Alma 45–49

Pasiuna

Human nga gihatagan ni Alma sa katapusang instruksyon ang anak niya nga si Helaman, mipalayo siya sa mga katawhan sa Nephi ug wala na siya igdungog pag-usab. Atol sa malisud nga mga panahon nga misunod alang sa mga Nephite, si Helaman ug si Kapitan Moroni nahimo nga ilang espiritwal ug lider sa militar. Si Amalickiah nga lider sa Lamanite sa iyang kahakog migukod sa dili matarung niyang mga tinguha, migamit og mga taktika nga sinunod sa yawa. Giandam ni Kapitan Moroni ang iyang mga tawo nga magmatinud-anon sa Dios atol sa peligrong mga panahon.

Alma 45

Si Helaman mituo sa mga pulong sa iyang amahan, nga si Alma, ug nagsugod sa iyang pangalagad

Hinumdumi ang gihimong pag-interbyu sa imong ginikanan o lider sa priesthood diha nimo. Hunahunaa ang matang sa mga pangutana nga gipangutana diha nimo. Sa wala pa mobiya si Alma palayo sa yuta, gipangutana niya si Helaman og tulo ka importanting mga pangutana. Basaha ang Alma 45:2–7, ug ilha ug markahi kining mga pangutana. (Ang “mga pulong” nga gipasabut ni Alma diha sa bersikulo 2 makita sa Alma 37:1.) Hunahunaa kon unsaon kaha nimo sa pagtubag ang mga pangutana ni Alma: Mituo ka ba sa mga kasulatan? Mituo ka ba ni Jesukristo? Tumanon ba nimo ang mga sugo?

Human nga gipahayag ni Helaman ang iyang pagpamatuod, gisultihan siya ni Alma mahitungod sa kaugmaon sa mga Nephite. Gipanagna niya ang ilang kalaglagan ug ang kalaglagan sa uban pang mga tawo kinsa mahinog na sa kadautan niining pinili nga yuta. Basaha ang Alma 45:16, ug hunahunaa ang mosunod nga kamatuoran niini nga bersikulo: ang Ginoo dili makatan-aw sa sala uban sa labing gamay nga matang sa pagtugot.

Aron matabangan ka sa pagsabut niini nga baruganan, hinumdumi nga pinaagi sa Iyang Pag-ula, gibayaran sa Manluluwas ang kantidad sa tanang sala kon kita maghinulsol ug magtinguha sa Iyang kapasayloan. Ang Dios dili makatugot sa sala sa bisan unsang matang. Hinoon, tungod kay ang Manluluwas andam nga mag-antus tungod og alang kanato, dili na kita mag-antus sa atong mga sala kon kita maghinulsol.

Basaha ang Doctrine Doktrina ug mga Pakigsaad 1:31–33. Mahimo nimong isulat kini nga mga bersikulo isip usa ka cross-reference duol sa Alma 45:16.

Tubaga ang mosunod nga pangutana diha sa imong scripture study journal: Unsa ang imong mga pagbati mahitungod sa Manluluwas kon ikaw maghunahuna mahitungod sa Iyang kaandam nga mobayad sa kantidad alang sa atong mga sala?

Sumala sa narekord sa Alma 45:20–24, gisugdan ni Helaman ang iyang pangalagad isip propeta sa Ginoo ug lider sa Simbahan. Siya ug ang ubang mga lider sa Simbahan mipili og mga pari ug mga magtutudlo sa tibuok nga kongregasyon, apan tungod sa panagbingkil ug nagtubo nga garbo ang mga tawo midumili sa pagpaminaw sa ilang mga lider.

Alma 46

Gipundok ni Kapitan Moroni ang mga matarung aron manalipud sa ilang mga katungod ug sa ilang relihiyon

Sumala sa narekord sa Alma 46:1–7, ang ubang tawo nga nasuko kang Helaman ug sa iyang mga kaigsoonan mipili nga mobiya sa Simbahan ug mosunod sa dautang mga tawo nga ginganlan og Amalickiah, kinsa gusto nga mahimong hari. Basaha ang Alma 46:8–10, ug pangitaa ang mga leksyon nga gusto ni Mormon nga atong makat-unan gikan niining peligro nga sitwasyon.

Aron matabangan sa pagpanalipud sa kalingkawasan sa mga tawo, si Moroni, kinsa mao ang labaw nga kapitan sa mga sundalo nga Nephite, migisi sa iyang kupo ug gigamit ang piraso niini sa paghimo og usa ka “bandila sa kalingkawasan” sa pagpundok sa mga tawo aron manalipud sa kalingkawasan.

Basaha ang Alma 46:12–13, ug markahi kon unsay gisulat ni Moroni diha sa bandila sa kalingkawasan. Hibaloi kon giunsa niya sa pag-andam ang pagpresentar sa bandila sa kalingkawasan ngadto sa mga tawo. Pamalandunga kon unsay gitudlo niini nga mga bersikulo kanimo mahitungod ni Moroni. Basaha usab ang Alma 48:11–13, 17–18 aron makabaton og dugang pang panabut sa kinaiya ni Kapitan Moroni. Mahimo nimong markahan ang mga kinaiya ni Moroni nga gusto nimong mas mapalambo sa kaugalingon nimong kinabuhi.

Diha sa imong scripture study journal, isulat ang usa o daghan pang mga kinaiya ni Moroni gikan sa Alma 46:12–13 ug sa Alma 48:11–13, 17–18. Ipasabut nganong ganahan ka nga makabaton niini nga mga kinaiya ug unsaon nimo sa pagpaningkamot nga mapalambo kini.

Basaha ang Alma 46:18–22, ug tan-awa kon giunsa sa mga tawo sa pagsanong ang pagdapit ni Moroni sa pagpakig-away alang sa kalingkawasan. Ang pakigsaad nga gihulagway sa bersikulo 20 usa ka espesyal nga saad nga gihimo niini nga grupo sa mga Nephite ngadto sa Dios.

Sumala sa Alma 46:20, nganong gusto man ni Moroni nga ang mga Nephite mohimo og pakigsaad uban sa Dios nga ilang mapanalipdan ang ilang mga katungod ug ilang relihiyon?

Sumala sa narekord sa Alma 46:28–37, ang mga Nephite nga mitipon ni Kapitan Moroni nakadakop sa mga sundalo ni Amalickiah. Hinoon, si Amalickiah ug pipila sa uban miikyas ug mitipon sa mga Lamanite. Daghan sa mga sumusunod ni Amalickiah nga nadakpan misulod sa pakigsaad sa pagsuporta sa kagawasan. Kadtong dili mohimo pagapatyon. Gikan sa mga kasinatian sa mga Nephite, atong makat-unan kini nga baruganan: Kon magmaisugon kita sa pagtuman sa mga sugo sama sa gihimo ni Kapitan Moroni, ang Dios molig-on ug mopanalangin kanato.

Human sa pakig-away, si Kapitan Moroni mipakayab sa bandila sa kalingkawasan ngadto sa matag tore sa mga Nephite isip usa ka “sumbanan” o pahinumdom kon unsay ilang gipakigsaad nga pakigbatukan ug panalipdan (tan-awa sa Alma 46:36).

Diha sa Alang sa Kalig-on sa Kabatan-onan nga booklet, ang Unang Kapangulohan miingon: “Among minahal nga batan-ong mga lalaki ug batan-ong mga babaye, kami adunay dakong pagsalig kaninyo. Kamo minahal nga anak nga mga lalaki ug anak nga mga babaye sa Dios ug Siya naghunahuna kaninyo. Kamo miabut sa yuta sa usa ka panahon nga adunay daghang mga oportunidad ug usab daghang mga hagit. Ang mga sumbanan niini nga booklet makatabang kaninyo diha sa importante nga mga pagpili nga inyong gihimo karon ug himoon pa sa umaabut. Kami mosaad nga kon kamo mosunod sa mga pakigsaad nga inyong gihimo ug niini nga mga sumbanan, kamo panalanginan og pagpakig-uban sa Espiritu Santo, ang inyong pagtuo ug pagpamatuod mas molig-on, ug inyong matagamtaman ang nagkadako nga kalipay” ([2011], ii).

Gikan sa imong nakat-unan niana nga mensahe gikan sa Unang Kapangulohan, tubaga ang mosunod nga mga pangutana diha sa imong scripture study journal:
1. Unsa ang mga saad nga gihimo para kanimo kon imong tumanon ang mga pakigsaad sa ebanghelyo nga imong gihimo ug sa mga sumbanan diha sa Alang sa Kalig-on sa mga Kabatan-onan nga booklet?
2. Tan-awa ang mga sulod nga pahina sa Alang sa Kalig-on sa mga Kabatan-onan nga booklet, ug pagpili og usa sa mga sumbanan diha sa booklet. Sa unsang paagi ang pagtuman niini nga sumbanan nakapanalangin sa imong kinabuhi, o sa unsang paagi kini mopanalangin sa imong kinabuhi sa umaabut?

Alma 47

Si Amalickiah nahimong hari sa mga Lamanite pinaagi sa pagluib ug panglingla

Unsay imong buhaton kon naa ka sa gubat ug dunay tawo nga mipakita kanimo og usa ka libro nga nagpadayag unsay giplano sa imong kaaway sa pagguba kanimo ug sa imong pamilya? Ang Alma 47 makahatag og pipila ka mga panabut sa mga plano sa atong kaaway, ang panulay.

Ang Alma 47 nagrekord og daghang mga panglingla nga gigamit ni Amalackiah para mahimong hari sa mga Lamanite aron iyang madala ang mga sundalo nga Lamanite sa gubat batok sa mga Nephite. Ang iya gayud nga tinguha mao ang pagdala sa tanang mga Nephite ngadto sa pagkaulipon, uban kaniya isip ilang hari.

Si Amalackiah ug ang iyang mga sumusunod nangadto una sa yuta sa Nephi, diin nagpuyo ang mga Lamanite. Ang Hari sa mga Lamanite nagtinguha nga moadto sa pakig-away sa mga Nephite, apan daghan sa iyang mga katawhan nangahadlok. Mao nga ang hari mihangyo ni Amalickiah sa pagpugos sa nangahadlok nga mga Lamanite nga moapil sa pakig-away. Si Amalickiah miadto sa bukid nga gitagoan niining mga tawhana, apan dili siya gustong motabang sa hari. Gusto niya nga mahimo siyang lider sa nangahadlok nga mga Lamanite pinaagi sa pag-ilad sa ilang lider, nga si Lehonti, sa pagkanaog gikan sa bungtod nga iyang gitagoan. Tuyo ni Amalickiah nga patyon si Lehonti pinaagi sa hilo human siya mokanaog.

Tun-i ang Alma 47:10–12. Kapila ka higayon gitintal ni Amalackiah si Lehonti nga mobiya sa iyang dapit sa kasiguroan? Basaha usab ang Alma 47:17–19. Giunsa sa pagpatay ni Amalickiah si Lehonti human siya nanaog sa bungtod?

Si Elder Robert D. Hales sa Korum sa Napulog Duha ka mga Apostoles mitudlo nga ang mga tawo karon mahimong mosulay sa pagguba sa atong pagtuo ug pagpamatuod pinaagi sa pagtintal kanato sa pagbiya sa atong mga dapit sa espirituhanong kasiguroan ug moadto sa teritoryo sa panulay: “Sa basahon ni Mormon, nakabasa kita kabahin ni Lehonti sa iyang mga tawo nga nagkampo sa usa ka bungtod. Ang mabudhion nga si Amalickiah miawhag ni Lehonti sa ‘pagkanaog’ ug makigkita niya sa walog. Apan dihang si Lehonti mibiya sa bungtod, gihiloan siya ‘sa hinay-hinay’ hangtud nga siya namatay ug ang iyang kasundalohan naadto sa mga kamot ni Amalickiah (tan-awa sa Alma 47). Pinaagi sa mga argumento ug mga akusasyon, ang ubang mga tawo molansis kanato sa pagbiya sa taas nga lugar. Sa taas nga lugar anaa diha ang kahayag. … Mao kini ang luwas nga lugar. Kini tinuod ug ang kahibalo anaa dinhi niini” (“Kristohanong Kaisug: Ang Bugti sa Pagkadisipulo,” Ensign o Liahona, Nob. 2008, 74).

Tubaga ang mosunod nga mga pangutana diha sa imong scripture study journal:
1. Unsa ang pipila ka mga paagi nga si Satanas magtinguha nga kita “mokanaog” gikan sa espiritwal nga taas nga dapit?
2. Si Satanas kaha mosulay sa pag-agni sa batan-ong mga tawo nga ipaubos ang ilang mga sumbanan “sa hinay-hinay”? Unsay usa ka ehemplo nga iyang gisulayan sa paghimo niini?
3. Unsa ang piho nga butang ang imong mahimo aron magpabilin sa mas taas nga espiritwal nga dapit? Unsa nga sumbanan sa ebanghelyo ang imong gikinahanglan nga trabahoon aron dili iubos kini nga sumbanan “sa hinay-hinay”?

Sama sa iyang gibuhat kang Amalikiah, tinguha ni Satanas ang paglaglag ug paglingla kanato og hinay-hinay aron mapaubos ang atong mga sumbanan.

Alma 48–49

Gidasig ni Kapitan Moroni ang mga Nephite nga palig-unon ang ilang kaugalingon sa pisikal ug sa espiritwal nga paagi

Samtang si Amalickiah naningkamot sa pag-angkon og gahum pinaagi sa “limbong ug lipot” (Alma 48:7) sa mga Lamanite ug sa mga Nephite, si Moroni naglihok sa lahi kaayo nga pamaagi. Basaha ang Alma 48:7–10, ug pangitaa kon unsay gihimo ni Moroni dihang nahibalo siya nga si Amalickiah na unya ang magdala sa mga sundalo nga Lamanite batok sa mga Nephite. Mahimo nimong markahan kini nga mga ideya: (1) Giandam niya ang mga tawo sa pagmatinud-anon sa Dios sa mga panahon sa kalisud (tan-awa sa bersikulo 7). (2) Gitabangan niya ang mga tawo sa paglig-on sa mga dapit diin sila huyang (tan-awa sa mga bersikulo 8–9). (3) Giandam niya ang mga tawo sa pagsuporta ug pagpanalipud sa “tumong sa mga Kristiyanos,” o sa Simbahan (tan-awa sa bersikulo 10).

Sama sa pagtabang ni Moroni sa iyang mga tawo nga maandam ug makalahutay sa lisud nga mga panahon, ang mga lider sa Simbahan sa atong panahon mihatag kanato og tambag sa pagtabang aron maandam kita alang sa mga panahon sa kalisdanan. Hunahunaa ang pagsulat sa mosunod nga kamatuoran diha sa imong mga kasulatan duol sa Alma 48:7–10: Kon atong sundon ang tambag sa mga sulugoon sa Ginoo, maandam kita sa mga kalisdanan sa kinabuhi.

Ang mga Lamanite sa sinugdanan nagplano sa pagsulong sa siyudad sa Ammonihah ug dayon sa siyudad sa Noah, nga mao ang huyang nga mga siyudad sa Nephite. Basaha ang Alma 49:4–5 aron mahibaloan unsay tubag sa mga Lamanite dihang nakita nila ang pagpangandam sa mga Nephite didto sa siyudad sa Ammonihah. Ang mga Lamanite mihukom nga dili mosulong sa siyudad tungod kay andam kaayo kini batok sa pagsulong. Basaha ang Alma 49:12–14 aron makita ang tubag sa mga Lamanite dihang gisulayan nila sa pagsulong ang siyudad sa Noah.

Gahini og pipila ka minutos ang pagribyu sa pipila ka mga pakigpulong gikan sa labing bag-o nga kinatibuk-ang komperensya (diha sa Ensign o Liahona). Sa imong scripture study journal, i-summarize ang tambag nga gihatag sa usa o mas daghan pang mga mamumulong. Sa unsang paagi kini nga tambag makatabang nimo nga maandam alang sa malisud nga mga panahon sa imong kinabuhi? Unsaon nimo sa paggamit kini nga tambag sa imong kinabuhi?
Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Alma 45–49 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: