Pasiuna sa Moroni
Nganong Kinahanglang Tun-an Kini nga Basahon?
Samtang magtuon ka sa basahon ni Moroni, makakuha ka og kalig-on gikan sa gamhanang ehemplo ug pagpamatuod ni Moroni. Agig dugang, gikan sa mga pagtulun-an ni Moroni ug sa iyang amahan, nga si Mormon, makakat-on ka bahin sa nag-unang mga ordinansa ug mga buluhaton sa Simbahan ni Jesukristo, sa kaimportante sa paghimo og matarung nga mga buhat uban sa tinuod nga katuyoan, sa paagi sa paghukom tali sa maayo ug dautan, ug sa relasyon tali sa hugot nga pagtuo, paglaum, ug gugmang putli. Mabasa usab nimo ang pag-awhag ni Moroni nga mag-ampo aron masayud sa imong kaugalingon nga ang Basahon ni Mormon tinuod ug “[mo]duol ngadto kang Kristo, ug paghingpit diha kaniya” (Moroni 10:32).
Kinsa ang Nagsulat Niini nga Basahon?
Gisulat ni Moroni kini nga basahon, nga naglakip sa iyang mga pulong, sa mga pulong ni Jesukristo ngadto sa Iyang napulog duha ka mga disipulo (tan-awa sa Moroni 2), ug sa mga pulong sa iyang amahan, nga si Mormon (tan-awa sa Moroni 7–9). Sa wala pa ang pagkalaglag sa mga Nephite, nagserbisyo si Moroni isip sundalo ug lider sa Simbahan taliwala kanila (tan-awa sa Mormon 6:12; Moroni 8:1). Sama sa ubang nag-unang mga tigsulat ug mga tighugpong sa Basahon ni Mormon, si Moroni usa ka saksi sa Manluluwas. Mipamatuod siya: “Ako nakakita ni Jesus, ug … siya nakigsulti kanako nawong sa nawong” (Ether 12:39). Matinud-anon si Moroni sa iyang pagpamatuod ug sa iyang kaandam nga mapatay kay sa molimud kang Kristo (tan-awa sa Moroni 1:1–3).
Niadtong 1823, mga 1,400 ka tuig human niya makompleto ang rekord sa Basahon ni Mormon, mipakita si Moroni ngadto ni Propeta Joseph Smith isip usa ka nabanhaw nga nilalang ug mipahibalo kaniya nga ang rekord nalubong diha sa usa ka bungtod duol sa panimalay ni Joseph Smith. Nianang higayuna ug atol sa misunod nga pipila ka tuig, gitudloan usab ni Moroni si Joseph Smith “mahitungod sa pagabuhaton sa Ginoo, unsaon ug sa unsa nga paagi ang pagdumala sa iyang gingharian sa katapusan nga mga adlaw” (Joseph Smith—Kasaysayan 1:54).
Kanus-a ug Diin Kini Gisulat?
Tingali gisulat ug gihugpong ni Moroni kini nga basahon sa tunga-tunga sa mga tuig A.D. 401 ug A.D. 421 (tan-awa sa Mormon 8:4–6; Moroni 10:1), sa iyang pagtago-tago alang sa kaluwasan sa iyang kinabuhi (tan-awa sa Mormon 1:1–3).