Unit 31: Day 4

Moroni 7:1–19

Pasiuna

Girekord ni Moroni ang usa ka wali nga gihatag sa iyang amahan, nga si Mormon, ngadto sa iyang “hinigugma nga mga kaigsoonan” daghang katuigan sa sayo pa (Moroni 7:2). Kini nga leksyon naglangkob sa unang porsyon sa wali ni Mormon nga makita diha sa Moroni 7. Gipamulong niini ang iyang mga pagtulun-an bahin sa paghimo og matarung nga mga buhat uban sa tinuod nga katuyoan ug sa iyang pagpasabut kon unsaon nato pag-ila tali sa maayo ug dautan. Sa sunod nga leksyon tun-an nimo ang nahabilin sa wali ni Mormon diha sa Moroni 7.

Moroni 7:1–10

Gitudloan ni Mormon ang mga sumusunod ni Jesukristo bahin sa mga buhat ug katuyoan

apple

Nakadiskubre ka na ba nga dunay butang nga dili maayo sa sulod kay sa unsay makita diha sa gawas? Usa ka ehemplo niini tingali mao ang piraso sa prutas, sama sa mansanas nga aslom o hinog na kaayo. Paglista og duha o tulo ka laing mga ehemplo nga imong mahunahunaan:

Ikonsiderar kon sa unsang paagi nga kining mga ehemplo sa mga butang nga nindot tan-awon sa gawas pero sa tinuod dili diay nindot mahimong matandi sa makita sa gawas ug mga tinguha sa sulod sa mga tawo. Girekord ni Moroni ang mga pulong sa iyang amahan, nga si Mormon, kalabut sa kahimtang sa atong kasingkasing samtang naghimo kita og matarung nga mga buhat. Basaha ang Moroni 7:2–3 aron matino kon kang kinsa namulong si Mormon.

Gipasabut ni Mormon ang iyang mga kaigsoonan kang kinsa siya namulong isip “malinawon nga mga sakop ni Kristo” (Moroni 7:3). Tun-i ang Moroni 7:4–5 aron madiskubrihan kon giunsa pagkasayud ni Mormon nga kining mga Nephite tinuod nga mga disipulo sa Manluluwas.

Sa imong hunahuna ang usa ka tawo makahimo ba nga magpakaaron-ingnon lang nga matarung? Ngano o nganong dili man?

Namulong si Mormon niini nga isyu diha sa Moroni 7:6. Samtang magtuon ka niini nga bersikulo, mahimo nimong markahan ang mga pulong nga “tinuod nga katuyoan.” Ang mosunod nga pagpasabut gikan ni Elder Dallin H. Oaks sa Korum sa Napulog Duha ka mga Apostoles makatabang nimo aron masabtan kon unsay buot ipasabut sa magbaton og tinuod nga katuyoan. Badlisi kadtong mga porsyon sa iyang pagpasabut nga makahuluganon kanimo.

“Kinahanglan gayud nga dili lamang kita mobuhat sa unsay husto. Kinahanglan gayud kitang molihok alang sa husto nga mga rason. Ang moderno nga termino mao ang maayong motibo. Ang mga kasulatan kanunayng nagmatuod niining tukma nga mental nga kinaiya uban sa mga pulong nga hingpit nga katuyoan sa kasingkasing o tinuod nga katuyoan.

“Ang mga kasulatan miklaro nga ang Dios makasabut sa atong mga tinguha ug mohukom sa atong mga binuhatan sa tukmang paagi” (Pure in Heart [1988], 15).

Gihulagway ni Mormon ang mga resulta sa usa ka tawo nga nagtinguha sa paghimo og kaayohan nga walay tinuod nga katuyoan. Siksika ang Moroni 7:7–10, ug hibaloi kon unsay mahitabo kon maghimo kita og matarung nga mga buhat nga walay husto nga katuyoan. Gikan niini nga mga bersikulo atong nakat-unan nga aron mapanalanginan tungod sa maayong mga buhat, kinahanglan gayud nato kining buhaton uban sa tinuod nga katuyoan sa kasingkasing. Ang tinuod nga katuyoan naglakip sa paghimo og maayong mga buhat tungod sa gugma alang sa Dios ug sa uban.

1. Tubaga ang mosunod nga pangutana sa imong scripture study journal: Unsa nga mga kalainan ang imong nabantayan sa dihang nakahimo ka og maayong mga buhat uban sa husto nga katuyoan ingon nga sukwahi sa paghimo og butang nga maayo uban sa hinakog nga katuyoan?

2. Aron matabangan ka nga mas makasabut sa baruganan aron mapanalanginan tungod sa maayong mga buhat, kinahanglan gayud nato kining buhaton uban sa tinuod nga katuyoan sa kasingkasing, ikonsiderar ang mosunod nga sitwayon: Usa ka higala nga nagbasa sa Basahon ni Mormon mihangyo alang sa imong tabang sa pagsabut sa Moroni 7:9 ug miingon, “Akong nabasahan nga kon ang usa ka tawo mag-ampo nga walay tinuod nga katuyoan, ‘kini dili makahatag kaniya og kaayohan, kay ang Dios dili modawat sa ingon niini.’ Kanunay kong mibati nga wala ko mag-ampo uban sa tinuod nga katuyoan. Mohunong na ba lang ko sa pag-ampo? Sa imong scripture study journal, isulat kon unsaon nimo pagtubag kana nga pangutana, ug ipasabut nganong ingon niana ang imong tubag.

Si Presidente Brigham Young mihatag niining makatabang nga tambag kon unsaon nato pag-angkon og tinguha nga mag-ampo uban sa tinuod nga katuyoan: “Dili igsapayan kon ikaw o ako dili ganahan nga mag-ampo, kon ang panahon moabut aron mag-ampo, pag-ampo. Kon kita dili ganahan nga mobuhat niini, kinahanglang mag-ampo kita hangtud nga kita ganahan” (Mga Pagtulun-an sa mga Presidente sa Simbahan: Brigham Young [1997], 53).

Hunahunaa kon sa unsang paagi nga ang tambag ni Presidente Young may kalabutan sa pagsunod sa ubang mga sugo gawas sa pag-ampo. Kasagaran ang pagbuhat sa unsay husto makatabang sa pagbaton og usa ka tinguha sa pagpadayon sa pagsunod niana nga sugo alang sa hustong mga rason.

3. Aron magamit ang mga pagtulun-an ni Mormon bahin sa kaimportante sa paghimo og maayong mga buhat uban sa tinuod nga katuyoan, pagpili og usa sa mosunod nga mga sugo: pagpuasa, pagbayad sa ikapulo, pagserbisyo sa uban, pagtuon sa mga kasulatan, pagtahud sa mga ginikanan, pagpabiling limpyo sa moral nga paagi. (Ang pagpabiling limpyo sa moral nga paagi naglakip sa pagkamahiyason samtang maggamit og Internet o social media. Naglakip usab kini sa dili paghimo og bisan unsa nga moresulta sa sekswal nga kalapasan.) Dayon tubaga ang mosunod nga mga pangutana diha sa imong scripture study journal:

   1. Sa unsang paagi ka napanalanginan sa dihang nagtinguha ka sa pagsunod nianang sugo uban sa tinuod nga katuyoan?

   2. Unsa nga tambag ang imong ihatag sa imong mga kaedad kon unsaon pagsunod niana nga sugo uban sa tinuod nga katuyoan?

Moroni 7:11–19

Nagtudlo si Mormon kon unsaon paghukom tali sa maayo ug dautan

Unsaon man nato pag-ila nga ang usa ka butang dautan nga wala man gani mosulay niini? Mitanyag si Mormon og tambag aron makatabang nato kon mag-atubang kita og ingon nga sitwasyon.

4. Basaha ang Moroni 7:11–13, ug pangitaa kon unsaon paghukom ang maayo gikan sa dautan. Mahimo nimong markahan ang mga pulong nga makahuluganon kanimo. I-summarize ang imong nakat-unan gikan niini nga mga bersikulo pinaagi sa pagkompleto sa mosunod nga mga pamahayag diha sa imong scripture study journal:

   1. Kana nga iya sa Dios …

   2. Kana nga gikan sa dautan …

Gipamatud-an ni Mormon nga ang Dios nagdapit ug nagdani kanato sa paghimo sa maayo sa kanunay. Bantayi nga sumala sa Moroni 7:12, ang yawa nagdapit ug nagdani usab kanato. Hunahunaa ang pipila ka paagi nga ang yawa nagdapit ug nagdani kanimo sa pagpakasala.

Elder Jeffrey R. Holland

Si Elder Jeffrey R. Holland sa Korum sa Napulog Duha ka mga Apostoles naghisgot sa mga motibo ni Satanas sa pagtinguha nga moagni kanato nga padayong magbuhat og dautan: “Si Satanas, o Lucifer, o ang amahan sa mga bakak—bisan unsay itawag ninyo kaniya—tinuod gayud, siya gayud ang representasyon sa dautan. Ang iyang mga motibo sa tanang paagi dautan. … Hangtud sa hangtud supak siya sa gugma sa Dios, sa Pag-ula ni Jesukristo, ug sa buhat sa kalinaw ug kaluwasan. Makigbatok siya niini bisan kanus-a ug bisan asa kutob sa iyang mahimo. Nahibalo siya nga siya mapildi ug palayason sa katapusan, apan determinado siya nga modala og daghan uban kaniya kutob sa iyang mahimo” (“Apil Kitang Tanan,” Ensign o Liahona, Nob. 2011, 44).

5. Aron matabangan ka nga makaandam sa paggamit sa mga pagtulun-an ni Mormon bahin sa paghukom tali sa maayo ug sa dautan, ilista diha sa imong scripture study journal ang pipila sa imong paborito nga mga salida sa TV, mga kanta, mga grupo sa musika, mga site sa Internet, mga apps, mga video game, o personal nga gipanag-iya. (Mahimo nimong usbon kini nga lista sumala sa imong mga interes.) Mobalik ka niining journal entry sa dili madugay dinhi niini nga leksyon.

Basaha ang Moroni 7:15–17, ug pangitaa ang mga kamatuoran nga makatabang nga imong masayran kon unsaon paghukom kon ang usa ka butang iya ba sa Dios o sa yawa.

Ang Espiritu ni Kristo gitawag usab nga Kahayag ni Kristo (tan-awa sa Moroni 7:18). Si Presidente Boyd K. Packer sa Korum sa Napulog Duha ka mga Apostoles mihatag sa iyang pagpasabut nga makatabang nga mas masabtan nimo ang Kahayag ni Kristo:

President Boyd K. Packer

“Ang Espiritu Santo ug ang Kahayag ni Kristo managlahi. May panahon nga ihulagway sila diha sa mga kasulatan uban sa sama nga mga pulong, managlahi ang pagkabutang sa duha. …

“Kon maglabi ang kahibalo nato sa Kahayag ni Kristo, mas atong masabtan ang kabahin sa kinabuhi ug mas labaw pa kitang mobati og hilabihang gugma sa katawhan. …

“Dili igsapayan kon kining gibati nga kahayag, kini nga kahibalo sa husto o sayop, gitawag og Kahayag ni Kristo, husto nga panabut, o konsensya, makagiya kini nato aron pagkontrol sa atong mga buhat—gawas kon ato kini nga pugngan o ibaliwala. …

“Kada lalaki, babaye, ug bata sa kada nasud, tinuohan, o kolor—kada usa, bisan diin sila magpuyo o unsay ilang gituohan o ilang gibuhat—anaa kanila ang dili mahanaw nga Kahayag ni Kristo. Mahitungod niini, ang tanang mga tawo managsama nga gilalang. Ang Kahayag ni Kristo sa kada usa maoy pagpamatuod nga ang Dios walay pagtamud sa mga tawo” (“Ang Kahayag ni Kristo,” Liahona, Abr. 2005, 8–10).

Ang nabunyagan nga mga miyembro sa Simbahan dunay gasa usab sa Espiritu Santo aron makatabang nila sa pag-ila tali sa maayo ug sa dautan. Si Presidente Packer nagtudlo, “Ang Espiritu Santo makabuhat pinaagi sa Kahayag ni Kristo.” (“Kahayag ni Kristo,” 10).

Siksika ang Moroni 7:18–19 aron makita ang tambag ni Mormon kon unsaon pagtubag ang Kahayag ni Kristo sa sulod nato. Mahimo nimong markahan ang mga pulong niining mga bersikulo nga nagpasabut nga samtang makugihon kitang nagsiksik sa pagsunod sa Kahayag ni Kristo, makaila kita tali sa maayo ug sa dautan.

I-refer ngadto sa lista nga imong gihimo diha sa imong scripture study journal sa assignment 5. Pamalandunga og maayo ang mga item diha sa imong lista, ug “magmakugihon sa pagpangita diha sa kahayag ni Kristo” (Moroni 7:19) aron matino kon kining mga item nagagikan ba sa Dios. Ang mosunod nga mga pangutana mahimong makatabang nga ikonsiderar:

• Sa unsang paagi nga kining mga butanga nakadapit nimo nga mobuhat og maayo, nga motuo ni Kristo, nga mohigugma sa Dios ug moserbisyo Kaniya?

• Ang bisan unsa niining mga butanga nakapaagni ba nimo “sa pagbuhat sa dautan, … sa dili pagtuo kang Kristo, … sa paglimud kaniya, [o] sa dili pag-alagad sa Dios”? (Moroni 7:17).

• Gibati ba nimo nga kinahanglan nimong tangtangon kining mga item gikan sa imong kinabuhi? Kon mao, unsaon man nimo pagbuhat niini?

Mitanyag si Mormon og saad nga kon mopili ka sa pagtangtang sa bisan unsa nga dili maayo gikan sa imong kinabuhi ug magtinguha nga “maghupot sa matag maayo nga butang,” mahimo kang “sumusunod ni Kristo” (Moroni 7:19).

6. Isulat ang mosunod diha sa ubos sa mga buluhaton karong adlawa sa imong scripture study journal:

   Akong natun-an ang Moroni 7:1–19 ug nahuman kini nga leksyon niadtong (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: