kang Korihor (tan-awa sa Alma 30:40–42), ug mihatag siya og mga ebidensya sa pagkaanaay Dios (tan-awa sa Alma 30:44). Unsa ang imong makat-unan gikan sa ehemplo ni Alma kon unsaon sa pag-atubang ang sama niadto nga lantugi batok sa kamatuoran?

Imahe

Elder Jeffrey R. Holland

Usahay ang bugtong natong ikadepensa batok sa mga tawo nga miatake sa atong pagtuo mao ang pagpaambit sa atong pagpamatuod sa kamatuoran. Dili ikaulaw ang paghimo niining paagiha—si Alma, nga propeta sa Dios, migamit niini ngadto kang Korihor. Sumala sa gipasabut ni Elder Jeffrey R. Holland nga sakop sa Korum sa Napulog Duha ka mga Apostoles: “Ang mga punto ni Korihor susama ra kaayo sa modernong mga tigbasa, apan si Alma migamit og walay katapusan ug dili malalis nga hinagiban sa pagtubag—ang gahum sa personal nga pagpamatuod” (Christ and the New Covenant [1997], 121).

Imahe

Alma and Korihor

Bisan sa daghang mga ebidensya, o timailhan, nga gipaambit ni Alma kang Korihor sa pagprubar sa pagkaadunay Dios, nangayo pa og laing timailhan si Korihor ug siya naamang (buot ipasabut dili na siya kasulti; tan-awa sa Alma 30:45–50). Basaha ang Alma 30:51–53, nga mangita kon nganong si Korihor miingon man nga gitudlo niya unsay iyang gibuhat.

Dihang si Korihor dili na makatudlo sa sayop nga mga doktrina, iyang giangkon nga nagtudlo siya og sayop nga mga ideya “tungod kay [kini] nakapahimuot ngadto sa kalibutanon nga hunahuna” (Alma 30:53). Ang pagbaton og “kalibutanon nga hunahuna” nagpasabut sa pagtutok sa kalibutanong mga kalingawan o katagbawan sa gana sa lawas. Kadtong mga mituo sa mga pagtulun-an ni Korihor nagtuo nga makapatuyang ra sila sa lawasnong kalingawan ug materyal nga mga butang ug walay mga sangputanan. Kini nga mga ideya mosangput ngadto sa usa ka kinabuhi sa pagpakasala (tan-awa sa Alma 30:18).

Ang Alma 30:54–59 nag-ingon nga gipalayas si Korihor, naglibut-libut gikan sa usa ka balay ngadto sa laing balay nagpakilimos og pagkaon, ug sa kadugayan gitunubtunuban hangtud nga siya namatay. Basaha ang Alma 30:60, ug pangitaa ang importante nga kamatuoran sa unsay mahitabo sa katapusan niadtong kinsa mopili sa pagsunod kang Satanas. Markahi ang mosunod nga mga pulong diha sa imong mga kasulatan: “Ang yawa dili mobulig sa iyang mga anak [iyang mga sumusunod] sa katapusan nga adlaw.” (Niini nga bersikulo, ang mga anak nagpasabut nga mga sumusunod.)

Tubaga ang mosunod nga mga pangutana diha sa imong scripture study journal:
1. Sa unsang paagi ang kamatuoran nga imong gimarkahan diha sa Alma 30:60 makita sa kinabuhi ni Korihor?
2. Ikumpara ang Alma 30:60 ngadto sa Alma 36:3. Unsa nga ebidensya ang imong nakita sa imong kinabuhi o sa kinabuhi sa uban nga nagpakita nga ang Dios padayon nga mosuporta niadtong kinsa maningkamot sa pagsunod sa Iyang mga sugo?

Ribyuha ang tinuod nga mga baruganan ug mga doktrina nga imong natun-an karon. Hunahunaa ang mga paagi diin imong malikayan ang pagkalingla sa sayop nga mga pagtulun-an, sama sa gitudlo ni Korihor.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Alma 30 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: