Sa pagpadayon sa iyang pakigpulong ngadto sa iyang mga katawhan, si Haring Benjamin misulti kanila nga usa ka anghel namulong ngadto kaniya mahitungod sa pagpangalagad ni Jesukristo. Si Haring Benjamin mipamatuod nga pinaagi sa hugot nga pagtuo diha kang Jesukristo ug paghinulsol, kadtong mga nakasala makadawat og kaluwasan. Mitudlo usab siya nga pinaagi sa Pag-ula ni Jesukristo ang usa ka indibidwal makabuntog sa kinaiyanhon nga tawo pinaagi sa pagtugyan ngadto sa mga pagdani sa Balaang Espiritu.
Si Haring Benjamin namulong sa mga pulong sa anghel kabahin sa Pag-ula
Imahe
Cups
Samtang magtuon ka sa Mosiah 3, pangitaa ang tinubdan sa “malipayon nga mga balita sa dako nga kalipay” (Mosiah 3:3).
Basaha ang Mosiah 3:1–5, ug pangitaa kon unsay gisulti sa anghel ngadto ni Haring Benjamin. Ang anghel mipahayag nga ang mga katawhan ni Haring Benjamin adunay rason nga magmaya ug mapuno sa hingpit nga kalipay.
Unsa man ang anaa sa mensahe sa anghel nga makahatag og hingpit nga kalipay sa mga Nephite?
Basaha ang Mosiah 3:5–10, ug markahi ang mga pulong mahitungod sa Manluluwas ug sa Iyang pagpangalagad nga makatabang kanimo nga mas masabtan ang mortal nga pangalagad sa Manluluwas.
Pagpili og duha ka hugpong sa mga pulong nga imong gimarkahan, ug pagsulat og usa ka pagpasabut diha sa imong scripture study journal mahitungod sa unsay gitudlo niini kanimo nga makatabang kanimo nga mas makasabut ug mopakabililhon sa pangalagad sa Manluluwas.
Adunay daghang mga doktrina ug mga baruganan nga gitudlo diha sa Mosiah 3:5–10. Usa sa labing importante mao kini: Si Jesukristo nag-antus aron maluwas kita gikan sa atong mga sala. Ikonsiderar ang pagsulat niini nga baruganan diha sa imong mga kasulatan tupad sa Mosiah 3:7–9.
Basaha ang mosunod nga pamahayag gikan ni Elder James E. Talmage sa Korum sa Napulog Duha ka mga Apostoles mahitungod sa pag-antus sa Manluluwas sa Tanaman sa Getsemani:
Imahe
Elder James E. Talmage
“Ang kasakit ni Kristo didto sa tanaman dili matugkad sa may kinutubang hunahuna, ang hilabihang kasakit niini ug ang hinungdan. … Nanglimbasog ug nag-agulo Siya tungod sa gibug-aton nga walay bisan kinsa nga binuhat nga nakapuyo sa yuta ang makatuo nga posible. Dili kadto usa ka pisikal nga kasakit, o mental nga kapait lamang, nga nakapaantus Kaniya sa ingon nga kasakit nga nakahimo sa pag-agas sa dugo gikan sa matag lungag sa panit; apan usa ka espirituhanong paghingutas sa kalag nga ang Dios lamang ang makahimo sa pagsinati. … Nianang mga orasa sa kasakit, si Kristo miatubang ug mibuntog sa tanang mga kabangis nga gipahamtang ni Satanas, ‘ang punoan niining kalibutana’ [Juan 14:30]. …
“Sa pipila ka paagi, aktwal ug tinuod gayud bisan kon dili masabtan sa tawo, gidala sa Manluluwas diha sa iyang Kaugalingon ang palas-anon sa mga sala sa katawhan gikan ni Adan ngadto sa katapusan sa kalibutan” (Jesus the Christ, 3rd ed. [1916], 613).
Diha sa imong scripture study journal, pagsulat og usa ka kasinatian nga nakatabang kanimo nga masayud nga si Jesukristo mao ang Manluluwas. Sa unsang paagi ang paghinumdom niini nga kasinatian nakadugang og kalipay sa imong kinabuhi?
Si Haring Benjamin naghulagway kon unsaon pagbuntog sa kinainyanhon nga tawo
Samtang si Haring Benjamin mipadayon sa pagtudlo sa iyang katawhan, mitudlo siya kanila kon sa unsang paagi ang Pag-ula nagpanalangin sa mga anak sa Dios. Mitudlo usab siya kon unsaon nato pagbuntog ang kinaiyanhon nga tawo ug mamahimong Santos pinaagi sa Pag-ula sa Manluluwas.
Imahe
Jesus Blessing Jairus’s Daughter
Aron mas makasabut kon sa unsang paagi ang Pag-ula makapanalangin sa mga anak sa Dios, basaha ang mosunod nga mga tudling sa kasulatan ug pagsulat og usa ka paghulagway sa grupo sa mga tawo nga gipamatud-an niana nga bersikulo nga mapanalanginan pinaagi sa Pag-ula ni Jesukristo:
Importante nga masayud nga bisan og si Jesukristo mitubos sa mga sala niadtong wala masayud sa ebanghelyo—kadtong namatay diha sa pagkawalay alamag—kinahanglan gihapon sila nga maghinulsol ug mopakita og hugot nga pagtuo kang Jesukristo diha sa kalibutan sa espiritu aron maluwas (tan-awa sa D&P 131:6; 138:31–34). Usab, ang Ginoo mipadayag nga ang mga bata gipakatawo nga inosente diha sa panan-aw sa Dios ug nga si Satanas walay gahum sa pagtintal kanila. Hangtud nga magsugod na sila nga mahimong responsable sa edad nga otso anyos, ang gagmay nga mga bata maluwas pinaagi sa Pag-ula ni Jesukristo nga walay panginahanglan nga maghinulsol o magpabunyag (tan-awa sa Moroni 8:8–15; D&P 29:46–47; 137:10).
Kinahanglan nga atong sundon ang kahibalo nga atong nabatunan kabahin sa ebanghelyo ni Jesukristo. Basaha ang Mosiah 3:12–13, ug linyahi ang mga pulong nga nagtudlo nga mahimo kita nga maluwas gikan sa atong mga sala ug magmalipayon kon mopakita kita og hugot nga pagtuo kang Jesukristo ug maghinulsol.
Hinumdumi ang imahe sa tasa nga gisudlan og “kalipay.” Hinumdumi ang mga pulong sa anghel nga nagpahayag nga ang kalipay naggikan sa pagsabut sa misyon ug Pag-ula sa Manluluwas (tan-awa sa Mosiah 3:4–5). Aron masabtan ang kaatbang niini nga imahe, basaha ang Mosiah 3:24–27. Linyahi ko unsay imnon sa adlaw sa paghukom niadtong mipili nga dili maghinulsol.
Unsay mahitabo niadtong mipili nga dili mopakita og pagtuo diha kang Jesukristo ug maghinulsol?
Human matudloi ang iyang katawhan mahitungod sa Pag-ula sa Manluluwas ug sa panginahanglan nga maghinulsol ug magbaton og hugot nga pagtuo diha sa Manluluwas, si Haring Benjamin mitudlo sa iyang katawhan kon unsaon sa pagtangtang sa makasasala nga bahin sa ilang kinaiya ug mamahimong mga Santos pinaagi sa Pag-ula.
Basaha ang Mosiah 3:19, ug pangitaa ang bisan unsa nga mga pulong nga wala nimo masabti. Tingali makatabang ang pagsulat og tulo ka mga kahulugan diha sa imong mga kasulatan duol niini nga bersikulo. Ang “kinaiyanhon nga tawo” mao ang tawo nga mipili nga maimpluwensyahan sa mga kahinam, mga tinguha, ug mga gana sa unod kay sa mga pag-aghat sa Balaang Espiritu. Ang “motugyan” nagpasabut nga monunot sa usa ka tawo o butang. Ang mga “pagdani” mao ang makahaylo o maanindot nga mga pagdapit. Ang Mosiah 3:19 usa ka scripture mastery passage. Mahimo nimo kining markahan sa lahi nga paagi aron makit-an nimo kini sa umaabut.
Isulat ang ulohan nga “Isalikway ang Kinaiyanhon nga Pagkatawo” diha sa imong scripture study journal. Ubos niini nga ulohan, paghimo og lista sa unsay gitudlo sa Mosiah 3:19 nga kinahanglan natong buhaton aron mabuntog ang “kinaiyanhon nga tawo.” Lingini ang usa ka buhat nga imong gibati nga maoy labing importante nimong trabahoon niining panahona. Paghimo og plano sa paggamit niini nga buhat.
Usa sa mga baruganan nga gitudlo sa Mosiah 3:19 mao nga kon kita motugyan ngadto sa mga pagdani sa Balaang Espiritu, makabuntog kita sa kinaiyanhon nga tawo pinaagi sa Pag-ula ni Kristo.
Sa imong kaugalingong mga pulong, unsay gipasabut sa pagtugyan “ngadto sa mga pagdani sa Balaang Espiritu”?
Basaha ang mosunod nga pamahayag gikan ni Elder Neal A. Maxwell sa Korum sa Napulog Duha ka mga Apostoles mahitungod sa pagsalikway sa kinainyanhon nga tawo: “Ang personal nga pagkamatarung, pagsimba, pag-ampo, ug pagtuon sa kasulatan mga importante kaayo aron sa ‘[pagsalikway sa] kinainyanhon nga tawo’ (Mosiah 3:19)” (“The Tugs and Pulls of the World,” Ensign, Nob. 2000, 36).
Tubaga ang mosunod nga pangutana diha sa imong scripture study journal: Sa unsang mga paagi nga nagtinguha ka sa pagtugyan ngadto sa mga pagdani sa Balaang Espiritu diha sa imong kinabuhi?
Unsay imong mabuhat aron mas hingpit nga motugyan “ngadto sa mga pagdani sa Balaang Espiritu” sa imong kaugalingong kinabuhi? Pagsulat og usa ka tumong diha sa imong scripture study journal nga makatabang nimo nga molambo niini nga dapit karong semanaha. Mahimo nimong ikonsiderar ang pag-ugmad sa usa sa mga kinaiya nga makatabang kanato nga mahimong sama sa usa ka bata, nga gilista diha sa Mosiah 3:19—sama pananglit, mahimong mas manunuton, maaghup, mapainubsanon, mapailubon, puno sa gugma, o mauyunon sa pagdawat sa tanan nga mga butang nga ang Ginoo nakakita nga “angay ipahamtang nganha” kanimo.
Isulat sa imong scripture study journal ang pipila sa mga babag diha sa imong kinabuhi nga nakapugong kanimo sa pagtugyan ngadto sa mga pagdani sa Espiritu.
Aron sa pagtabang kanimo nga mahinumduman o masag-ulo ang Mosiah 3:19, mahimo nimong basahon kini og katulo. Ang pagbalik-balik makatabang kanimo nga mahimong pamilyar sa sulod sa bersikulo. Human makabuhat niini, sulayi pagsulat ang bersikulo, o ang mga ideya diha sa bersikulo, kutob sa mahimo diha sa imong scripture study journal nga dili motan-aw sa imong mga kasulatan. Sulayi ang balik-balik nga pagsulti og kusog sa bersikulo sa lain-laing mga higayon, sama sa mga higayon nga naglakaw ka, nag-ehersisyo, o nangandam para matulog. Ang pagbuhat niini sulod sa pipila ka nagsunod nga mga adlaw makatabang kanimo sa pagsag-ulo ug paghinumdom sa importanting mga baruganan niini nga bersikulo.
Isulat ang mosunod diha ubos sa mga assignment karong adlawa diha sa imong scripture study journal:
Akong natun-an ang Mosiah 3 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: