Pasiuna sa 3 Nephi
Nganong Kinahanglang Tun-an Kini nga Basahon?
Samtang tun-an nimo ang 3 Nephi, makat-unan nimo ang mga pulong ug mga aksyon sa Manluluwas panahon sa Iyang pangalagad sa mga tawo sa Basahon ni Mormon. Ang mga lider sa Simbahan miisip sa 3 Nephi nga “ikalima nga Ebanghelyo” sa atong Ginoo tungod kay, sama sa upat ka mga Ebanghelyo sa Bag-ong Tugon, nagtutok kini sa direkta nga mga pagtulun-an ug pangalagad ni Jesukristo (tan-awa sa Gordon B. Hinckley, “The Cornerstones of Our Faith,” Ensign, Nob. 1984, 52). Si Presidente Ezra Taft Benson mitudlo nga ang “3 Nephi naglangkob sa pipila sa labing makapatandog ug gamhanan nga mga tudling sa tibuok kasulatan. Nagmatuod kini ni Jesukristo, sa Iyang mga propeta, ug sa mga doktrina sa kaluwasan” (“The Savior’s Visit to America,” Ensign, Mayo 1987, 6). Sa pagtan-aw kon giunsa ni Jesukristo pagpakita og kapuangod sa mga tawo “tagsa-tagsa” (3 Nephi 11:15; 17:21), mas masabtan nimo ang Iyang pagpakabana alang nimo isip usa ka indibidwal. Makat-unan usab nimo ang importante nga leksyon pinaagi sa pag-obserbar sa unsa nga paagi ang pipila ka mga tawo miandam sa ilang kaugalingon sa pakighimamat sa Manluluwas samtang ang uban mipugong sa ilang mga kaugalingon sa pagsinati og talagsaong mga panalangin.
Kinsa ang Nagsulat Niini nga Basahon?
Si Mormon mipamubo sa mga rekord gikan sa dagko nga mga palid ni Nephi aron maghimo sa basahon sa 3 Nephi. Ang basahon ginganlan alang ni Nephi, ang anak ni Nephi, kansang pangalagad milungtad sa wala pa, panahon sa, ug human sa pagpakita sa Manluluwas ngadto sa katawhan. Panahon sa hilabihan nga pagkadautan nga nag-una sa pagbisita ni Kristo, si Nephi nangalagad “uban sa gahum ug dako nga pagtugot” (3 Nephi 7:17). Apan ang pangalagad ni Nephi mao usa lamang ka prelude sa pangalagad ni Jesukristo, kansang mga pulong ug mga binuhatan naglangkob sa importanting gitutukan sa 3 Nephi. Samtang naghimo sa iyang minubo sa rekord ni Nephi, midugang usab si Mormon sa iyang kaugalingong komentaryo ug pagpamatuod niini nga basahon (tan-awa sa 3 Nephi 5:8–26; 26:6–12; 29–30).
Kanus-a ug Diin Kini Gisulat?
Ang orihinal nga mga rekord nga gigamit isip mga tinubdan sa basahon sa 3 Nephi tingali gisulat tunga-tunga sa mga 1 B.C. ug 34 B.C. Gipamubo ni Mormon kadto nga mga rekord tunga-tunga sa mga A.D. 345 ug A.D. 385. Wala girekord ni Mormon diin siya sa dihang iyang gitipigan kini nga basahon.