Unit 31: Day 3

Moroni 6

Pasiuna

Hapit na mahuman si Moroni sa iyang mga sinulat diha sa mga palid pinaagi sa pagpasabut sa ubang mga kwalipikasyon aron ang usa ka tawo maandam alang sa bunyag ngadto sa Simbahan. Gilatid dayon niya ang mga responsibilidad sa mga miyembro sa Simbahan sa pag-atiman sa ubang mga miyembro. Gipasabut usab ni Moroni ang katuyoan sa mga miting sa Simbahan ug gihatagan og gibug-aton ang panginahanglan alang sa mga miting sa Simbahan nga ipahigayon pinaagi sa impluwensya sa Espiritu Santo.

Moroni 6:1–3

Gitakda ni Moroni ang mga gikinahanglan alang sa bunyag

boy being baptized

Hunahunaa nga ikaw dunay siyete anyos nga igsoon nga mag-otso anyos sa pipila ka bulan. Gihangyo ka sa imong mga ginikanan nga magtudlo og leksyon sa family home evening kon unsaon pag-andam alang sa bunyag.

1. Kon patudluon ka og leksyon karon dayon, unsay imong itudlo aron makatabang sa imong igsoon nga maandam nga mabunyagan? Isulat ang imong mga hunahuna diha sa imong scripture study journal.

Human malakip ang mga pag-ampo sa sakrament diha sa iyang mga rekord (tan-awa sa Moroni 4–5), gidugang ni Moroni ang instruksyon kalabut sa ordinansa sa bunyag. Siksika ang Moroni 6:1–3, nga mangita sa mga gikinahanglan alang sa bunyag. Mahimo nimong markahan ang mga gikinahanglan nga imong matino diha sa imong mga kasulatan.

Sa imong hunahuna unsay gipasabut nga kadtong gustong mabunyagan kinahanglang magdala og “makapakita og buhat nga angay nga sila mahimo nga takus niini”? (Moroni 6:1).

Pamalandunga kon unsa sa imong hunahuna ang gipasabut sa makabaton og “usa ka masulub-on nga kasingkasing ug usa ka mahinulsulon nga espiritu” (Moroni 6:2) sa dili pa mabunyagan. Sama sa narekord diha sa Moroni 6:1–3, gipasabut ni Moroni nga pinaagi sa bunyag nakigsaad kita nga modala sa ngalan ni Jesukristo ug moserbisyo Kaniya hangtud sa katapusan. Unsay imong gibuhat aron mapabilin ug mapalig-on ang imong determinasyon nga moserbisyo ni Jesukristo?

2. Sa imong scripture study journal, ihulagway ang pipila ka paagi nga imong nasulayan sukad sa imong bunyag aron mapabilin ug mapalig-on ang imong determinasyon nga moserbisyo ni Jesukristo.

Moroni 6:4

Gipasabut ni Moroni kon unsaon sa pag-atiman ug espirituhanong moamuma sa mga miyembro sa Simbahan

Human mapasabut ang mga gikinahanglan nga angayng himoon sa mga indibidwal sa dili pa mabunyagan, gipasabut dayon ni Moroni kon sa unsang paagi nga kadtong bag-o nga nabunyagan nagpabiling matinud-anon sa ilang mga pakigsaad. Basaha ang Moroni 6:4, ug pangitaa kon unsay gibuhat aron matabangan ang bag-ong mga kinabig nga magpabiling matinud-anon.

I-summarize ang imong nakat-unan gikan sa Moroni 6:4 bahin sa imong mga responsibilidad ngadto sa ubang mga miyembro sa Simbahan.

Unsa nga mga panalangin ang gipasabut sa Moroni 6:4 nga moabut tungod kay giamumahan pinaagi sa pulong sa Dios?

Usa ka importante nga kamatuoran diha sa Moroni 6:4 mao nga kita dunay responsibilidad sa paghinumdom ug espirituhanong moatiman sa ubang mga miyembro sa Simbahan.

Si Elder Jeffrey R. Holland sa Korum sa Napulog Duha ka mga Apostoles mipamatuod sa kaimportante sa pag-amuma sa usag usa pinaagi sa pulong sa Dios: “Kadaghanan sa mga tawo dili mosimba nga mangita lamang og pipila ka bag-ong kamatuoran sa ebanghelyo o sa pagpakigkita sa daang mga higala, bisan og kanang tanan importante. Sila moanha nga nangita og espirituhanong kasinatian. Sila gusto og kalinaw. Sila gusto nga malig-on ang ilang pagtuo ug mabag-o ang ilang paglaum. Sila gusto, sa laktud, nga maamumahan sa maayong pulong sa Dios, nga malig-on pinaagi sa mga gahum sa langit. Kita, kinsa gitawag sa pagpamulong o sa pagtudlo o sa paggiya adunay obligasyon sa pagtabang sa pagsangkap niana, kutob sa mahimo” (“A Teacher Come from God,” Ensign, Mayo 1998, 26).

Nakahunahuna ka na ba bahin sa dakong gidaghanon sa mga indibidwal nga nag-ampo alang nimo, nangandam og mga leksyon alang nimo, miawhag nimo ug sa imong pagkaaktibo sa Simbahan, ug mitabang nimo agi sa mga hagit?

3. Diha sa imong scripture study journal, pagsulat bahin sa duha o sobra pa nga mga tawo nga nakahinumdom nimo sa usa ka makahuluganong paagi o espirituhanong nakaamuma nimo.

Sa dili madugay, hisguti uban sa usa ka sakop sa pamilya o higala kon sa unsang paagi ka napanalanginan tungod kay ang usa ka tawo nakahinumdom nimo o miamuma nimo pinaagi sa pulong sa Dios.

Si Presidente Henry B. Eyring sa Unang Kapangulohan misaysay sa istorya bahin sa usa ka deacon sa iyang ward nga nakasabut sa panginahanglan nga motuman sa iyang responsibilidad ngadto sa ubang mga sakop sa iyang korum:

President Henry B. Eyring

“Usa sa iyang mga sakop sa korum nagpuyo duol sa akong panimalay. Kanang silingan nga batang lalaki wala gayud makatambong og miting sa korum ni nakabuhat og bisan unsa kauban ang mga sakop sa iyang korum. Ang iyang stepfather dili miyembro, ug ang iyang mama wala motambong sa simbahan.

“Ang presidency sa iyang korum sa mga deacon nagmiting sa council usa ka Dominggo sa buntag. … Sa ilang miting sa presidency, kadtong mga 13 anyos nga mga magbalantay nakahinumdom sa batang lalaki nga wala na gayud motunga. Gihisgutan nila kon unsa gayud niya kakinahanglan ang unsay ilang nadawat. Ang presidente mi-assign sa iyang counselor nga atimanon kanang naglatagaw nga karnero.

“Nakaila ko sa counselor, ug nahibalo ko nga manggiulawon siya, ug nahibalo ko sa kalisud sa assignment, mao nga nagtan-aw ko sa akong atubangang bintana samtang ang counselor hinay nga milakaw agi sa akong balay, patangas sa karsada paingon sa panimalay sa batang lalaki nga wala gayud mitunga sa simbahan. Ang magbalantay mibutang sa iyang mga kamot sulod sa iyang mga bulsa. Ang iyang mga mata nagtan-aw sa yuta. Hinay siyang milakaw, sama sa inyong buhaton kon dili mo sigurado nga ganahang moabut sa inyong adtuan. Mga 20 minutos o sobra pa, mibalik siya og lugsong sa karsada uban sa nawala nga deacon nga nakigdungan niya sa paglakaw. Kana nga sitwasyon nausban pa sulod sa pipila ka Dominggo. Dayon ang batang lalaki nga nawala ug nakit-an mibalhin.

“… Mga katuigan na ang milabay, didto ko sa usa ka stake conference, kontinente ang gilay-on sa lawak diin kana nga presidency nagmiting sa council. Usa ka ubanon og buhok nga lalaki ang miduol kanako ug hinay nga miingon, ‘Ang akong apo nga lalaki nagpuyo sa inyong ward mga katuigan na ang milabay.’ Uban sa kalumo, gisultihan ko niya bahin sa kinabuhi nianang batang lalaki. Ug dayon gihangyo ko niya kon pwede ba nakong mapangita kanang deacon nga hinayng milakaw niana nga karsada. Ug naghunahuna siya kon pwede ba nako siyang mapasalamatan ug sultihan nga ang iyang apo nga lalaki, nga karon hingkod na nga tawo, nakahinumdom pa gihapon” (“Watch with Me,” Ensign, Mayo 2001, 38–39).

Ikonsiderar ang pihong mga indibidwal nga tingali gusto sa Ginoo nga imong “mahinumduman” o “maamumahan.” Pagplano og paagi nga makatabang ka sa espirituhanong pag-amuma nila. Isulat ang ilang mga ngalan sa usa ka piraso nga papel, ug ibutang kini sa usa ka dapit nga makatabang nimo nga mahinumdom nila.

Moroni 6:5–9

Gihulagway ni Moroni ang mga katuyoan sa mga miting sa Simbahan ug kon sa unsang paagi kini ipahigayon.

Hunahunaa nga ginikanan ka sa usa ka tin-edyer kinsa, sulod sa miaging pipila ka semana, miingon nga dili siya gustong mosimba tungod kay morag wala kini kahulugan ug makalaay. Ikonsiderar kon unsay imong isulti aron matabangan nga maawhag ang imong anak nga mosimba ug makasabut sa hustong mga rason alang sa kanunayng pagtambong.

Diha sa iyang rekord, nadasig si Moroni sa paghulagway sa mga rason nga ang mga miyembro sa Simbahan magpundok niining adlawa. Tun-i ang Moroni 6:5–6, ug pangitaa kon unsaon nimo pagkompleto sa mosunod nga pamahayag: Isip mga miyembro sa Simbahan, kinahanglang magpundok kita kanunay aron .

Si Elder Dallin H. Oaks sa Korum sa Napulog Duha ka mga Apostoles mipakigbahin og porsyon sa usa ka sulat gikan sa higala nga nausab ang kinaiya kalabut sa pagtambong sa simbahan:

Elder Dallin H. Oaks

“Usa ka maalamon nga higala misulat:

“‘Mga katuigan na ang milabay, akong giusab ang akong kinaiya mahitungod sa pag-adto sa simbahan. Wala na ko moadto sa simbahan alang sa akong kaayohan, apan sa paghunahuna sa uban. Akong gisiguro ang pagpangumusta sa mga tawo kinsa nag-inusarang naglingkod, sa pag-abi-abi sa mga bisita, … sa pagboluntaryo alang sa usa ka buluhaton. …

“‘Sa ato pa, miadto ko sa simbahan kada semana uban sa tuyo nga mahimong aktibo, dili kay mag-urong lang, ug mihimo og positibo nga kalainan sa mga kinabuhi sa uban. Isip sangputanan, ang akong pagtambong sa mga miting sa Simbahan mas makalingaw pa gayud ug may katagbawan.’

“Kining tanan nagpakita sa mahangturong baruganan nga kita mas malipayon ug mas may katagbawan kon kita molihok ug moserbisyo alang sa unsay atong gihatag, dili alang sa unsay atong nadawat” (“Dili Hinakog nga Pagserbisyo,” Ensign o Liahona, Mayo 2009, 96).

Mahimo nimong makompleto ang pamahayag sa ibabaw gamit ang mosunod nga mga ideya:

Isip mga miyembro sa Simbahan, kinahanglang magpundok kita kanunay aron:

• Magpuasa ug mag-ampo.

• Molig-on sa usag usa sa espirituhanong paagi.

• Moambit sa sakrament agig paghinumdom ni Ginoong Jesukristo.

Pamalandunga ang imong mga kasinatian nga nagtudlo nimo sa kaimportante sa dungan nga pag-ampo o pagpuasa uban sa mga miyembro sa imong ward o branch.

families in sacrament meeting

4. Tubaga ang mosunod nga mga pangutana diha sa imong scripture study journal:

   1. Sa unsang paagi nga ang imong kasinatian sa simbahan mausab kon mitambong ka nga dunay tinguha nga malig-on ang uban sa espirituhanong paagi?

   2. Nganong bililhon ang kanunayng pag-ambit sa sakrament agig paghinumdom kang Jesukristo?

   3. Sa unsang paagi nga ang pagsimba alang sa mga katuyoan nga gilista sa ibabaw makatabang sa “pag-agak [kanimo] sa matarung nga agianan”? (Moroni 6:4).

Basaha ang Moroni 6:7–8, ug pangitaa ang butang nga ang mga miyembro sa Simbahan sa panahon ni Moroni “higpit nga nagbantay,” o sa laing pagkasulti, unsay ilang gihatagan og espesyal nga pagtagad. Sa imong hunahuna nganong importante man nga atong tudloan ug awhagon ang usag usa aron makalikay ug makahinulsol sa sala?

Nagpamatuod si Moroni nga kon kanunay kitang maghinulsol ug magtinguha og kapasayloan uban sa tinuod nga katuyoan, kita pasayloon. Mahimo nimong markahan kini nga kamatuoran diha sa Moroni 6:8.

Gitapos ni Moroni kini nga kapitulo pinaagi sa pagtudlo kon sa unsang paagi ipahigayon ang atong mga miting sa Simbahan. Basaha ang Moroni 6:9, ug hibaloi kon kinsa ang mogiya sa atong mga miting sa Simbahan. Hunahunaa ang usa ka higayon sa dihang piho kang nahibalo sa impluwensya sa Espiritu Santo atol sa usa ka miting sa Simbahan.

Sa unsang paagi nga ang baruganan nga ang mga miting sa Simbhan kinahanglang ipahigayon pinaagi sa gahum sa Espiritu Santo magamit nimo? Kon hangyuon ka nga mohatag og pakigpulong o motudlo og leksyon atol sa usa ka miting sa Simbahan, sa unsang paagi ka makatabang sa pagsiguro nga kon unsay imong isulti makatampo sa paggiya ug impluwensya sa Espiritu Santo atol niana nga miting?

5. Sa imong scripture study journal, pagsulat og plano kon unsaon nimo pagtagad ang imong miting sa Simbahan karong umaabut nga Dominggo. Mahimo nimong iapil ang mga paagi sa pagdapit sa Espiritu Santo nganha sa imong pagsimba ug unsaon nimo paghinumdom ug pag-amuma ang uban pinaagi sa imong pagtambong.

6. Isulat ang mosunod diha sa ubos sa mga buluhaton karong adlawa sa imong scripture study journal:

   Akong natun-an ang Moroni 6 ug nahuman kini nga leksyon niadtong (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: