Ether 6

Pasiuna

Human makaandam sumala sa mga sugo sa Ginoo, ang mga Jaredite misakay sa ilang mga sakayan ug misalig sa Ginoo nga modala nila sa luwas nga paagi sa ilang lisud nga biyahe paingon sa gisaad nga yuta. Mipadala ang Ginoo og mga hangin nga mikuso-kuso sa mga kasko diha sa mga balud ug mipatidlum niini sa dagat sa daghang higayon, apan kadtong sama nga mga hangin maoy mipadpad niini paingon sa gisaad nga yuta. Human makaestablisar sa ilang kaugalingon sa bag-ong dapit, ang mga tawo mipili og usa ka hari bisan pa man sa mga pasidaan gikan sa igsoon nga lalaki ni Jared.

Ether 6:1–12

Ang Ginoo mipapadpad sa mga kasko sa mga Jaredite pinaagi sa hangin paingon sa gisaad nga yuta

Dunay mga panahon nga tingali mobati kita nga lisud ang pagbuhat sa unsay gipangayo sa Ginoo, sama sa pagpakigbahin sa ebanghelyo sa usa ka higala, pagpabilin nga limpyo sa moral nga paagi, pagpili og mga higala nga dunay taas nga mga sumbanan, ug pagtakda og husto nga mga prayoridad sa kinabuhi. Makahunahuna ka ba og ubang mga ehemplo diin lisud ang pagbuhat sa unsay gipangayo sa Ginoo?

Ang istorya bahin sa biyahe sa mga Jaredite paingon sa gisaad nga yuta nagtudlo og mga baruganan nga makagiya nimo kon makita nimo nga lisud ang pagbuhat sa unsay gimando sa Ginoo. Basaha ang Ether 2:24–25, ug pangitaa kon unsay gipasidaan sa Ginoo sa mga Jaredite nga makapalisud sa ilang biyahe paingon sa gisaad nga yuta.

Aron mabuntog kining mga kalisdanan, gimanduan sa Ginoo ang mga Jaredite nga maghimo og mga kasko nga “hugot sama ngadto sa usa ka tadyaw” (Ether 2:17), nga dunay mga lungag sa ibabaw ug sa ubos nga ilang matangtang aron dunay hangin. Basaha ang Ether 6:1–4, ug hibaloi ang ubang mga paagi nga gipaandam sa Ginoo sa mga Jaredite alang sa kalisud sa pagbiyahe.

Mahimong makatabang kini nga masabtan nga ang “nagtugyan sa ilang mga kaugalingon ngadto sa Ginoo nga ilang Dios” (Ether 6:4) nagpasabut nga gisalig sa mga Jaredite ang ilang kaugalingon ngadto sa Dios aron maatiman ug mapreserbar sila.

Tubaga ang mosunod nga mga pangutana diha sa imong scripture study journal:
1. Nganong lisud man unta alang sa mga Jaredite nga mosalig sa Ginoo niini nga sitwasyon?
2. Sa imong hunahuna nganong ang pagpangandam ug pagtugyan sa ilang kaugalingon ngadto sa Ginoo mahinungdanon man?

Samtang magbasa sa Ether 6:5–11, sulayi sa paghunahuna unsa kaha ang bation kon magbiyahe sa usa ka kasko sa mga Jaredite.

Aron matabangan ka nga maandam sa pagtino sa mga baruganan sa ebanghelyo nga imong makat-unan gikan niini nga istorya, tubaga ang mosunod nga mga pangutana diha sa imong scripture study journal:
1. Giunsa sa pagpakita sa mga Jaredite ang ilang pagsalig sa Ginoo atol sa ilang lisud nga biyahe? (tan-awa sa Ether 6:7, 9).
2. Giunsa sa pagpanalangin sa Dios kanila atol sa ilang biyahe?

Human sa dul-an sa usa ka tuig diha sa katubigan, ang biyahe sa mga Jaredite nahuman na sa katapusan. Basaha ang Ether 6:12, ug hibaloi kon unsay ilang gibati sa dihang miabut sila sa gisaad nga yuta. I-summarize kon unsay imong nakat-unan niini nga leksyon pinaagi sa pagkompleto sa mosunod nga pamahayag sa baruganan: Samtang mosalig kita sa Ginoo ug mobuhat sa Iyang kabubut-on, Siya .

Usa ka paagi sa pagkompleto niining pamahayag mao ang pinaagi sa mga pulong nga “mogiya sa dagan sa atong kinabuhi.” Aron mapalambo ang imong pagsabut niini nga baruganan, balik ngadto sa mga sitwasyon nga tingali mobati kita nga lisud ang pagbuhat sa unsay gipangayo sa Ginoo, nga gilista diha sa sinugdanan sa leksyon. Sama sa Iyang gibuhat sa mga Jaredite, giandam kita sa Ginoo sa pagbuntog sa kalisdanan nga atong atubangon sa kinabuhi samtang kita mag-ampo, mosunod sa propeta, ug motuman sa mga sugo.

Sa imong scripture study journal, irekord kon sa unsang paagi nga ang usa ka tawo mahimong mopakita og pagsalig sa Ginoo. Base sa ehemplo sa mga Jaredite, unsay kinahanglan natong buhaton kon mag-atubang og lisud nga sugo gikan sa Ginoo?
Pamalandunga ang mosunod nga baruganan: Kon moslaig kita sa Ginoo, ang kalisdanan makatabang kanato nga mouswag ug maangkon ang gisaad nga mga panalangin. (Mahimo nimo kining isulat diha sa imong mga kasulatan tupad sa Ether 6:5–10.) Sa imong scripture study journal, tubaga ang mosunod nga mga pangutana:
1. Sa unsang paagi nga mibati ka nga ikaw miuswag ug nakaangkon og mga panalangin pinaagi sa matinud-anong paglahutay sa kalisdanan nga imong nasagubang o kasamtangang gisagubang sa imong kinabuhi?
2. Sa unsa kaha nga paagi nga mas mosalig ka sa Ginoo ug mosunod sa Iyang mga direksyon sa lisud nga mga sitwasyon nga mahimo nimong sagubangon?

Ether 6:13–18

Ang mga Jaredite nagtudlo sa ilang mga anak sa paglakaw nga mapainubsanon sa atubangan sa Ginoo

Hunahunaa nga ikaw, sama sa mga Jaredite, mao pa lang ang pagtabok sa kadagatan ug miabut sa usa ka dapit nga bag-o gayud alang nimo. Basaha ang Ether 6:13–18, ug hunahunaa ang mosunod nga mga pangutana: unsa kaha ang pipila ka ehemplo sa unsay gipasabut sa paglakaw nga mapainubsanon sa atubangan sa Ginoo? Giunsa ka pag-awhag sa imong mga ginikanan ug sa uban sa paglakaw nga mapainubsanon sa atubangan sa Ginoo? Sa imong hunahuna unsay relasyon tali sa paglakaw nga mapainubsanon ug sa tinudloan gikan sa kahitas-an? Kanus-a ka mibati nga ikaw “gitudloan gikan sa kahitas-an”? (Ether 6:17).

Isulat ang mosunod diha sa ubos sa mga buluhaton karong adlawa sa imong scripture study journal:

Akong natun-an ang Ether 6 ug nahuman kini nga leksyon niadtong (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: