Mosiah 5–6

Pasiuna

Ang Mosiah 5 nagtapos sa pakigpulong ni Haring Benjamin ngadto sa iyang katawhan nga misugod diha sa Mosiah 2. Isip resulta sa ilang pagtuo diha sa mga pulong ni Haring Benjamin, ang katawhan nakasinati og dakong kausaban sa kasingkasing. Misulod sila og usa ka pakigsaad uban sa Dios ug midala diha sa ilang mga kaugalingon sa ngalan ni Jesukristo. Sumala sa narekord sa Mosiah 6, gibalhin ni Haring Benjamin ang iyang gahum sa pagdumala sa iyang gingharian ngadto sa iyang anak nga si Mosiah, ug si Mosiah nangulo sa pagkamatarung, nagsunod sa ehemplo sa iyang amahan.

Mosiah 5:1–4

Ang katawhan ni Haring Benjamin nakasinati og dakong kausaban

Hunahunaa ang mosunod nga mga pangutana: Nakapangandoy ka ba sukad nga unta mausab nimo ang usa ka butang mahitungod sa imong kaugalingon? Unsay imong gibuhat mahitungod niini?

Si Elder David A. Bednar sa Korum sa Napulog Duha ka mga Apostoles mihulagway sa panginahanglan sa matag usa kanato nga mosinati og dakong kausaban sa atong kinabuhi: “Sa pagkatinuod, ang lintunganay sa ebanghelyo ni Jesukristo nagkinahanglan sa sukaranan ug permanente nga kausaban sa atong pagkatawo nga mahimong posible pinaagi sa atong pagsalig sa ‘maayo nga buhat, ug kalooy, ug grasya sa Balaan nga Mesiyas’ (2 Nephi 2:8). Kon kita mopili sa pagsunod sa Ginoo, kita mipili nga mag-usab—espirituhanong magpakatawo pag-usab” (“Kinahanglang Matawo Kamo Pag-usab,” Ensign o Liahona, Mayo 2007, 20).

Mahimo nimong isulat ang mosunod nga mga pulong diha sa imong mga kasulatan tupad sa Mosiah 5:2: “Kon kita mopili sa pagsunod sa Ginoo, kita mipili nga mag-usab.”

Sa unsang paagi kaha kita mopili nga mag-usab kon kita mopili sa pagsunod ni Jesukristo?

Ribyuha ang mga summary sa kapitulo alang sa Mosiah 3 ug Mosiah 4 aron mahinumduman ang labing gitutukan sa pakigpulong ni Haring Benjamin. Sa pagtapos sa iyang wali, si Haring Benjamin nangutana sa katawhan kon mituo ba sila sa mga pulong nga iyang gitudlo kanila mahitungod sa Pag-ula ni Jesukristo (tan-awa sa Mosiah 5:1). Basaha ang Mosiah 5:2–4, ug pangitaa kon unsay nausab diha sa mga kasingkasing sa katawhan human sila maminaw sa mga pulong sa ilang hari. Samtang magbasa ka, makatabang nga masayud nga ang “hilig” (Mosiah 5:2) nagpasabut ngadto sa mga kinaiya, mga tinguha, o taras sa usa ka indibidwal.

Basaha ang mosunod nga pamahayag gikan ni Elder David A. Bednar: “Ang ebanghelyo ni Jesukristo nagtingub og mas labaw pa kay sa paglikay, pagbuntog, ug sa pagkanalimpyuhan sa sala ug sa dautang mga impluwensya sa atong mga kinabuhi; kini usab nagkinahanglan sa pagbuhat og maayo, sa pagpakamaayo, ug sa pagkahimong mas maayo. … Nga ang atong mga kasingkasing mausab pinaagi sa Balaang Espiritu nga sa ingon ‘kami wala nay hilig sa pagbuhat og dautan, apan sa pagbuhat og maayo sa kanunay’ (Mosiah 5:2), sama sa gihimo sa mga katawhan ni Haring Benjamin, mao ang katungdanan nga atong gidawat pinaagi sa pakigsaad. Kining dako nga kausaban dili lamang resulta sa pagpaningkamot pag-ayo o sa pag-ugmad og talagsaong tagsa-tagsa nga disiplina. Kondili, tungod kay kini ang sinugdanan sa pagkausab sa atong mga tinguha, atong mga motibo, ug atong mga kinaiya nga nahimong posible pinaagi sa Pag-ula ni Kristo nga Ginoo. Ang atong espirituhanong katuyoan mao ang pagbuntog sa sala ug sa tinguha sa pagpakasala” (“Limpyo nga mga Kamot ug Putli nga Kasingkasing,” Liahona, Nob. 2007, 81).

Sa imong scripture study journal, tubaga ang mosunod nga mga pangutana:
1. Unsa kaha ang gipasabut nga mosinati og usa ka “dako nga kausaban” diha sa imong kasingkasing? (Mosiah 5:2).
2. Kon mopili kita sa pagsunod ni Jesukristo, nganong gikinahanglan man nga atong usbon ang atong mga hilig ug dili lang ang batasan?
3. Ngano kaha nga ang Pag-ula ni Jesukristo gikinahanglan aron ang usa ka kausaban mahitabo sulod kanato?

Tun-i ang Mosiah 5:2, 4, nga mangita kon unsa ang gibuhat sa katawhan nga nagtugot sa usa ka dakong kausaban sa kasingkasing nga mahitabo sa sulod kanila. Mahimo nimong markahan kini nga mga butang diha sa imong mga kasulatan. Hinumdumi nga ang mga pulong ni Haring Benjamin mao ang mahitungod sa gahum sa Pag-ula ni Jesukristo, ug ang mga tawo adunay dakong pagtuo niini nga mga pulong.

Usa sa mga baruganan nga atong makat-unan gikan niini nga mga bersikulo mao kini: Samtang mopakita kita og hugot nga pagtuo kang Jesukristo ug modawat sa Balaang Espiritu, makasinati kita og dakong kausaban sa kasingkasing.

Base sa imong pagtuon sa Mosiah 5:1–4 ug sa baruganan sa ibabaw, isulat sa imong scripture study journal kon unsay imong mabuhat aron makapakita og dugang hugot nga pagtuo sa Manluluwas. Unsang piho nga mga butang ang imong mahimo, sugod karong adlawa, sa pagpakita og dugang pagtuo aron makaawhag ug makamentinar ka og dakong kausaban sa kasingkasing diha sa imong kinabuhi?

Mosiah 5:5–15

Ang katawhan ni Haring Benjamin misulod og usa ka pakigsaad uban sa Dios ug gihatagan og bag-o nga pangalan

Human makasinati og dakong kausaban sa kasingkasing ang katawhan ni Haring Benjamin, nagtinguha sila nga mosulod og usa ka pakigsaad uban sa Ginoo. Hibaloi ang mga pulong diha sa Mosiah 5:5 nga nagpakita sa gitas-on sa pasalig nga gibati sa katawhan ni Haring Benjamin ngadto sa paghimo ug pagtuman niini nga pakigsaad.

Kon mohimo kita og mga pakigsaad uban sa Dios, Siya ang motino sa mga kondisyon alang sa mga pakigsaad, ug mouyon kita sa mga kondisyon. Ang Dios dayon mosaad kanato og piho nga mga panalangin alang sa atong pagkamasulundon (tan-awa sa D&P 82:10). Ang paghimo og mga pakigsaad maoy usa ka paagi nga makapakita kita sa Ginoo nga sinsero kita sa atong mga tinguha sa pagserbisyo Kaniya.

Tubaga ang mosunod nga mga pangutana diha sa imong scripture study journal:
1. Unsa nga mga pulong diha sa Mosiah 5:5 ang nagpahinumdom kanimo sa mga saad nga atong gibag-o sa matag higayon nga moambit kita sa sakrament?
2. Sa unsang paagi kaha nga ang paghimo ug pagtuman sa mga pakigsaad makatabang kanimo sa pagmintinar og dakong “kausaban sa kasingkasing”?

Balik ngadto sa Mosiah 1:11–12. Usa sa mga katuyoan ni Haring Benjamin sa pagpundok sa iyang katawhan mao ang paghatag kanila og usa ka ngalan. Basaha ang Mosiah 5:6–7, ug markahi ang ngalan nga gihatag ni Haring Benjamin sa iyang katawhan human sila mihimo sa ilang pakigsaad sa Ginoo.

Kini nga mga bersikulo nagtudlo niini nga baruganan: Atong dalhon sa atong kaugalingon ang pangalan ni Jesukristo pinaagi sa sagradong mga pakigsaad. Basaha ang Mosiah 5:8–14, ug pangitaa kon nganong kinahanglan nato nga dalhon sa atong kaugalingon ang ngalan ni Jesukristo.

Unsa ang pipila ka mga panalangin nga maanaa kon mahisulat sa atong mga kasingkasing ang pangalan ni Jesukristo?

Unsay hinungdan nga ang ngalan “mapapas” sa imong kasingkasing o sa kasingkasing sa usa ka tawo?

Basaha ang Mosiah 5:15, ug pangitaa ang mga saad nga gihimo sa Ginoo ngadto niadtong nagtuman sa ilang mga pakigsaad.

Sa imong scripture study journal, isulat kon unsay imong bation kon maghunahuna ka nga nahisulat diha sa imong kasingkasing ang ngalan ni Jesukristo. Pagsulat og usa o daghan pa nga mga rason nganong gusto nimong tipigan kini nga ngalan ug dili gayud kini wagtangon.

Mosiah 6:1–7

Si Mosiah nagsugod sa iyang pagmando isip hari

Basaha ang Mosiah 6:3, ug hibaloi kon unsay gibuhat ni Haring Benjamin sa wala pa niya gipapauli ang pundok sa mga katawhan.

Unsa ang gibuhat ni Haring Benjamin aron sa pagtabang sa iyang katawhan nga mahinumdom sa mga pakigsaad nga ilang gihimo?

Sa imong scripture study journal, isulat kon sa unsang paagi ang mga lider sa priesthood ug mga magtutudlo nagtabang kanimo sa pagtuman sa imong mga pakigsaad.

Si Haring Benjamin namatay tulo ka tuig human siya mihatag sa iyang pakigpulong. Basaha ang Mosiah 6:6–7, ug pangitaa kon sa unsang paagi si Haring Mosiah misunod sa ehemplo sa iyang amahan isip usa ka matarung nga lider.

Isulat ang mosunod diha ubos sa mga assignment karong adlawa diha sa imong scripture study journal:

Akong natun-an ang Mosiah 5–6 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: