Unit 26: Day 4

3 Nephi 20–22

Pasiuna

Atol sa ikaduhang adlaw sa Iyang pangalagad sa mga Nephite, si Jesukristo nangalagad pag-usab sa sakrament ngadto sa katawhan. Mipamatuod Siya nga sa ulahing mga adlaw ang Amahan motuman sa Iyang pakigsaad sa pagpundok sa Israel ug mopanalangin sa tanang mga nasud sa yuta. Mipasabut usab Siya nga ang pag-abut sa Basahon ni Mormon sa katapusang mga adlaw mao ang timailhan nga ang Amahan nagsugod na sa pagtuman niini nga pakigsaad.

3 Nephi 20:1–9

Gipangalagad pag-usab sa Manluluwas ang sakrament ngadto sa katawhan

Kon ikaw usa ka batan-ong lalaki ug naghupot sa Aaronic Priesthood, pamalandunga ang mosunod nga mga pangutana: Unsa ang gipasabut nganha nimo nga makahimo sa pagtabang sa pagpangalagad sa sakrament? Unsaon nimo sa pagpakita ngadto sa Ginoo nga ikaw nakasabut sa sagrado nga matang niini nga ordinansa?

Kon ikaw usa ka batan-ong babaye o batan-ong lalaki nga wala pa maghupot sa priesthood, pamalandunga ang mosunod nga mga pangutana: Unsay imong bation kon ikaw makakita og takus nga mga batan-ong lalaki nga mangalagad sa sakrament? Unsay imong buhaton panahon sa pagpangalagad sa sakrament nga nagpakita nga ikaw nakasabut sa sagrado nga matang niini?

Sumala sa narekord sa 3 Nephi 20:3–5, sa sinugdanan sa ikaduhang adlaw sa Iyang pangalagad sa mga Nephite, ang Manluluwas milagrosong mihatag og pan ug bino aron mangalagad pag-usab sa sakrament. Basaha ang 3 Nephi 20:1, ug hibaloi unsay Iyang gisugo nga buhaton sa katawhan sa wala pa Niya andama ug ipaambit ang sakrament. Sa imong hunahuna sa unsang paagi nga ang kinasingkasing nga pag-ampo makaapekto sa imong sinemana nga kasinatian sa pag-ambit sa sakrment?

Basaha ang 3 Nephi 20:8. Timan-i nga ang mga Nephite migamit og bino niining higayuna, apan karon migamit na ang Simbahan og tubig (tan-awa sa D&P 27:2). Timan-i usab unsay girepresentaran sa pan ug tubig. Kon kanunay kitang moambit sa sakrament, gipakita nato ang atong pagkaandam sa paghimo sa Pag-ula sa Manluluwas nga kabahin sa atong kinabuhi.

Sumala sa 3 Nephi 20:8, unsa ang gisaad ni Jesukristo niadtong kinsa moambit sa sakrament? Hunahunaa ang gidak-on sa pan ug gidaghanon sa tubig sa sakrament. Kon ikaw gigutom ug giuhaw, ang pan ug tubig sa sakrament makatagbaw ba sa imong kagutom ug kauhaw? Aron mas makasabut sa unsa nga paagi kita pagatagbawon pinaagi sa pag-ambit sa sakrament, basaha ang 3 Nephi 20:9 ug humana kini nga baruganan: Kon takus kitang moambit sa sakrament, mapuno kita sa .

Basaha ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles, ug badlisi ang mga paagi nga iyang giingon nga ikaw mapanalanginan kon ikaw mapuno sa Espiritu:

Elder Dallin H. Oaks

“Himoon natong takus ang atong kaugalingon sa saad sa Manluluwas nga pinaagi sa pag-ambit sa sakrament kita ‘pagatagbawon’ (3 Ne. 20:8; tan-awa usab sa 3 Ne. 18:9), nga nagpasabut nga kita ‘mapuno sa Espiritu’ (3 Ne. 20:9). Kana nga Espiritu—ang Espiritu Santo—mao ang atong maghuhupay, ang atong tigpangita sa direksyon, ang atong tigpama-ba, ang atong tighubad, ang atong tigsaksi, ug atong tiglimpyo—atong dili mapakyas nga giya ug tigbalaan sa atong mortal nga panaw ngadto sa kinabuhing dayon.

“… Gikan sa morag gamay nga buhat sa paghunahuna ug pagbag-o sa atong mga pakigsaad sa bunyag moabut ang pagbag-o sa mga panalangin sa bunyag pinaagi sa tubig ug pinaagi sa Espiritu, aron kita kanunayng makabaton sa iyang Espiritu nga magauban kanato. Niining paagiha kitang tanan magiyahan, ug niining paagiha kitang tanan malimpyuhan” (“Always Have His Spirit,” Ensign, Nob. 1996, 61).

1. Paghunahuna og panahon sa dihang imong gibati ang Espiritu Santo sa dihang miambit ka sa sakrament. Basaha ang mga pag-ampo sa sakrament sa Moroni 4:3 ug 5:2. Sa unsa nga paagi nga ang pag-ambit sa sakrament matag semana makatabang nimo nga mapuno sa Espiritu Santo? Isulat ang pipila niini ka paagi diha sa imong scripture study journal.

3 Nephi 20:10–46

Ang Manluluwas nagtudlo sa mga Nephite mahitungod sa mga pakigsaad nga tumanon sa katapusang mga adlaw

Hunahunaa ang pipila sa imong labing importante nga mga hiyas. Unsa nga matang sa mga hiyas ang imong gitutukan? Ang pisikal ba nga mga kinaiya, mga hiyas ba sa pagkatawo, o espirituhanong mga hiyas?

Basaha ang mosunod nga pamahayag ni Elder David A. Bednar sa Korum sa Napulog Duha ka mga Apostoles, ug markahi kon giunsa niya paghulagway kon kinsa kita: “Mahimong malingaw kamo sa musika, mga paugnat, o mahiligon kamo sa makina, ug ugma damlag motrabaho og panginabuhi o usa ka propesyon o sa mga arte. Ang ingon niini kaimportante nga mga kalihokan ug mga panginabuhi, dili kini makahulagway kon kinsa kita. Una ug pinakauna, kita mga espirituhanong binuhat. Mga anak kita sa Dios ug ang binhi ni Abraham” (“Pagkahimong Usa Ka Misyonaryo,” Ensign o Liahona, Nob. 2005, 47).

Ang pagkahimong binhi ni Abraham nagpasabut nga kita literal nga mga kaliwat ni Abraham o kita nahimong anak nga mga lalaki ug anak nga mga babaye pinaagi sa pagkamasulundon sa mga balaod ug mga ordinansa sa ebanghelyo ni Jesukristo. Ang tanan makadawat sa samang mga saad ug mga pakigsaad nga gihimo sa Dios ngadto ni Abraham.

Sumala sa narekord sa 3 Nephi 20:11–13, ang Manluluwas mitudlo sa mga Nephite mahitungod sa mga pakigsaad ug mga saad nga gihimo ngadto ni Abraham ug sa iyang mga kaliwat, kinsa mao ang balay ni Israel. Nagtudlo Siya nga ang Amahan motuman sa Iyang pakigsaad sa pagpundok sa balay ni Israel sa katapusang mga adlaw. Basaha ang 3 Nephi 20:13, ug timan-i unsa nga kahibalo bahin sa balay ni Israel ang maangkon isip importante nga bahin niini nga panagpundok. Ngano sa imong hunahuna nga kini nga kahibalo importante?

Basaha ang 3 Nephi 20:25–26, ug hibaloi unsay gitudlo sa Manluluwas kon sa unsa nga paagi ang mga kaliwat ni Lehi napanalanginan tungod sa pakigsaad sa Amahan nga gihimo ngadto ni Abaraham. Ang Manluluwas mihatag og gibug-aton nga ang Amahan mipadala Kaniya aron sa pagbisita sa mga Nephite ug pagluwas kanila gikan sa sala “tungod kay [sila] ang mga anak sa pakigsaad” (3 Nephi 20:26).

2. Isulat diha sa imong scripture study journal kon sa unsang paagi nga ikaw napanalanginan sa pakigsaad nga imong gihimo ngadto sa Langitnong Amahan atol sa bunyag. Tungod kay ikaw nabunyagan nga usa ka miyembro sa Simbahan, ikaw binhi ni Abraham ug ikaw adunay responsibilidad sa pagtabang nga matuman ang pakigsaad sa Dios nga gihimo ngadto ni Abraham.

Basaha ang 3 Nephi 20:27, ug markahi ang mga pulong nga nagtudlo sa mosunod nga baruganan: Isip binhi ni Abraham, kita dunay pakigsaad nga responsibilidad sa pagpanalangin sa tanang mga tawo sa yuta.

Elder David A. Bednar

Samtang basahon nimo ang mosunod nga pamahayag ni Elder David A. Bednar, pangitaa kon sa unsa nga paagi—isip binhi ni Abraham—nga kita makapanalangin sa katawhan sa yuta: “Kamo ug ako, karon ug sa kanunay, mopanalangin kita sa katawhan sa tanang kanasuran sa kalibutan Kamo ug ako, karon ug sa kanunay, mopamatuod kang Jesukristo ug mosangyaw sa mensahe sa Pagpahiuli. Kamo ug ako, karon ug sa kanunay, modapit sa tanan sa pagdawat sa mga ordinansa sa kaluwasan. Ang pagsangyaw sa ebanghelyo dili usa ka obligasyon sa priesthood kon may panahon lang. Dili kay ordinaryo lang kini nga kalihokan nga moapil-apil kita sa mubo nga panahon o usa ka buluhaton nga kinahanglang kompletuhon isip mga miyembro sa Simbahan ni Jesukristo sa mga Santos sa Ulahing mga Adlaw. Kondili ang misyonaryo nga buhat usa ka pagpakita sa atong espirituhanong pagkakita ug panulundon. Kita gi-ordinahan nang daan didto sa pre-mortal nga kahimtang ug natawo dinhi nga mortal aron matuman ang pakigsaad ug saad sa Dios ngadto ni Abraham. Ania kita karon dinhi sa kalibutan niining panahona aron sa pagpadayag sa priesthood ug sa pagsangyaw sa ebanghelyo. Mao kini kita, mao kini ang hinungdan nganong ania kita—karon ug sa kanunay” (“Pagkahimong Usa Ka Misyonaryo,” 47).

3. Tubaga ang mosunod nga mga pangutana diha sa imong scripture study journal:

   1. Unsa man ang imong mabuhat karon, isip usa ka batan-on, sa pagpanalangin sa uban sa kalibutan?

   2. Ngano sa imong hunahuna nga importante alang nimo nga makasabut nga ikaw usa ka binhi ni Abraham?

3 Nephi 21–22

Si Jesukristo nanagna sa mga timailhan sa pagpundok sa balay ni Israel sa katapusang mga adlaw

Sumala sa narekord sa 3 Nephi 21–22, ang Manluluwas mitudlo sa mga Nephite og daghang mga butang mahitungod sa katapusang mga adlaw—sa panahon nga ang ebanghelyo ipahiuli nganhi sa yuta ug ang mga Santos mangandam alang sa Iyang Ikaduhang Pag-anhi.

4. Aron matabangan ka sa pagdiskobre sa unsay gitudlo sa Manluluwas mahitungod sa pagpundok sa Israel, sumala sa narekord sa 3 Nephi 21–22, basaha ang tanan nga mga kasulatan sa wala nga kolum sa mosunod nga tsart. Dayon pagpili og duha sa mga pangutana sa tuo nga kolum nga tubagan diha sa imong scripture study journal.

Mga Bersikulo	Mga Pangutana
Basaha ang 3 Nephi 21:1–2, 7. Kon ang Basahon ni Mormon moabut na sa katapusang mga adlaw, kini mahimong timailhan nga ang Amahan nagsugod na sa pagpundok sa balay ni Israel.	Kanus-a nimo nakita nga ang Basahon ni Mormon migiya (o mipundok) og tawo, lakip sa imong kaugalingon, ngadto ni Jesukristo ug sa mga pakigsaad sa ebanghelyo?
Basaha ang 3 Nephi 21:9. Ang mga pulong nga “usa ka mahinungdanon ug usa ka kahibulongan nga buhat” nagpasabut sa Pagpahiuli sa ebanghelyo ni Jesukristo.	Unsa sa imong hunahuna ang mahinungdanon ug kahibulongan nga buhat sa Pagpahiuli sa ebanghelyo ni Jesukristo?
Basaha ang 3 Nephi 21:10–11, ug pamalandunga kon sa unsa nga paagi nga kini nga deskripsyon mihaum ni Propeta Joseph Smith.	Ngano nga importante nga motuo sa mga pulong sa Ginoo nga miabut pinaagi ni Propeta Joseph Smith?
Basaha ang 3 Nephi 21:22. Kon ang katawhan maghinuslol ug dili magpatig-a sa ilang mga kasingkasing, pagaiphon sila uban sa balay ni Israel.	Ngano sa imong hunahuna nga gikinahanglan ang paghinulsol alang sa usa ka tawo aron mapundok ngadto sa katawhan sa pakigsaad sa Dios?
Basaha ang 3 Nephi 22:7–10, ug pangitaa ang mga saad sa Manluluwas nga gihimo ngadto sa Iyang katawhan sa pakigsaad kinsa mobalik ngadto Kaniya human makalimot sa mga pakigsaad nga ilang gihimo uban Kaniya.	Ngano sa imong hunahuna nga importante nga makasabut nga ang Ginoo nagpakita sa walay katapusan nga kamabination ug kalooy ngadto niadtong kinsa nagpalayo gikan Kaniya?

Paghunahuna og usa ka tawo nga imong kaambitan sa imong pagpamatuod ni Jesukristo, sa Basahon ni Mormon, sa Pagpahiuli sa ebanghelyo, ug sa misyon ni Propeta Joseph Smith sa pagtabang niini nga tawo nga makadawat sa mga panalangin sa gipahiuli nga ebanghelyo. Pamalandunga usab kon unsaon nimo sa pag-awhag ang uban nga moduol ngadto sa Ginoo, lakip niadtong kinsa kaniadto matinud-anon sa ebanghelyo apan wala na karon. Kon ikaw makahunahuna og piho nga indibidwal, paghimo og tumong sa pagsunod sa mga pag-aghat nga imong nadawat.

5. Isulat ang mosunod diha sa ubos sa mga buluhaton karong adlawa sa imong scripture study journal:

   Akong natun-an ang 3 Nephi 20–22 ug nahuman kini nga leksyon niadtong (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: