Unit 32: Day 4

Moroni 10:8–26, 30–34

Pasiuna

Human matudlo kon unsaon pagbaton og pagsaksi bahin sa kamatuoran sa tanang mga butang pinaagi sa Espiritu Santo, giawhag ni Moroni kadtong makabasa sa iyang mga pulong sa pag-ila ug pagdawat sa espirituhanong mga gasa. Gitapos ni Moroni ang rekord sa Basahon ni Mormon pinaagi sa pag-awhag sa tanang katawhan nga moduol ngadto kang Jesukristo, maghupot sa matag maayo nga gasa nga Iyang gitanyag, ug mahingpit pinaagi Kaniya.

Moroni 10:8–26

Nagtudlo si Moroni bahin sa mga gasa sa Espiritu ug sa katuyoan niini diha sa buhat sa Ginoo

Paghunahuna og higayon sa dihang gipanalanginan ka sa Langitnong Amahan nga makabuhat og butang nga wala unta nimo mabuhat kon ikaw ra. Sa iyang panapos nga kapitulo, nagpamatuod si Moroni bahin sa tabang ug kalig-on nga ihatag sa Ginoo kanato. Basaha ang Moroni 10:8, ug pangitaa ang mga pulong nga naghulagway sa espirituhanong mga abilidad o mga panalangin nga ihatag sa Langitnong Amahan sa Iyang matinud-anon nga mga anak.

Ang “mga gasa sa Dios” nga gihisgutan ni Moroni diha sa Moroni 10:8 nagpasabut usab isip “mga gasa sa Espiritu” o “espirituhanong mga gasa.” Mahimo nimong markahan ang mga pulong nga “mga gasa sa Dios” diha imong mga kasulatan. Isulat ang mosunod nga kamatuoran diha sa imong mga kasulatan tupad sa Moroni 10:8: Gihatag sa Dios ang mga gasa sa Espiritu aron makaayo sa Iyang mga anak. Ang mga pulong nga “makaayo sa Iyang mga anak” nagpasabut nga makabenepisyo o makaserbisyo sa Iyang mga anak.

Basaha ang Moroni 10:9–16, ug markahi ang matag usa sa espirituhanong gasa nga gihisgutan ni Moroni. Importante nga masayud nga ang espirituhanong mga gasa nga gihisgutan ni Moroni pipila lang ka ehemplo sa daghang espirituhanong mga gasa nga anaa. Si Elder Marvin J. Ashton sa Korum sa Napulog Duha ka mga Apostoles nagtudlo nga ang “Dios mihatag sa matag usa kanato og usa o dugang pa nga espesyal nga mga talento”:

Elder Marvin J. Ashton

“Usa sa mga trahedya sa kinabuhi, para nako, mao ang higayon nga ang tawo moisip sa iyang kaugalingon nga usa ka tawo nga walay mga talento o mga gasa. … Kon kita mosulti nga kita walay mga gasa kon hukman nato ang atong kaugalingon pinaagi sa kahimtang, salabutan, grado, katigayunan, gahum, posisyon, o sa makita sa gawas dili lamang ingon nga dili makiangayon apan dili makatarunganon. …

“… Sa walay paghan-ay, tuguti ko nga maghisgot og pipila sa mga gasa nga dili kanunayng makita o mabantayan apan importante kaayo. Apil niini tingali ang inyong mga gasa—mga gasa nga dili makita apan bisan pa niana kini tinuod ug bililhon.

“Atong ribyuhon ang pipila niining dili kaayo makita nga mga gasa: ang gasa sa pagpangutana; ang gasa sa pagpaminaw; ang gasa sa pagkadungog ug paggamit sa hinay, hinagawhaw nga tingog; ang gasa nga makahimo sa pagbakho; ang gasa sa paglikay sa panaglalis; ang gasa nga dali rang mouyon; ang gasa sa paglikay sa kawang nga pagbalik-balik; ang gasa sa pagpangita asa ang matarung; ang gasa nga dili dayon mohukom; ang gasa sa pagpangayo sa Dios og giya; ang gasa sa pagkadisipulo; ang gasa sa pag-amuma sa uban; ang gasa nga makahimo sa pagpamalandong; ang gasa sa paghalad og pag-ampo; ang gasa sa paghatag og makapatandog nga pagpamatuod; ug ang gasa sa pagkadawat sa Espiritu Santo.

“Kinahanglan gayud natong hinumduman nga ngadto sa matag tawo gihatag ang usa ka gasa pinaagi sa Espiritu sa Dios [tan-awa sa D&P 46:11–12]. Kini atong katungod ug responsibilidad ang pagdawat sa atong mga gasa ug pagpakigbahin niini. Ang mga gasa ug mga gahum sa Dios anaa alang kanatong tanan” (“There Are Many Gifts,” Ensign, Nob. 1987, 20).

Basaha ang Moroni 10:17, ug hinumdumi ang pagtulun-an ni Moroni nga ang matag matinud-anong miyembro sa Simbahan dunay dili mominos sa usa ka espirituhanong gasa (tan-awa usab sa D&P 46:11). Si Elder Robert D. Hales sa Korum sa Napulog Duha ka mga Apostoles nagtudlo nga “ang mga gasa sa Espiritu … makatabang sa matag usa kanato nga makab-ot ang atong tumong sa kinabuhing dayon.

Elder Robert D. Hales

“Kining mga gasa sa Espiritu nalangkob sa gasa sa Espiritu Santo. Ang Espiritu Santo mao ang ikatulong sakop sa mahangturong Dios nga Kapangulohan ug nailhan isip ang Balaang Espiritu. Kining Balaang Espiritu usa ka gasa gikan sa Dios aron pagtabang kanato nga makahimo og mga desisyon nga motugot kanato nga makita ug matuman ang atong misyon. …

“Niining ulahing mga adlaw, ang pagsabut bahin sa mga gasa sa Espiritu gihatag kanato pinaagi sa pagpadayag sumala sa narekord diha sa seksyon 46 sa Doktrina ug mga Pakigsaad. Ang seksyon 46 miila sa piho nga mga gasa sa Espiritu sama sa mosunod:

“‘Kay dili tanan aduna sa matag gasa nga ihatag ngadto kanila; kay adunay daghan nga mga gasa, ug ngadto sa matag tawo gihatag ang usa ka gasa pinaagi sa Espiritu sa Dios’ (b. 11).

“Klaro kitang gitudloan nga ang matag usa kanato gihatagan og gasa o mga gasa. Nahibalo ba kita unsa nga gasa ang gihatag kanato? Naninguha ba kita aron makita ang atong mga gasa?” (“Gifts of the Spirit,” Ensign, Peb. 2002, 12).

1. Hunahunaa ang espirituhanong mga gasa nga imong nadawat gikan sa Dios, ug dayon tubaga ang duha o tanan sa mosunod nga mga pangutana diha sa imong scripture study journal:

   1. Sa unsang paagi ka nakadawat og kaayohan gikan sa mga gasa sa Espiritu nga imong nadawat?

   2. Unsa nga mga ehemplo sa espirituhanong mga gasa ang imong nakita sa Simbahan karon?

   3. Unsaon man nimo paggamit ang imong espirituhanong mga gasa aron mapanalanginan ang mga kinabuhi sa uban? Sa unsang paagi nga napanalanginan ang imong kinabuhi pinaagi sa mga gasa sa uban?

Ikonsiderar kon sa unsang paagi nga ang espirituhanong mga gasa klaro diha sa pag-abut sa Basahon ni Mormon? Sa mga luna nga giandam, ilha ang espirituhanong mga gasa nga mabantayan sa kinabuhi ni Joseph Smith, sama sa gipakita sa matag hulagway:

First Vision

Moroni 10:11

Moroni Appears to Joseph Smith in His Room

Moroni 10:14

Joseph Smith Receives the Gold Plates

Moroni 10:16

Nagpamatuod si Moroni nga kinahanglan gayud kitang magbaton og hugot nga pagtuo aron makadawat og espirituhanong mga gasa. Nagtudlo siya nga ang Dios “nagbuhat pinaagi sa gahum, sumala ngadto sa hugot nga pagtuo sa mga katawhan, sama sa karon ug sa ugma, ug sa kahangturan” (Moroni 10:7). Basaha ang Moroni 10:19, 24, ug hibaloi unsay nakapugong sa mga tawo aron makadawat ug makaila sa espirituhanong mga gasa.

2. Isulat sa imong scripture study journal kon ngano sa imong hunahuna nga ang mga tawo nga anaa sa kahimtang sa pagkawalay pagtuo dili makaila o makadawat sa gahum ug mga gasa sa Dios.

Basaha ang Moroni 10:20–23. Pangitaa unsay gitudlo ni Moroni bahin sa kaimportante sa espirituhanong mga gasa sa hugot nga pagtuo, paglaum, ug gugmang putli. Mipamatuod siya nga ang espirituhanong gasa sa hugot nga pagtuo moresulta sa talagsaong panalangin. Tan-awa sa bersikulo 23 aron makita kini nga panalangin. Hinumdumi nga ang pulong maayo [expedient] nagpasabut og “tinguhaunon,” ug ang mga pulong nga “tanan nga mga butang nga maayo ngari kanako” mahimong nagpasabut og “tanan nga mga butang nga akong gitinguha nga imong buhaton.” Mahimo nimong markahan ang sentence diha sa Moroni 10:23 nga nagtudlo niini nga baruganan Kon kita dunay hugot nga pagtuo, makabuhat kita sa unsay gusto sa Langitnong Amahan nga atong buhaton.

3. Aron matabangan ka nga makaila kon sa unsang paagi nga kining baruganan natuman o mahimong matuman sa imong kinabuhi, pagsulat og pipila ka sentence diha sa imong scripture study journal agig tubag sa usa o duha sa mosunod nga mga pamahayag:

   1. Nasinati nako ang saad diha sa Moroni 10:23 sa dihang …

   2. Ang saad nga nakita diha sa Moroni 10:23 makatabang nako sa …

4. Hunahunaa ang duha ka mga baruganan nga imong nakat-unan sa Moroni 10:8–26: Gihatag sa Dios ang mga gasa sa Espiritu alang sa kaayohan sa Iyang mga anak. Kon kita dunay hugot nga pagtuo, makabuhat kita sa unsay gusto sa Langitnong Amahan nga atong buhaton. Sa imong scripture study journal, tubaga ang mosunod nga mga pangutana:

   1. Sa unsang paagi nga ang pagkasayud niining duha ka mga baruganan makatabang nimo karon sa imong kinabuhi?

   2. Sa unsang paagi nga kining mga baruganan makatabang nimo pinaagi sa mga oportunidad nga mahimong moabut ugma damlag?

Moroni 10:30–34

Gitapos ni Moroni ang iyang rekord pinaagi sa pagdapit sa tanan nga moduol kang Kristo ug maghingpit diha Kaniya

President James E. Faust

Sa imong hunahuna posible ba nga mahingpit niining kinabuhia? Si Presidente James E. Faust sa Unang Kapangulohan mipasabut sa sugo nga mahimong hingpit: “Ang pagkahingpit usa ka mahangturong tumong. Samtang dili kita mahingpit sa mortalidad, ang pagpaningkamot alang niini usa ka sugo, nga sa katapusan, pinaagi sa Pag-ula, atong matuman” (“This Is Our Day,” Ensign, Mayo 1999, 19).

Sama sa gitudlo ni Presidente Faust, ang pagkahingpit usa ka tumong nga atong mabuhat karon ug makab-ot sa kinabuhi nga moabut, uban sa tabang sa Manluluwas. Gitapos ni Moroni ang iyang pagpamatuod pinaagi sa pagtudlo kon unsay atong mabuhat aron madapit ang makalimpyo nga gahum sa Manluluwas ngari sa atong kinabuhi karon ug sa katapusan mahimong hingpit pinaagi sa Iyang Pag-ula.

5. Himoa ang mosunod nga tsart diha sa imong scripture study journal:

   Unsay akong mahimo	Unsay gisaad sa Dios

   Siksika ang Moroni 10:30–33, nga mangita alang sa (a) unsay kinahanglan gayud natong buhaton aron mahimong putli ug sa katapusan mahingpit ug (b) unsay gisaad sa Dios nga buhaton aron sa pagtabang kanato. Irekord kon unsay imong makit-an diha sa tukma nga kolum sa imong tsart.

Isulat ang mosunod nga pamahayag ubos sa tsart diha sa imong scripture study journal o sa imong mga kasulatan tupad sa Moroni 10:32–33: samtang moduol kita kang Jesukristo, malimpyo kita ug mahingpit pinaagi sa Iyang Pag-ula.

Ang pagduol kang Kristo usa ka tibuok kinabuhi nga proseso nga nagsugod sa pagtuo diha Kaniya ug dayon mapainubsanong magtinguha sa Iyang impluwensya sa atong kinabuhi. Ang proseso magpadayon pinaagi sa pagdawat sa Iyang ebanghelyo, pagdawat Kaniya isip atong Manluluwas, paghinulsol, pakigsaad uban Kaniya pinaagi sa mga ordinansa sa ebanghelyo, ug matinud-anong paglahutay diha sa pagkamasulundon sa Iyang mga sugo sa tibuok natong kinabuhi. Sa katapusan makaduol kita kang Kristo kon mahimo kitang sama Kaniya; dayon makapuyo kita uban Kaniya sa kahangturan.

Si Elder Jeffrey R. Holland sa Korum sa Napulog Duha ka mga Apostoles mi-summarize sa katapusang pagdapit ni Moroni nga moduol kang Kristo, nga makita diha sa Moroni 10:30–33:

Elder Jeffrey R. Holland

“Ang [katapusang pagpamatuod ni Moroni naghatag og gibug-aton] sa hugot nga pagtuo, paglaum diha kang Kristo, sa gugmang putli ni Kristo, uban sa pag-ampo nga kining tulo ka mahinungdanon nga Kristohanong mga hiyas, kining tulo ka talagsaon nga Kristohanong mga baruganan, modala kanato ngadto sa pagkaputli. …

“Kanang katapusan, kinaulahian, masub-anong pangamuyo sa sukaranang bato sa atong relihiyon ug ang labing tukma nga basahon nga nasulat sukad mao ang dili paghikap sa mahugaw nga butang; kinahanglan kini nga balaan ug walay lama; kinahanglan kini nga putli. Ug kanang kaputli moabut lamang pinaagi sa dugo sa Kordero nga mipas-an sa atong mga kagul-anan ug midala sa atong mga kasubo, ang Kordero nga nasamdan alang sa atong mga kalapsan ug nabun-og alang sa atong mga kadautan, ang Kordero nga gibiay-biay ug gisakit, apan kinsa wala nato gitahud (tan-awa sa Mosiah 14). …

“Kaputli—pinaagi sa dugo sa Kordero. Kana ang gipangamuyo [sa Basahon ni Mormon]” (“A Standard unto My People” [symposium sa CES bahin sa Basahon ni Mormon, Ago. 9, 1994], 15, si.lds.org).

Ribyuha ang Moroni 10:32–33, ug markahi ang mga pulong nga naghatag og gibug-aton nga ang bugtong paagi nga mahingpit kita mao ang mahingpit “diha ni Kristo.” Nagpasabut kini nga dili kita makakab-ot og kahingpitan nga kita ra; kinahanglan gayud kitang mosalig sa gahum ug grasya sa Pag-ula sa Manluluwas. Pamalandunga nganong nagkinahanglan kita sa Pag-ula ni Jesukristo aron mahimong putli ug hingpit. Mahimo nimong markahan ang mga pulong diha sa Moroni 10:32–33 nga nakita nimo nga makapadasig samtang naningkamot ka alang sa pagkaputli ug sa mahangturong tumong sa pagkahingpit.

Balik ngadto sa unsay imong gisulat ubos sa “Unsay akong mahimo” diha sa tsart sa imong scripture study journal. Pagpili og usa ka aksyon nga gisulat didto ug pamalandunga kon sa unsang paagi nga mahimo kang mas makugihon pa nianang butanga sa imong kinabuhi.

Basaha ang Moroni 10:34, ug pangitaa ang ebidensya sa hugot nga pagtuo ni Moroni kang Jesukristo ug paglaum nga makadawat og kinabuhing dayon. Kita usab makabaton og hugot nga pagtuo ug paglaum samtang himoon nato ang pagtuon sa Basahon ni Mormon nga usa ka tibuok kinabuhi nga paningkamot ug mogamit sa mga kamatuoran nga gitudlo sa mga pahina niini.

6. Sa pagtapos niining kurso sa pagtuon sa Basahon ni Mormon, tubaga ang mosunod nga mga pangutana diha sa imong scripture study journal, ug pangandam sa pagpakigbahin sa imong mga tubag uban sa imong magtutudlo:

   1. Unsa ang kalainan nga nahimo sa imong kinabuhi tungod sa pagtuon sa Basahon ni Mormon karong tuiga?

   2. Unsa nga mga leksyon o mga baruganan ang nakatabang nimo nga “moduol kang Kristo” ug nakapalig-on sa imong pagtuo diha sa Manluluwas?

   3. Unsa ang imong pagpamatuod sa Basahon ni Mormon?

7. Isulat ang mosunod sa ubos sa mga buluhaton karong adlawa sa imong scripture study journal:

   Akong natun-an ang Moroni 10:8–26, 30–34 ug nahuman kini nga leksyon niadtong (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo:

Moroni Hides the Plates in the Hill Cumorah