Unit 11: Day 3

Mosiah 4

Pasiuna

Ang mga pagtulun-an ni Haring Benjamin adunay dakong epekto sa mga tawo nga nakadungog kaniya. Kining mga tawhana mipakita og hugot nga pagtuo sa Pag-ula, naghinulsol, ug nakadawat og kapasayloan sa ilang mga sala. Si Haring Benjamin mitudlo dayon kanila kon unsay kinahanglan nilang buhaton aron makabaton og kapasayloan sa ilang mga sala. Mipahayag siya nga sama kita sa mga makililimos tungod kay hingpit kita nga nagsalig sa Dios alang sa atong kaluwasan. Si Haring Benjamin mipasidaan nga kinahanglang magbantay kita sa kanunay sa atong mga hunahuna, mga buhat, ug mga lihok.

Mosiah 4:1–8

Ang pundok sa katawhan nadaog sa Espiritu ug nakadawat og kapasayloan sa ilang mga sala

Hunahunaa nga ang usa ka higala nangutana, Unsaon nako pagkahibalo nga ako napasaylo na sa usa ka partikular nga sala? Unsaon nimo sa pagtubag?

Tun-i ang Mosiah 4:1–3, ug pangita og mga ideya nga makatabang kanimo sa pagtubag sa pangutana sa imong higala. Isulat kon unsaon nimo sa pagtubag:

Usa sa mga baruganan nga gitudlo niini nga mga bersikulo mao kini: Samtang mopakita kita og hugot nga pagtuo kang Jesukristo ug sinsero nga maghinulsol, makadawat kita og kapasayloan sa atong mga sala. Ang ingon nga paghinulsol usa ka importanting elemento sa pag-angkon og kalipay ug kalinaw sa tanlag.

Kasagaran, kon dunay tawo nga mangutana kanato gusto kitang mohatag og tubag. Niining higayona, samtang naghunahuna ka kon unsaon sa pagtubag ang pangutana sa imong higala, hunahunaa kon sa unsang paagi imong matubag ang pangutana pinaagi sa usa ka pangutana. Pamalandungi ang Mosiah 4:1–3 ug ang mosunod nga pamahayag ni Elder F. Burton Howard, usa ka emeritus nga sakop sa Seventy: “Kon hingpit kamo nga naghinulsol, mobati kamo og kalinaw sa sulod. Mahibaloan ra ninyo nga gipasaylo kamo tungod kay ang palas-anon nga dugay na ninyong gidala-dala, kalit lang nga mawala. Kini mawala na ug makahibalo kamo nga kini nawala na” (“Repentance,” Ensign, Mayo 1983, 59).

Paghunahuna og usa ka pangutana nga mahimo nimong ipangutana sa imong higala aron matabangan siya sa pagdiskubre kon unsaon nato sa pagkasayud nga kita napasaylo.

Tingali makatabang ang pagsabut sa duha ka mga termino diha sa Mosiah 4:1–3 samtang naghunahuna ka og usa ka pangutana. Ang pagtan-aw sa atong mga kaugalingon diha sa atong “kalibutanon nga kahimtang” nagpasabut sa pag-ila sa atong napukan o yutan-on nga kahimtang. Ang pagtan-aw sa atong mga kaugalingon nga “gani ubos kay sa abug sa yuta” nagpasabut nga ang abug sa yuta masulundon sa mga sugo sa Dios (tan-awa sa Helaman 12:7–8), apan ang mga anak sa Dios dili kanunay nga masulundon sa Iyang mga sugo.

Usa ka ehemplo sa pagtubag sa pangutana sa imong higala pinaagi sa usa ka pangutana mao ang: Mibati ka ba og kalinaw sa konsensya kon maghunahuna ka nga nakahinulsol na sa imong mga sala? Napuno ka ba sa kalipay?

1. Tubaga ang mosunod nga mga pangutana diha sa imong scripture study journal:

   1. Ang katawhan ni Haring Benjamin gipasaylo tungod sa “naghingapin nga hugot nga pagtuo diin sila aduna diha kang Jesukristo” (Mosiah 4:3). Unsa nga mga lihok nga girekord diha sa Mosiah 4:1–2 ang nagpakita sa ilang hugot nga pagtuo? Unsa nga mga kinaiya ug mga pagbati ang angay nimong batunan nga susama sa katawhan ni Mosiah?

   2. Sa unsang paagi nimo mapakita ang imong hugot nga pagtuo kang Jesukristo samtang nagtinguha ka og kapasayloan sa imong mga sala?

Human makasaksi sa mahinulsulon nga mga kinaiya sa iyang katawhan, si Haring Benjamin mitudlo kanila sa pipila sa mga butang nga kinahanglan nilang buhaton aron makaangkon og kaluwasan. Samtang imong basahon ang Mosiah 4:4–8, pangitaa ang unsay kinahanglan natong buhaton aron makadawat og kaluwasan.

Ipasabut o paghatag og mga ehemplo kon giunsa nimo pagpaningkamot sa pagbuhat sa mga butang nga gihulagway ni Haring Benjamin:

“Magbutang sa [imong] pagsalig diha sa Ginoo”:

“Kinahanglan magmakugihon sa paghupot sa iyang mga sugo”:

“Magpadayon diha sa hugot nga pagtuo bisan ngadto sa katapusan sa [imong] kinabuhi”:

Mosiah 4:9–30

Si Haring Benjamin nagtudlo kon unsaon sa pagbaton og kapasayloan sa mga sala

Human makadawat ang mga Nephite og kapasayloan sa ilang mga sala, si Haring Benjamin mitudlo kanila kon unsaon sa pagbaton (o sa pagpadayon) nianang limpyo ug putli nga kahimtang. Siksika ang Mosiah 4:9–11, 26, 28, 30, nga mangita kon unsay kinahanglan natong tuohan ug buhaton aron makabaton og kapasayloan sa atong mga sala. Irekord ang imong madiskubrihan sa mosunod nga tsart:

Pagbaton og Kapasayloan sa mga Sala
Motuo	Mobuhat

Si Haring Benjamin mitudlo sa iyang katawhan og daghang mga butang, sumala sa narekord sa Mosiah 4:9–30, apan usa sa labing importante nga mga baruganan nga gitudlo niya mao: Kon magmapainubsanon kita atubangan sa Dios ug maningkamot sa pagpalambo og Kristohanong mga hiyas, makabaton kita og kapasayloan sa atong mga sala.

2. Si Haring Benjamin mitudlo nga kinahanglan kitang “[mo]tuo sa Dios” (Mosiah 4:9) ug sa kanunay mohinumdom sa “pagkahalangdon sa Dios” (Mosiah 4:11). Sa imong scripture study journal, ihulagway kon unsa nga mga kasinatian nimo ug sa imong kaila nga nakatabang nimo nga makaamgo nga ang Dios tinuod, nga Siya gamhanan, ug nga Siya nahigugma kanimo. Nganong importante kaha nga makasabut ug mohinumdom sa gahum, kaayo, ug gugma sa Dios? Kon mohinumdom ka niining mga butanga, sa unsang paagi kini makaapekto sa imong kinabuhi?

Gihulagway ni Haring Benjamin ang mga buhat sa mga tawo nga naningkamot sa pagbaton og kapasayloan sa ilang mga sala. Tun-i ang Mosiah 4:12–16 aron makat-on sa mga buhat nga gihulagway ni Haring Benjamin. (Ang pulong nga panabang sa Mosiah 4:16 nagpasabut sa paghatag og kahupayan o tabang sa panahon sa panginahanglan.)

3. Sa imong scripture study journal, isulat kon sa unsang paagi ang mga buhat nga gihulagway ni Haring Benjamin nagpakita nga ang usa ka tawo naningkamot sa pagbaton og kapasayloan sa iyang mga sala. Makalista ka ba og pipila sa uban pang mga lihok nga magpakita nga ang usa ka tawo naningkamot nga magbaton og kapasayloan sa mga sala? Paglista og usa o mas daghang mga paagi nga nakahatag ka og panabang niadtong nanginahanglan.

Gitandi ni Haring Benjamin ang matag usa kanato ngadto sa usa ka makililimos, kay ang matag usa kanato hingpit nga nagsalig diha sa Dios sa tanan nga anaa kanato. Kini nga sambingay makatabang kanato nga magmapasalamaton sa mga panalangin nga atong nadawat gikan sa Ginoo. Basaha ang Mosiah 4:19–21, nga mangita kon sa unsang paagi ang matag usa kanato sama sa usa ka makililimos diha sa panan-aw sa Dios.

Hunahunaa ang imong pagsalig diha sa Dios. Unsa ang usa ka panalangin nga imong mapasalamatan ang Langitnong Amahan niini nga higayon?

Human motudlo nga kanunay kitang nagkinahanglan og tabang gikan sa Dios, si Haring Benjamin mihangyo kanato sa paghunahuna kon unsaon nato pagtratar kadtong mangayo kanato og tabang. Tun-i ang Mosiah 4:26–27, nga mangita kon unsaon nato sa pagtratar niadtong nanginahanglan.

4. Sa imong scripture study journal, i-rekord ang imong tubag sa mosunod nga pangutana: Sa unsang paagi ang paghinumdom sa mga pagtulun-an ni Haring Benjamin diha sa Mosiah 4 makatabang kanimo nga mahimong mas maloloy-on niadtong anaa sa espiritwal o temporal nga panginahanglan?

5. Gahini kadiyot og panahon ang pagpamalandong sa mga kasulatan nga imong natun-an karon. Mibati ka ba og impresyon gikan sa Espiritu Santo mahitungod sa unsay angay nimong buhaton, base sa unsay imong nakat-unan gikan sa mga pagtulun-an ni Haring Benjamin? Isulat kini nga impresyon diha sa imong scripture study journal.

Pagsulat sa mga Impresyon nga Imong Madawat

Si Elder Richard G. Scott sa Korum sa Napulog Duha ka mga Apostoles miawhag kanato sa pagsulat sa mga impresyon nga atong nadawat, “Isulat diha sa usa ka luwas nga dapit ang importanting mga butang nga inyong nakat-unan gikan sa Espiritu. Inyong makaplagan nga samtang magsulat kamo sa bililhon nga mga impresyon, kasagaran adunay daghan pa nga moabut. Usab, ang kasayuran nga inyong naangkon maanaa sa tibuok ninyong kinabuhi. Kanunay, sa adlaw o gabii, bisan asa man kamo, bisan unsay inyong gibuhat, tinguhaa ang pag-ila ug pagtubag sa paggiya sa Espiritu” (“To Acquire Knowledge and the Strength to Use It Wisely,” Ensign, Hunyo 2002, 32).

Hinumdumi nga ang Ginoo adunay dakong gugma alang kanimo. Samtang maghinulsol ka sa bisan unsang sayop nga binuhatan ug mobuhat sa imong pinakamaayo sa pagsunod sa ehemplo sa Manluluwas, makabaton ka og kapasayloan sa imong mga sala.

Scripture Mastery—Mosiah 4:30

Basaha og kusog ang Mosiah 4:30. Unsay relasyon tali sa imong mga hunahuna, imong mga pulong, ug imong mga buhat?

Si Presidente Ezra Taft Benson mihulagway niini nga relasyon: “Paghunahuna og limpyo nga mga hunahuna. Kadtong naghunahuna og limpyo nga mga panghunahuna dili mobuhat og mga hugaw. Responsable kamo sa atubangan sa Dios dili lamang sa inyong mga buhat apan usab sa pagkontrolar sa inyong mga hunahuna. … Ang karaan nga panultihon tinuod gihapon nga mopugas kamo og mga hunahuna ug moani kamo og mga buhat, mopugas kamo og mga buhat ug moani kamo og mga batasan, mopugas kamo og mga batasan ug moani kamo og kinaiya, ug ang inyong kinaiya motino sa inyong mahangturong padulngan. ‘Kay maingon nga ang tawo nagahunahuna, sa ingon niana mao man siya.’ (Tan-awa sa Prov. 23:7.) (sa Conference Report, Okt. 1964, 60).

6. Samtang nagkat-on ka sa pagkontrolar sa imong mga hunahuna, imong anihon ang panalangin sa pagkahimong mas sama kang Kristo sa imong mga pulong ug mga lihok. Sa imong scripture study journal, pagsulat og usa o daghan pa nga mga paagi diin imong makontrolar ang imong mga hunahuna ug mapabilin kini nga mas sama kang Kristo.

7. Isulat ang mosunod diha ubos sa mga assignment karong adlawa diha sa imong scripture study journal:

   Akong natun-an ang Mosiah 4 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: