Unit 10: Day 4

Jarom ug Omni

Pasiuna

Ang mga basahon ni Jarom ug Omni naglakip sa katapusang mga sinulat gikan sa gagmay nga mga palid ni Nephi. Si Jarom nakadawat sa mga palid gikan sa iyang amahan, si Enos, ug mirekord sa mga panglimbasug ug mga panalangin sa mga Nephite sulod sa gibana-bana nga 60 ka tuig. Dayon iyang gipasa ang mga palid ngadto sa iyang anak nga si Omni. Ang basahon ni Omni naglakip sa mga sinulat sa lima ka lain-laing mga tigtipig og rekord nga Nephite ug milangkob sa gibana-bana nga 230 ka tuig.

Jarom 1:1–15; Omni 1:5–7

Si Jarom naghulagway kon sa unsang paagi ang mga Nephite miuswag kon sila nagsunod sa mga sugo sa Ginoo

Aron mangandam sa pagtuon og usa ka importanting baruganan nga gitudlo diha sa Jarom ug Omni, basaha ang mosunod nga kasinatian nga gipakigbahin ni Presidente Dieter F. Uchtdorf sa Unang Kapangulohan:

“Nahinumdom ako sa dihang nangandam ako nga bansayon isip usa ka fighter pilot. Migahin kami og dugay kaayo nga panahon sa among pasiuna nga military training sa pisikal nga pagbansay. Sa gihapon wala ako sa tinud-anay makasiguro kon ngano nga ang walay katapusan nga pagdagan gikonsiderar nga ingon niana ka mahinungdanon nga bahin sa pagpangandam sa pagkahimong usa ka piloto. Bisan pa niana, kami mibalik-balik og dagan ug midagan pa og mas daghan.

“Samtang ako nagdagan nakamatikod ko og usa ka butang nga, sa prangka nga pagkasulti, misamok kanako. Kanunay ako nga maapsan sa mga tawo kinsa motabako, moinom, ug nagbuhat sa tanang butang nga supak sa ebanghelyo ug ilabi na gayud sa Pulong sa Kaalam.

“Nahinumdom ako nga naghunahuna, ‘Taym pa usa! Dili ba unta nga makadagan ako ug dili maluya?’ Apan naluya ako, ug naapsan ako sa mga tawo kinsa piho nga wala magsunod sa Pulong sa Kaalam. Akong itug-an, nga nakasamok kini kanako niadtong higayuna. Nangutana ko sa kaugalingon, ang saad tinuod ba o dili?” (“Ipadayon ang Pagpailub,” Ensign o Liahona, Mayo 2010, 58).

Naghunahuna ba ka kon tumanon o sa unsang paagi tumanon sa Ginoo ang Iyang saad nga mopanalangin kanimo sa pagsunod sa Iyang mga sugo?

Si propeta Jarom, kinsa anak ni Enos, mipasabut kon sa unsang paagi ang usa ka piho nga saad sa Ginoo ngadto sa iyang mga amahan namatud-an, o naprubahan nga tinuod. Basaha ang Jarom 1:9, ug markahi ang saad nga gimatud-an sa Ginoo ngadto sa katawhan.

1. Si Jarom mipakita nga samtang kita mosunod sa mga sugo sa Dios, kita molambo. Aron makakita og mga ehemplo niini nga kamatuoran, tun-i ang matag usa sa mga scripture reference sa ubos, ug tubaga ang kauban nga mga pangutana diha sa imong scripture study journal:

   1. Jarom 1:4–5, 8. Unsa ang pipila ka mga ehemplo kon sa unsang paagi nagmasulundon ang mga Nephite ug sa unsang paagi sila napanalanginan?

   2. Jarom 1:7, 10–12. Unsay papel sa mga propeta ug ubang mga lider sa pagtabang sa mga Nephite nga magmasulundon ug mouswag?

   3. Omni 1:5–7. Sa unsang paagi ang saad sa Dios sa wala madugay namatud-an sa lahi nga paagi?

President Dieter F. Uchtdorf

Basaha unsay gitudlo ni Presidente Uchtdorf ug gipamatud-an mahitungod sa iyang kasinatian nga naghunahuna kon panghimatud-an ba sa Ginoo ang saad nga gihatag diha sa Pulong sa Kaalam: “Ang tubag wala moabut dayon. Apan sa kaulahian akong nakat-unan nga ang mga saad sa Dios dili kanunay nga matuman dayon o sa paagi nga atong gilauman; kini moabut sa Iyang panahon ug sa Iyang mga pamaagi. Paglabay sa mga tuig akong nakita ang klaro nga ebidensya sa temporal nga mga panalangin nga madawat niadtong kinsa nagsunod sa Pulong sa Kaalam—agig dugang sa espirituhanon nga mga panalangin nga moabut dayon tungod sa pagkamasulundon sa bisan unsang mga balaod sa Dios. Sa paghinumdom, ako siguradong nasayud nga ang mga saad sa Ginoo, kon tingali dili kanunay nga dali, sa kanunay sigurado” (“Ipadayon ang Pagpailub,” 58, mga italic gidugang).

2. Sa imong scripture study journal, paghulagway og kasinatian sa dihang ang Ginoo mipanalangin o mipalambo kanimo tungod sa pagsunod sa Iyang mga sugo. Gikan sa imong kasinatian, unsay mahimo nimong mapamatud-an mahitungod sa Ginoo ug sa Iyang mga saad?

Omni 1:1–30

Ang mga tigtipig og rekord misugilon sa Nephite nga kasaysayan

Ang mga kaliwat ni Jarom misulat sa basahon ni Omni, nga naglangkob sa gibana-bana nga 230 ka tuig. Markahi ang mga ngalan sa nagkalain-laing mga tawo nga maoy naghupot sa gagmay nga mga palid human ni Jarom. Makita nimo kini sa Omni 1:1, 4, 9, 10, 12, ug 25.

Ang basahon ni Omni naghulagway sa pipila ka importanting mga panghitabo sa kasaysayan sa Basahon ni Mormon. Mahimong makahinumdom ka nga sa panahon ni Nephi ang mga Nephite mibiya sa mga Lamanite ug mipuyo sa usa ka dapit nga ilang gitawag nga yuta sa Nephi. Kini nga paglalin girepresentahan diha sa mapa sa usa ka arrow gikan sa yuta sa unang kabilin padulong ngadto sa yuta sa Nephi.

Basaha ang Omni 1:12–13, ug hibaloi kon sa unsang paagi ang mga Nephite nakapuyo sa yuta sa Zarahemla. Mahimo nimong badlisan ang bisan unsang mga pulong niini nga mga bersikulo nga nagpasabut nga ang mga Nephite mibiyahe pinaagi sa direksyon ug gahum sa Ginoo. Diha sa mapa, ang arrow gikan sa yuta sa Nephi ngadto sa yuta sa Zarahemla nagrepresentar niini nga paglalin.

map of migrations

Basaha ang Omni 1:14–19, ug pangita og kaparehas ug kalainan tali sa mga Nephite ug sa katawhan nga ilang nakaplagan sa yuta sa Zarahemla.

3. Tubaga ang mosunod nga mga pangutana diha sa imong scripture study journal:

   1. Sa unsang paagi ang kakulang sa mga kasulatan nakaapekto sa katawhan sa Zarahemla?

   2. Sa unsang paagi ang pagkasayud niini makatabang kanimo nga mobati nga mas mapasalamaton alang sa mga kasulatan ug mahimong mas makugihon sa pagtuon niini?

Ang basahon ni Omni nagpaila usab sa duha ka grupo sa katawhan nga imo unyang tun-an sa Basahon ni Mormon. Aron sa pag-ila sa usa niini nga mga grupo, basaha ang Omni 1:20–22, ug isulat ang pulong nga mga Jaredite diha sa imong mga kasulatan tupad niini nga mga bersikulo. Si Coriantumr maoy usa sa katapusang duha ka mga nahabilin sa Jaredite nga nasud; ang lain mao si propeta Ether. Makakat-on ka mahitungod sa mga Jaredite sa imong pagtuon sa basahon ni Ether.

Aron makat-on mahitungod sa katapusang grupo sa mga tawo nga gihisgutan sa Omni, tan-awa ang arrow diha sa mapa nga nagkutay gikan sa yuta sa Zarahemla hangtud sa duol na sa yuta sa Nephi ug dayon balik ngadto sa Zarahemla ug ang arrow gikan sa yuta sa Zarahemla nga mideretso hangtud gyud sa yuta sa Nephi. Kini nga mga arrow nagrepresentar sa paglalin sa katawhan ni Zeniff, kinsa maoy gipasabut diha sa Omni 1:27–30. (Mahimo nimong isulat ang “katawhan ni Zeniff” tupad niini nga mga bersikulo.) Makakat-on ka mahitungod niini nga grupo sa katawhan samtang magtuon ka sa basahon ni Mosiah.

Ang Basahon ni Mormon wala mangangkon nga maoy rekord sa tanan nga mga katawhan nga nakapuyo sa Amerika. Gawas sa mga Jaredite, sa katawhan sa Zarahemla, ug sa mga kaliwat ni Lehi, duna pay uban nga miabut usab sa kontinente sa Amerika. Si Presidente Anthony W. Ivins sa Unang Kapangulohan namahayag sa kinatibuk-ang komperensya sa Abril 1929: “Ang Basahon ni Mormon … wala magsulti kanato nga walay tawo dinhi sa wala pa [ang mga katawhan sa Basahon ni Mormon]. Wala kini magsulti kanato nga wala nay mga tawo nga miabut pagkahuman” (sa Conference Report, Abr. 1929, 15).

Bantayi sa Omni 1:23–24 nga ang katapusang bahin niini nga basahon gisulat ni Amaleki. Nabuhi siya sa panahon ni Haring Benjamin, pagkahuman sa paglalin sa mga Nephite ngadto sa yuta sa Zarahemla. Basaha ang Omni 1:25–26, ug markahi ang usa ka pagdapit nga gihatag ni Amaleki sa tulo ka higayon.

Pangitaa ang Gibalik-balik nga mga Pulong, Hugpong sa mga Pulong, ug mga Ideya diha sa Kasulatan

Ang mga misulat sa mga kasulatan sagad nga mihatag og gibug-aton sa importanting mga kamatuoran pinaagi sa pagbalik-balik. Kon makit-an nimo ang gibalik-balik nga mga pulong, hugpong sa mga pulong, ug mga ideya, tinguhaa ang pagsabut nganong gihatagan kini og gibug-aton ug unsay gusto sa Ginoo nga imong makat-unan gikan niini.

Timan-i nga ang matag usa sa tulo ka mga pagdapit sa pagduol kang Kristo sa Omni 1:25–26 gisundan sa pulong nga ug, ingon man sa usa ka piho nga direksyon nga nagtabang kanato nga masayud kon unsaon sa pagduol ngadto kang Kristo. Tan-awa og balik ang Omni 1:25–26, ug markahi kon unsay giawhag ni Amaleki nga atong buhaton aron sa pagduol kang Kristo.

Christus statue

Kinahanglang nakit-an nimo ang mosunod nga tambag kon unsaon sa pagduol ngadto kang Kristo:

• Motuo

• Moambit sa Iyang kaluwasan (modawat sa mga panalangin sa Iyang Pag-ula)

• Mohalad sa imong tibuok kalag ngadto Kaniya (mohatag sa imong kasingkasing, imong mga tinguha, ug imong labing maayong paningkamot—sa walay pagpugong)

• Magpuasa ug Mag-ampo

• Molahutay hangtud sa katapusan

Si Amaleki mihatag og usa ka saad sa katapusan sa Omni 1:26 niadtong mosunod niini nga tambag. Pangitaa ang saad, ug kompletuha ang mosunod nga baruganan: Kon moduol kita kang Kristo ug molahutay hangtud sa katapusan, kita .

4. Pagpili og usa sa mga hugpong sa pulong diha sa tambag kon unsaon sa pagduol ngadto kang Kristo nga gilista sa ibabaw, ug pagsulat o pag-outline diha sa imong scripture study journal og usa o duha ka minuto nga pakigpulong nga nagpasabut kon sa unsang paagi kita mahimo nga moduol kang Kristo pinaagi sa paggamit niana nga baruganan.

   Sama pananglit, mahimo kang mosulat og pakigpulong kon sa unsang paagi ang pagpuasa ug pag-ampo makatabang kanato sa pagduol ngadto kang Kristo. Ang imong pakigpulong mahimong maglakip sa (1) pagbasa sa Omni 1:25–26 ug pagpasabut sa imong kaugalingong mga pulong sa hugpong sa mga pulong nga imong gipili; (2) dugang nga mga kasulatan nga nagpatin-aw o nagdugang og kahulugan sa hugpong sa mga pulong; (3) usa ka kasinatian gikan sa imong kinabuhi o gikan sa kinabuhi sa imong kaila nga nagpakita og ehemplo sa mga pulong; ug (4) imong mga hunahuna, mga pagbati, ug pagpamatuod.

Ang imong magtutudlo mahimong mohangyo kanimo sa pagpakigbahin sa imong pakigpulong sa sunod higayon nga magkita kamo. Mahimo usab nimong ipakigbahin ang imong pakigpulong diha sa family home evening o sa lain nga sitwasyon.

5. Isulat ang mosunod diha ubos sa mga assignment karong adlawa diha sa imong scripture study journal:

   Akong natun-an ang Jarom–Omni ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: