Mosiah 25

Pasiuna

Sumala sa narekord sa Mosiah 25, ang katawhan ni Limhi ug ang mga sumusunod ni Alma mipanaw ngadto sa Zarahemla aron luwas nga magkahiusa ubos sa pagmando ni Haring Mosiah. Samtang kini nga mga grupo sa Nephite nagkahiusa, ilang giila ang kaayo sa Dios ug ang Iyang gahum sa pagluwas kanila. Giestablisar usab nila ang usa ka hiniusa nga Simbahan. Samtang magtuon ka niini nga leksyon, mahimong makabenipisyo nimo ang paghunahuna kon sa unsang paagi imong nakita ang kaayo sa Dios diha sa imong kinabuhi ug ang mga panalangin nga nahisakop sa tinuod nga Simbahan ni Jesukristo.

Mosiah 25:1–13

Kadtong nagpundok sa Zarahemla nagkahiusa ug nailhan isip mga Nephite

Basaha ang mosunod nga istorya mahitungod sa usa ka batan-ong babaye kinsa naprotektahan pinaagi sa pagpaminaw sa Espiritu samtang nag-hiking uban sa iyang grupo sa Young Women:

“Sa among pagbalik, anaa ko sa hinay nga grupo, lima ka mga babaye ug ang among lider. Busy sila sa pagpanglitrato, busa nakahukom ko nga mouna. Samtang nagdulhog ko sa bungtod nakadungog ko og usa ka baka [nga madungog nga daw himatyon]. Usa ka tingog sa pagpasidaan, kusganon apan hilum, ang miingon ‘Balik.’ Hapit nako kining gibaliwala, apan mibalik kini pag-usab. Niining higayona naminaw ko ug mibalik ngadto sa grupo. Sa pagsugod namo og dulhog, among nakita ang duha ka dagko nga itum nga mga baka nga paspas ug masuk-anon nga nagtungas sa bungtod. Ang pinakadako misugod sa pagpanikad sa yuta samtang nagtan-aw kini kanamo. … Pwerti namong hadluka, apan gilinga kini sa among lider sa priesthood, ug nakahimo mi sa pagkatkat sa usa ka koral aron maluwas.

“Sa among pagsulod og usab sa kampo, nakaamgo ko nga kon wala pa ko maminaw sa pasidaan gikan sa Espiritu, grabe unta ko nga nasamdan o gani namatay. Nasayud ko nga ang Langitnong Amahan personal nga naghunahuna kanako ug naghimo kanako nga luwas. Mapasalamaton kaayo ko sa Ginoo alang niadto nga pasidaan. Kini nga kasinatian nakapalig-on sa akong pagpamatuod ug nakahatag kanako og mas dakong gugma alang sa Ginoo” (Marissa W., “Turn Back,” New Era, Nob. 2010, 47).

Sa unsang paagi ang pagpaminaw o pagbasa mahitungod sa mga kasinatian sa ubang tawo nga nagpakita sa pagkamaayo ug gahum sa Dios diha sa ilang kinabuhi makatabang sa paglig-on kanimo?

Imahe

journeys diagram

Samtang ang katawhan ni Limhi ug ang katawhan ni Alma nahiusa uban sa mga tawo sa Zarahemla, gipabasa ni Haring Mosiah ang ilang mga rekord ngadto sa tanang katawhan (tan-awa sa Mosiah 25:1–6). Siksika ang Mosiah 25:7 kon unsay reaksyon sa katawhan ni Haring Mosiah samtang naminaw sila sa mga istorya sa pagpakigsandurot sa Dios ngadto niini nga mga katawhan.

Alang sa matag usa sa upat ka mga bersikulo sa Mosiah 25:8–11, irekord diha sa imong scripture study journal ang reaksyon sa katawhan sa dihang ilang nadungog ang istorya sa ilang mga kaigsoonan. Sama pananglit, diha sa Mosiah 25:8, sa diha nga ilang nakita kadtong mga giluwas gikan sa pagkaulipon sa mga Lamanite, ang katawhan “napuno sa hilabihan ka dako nga hingpit nga kalipay.”

Ikonsiderar ang pagsulat sa mosunod nga baruganan diha sa margin sa imong mga kasulatan duol sa Mosiah 25:8–11: Pinaagi sa pagtuon sa mga rekord sa pakigsandurot sa Dios ngadto sa uban, atong mabati ang kalipay ug pasalamat alang sa kaayo sa Dios.

Paghunahuna og posible nga mga tinubdan diin makakat-on ka kabahin sa uban nga nakasinati sa kaayo sa Dios. Kini tingali maglakip sa mga kasulatan, kasaysayan sa Simbahan, mga magasin sa Simbahan, mga pakigpulong sa kinatibuk-ang komperensya, imong kaugalingon mga rekord sa family history, mga miting sa pagpamatuod, ug mga klase sa Sunday School ug sa priesthood o sa Young Women. Paghunahuna og higayon diin nakakat-on ka sa kaayo sa Dios gikan niini nga mga tinubdan. Dayon pamalandungi ang imong mga tubag sa mosunod nga mga pangutana:

Aduna ba akoy kasinatian diin ang pagkat-on sa kaayo sa Dios ngadto sa uban nakatabang nako nga mobati og hingpit nga kalipay o pasalamat?
Unsa kaha ang pipila sa malungtarong mga epekto kon kanunay nakong tun-an ang mga kasinatian sa kaayo sa Dios sa Iyang pagpakigsandurot sa uban—maanaa man sa mga kasulatan o sa ubang tinubdan?

Sa umaabut nga semana, ikonsiderar ang pagsiksik sa usa sa mga tinubdan nga imong nahunahunaan alang sa usa ka istorya sa kaayo sa Dios nga mopuno kanimo sa katingala, kahingangha, hingpit nga kalipay, o pasalamat. Mahimo kang mosulat mahitungod sa unsay imong nakat-unan ug sa unsang paagi kini nakaapekto kanimo diha sa imong kaugalingong personal nga journal. Mahimo usab nimong gamiton kini nga istorya diha sa family home evening aron sa pagtudlo sa imong pamilya bahin sa kaayo sa Dios, o mahimo nimong ipakigbahin ang istorya ngadto sa imong klase sa seminary o sa usa ka higala.

Mosiah 25:14–24

Si Alma nag-establisar og mga simbahan sa Dios sa tibuok yuta sa mga NephitePagkahuman ni Mosiah

sa pagpamulong ug pagbasa sa mga rekord ngadto sa katawhan, si Alma namulong kanila. Basaha ang Mosiah 25:14–16, ug hibaloi kon unsay gitudlo ni Alma. Pagsulat og mga tubag sa mosunod nga mga pangutana diha sa manwal:

Sa unsang paagi nga ang gitudlo ni Alma usa ka angay nga pag-summary sa mga kasinatian sa katawhan ni Limhi ingon man usab sa mga sumusunod ni Alma?
Ngano kaha nga ang mga pulong ni Alma importante nga madunggan sa katawhan human sila makadungog sa kasaysayan sa katawhan ni Zeniff?

Sa dili pa mopadayon og basa diha sa Mosiah 25, paghunahuna og higayon dihang mitambong ka sa usa ka ward o branch sa mga Santos sa Ulahing mga Adlaw gawas sa imong kaugalingong ward o branch. Hunahunaa ang mga pagkasusama nga imong namatikdan tali sa imong home ward o branch ug sa usa nga imong gibisitahan.

Imahe

sacrament meeting

Sa Mosiah 23:16 imong nakat-unan nga si Alma “mao ang ilang halangdon nga pari” ug ang “magtutukod sa ilang Simbahan” (Mosiah 23:16). Si Presidente Joseph Fielding Smith mipasabut: “Ang kinadak-ang pundok sa mga Nephite, ubos sa ikaduha nga Haring Mosiah, nagtapok ra gihapon sa yuta sa Zarahemla. Ang reference nga nagsaysay nga si Alma mao ang magtutukod sa ilang simbahan nagpasabut lamang sa mga namakwit kinsa mibiya sa yuta sa unang kabilin sa mga Nephite. Paglabay sa panahon nakahimo sila sa pagbalik ngadto sa kinadak-ang pundok sa Simbahan ug si Alma gipahinungod isip halangdon nga pari sa Simbahan sa tanang mga dapit nga giokupar sa mga Nephite” (Answers to Gospel Questions, comp. Joseph Fielding Smith Jr., 5 vols. [1957–66], 3:39–40).

Pagsulat og mugbo nga mga tubag sa matag usa sa mosunod nga mga pangutana diha sa imong scripture study journal:
1. Sa unsang mga paagi nga ang Simbahan sa mga Nephite susama sa Simbahan karon?
2. Ngano kaha nga importante nga ang mga lider gitawag ni Alma, kinsa adunay awtoridad gikan sa Dios?
3. Nganong importante man alang sa mga lider nga motudlo sa samang mga kamatuoran ngadto sa tanang mga miyembro sa Simbahan sa tibuok kalibutan?

Samtang magbasa ka sa Mosiah 25:23–24, pangita og mga pulong nga naghulagway niadtong nagpasakop sa Simbahan ni Kristo nga naghulagway usab sa mga miyembro sa Simbahan sa Ginoo karon. Usa ka baruganan nga atong makat-unan gikan niini nga bersikulo mao ang: Samtang atong dalhon diha sa atong kaugalingon ang pangalan ni Jesukristo ug magpakabuhi subay niini, ang Ginoo mobu-bu sa Iyang Espiritu ngari kanato.

Pagsulat og mga tubag sa mosunod nga mga pangutana diha sa imong scripture study journal:
1. Sa unsang paagi ang mga pulong sa Mosiah 25: 23–24 nga naghulagway sa mga Nephite nga mga miyembro sa Simbahan magamit usab ngadto sa mga miyembro sa Simbahan karon?
2. Sa unsang paagi ang paghinumdom nga nagdala ka sa ngalan ni Jesukristo nganha sa imong kaugalingon makahimo og kalainan sa imong mga hunahuna ug sa inadlaw nga mga pagpili nga imong himoon?

Timan-i sa Mosiah 25:24 nga “ang Ginoo mibu-bu sa iyang Espiritu diha” sa Iyang katawhan. Si Elder Joseph B. Wirthlin sa Korum sa Napulog Duha ka mga Apostoles mipasabut sa bili sa gasa sa Espiritu Santo alang sa mga miyembro sa Simbahan:

Imahe

Elder Joseph B. Wirthlin

“Ang gasa sa Espiritu Santo, nga mao ang katungod sa pagdawat sa Espiritu Santo isip kanunay nga kauban, maangkon lamang sa kondisyon sa pagtuo diha kang Kristo, paghinulsol, bunyag pinaagi sa pagpaunlod, ug pagpandong sa mga kamot pinaagi sa gitugutan nga mga sulugoon nga gitugahan sa Melchizedek Priesthood. Mao kini ang labing bililhong gasa nga madawat lamang sa takus nga mga miyembro sa Simbahan sa Ginoo.

“… Mao kini ang tinubdan sa pagpamatuod ug espirituhanong mga gasa. Naglamdag kini sa mga hunahuna, mopuno sa atong mga kalag sa kalipay, magtudlo kanato sa tanang mga butang, ug makapahinumdom nato sa nakalimtan nga kahibalo. Ang Espiritu Santo usab ‘mopakita ngari [kanato] sa tanang mga butang unsay [atong] buhaton’ [2 Nephi 32:5]” (“Ang Dili Mahulagway nga Gasa,” Ensign o Liahona, Mayo 2003, 26–27).

Tubaga ang mosunod nga mga pangutana diha sa imong scripture study journal:
1. Sa unsang mga paagi nga ang imong pag-apil diha sa Simbahan ni Jesukristo makatabang nimo nga mobati sa Espiritu?
2. Unsay imong mabuhat aron madugangan ang imong pagkamatinud-anon ug matarung nga mga lihok aron imong mabati nga mas mapaduol sa Espiritu?

Pangita og oportunidad sa pagpakigbahin sa usa ka tawo kon sa unsang paagi ang gasa sa Espiritu Santo nakapanalangin sa imong kinabuhi. Ang mga panalangin nga imong nasinati pinaagi sa Espiritu Santo madugangan samtang maningkamot ka nga mahimong takus sa Iyang pagpakig-uban.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Mosiah 25 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: