Ether 7–11

Pasiuna

Bisan tuod nga ang igsoon nga lalaki ni Jared nanagna nga ang pag-establisar og usa ka hari nga Jaredite moresulta sa pagkabihag, ang iyang mga pulong wala dayon matuman. Ang unang hari nga Jaredite, si Orihah, mihari sa pagkamatarung. Hinoon, usa ka tawo nga ginganlan og Jared ang nahimong hari pipila ka henerasyon human niana pinaagi sa paghimo og tinago nga mga kalihokan. Atol sa pagmando sa mga hari, ang mga Jaredite miagi og pipila ka cycle sa pagpaminaw sa mga propeta ug pagpuyo diha sa pagpakamatarung, ug pagsalikway sa mga propeta ug pagpuyo diha sa pagkadautan.

Ether 7

Gikuha ni Corihor ang gingharian gikan sa iyang amahan, ang iyang igsoong lalaki nga si Shule mikuha niini og balik, ug ang mga propeta mipanghimaraut sa pagkadautan sa katawhan

Sa imong hunahuna unsa kaha ang bation sa usa ka tawo nga magpuyo sa pagkabihag? Aduna ka bay susama nga mga pagbati nga napugngan tungod sa dili husto nga mga pagpili nga imong nahimo? Pangita og mga ideya kon unsaon nimo paglikay sa pisikal ug espiritwal nga pagkabihag samtang magtuon ka sa Ether 7–11.

Sa dihang si Jared ug ang iyang igsoon nga lalaki natigulang na, ang mga Jaredite mihangyo alang sa usa ka hari. Ang igsoon nga lalaki ni Jared mipasidaan nga ang pagbaton og usa ka hari moresulta sa pagkabihag (tan-awa sa Ether 6:19–23). Ang mga propeta kanunay nga nanagna batok sa mga lihok nga modala kanato ngadto sa pisikal ug espiritwal nga pagkabihag.

Isulat sa imong scripture study journal ang usa o duha ka ehemplo sa mga lihok nga gipasidaan sa modernong mga propeta nga dili maayo ug sa unsang paagi nga kadtong mga lihok moresulta sa pisikal ug espiritwal nga pagkabihag.

Bisan pa man sa pasidaan sa igsoon nga lalaki ni Jared, ang katawhan mipili nga magbaton og usa ka hari. Basaha ang Ether 7:1–2 aron mahibalo kon ang panagna sa igsoon nga lalaki ni Jared natuman sa panahon ni Orihah, kinsa anak nga lalaki ni Jared. Hunahunaa kon unsay imong isulti sa usa ka tawo nga nagpuyo sa panahon ni Haring Orihah ug wala motuo nga ang panagna sa igsoon nga lalaki ni Jared matuman.

Sulod sa duha ka henerasyon ang propetikanhong pasidaan sa igsoon nga lalaki ni Jared natuman. Basaha ang Ether 7:3–7, ug idiskubre kon giunsa ni Kib ug sa iyang katawhan pagpuyo sa pagkabihag ubos ni Corihor, kansang hinakog nga tinguha nga mahimong hari nakapahimo niya sa pagsukol batok sa iyang amahan. Kini nga pagkabihag mao ang resulta sa pagkahakog ug pagsukol.

Sa imong scripture study journal, isulat kon unsay imong isulti sa mga tawo karon kinsa misupak sa tambag sa mga propeta apan wala mobati nga anaa sila sa espiritwal nga pagkabihag. (Sa imong tubag, mahimo nimong iapil ang ideya nga kadtong nalaang sa espiritwal nga pagkabihag sa kasagaran mao ang katapusang makaamgo niini. Paghatag og moderno nga sitwasyon nga makabutang sa usa ka tawo sa espiritwal nga pagkabihag.)

Kini nga bahin sa kasaysayan sa mga Jaredite naghulagway sa baruganan nga ang pagsalikway sa mga pulong sa mga propeta moresulta sa pagkabihag. Pamalandong og ubang mga paagi nga mahimo kang makasinati og espiritwal nga pagkabihag tungod sa pagkamasinupakon sa mga sugo o propetikanhong tambag.

Ang pagsukol ni Corihor batok sa iyang amahan, si Kib, miresulta sa padayon nga panagbingkil ug gubat. Samtang tigulang na, si Kib dunay laing anak nga lalaki—si Shule. Sa dihang midako na si Shule, nakigbatok siya sa iyang masukulon nga igsoong lalaki, si Corihor.

Hunahunaa nga ikaw usa ka tigbalita nga gisangunan sa pagbalita sa istorya ni Shule. Basaha ang Ether 7:8–13, ug pagsulat og mubo nga paragraph sa imong scripture study journal nga magbalita kon unsay hatagan nimo og importansya sa imong pagbalita sa kinabuhi ni Shule.

Atol sa paghari ni Shule, daghang mga propeta ang miabut taliwala sa katawhan ug mipasidaan kanila sa ilang pagkadautan. Basaha ang Ether 7:23–25, ug hibaloi kon unsa ang gipanagna sa mga propeta ug unsay reaksyon sa katawhan. Unsa ang reaksyon ni Shule? Sa unsang paagi nga ang pagpanalipod ni Shule sa mga propeta nakapanalangin sa iyang katawhan?

Basaha ang Ether 7:26–27, ug pangitaa kon unsay nahitabo sa dihang misunod ang katawhan sa mga pulong sa mga propeta. Si Shule “nahinumdom sa mahinungdanon nga mga butang nga ang Ginoo nakahimo alang sa iyang mga amahan” (Ether 7:27). Kon mahinumdom ka sa mahinungdanon nga mga butang nga gibuhat sa Ginoo alang kanimo, nan malagmit makabaton ka og pasalamat alang Kaniya ug magpuyo nga matarung.

Kining mga panghitabo nagpamatuod sa usa ka importante nga baruganan: Samtang maghinulsol kita sa atong kadautan, magsugod kita sa pag-uswag. Ang pulong nga pag-uswag nagpasabut og “paglaum” ug usab “paglampus,” ug kini “kasagarang gigamit sa paagi sa materyal nga kalampusan, [apan] kini wala gayud magpasabut og kaabunda sa temporal nga mga katigayunan—o bisan sa mas haruhay, walay problema nga kinabuhi. …

“Ang tinuod nga matarung mga mauswagon, sa paagi nga dunay pagsalig, nga makadasig sa hugot nga pagtuo ngadto sa pagkaaktibo ug makahimo og makaayo nga mga kahimtang gikan sa dili kaayo maayo. Dili sila maghulat sa Ginoo nga mohatag o mopugong sa mga ganti, apan hinoon motawag kaniya alang sa giya kon unsay labing makaayo alang kanila, sa temporal ug sa espiritwal nga paagi. Ang maong giya mahimong moresulta sa pag-usab og mga trabaho, pagbalhin sa laing distrito, pagbaton og training o bag-ong mga kahanas, o pagdawat sa mga butang kon unsa kini karon apan sa pagtrabaho sulod sa kaugalingong mga limitasyon sa tawo ug pagsunod sa direksyon sa Espiritu sa laing mga paagi” (Alan Webster, “I Have a Question,” Ensign, Abr. 1990, 52–53).

Tubaga ang mosunod nga mga pangutana diha sa imong scripture study journal:
1. Sa unsang paagi ka napanalanginan tungod sa pagpatalinghug sa mga pulong sa mga propeta?
2. Unsa ang usa ka butang nga mahimo nimo nga mas mopatalinghug sa mga pulong sa mga propeta ug mahimong angayan alang sa mga panalangin sa Ginoo?

Ether 8:1–9:12

Si Jared ug dayon si Akish nahimong mga hari sa mga Jaredite pinaagi sa tinago nga mga kalihokan

Basaha ang mosunod nga lista: musika nga imong paminawon, mga butang nga imong hunahunaon, unsaon nimo paglihok diha sa eskwelahan, mga salida nga imong tan-awon, imong kinaiya sa pakig-date, mga kalihokan nga imong buhaton kauban ang imong mga higala, unsay imong buhaton kon walay lain nga kauban. Ngano kaha nga ang usa ka tawo nga nalambigit sa dautan nga kinaiya gustong taguon gikan sa ilang mga higala, mga ginikanan, o mga lider kon giunsa nila pag-apil sa usa o sobra pa niining mga kalihokan? Unsa ang kakuyaw sa pagkalambigit sa dili matarung nga sikretong mga kalihokan?

Sumala sa Ether 8, si Omer nahimong hari human nga namatay si Shule, apan ang anak nga lalaki ni Omer nga si Jared “misukol batok sa iyang amahan” (Ether 8:2) ug “nakapahimutang sa iyang kasingkasing diha sa gingharian ug diha sa himaya sa kalibutan” (Ether 8:7). Ang anak nga babaye ni Jared nakahimo og plano uban sa iyang amahan nga makahatag kaniya sa gingharian. Usa siya ka matahum nga babaye, ug sa dihang misayaw siya atubangan sa usa ka lalaki nga ginganlan og Akish, gusto siya nga mangasawa niya. Gisultihan ni Jared si Akish nga mapangasawa lamang niya ang iyang anak “kon ikaw modala ngari kanako sa ulo sa akong amahan, ang hari” (Ether 8:12). Miapil si Akish sa usa ka tinago nga mga kalihokan uban sa iyang mga higala aron patyon si Haring Omer. Ang tinago nga kalihokan mao ang duha o sobra pa nga mga tawo nga manumpa nga ipabiling sikreto ang ilang dili matarung nga mga binuhatan aron makalikay sa mga sangputanan sa ilang mga binuhatan.

Basaha ang Ether 8:15–18, ug hibaloi ang mga pulong nga naghulagway sa pipila ka mga motibo ug mga pamaagi sa likod niadtong mihangup sa tinago nga mga kalihokan.

Tubaga ang duha o sobra pa sa mosunod nga mga pangutana diha sa imong scripture study journal:
1. Nganong ang ubang mga tawo moapil man sa tinago nga mga kalihokan?
2. Sa imong hunahuna nganong makadaut man sa espirituhanong paagi ang motuo nga makahimo ka sa “tanan nga matang sa mga pagkadautan” (Ether 8:16) o “sa bisan unsa nga butang” nga imong gitinguha (Ether 8:17) nga dili moatubang og bisan unsa nga mga sangputanan?
3. Unsa nga mga pulong diha sa Ether 8:18 ang nagpakita kon unsay gibati sa Ginoo bahin sa tinago nga mga kalihokan? Sa imong hunahuna ngano nga ang maong mga kalihokan gikonsiderar man nga “dautan ibabaw sa tanan”?

Basaha ang Ether 8:20–22, 25 ug Ether 9:5–6, 11–12, nga mangita sa mga sangputanan sa pagsuporta sa tinago nga mga kalihokan. I-summarize ang imong nakat-unan:

Usa sa mga kamatuoran nga tingali imong nahibaloan diha niini nga mga bersikulo mao nga: Ang pagsuporta sa tinago nga mga kalihokan moresulta sa pagkalaglag sa mga indibidwal ug mga katilingban.

Mihunong si Moroni sa pagsulat bahin sa mga gubat sa mga Jaredite aron mamulong ngari nato. Basaha ang Ether 8:23–24, 26, ug hibaloi kon giunsa pag-awhag ni Moroni ang katawhan sa atong panahon sa paggamit sa iyang mga pasidaan bahin sa tinago nga mga kalihokan.

Hunahunaa ang mga tubag sa mosunod nga mga pangutana: Sa imong hunahuna nganong ang usa ka nasud, katilingban, o laing pundok anaa sa “makalilisang nga kahimtang” (Ether 8:24) kon dunay tinago nga mga kalihokan sa taliwala niini? Sa unsang paagi nga ang pagkasikreto naghatag og gahum ngadto niining mga kalihokan? Sa unsang paagi nga ang pagkasayud sa kamatuoran bahin sa tinago nga mga kalihokan makatabang sa katawhan nga malikay niining kadautan?

I-refer og balik ngadto sa lista sa mga buhatunon nga gihatag sa sinugdanan niining bahina sa leksyon. Bisan kon ang pagbuhat og dili matarung nga mga pagpili niini nga mga aspeto sa imong kinabuhi dili kinahanglang makategoriya isip usa ka tinago nga kalihokan, isulat sa imong scripture study journal ang kakuyaw nga moabut tungod sa pagkalambigit sa mga kalihokan nga ang usa ka tawo mobati og panginahanglan nga isikreto gikan sa uban.

Ether 9:13–11:23

Usa ka hari misunod sa lain—ang uban matarung, ang uban dautan

Sama sa narekord diha sa Ether 9–11, daghang hari ang mimando sa mga Jaredite, ang uban sa pagkamatarung ug ang uban sa pagkadautan. Basaha ang Ether 9:26–35 (atol sa paghari ni Heth) ug Ether 11:1–8 (atol sa paghari nila ni Com ug Shiblom), nga mangita og ebidensya sa katinuod sa baruganan nga ang pagsalikway sa mga pulong sa mga propeta moresulta sa pagkabihag, nga nahisgutan na sa sayo pa niini nga leksyon.

Hinumdumi ang paagi nga imong nahunahunaan nga mas makapatalinghug sa mga pulong sa mga propeta. Sa umaabut nga mga adlaw, i-follow up kini nga tumong ug pangita og mga oportunidad sa pagpakigbahin sa imong pagpamatuod bahin sa kaimportante sa pagsunod sa mga pulong sa mga propeta.

Isulat ang mosunod diha sa ubos sa mga buluhaton karong adlawa sa imong scripture study journal:

Akong natun-an ang Ether 7–11 ug nahuman kini nga leksyon niadtong (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: