Alma 6–7

Pasiuna

Human matudloan ang mga tawo sa Zarahemla ug sa pagpahiluna nga hapsay sa Simbahan, miadto si Alma sa siyudad sa Gideon. Nakita niya ang mga lumulupyo didto nga mas matinud-anon kay sa mga tawo sa Zarahemla. Mao nga, iyang giawhag ang mga tawo sa Gideon nga ipadayon ang pagsalig sa Ginoo ug tinguhaon nga magamit ang Pag-ula sa ilang kinabuhi. Ang pagpamatuod ni Alma kang Jesukristo makatabang nga imong mas masabtan ang sukod sa Pag-ula ni Jesukristo ug magtudlo kanimo unsaon sa pagdawat sa mga panalangin matag adlaw sa Iyang Pag-ula samtang padayon kamo sa dalan ngadto sa gingharian sa Dios.

Alma 6

Gilig-on ni Alma ang Simbahan sa Zarahemla ug miadto sa Gideon sa pagsangyaw

Kompletuha ang mosunod nga sentence: Misimba ko tungod kay .

Samtang magtuon ka sa Alma 6, hunahunaa kon sa unsang paagi ang pagsabut sa mga katuyoan sa mga miting sa Simbahan maghimo sa mga miting nga mas makahuluganon para nimo.

Sa wala pa mobiya si Alma sa Zarahemla, gilig-on niya ang Simbahan didto. Basaha ang Alma 6:1–4, ug ilha ang duha o tulo ka hugpong sa mga pulong nga naghulagway sa mga responsibilidad sa mga lider sa priesthood sa Simbahan.

Usa ka importanting baruganan nga atong makat-unan gikan sa kasinatian ni Alma mao kini: Sa atong panahon, ingon man sa kapanahunan sa basahon ni Mormon, ang Simbahan giestablisar alang sa kaayohan sa mga katawhan. Basaha ang Alma 6:5–6, ug markahi ang mosunod nga duha ka hugpong sa mga pulong nga: “sa pagpamati sa pulong sa Dios” ug “makighiusa diha sa pagpuasa ug sa hugot nga pag-ampo alang sa kaayohan sa mga kalag kinsa wala makaila sa Dios.” Kini nga mga pulong nagpaila sa mga paagi diin ang Simbahan naghatag og mga oportunidad sa tanang tawo sa pagtubo ug pagtabang sa uban. Hunahunaa sa unsang paagi kaha ang mga miyembro sa Simbahan sa Zarahemla mikompleto sa sentence nga imong gikompleto sa ibabaw.

Pagsulat og pipila ka mga ideya diha sa imong scripture study journal kon sa unsang paagi ang pag-adto sa simbahan alang sa mga rason nga gisulat sa Alma 6:5–6 makahimo og kalainan sa imong kasinatian sa simbahan.

Ang mga panalangin sa pagkamiyembro sa Simbahan gituyo alang sa tanang mga anak sa Dios. Si Elder Jeffrey R. Holland sa Korum sa Napulog Duha ka mga Apostoles mitudlo:

“Ang tanan mag-ampo alang sa mga misyonaryo. Unta buhaton kini sa kanunay. Nianang sama nga diwa, kinahanglan usab kitang mag-ampo alang niadtong kinsa (o kinsa kinahanglan nga) makighimamat sa mga misyonaryo. Sa Zarahemla, ang mga miyembro sa gisugo nga ‘makighiusa diha sa pagpuasa ug sa hugot nga pag-ampo’ [Alma 6:6] alang niadtong wala pa magpasakop sa Simbahan sa Dios. Kita makabuhat sa ingon.

“Mahimo sab kitang mag-ampo matag adlaw alang sa personal natong misyonaryo nga mga kasinatian. Mag-ampo nga ubos sa balaang pagdumala sa maong mga butang, ang misyonaryo nga oportunidad nga imong gusto maandam ang kasingkasing sa tawo kinsa nangandoy ug nangita sa unsay anaa kanimo. ‘Aduna pay daghan sa ibabaw sa yuta … kinsa natago gikan sa kamatuoran tungod kay sila wala masayud asa kini pangitaa’ [D&P 123:12]. Pag-ampo nga sila makakita kaninyo! Ug dayon pagmaabtik, tungod kay adunay daghan sa inyong kalibutan kinsa mibati og kagutom sa ilang kinabuhi, dili kagutom sa tinapay o pan, dili kauhaw sa tubig, apan sa pagpaminaw sa pulong sa Ginoo [tan-awa sa Amos 8:11]” (“Witnesses unto Me,” Ensign, Mayo 2001, 15).

Sa pag-uyon sa tambag ni Elder Holland, ikonsiderar ang pag-ampo ngadto sa Langitnong Amahan sa pagtabang nga imong maila ug malihok ang misyonaryo nga mga oportunidad nga giandam alang kanimo. Tinguhaa ang mga oportunidad sa pagdapit sa uban nga ikapaambit ang mga panalangin nga imong natagamtam isip miyembro sa Simbahan.

Alma 7:1–13

Si Alma mitudlo sa mga tawo ni Gideon mahitungod sa Pag-ula ni Jesukristo

Hunahunaa nga nakigsulti ka mahitungod sa paghinulsol ngadto sa imong mga higala kinsa mga aktibong miyembro sa Simbahan. Ang imong mga higala wala magtuo nga nakahimo sila og dagkong mga sala ug naghunahuna unsaon kaha nila sa pagsinati ang gahum sa Pag-ula. Hunahunaa kon unsa kaha ang imong ipaambit niini nga mga higala. Hinumdumi kini nga mga ideya samtang magtuon ka sa Alma 7:1–13.

Human mibiya sa Zarahemla, nakig-istorya si Alma sa mga tawo sa siyudad sa Gideon. Basaha ang Alma 7:3–6 sa pagsusi kon unsa nga espirituhanong kahimtang ang gipanghinaot ni Alma nga makita tali sa mga tawo sa Gideon. Dayon basaha ang Alma 7:17–19 aron mahibaloan kon ang mga panghinaot ni Alma kumpirmado na. Sa nagsunod nga mga linya, ihulagway ang espirituhanong kondisyon sa mga tawo sa Gideon:

Basaha ang Alma 7:7–10, ug pangitaa ang mga hitabo nga gibati ni Alma nga limportante kaayong mahibaloan sa mga tawo ug unsay gikinahanglang buhaton aron maandam alang niini.

Tubaga ang mosunod nga pangutana diha sa imong scripture study journal: Ngano kaha nga sultihan pa man ni Alma ang mga tawo nga may lig-on nang pagpamatuod (tan-awa sa Alma 7:17) nga sila nagkinahanglang maghinulsol aron maandam sa pag-anhi sa Manluluwas? (Tan-awa sa Mga Taga-Roma 3:23.)

Gitudloan ni Alma ang mga tawo sa Gideon niining importante nga baruganan: Si Jesukristo nag-antus aron pagluwas kanato gikan sa sala ug kamatayon ug pagtabang kanato latas sa mga hagit sa mortalidad. Basaha ang Alma 7:11–13, ug markahi diha sa imong mga kasulatan ang mga kondisyon diin ang Manluluwas andam nga “modala” sa Iyang kaugalingon alang sa atong kaayuhan.

Makatabang ang pagkahibalo nga ang mga kahuyang mao ang kawalay katakus, o mga sakit—ang pulong nagpasabut og daghang matang sa mga problema. Ang pulong nga pagtabang nagpasabut sa pagtabang panahon sa panginahanglan o kalisdanan. Sa Latin ang buot ipasabut niini mao ang pagpangayo og tabang ngadto sa uban, nga nagpasabut sa dako kaayong tinguha sa Dios sa pagtabang kanato.

Sunod sa Alma 7:11–13 diha sa imong mga kasulatan o sa imong scripture study journal, mahimo nimong isulat ang mosunod nga pamahayag gikan ni Elder Bruce C. Hafen, kinsa nagserbisyo isip sakop sa Seventy: “Ang Pag-ula dili lamang alang sa mga makasasala” (“Beauty for Ashes: The Atonement of Jesus Christ,” Ensign, Abr. 1990, 7). (Ang Alma 7:11–13 usa ka scripture mastery passage. Mahimo nimong markahan kini sa lahi nga paagi aron mapangita nimo kini sa umaabut.)

Ang mosunod nga tsart naglakip sa mga pulong gikan sa Alma 7:11–13 nga naghulagway sa mga kahimtang nga gidala sa Manluluwas sa Iyang kaugalingon. Drowinga ang tsart diha sa imong scripture study journal, ug dayon pilia ang pipila niini nga mga pulong ug isulat ang mga ehemplo kon sa unsang paagi nimo o sa mga tawo nga imong kaila nasinati kini nga mga kahimtang. Hunahunaa kon unsay ipasabut nga si Jesukristo ang modala niining mga butanga sa Iyang kaugalingon.

Mga kasakit
Mga balatian
Mga pagtintal
Mga sakit
Kamatayon
Mga kahuyang
Mga sala

Gipakigbahin ni Elder Jeffrey R. Holland ang mosunod nga pagpamatuod nga ang Pag-ula makawagtang sa atong mga palas-anon gikan kanato:

“Aduna ka bay pakigbugno sa kadautan sa pagka-adik—tabako o drugas o sugal, o ang makaamong karong pagkaylap sa pornograpiya? Ang inyong kaminyoon aduna bay kagubot o ang inyong anak anaa sa kakuyaw? Naglibug ka ba sa imong pagkatawo [gender] o nagpangita ka ba og kaugalingong kalipay? Ikaw ba—o imong minahal—nag-antus og sakit o kalisud o kamatayon? Bisa’g unsa nga uban pa nga paagi nga kinahanglan nga imong buhaton aron pagsulbad niining mga suliran, duol una sa ebanghelyo ni Jesukristo. Salig sa mga saad sa Langit. Kabahin niana nga pagpamatuod ni Alma ako nagpamatuod: ‘ako nasayud,’ miingon siya, ‘nga kinsa ang mobutang sa ilang pagsalig diha sa Dios pagabuligan sa ilang mga pagsulay, ug sa ilang mga kasamok, ug sa ilang mga kasakit’ [Alma 36:3].

“Kini nga pagsalig diha sa maloloy-ong kinaiya sa Dios mao gayud ang katuyoan sa ebanghelyo nga gitudlo ni Kristo. Ako nagpamatuod nga ang Pag-ula sa Manluluwas motangtang gikan kanato dili lang kay sa gibug-aton sa atong mga sala, apan usab sa gibug-aton sa atong mga kapakyasan ug kagul-anan, sa atong kasakit ug ka walay paglaum [tan-awa sa Alma 7:11–12]. Gikan sa sinugdanan, ang pagsalig niana nga pagtabang nakahatag nato og hinungdan ug paagi nga molambo, usa ka pagdasig sa paglikay sa atong kaugalingon gikan sa mga sala ug maninguha sa atong kaluwasan” (“Mga Butang nga Guba Mahimong Ayohon,” Ensign o Liahona, Mayo 2006, 70–71).

Isulat sa imong scripture study journal ang imong mga pagbati alang kang Jesukristo ug unsay Iyang nahimo alang kanimo pinaagi sa Pag-ula. Dayon tubaga ang usa o ang tanan sa mosunod nga hut-ong sa mga pangutana:
1. Kanus-a ang Pag-ula nakatabang kanimo sa usa sa mga paagi nga gihulagway ni Alma sa Alma 7:11–13? Sa unsang paagi ang Pag-ula nakatabang kanimo nianang higayuna?
2. Sa unsang paagi nga ang Pag-ula sa Manluluwas makatabang sa hagit nga kasamtangan nimong giatubang? Unsay imong buhaton aron makasalig sa Pag-ula samtang nag-atubang niini nga hagit?

Scripture Mastery—Alma 7:11–13

Samtang ang Alma 7:11–13 usa ka taas nga scripture mastery passage, naglakip kini og piho nga mga pulong nga makatabang nimo sa paghinumdom sa kamahinungdanon ug gahum sa Pag-ula sa tibuok nimong kinabuhi. Aron matabangan ka sa pagmemorya niining mga keyword, isulat og balik ang Alma 7:11–13 sa lahi nga papel, nga ipabilin ang mga pulong nga diha na daan sa tsart sa pagsugod sa leksyon. Basaha ang sinulat nimo nga bersyon niini nga kasulatan hangtud imong masulatan ang nawala nga mga pulong nga walay pagtan-aw sa mga kasulatan. Mahimo nimong ribyuhon kini nga mga bersikulo sa mosunod nga pipila ka adlaw aron matabangan ka sa paghinumdom unsay mahimo sa Manluluwas kanimo ug sa uban sa tibuok nimong kinabuhi. Sulayi ang imong scripture mastery sa Alma 7:11–13 pinaagi sa pag-recite og kusog niini sa imong kaugalingon og ngadto sa sakop sa pamilya o higala o pinaagi sa pagsulat niini diha sa imong scripture study journal.

Alma 7:14–27

Giawhag ni Alma ang mga tawo sa pagpadayon sa dalan padulong sa gingharian sa Dios

Basaha ang Alma 7:19 sa paghinumdom sa unsang paagi gihulagway ni Alma ang esprituhanong kahimtang sa mga tawo sa Gideon. Nagtudlo si Alma niining importante nga baruganan: Pinaagi sa pagsunod sa mga baruganan sa ebanghelyo, nagsubay kita sa dalan padulong sa gingharian sa Dios. (Ang gingharian sa Dios mao ang celestial nga gingharian.) Siksika ang Alma 7:14–16, ug badlisi ang mga pulong ug hugpong sa mga pulong nga nagpakita kon unsay angay natong buhaton aron masubay ang dalan nga magtultol kanato ngadto sa gingharian sa Dios. Dayon siksika ang Alma 7:22–25, ug badlisi ang mga pulong ug hugpong sa mga pulong nga nagpakita unsay angay nga kita mamahimo aron makasubay niini nga dalan.

Pagdrowing og dalan sa imong scripture study journal gikan sa pinakaubos nga walang bahin sa usa ka pahina padulong sa tuong bahin sa pahina. Isulat ang Mortalidad sa kinaubsan sa dalan, ug isulat ang Ang Gingharian sa Dios sa ibabaw sa dalan. Subay sa dalan, isulat unsay angay nimong buhaton ug unsay angay nga ikaw mamahimo nga magtultol kanimo ngadto sa gingharian sa Dios.
Pagpili og usa ka lihok o aksyon gikan sa dalan, ug isulat unsay imong nakita nga gibuhat sa uban niini. Pagpili og usa ka kalidad gikan sa dalan, ug isulat kon unsay imong nakita sa uban nga mamahimong ingon niini. Paghimo og tumong nga makatabang nimo sa paglambo niining duha ka dapit aron ugma damlag makasulod ka sa gingharian sa Dios.

Basaha ang Alma 7:27, ug pangitaa ang mga panalangin nga nahibaloan ni Alma nga madawat sa mga tawo kon magpadayon sila sa hugot nga pagtuo ug maayong mga buhat. Hinumdumi nga kon subayon nimo ang dalan padulong sa gingharian sa Dios, madawat usab nimo kini nga mga panalangin.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Alma 6–7 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: