Unit 29: Day 3
Ether 1–2
Pasiuna
Ang basahon ni Ether mao ang pagminubo ni Moroni sa kasaysayan sa mga Jaredite. Ang mga Jaredite mga tawo nga miadto sa Western Hemisphere mga siglo na ang milabay sa wala pa ang katawhan ni Lehi. Human sa Lunop sa panahon ni Noe, daghang kaliwatan niadtong naluwas ang nahimong dautan. Usa ka grupo sa mga tawo ang misulay sa pagtukod og usa ka tore “nga ang iyang ibubungan moabut sa langit” (Genesis 11:4). Ang istorya bahin sa nasud sa mga Jaredite nagsugod sa pagtukod sa Tore sa Babel. Gipakgang sa Ginoo ang pagkatap sa kadautan pinaagi sa paglibug sa komon nga pinulongan ug pinaagi sa pagpatibulaag sa katawhan sa tibuok yuta (tan-awa sa Genesis 11:5–8; Ether 1:33). Kining istorya diha sa basahon ni Ether nagsugod kang Jared ug sa iyang igsoong lalaki nga nagtinguha sa tabang sa Ginoo sa dihang Iyang gilibug ang pinulongan sa katawhan sa Tore sa Babel. Ang Ginoo mipreserbar sa pinulongan ni Jared, sa iyang igsoong lalaki, ug sa ilang mga pamilya ug mga higala ug migiya kanila agi sa kamingawan paingon sa yuta nga saad. Ang Ginoo misugo dayon sa igsoon nga lalaki ni Jared sa paghimo og walo ka kasko nga modala sa iyang katawhan tabok sa kadagatan.
Ether 1:1–33
Girekord ni Moroni ang genealogy ni Ether balik ngadto ni Jared sa pagtukod sa Tore sa Babel
Aron matabangan nga masabtan nimo kon diin gikan ang basahon ni Ether, ribyuha ang “Overview sa Mosiah 7–24” gikan sa Unit 12: Day 1 lesson (pahina 116). I-refer ngadto sa journey 4, ug bantayi kon unsay nakit-an sa mga tawo ni Limhi niini nga biyahe.
Tan-awa sa sinugdanan sa basahon ni Ether, ug pangitaa ang mubo nga paghulagway sa basahon ubos sa ulohan. Kini nga paghulagway nagpasabut nga ang rekord sa mga Jaredite gikuha gikan sa 24 ka bulawang mga palid nga nakit-an sa katawhan ni Limhi.
Pagkahuman ni Moroni sa rekord sa iyang amahan, gikuha niya ang rekord sa mga Jaredite ug naghimo og mas mubo nga bersyon niini aron malakip sa Basahon ni Mormon. Basaha ang Ether 1:1–4, ug pangitaa kon unsay gisulti ni Moroni nga wala niya giapil sa iyang bersyon sa rekord sa mga Jaredite. Basaha ang Ether 1:5, ug pangitaa kon unsa nga bahin sa istorya nga giapil ni Moroni sa iyang rekord. Ang tore nga gipasabut diha sa Ether 1:5 mao ang Tore sa Babel. Sama sa gipasabut diha sa Ether 1:33, ang Ginoo “milibug” (misagul-sagol) sa pinulongan sa katawhan nga nagtinguha sa pagtukod og tore aron dili nila masabtan ang usag usa, ug Siya mipatibulaag sa katawhan sa tibuok kalibutan.
Sama sa narekord diha sa Ether 1:6–33, usa ka tawo nga ginganlan og Ether ang misulat sa rekord sa mga Jaredite. Girekord ni Moroni ang kaliwatan ni Ether balik ngadto sa tawo nga ginganlan og Jared, nga nagpuyo sa panahon sa Tore sa Babel.
Ether 1:33–43
Ang igsoon nga lalaki ni Jared nag-ampo alang sa tabang, ug ang mga sakop sa iyang pamilya ug mga higala nakadawat og kalooy ug giya
Nakaadto ka na ba og usa ka nasud o dapit diin ang mga tawo nagsulti og pinulongan nga wala nimo masabti? Unsa kaha sa imong hunahuna ang imong bation kon dili ka makasabut sa pinulongan nga gisulti sa uban nga naglibut nimo? Kon makapili ka og pipila lang ka tawo nga ikaistorya niana nga sitwasyon, kinsa man ang imong pilion? Kini nga sitwasyon nahitabo sa usa ka tawo nga ginganlan og Jared ug sa iyang igsoong lalaki, ingon man usab sa ilang mga pamilya, nga nagpuyo sa panahon sa Tore sa Babel. Basaha ang Ether 1:33–37, ug pangitaa ang mga tawo nga gustong ikaistorya ni Jared. Human nga ang igsoon nga lalaki ni Jared nakabaton og saad gikan sa Ginoo nga ang ilang pinulongan dili libugon (tan-awa sa Ether 1:34–35), nag-ampo siya alang sa iyang mga higala (tan-awa sa Ether 1:36–37). Sama sa gipakita sa igsoon nga lalaki ni Jared, usa sa mga kinaiya sa matinud-anong mga tawo mao ang mag-ampo alang sa ilang mga higala aron makadawat sa mga panalangin sa Ginoo.
Ang Ginoo mipanalangin sa mga pamilya ni Jared ug sa iyang igsoong lalaki ug mga higala aron dili libugon ang ilang pinulongan. Dayon mihangyo si Jared sa iyang igsoong lalaki nga mag-ampo sa Dios, nga mangutana Kaniya kon asa moadto ang ilang mga pamilya. (Tan-awa sa Ether 1:38–40.)
Basaha ang Ether 1:40–43, ug hibaloi ang mga instruksyon nga gihatag sa Ginoo sa mga Jaredite aron giyahan sila sa ilang pagbiyahe. Sa imong hunahuna ngano kaha nga importante man alang ni Jared ug sa iyang igsoong lalaki nga mosunod niining mga instruksyon gikan sa Ginoo?
Ether 2:1–12
Ang mga Jaredite nagsugod sa ilang pagbiyahe paingon sa gisaad nga yuta
Basaha ang Ether 2:1–3 aron madiskubrihan kon unsa kamaayo ang reaksyon sa mga Jaredite ngadto sa mga instruksyon nga gihatag sa Ginoo kanila bahin sa pagbiyahe paingon sa gisaad nga yuta (tan-awa sa Ether 1:41–42). Basaha dayon ang Ether 2:4–6, ug pangitaa kon unsay sunod nga nahitabo. Bantayi nga tungod kay ang mga Jaredite mituman sa mga instruksyon sa Ginoo, Siya mihatag kanila og dugang pa nga mga direksyon. Pamalandunga ang mga panalangin ug ang giya nga nadawat sa mga Jaredite tungod kay misunod sila sa mga instruksyon sa Ginoo.
Gikan sa kasinatian sa mga Jaredite atong makat-unan kini nga baruganan: Sa paglihok nato sa atong pagtuo sa direksyon nga gihatag sa Ginoo kanato, makadawat kita og dugang pa nga giya gikan Kaniya. Mahimo nimong isulat kining baruganan diha sa imong mga kasulatan tupad sa Ether 2:6.
Makahunahuna ka ba og usa ka impresyon o pag-aghat nga imong nadawat gikan sa Ginoo samtang nag-ampo, nagtuon sa mga kasulatan, o nagtambong og usa ka miting sa Simbahan? Ipabilin sa hunahuna kana nga impresyon o pag-aghat samtang magbasa ka sa mosunod nga pamahayag gikan ni Elder Richard G. Scott sa Korum sa Napulog Duha ka mga Apostoles kon sa unsang paagi nga kanunay kitang makadawat og mga tubag sa mga pag-ampo: “Tagsa ra kamong makadawat og tubag [sa pag-ampo] diha-diha dayon. Moabut kini sa hinay-hinay, matag usa, aron kamo magtubo nga lig-on. Samtang ang matag usa pagasundan og pagtuo, dad-on kamo ngadto sa laing porsyon hangtud madawat ninyo ang tibuok tubag. Kana nga sundanan nagkinahanglan kanimo nga adunay pagtuo sa kapasidad sa atong Amahan sa pagtubag. Samtang usahay kini lisud kaayo, moresulta kini sa makahuluganong personal nga pagtubo” (“Ang Paggamit sa Langitnon nga Gasa sa Pag-ampo,” Ensign o Liahona, Mayo 2007, 9).
-
Isulat sa imong scripture study journal kon sa unsang paagi ka mitubag (o makatubag) sa espirituhanong pag-aghat nga imong nahunahunaan sa sayo pa. Mahimo usab nimong iapil ang mga panalangin nga imong nadawat (o madawat) tungod sa pagbuhat niana nga pag-aghat.
Sama sa narekord diha sa Ether 2:7–12, gisultihan sa Ginoo ang igsoon nga lalaki ni Jared nga sa dihang siya ug ang iyang katawhan miabut sa gisaad nga yuta, kinahanglan sila nga “moalagad kaniya, ang tinuod ug bugtong nga Dios, o sila kinahanglan pagalaglagon” (Ether 2:8).
Ether 2:13–15
Ang Ginoo mipanton sa igsoon nga lalaki ni Jared tungod sa wala pagtawag Kaniya diha sa pag-ampo
Basaha ang Ether 2:13–15, ug pangitaa kon unsay nahitabo sa dihang miabut ang mga Jaredite sa dako nga dagat nga nagbahin sa mga yuta. Gigiyahan sila sa Ginoo tabok sa kamingawan tungod kay naminaw sila sa Ginoo ug mituman sa Iyang mga sugo. Hinoon, human sila nagkampo duol sa dako nga dagat sulod sa upat ka tuig, miadto ang Ginoo sa igsoon nga lalaki ni Jared ug mipanton kaniya tungod sa kapakyas nga mag-ampo.
Ang Ether 2:14–15 makatabang nato nga makakat-on niining mga baruganan: Ang Ginoo dili mahimuot kon mapakyas kita sa pagtawag Kaniya diha sa pag-ampo. Ang Ginoo nagtinguha nga kita motawag Kaniya kanunay diha sa pag-ampo.
Samtang magbasa ka sa mosunod nga pamahayag gikan ni Elder Donald L. Staheli, nga miserbisyo isip sakop sa Seventy, hunahunaa kon kapila ka mag-ampo: “Ang inadlaw nga kinasingkasing nga mga pag-ampo nga mangayo og pasaylo ug sa espesyal nga panabang ug direksyon mahinungdanon sa atong mga kinabuhi ug sa pag-amuma sa atong mga pagpamatuod. Kon magdali kita, magbalik-balik, dili kaayo tinud-anay, o malimtanon sa atong mga pag-ampo, may purohan nga mawala nato ang kasuod sa Espiritu, nga gikinahanglan kaayo sa mapadayunong direksyon nga atong gikinahanglan aron malampusong madumala ang atong mga hagit sa atong inadlaw-adlaw nga kinabuhi” (“Pagsiguro sa Atong mga Pagpamatuod” Ensign o Liahona, Nob. 2004, 39).
Diha sa imong personal nga journal o sa lain nga papel, tubaga ang mosunod nga mga pangutana;
-
Unsa ang imong gibati bahin sa gihimo nimong personal nga mga pag-ampo?
-
Unsa ang imong gibati bahin sa kasinsero sa imong personal nga mga pag-ampo?
-
Sa imong personal nga mga pag-ampo, mibati ka ba nga tinud-anay kang nakig-istorya sa Langitnong Amahan? Ngano, o nganong dili man?
-
Kon makahimo ka og usa ka kausaban nga makapalambo sa imong personal nga mga pag-ampo, unsa man kaha kini?
Sumala sa narekord diha sa Ether 2:16, ang igsoon nga lalaki ni Jared naghinulsol sa iyang mga sala ug nag-ampo sa Ginoo alang sa mga sakop sa iyang pamilya ug mga higala. Gisultihan siya sa Ginoo nga gipasaylo siya apan kinahanglan gayud nga magpadayon siya diha sa pagkamatarung aron magiyahan paingon sa gisaad nga yuta.
Ether 2:16–25
Ang mga Jaredite naghimo og mga kasko aron makatabok sa kadagatan paingon sa gisaad nga yuta
Paghunahuna og importante nga personal nga desisyon nga imong giatubang o mahimong atubangon sa umaabut, sama sa unsaon pag-atiman sa usa ka lisud nga sitwasyon sa pamilya o pangkatilingban, unsaon nga mahimong maayo sa eskwelahan, kinsa ang minyuan, o unsa nga propesyon ang kuhaon. Nakahunahuna ka ba kon sa unsa kaha nga paagi ang Ginoo mohatag nimo og direksyon o tabang niana nga sitwasyon? Samtang magtuon ka sa nahabilin sa Ether 2, pamalandunga ang desisyon nga imong natino ug pangitaa ang mga baruganan nga makatabang nimo nga madawat ang panabang sa Ginoo.
Basaha ang Ether 2:16–17, ug pangitaa kon unsay gipangayo sa Ginoo nga buhaton sa mga Jaredite aron mouswag paingon sa gisaad nga yuta. Ang igsoon nga lalaki ni Jared nag-atubang og tulo ka mga problema nga miresulta tungod sa desinyo sa mga kasko. Basaha ang Ether 2:18–19, ug markahi ang tulo ka mga problema nga gihisgutan sa igsoon nga lalaki ni Jared ngadto sa Ginoo.
-
Ang mosunod nga tsart makatabang nimo nga makadiskubre kon giunsa pagtabang sa Ginoo ang igsoon nga lalaki ni Jared sa mga problema kalabut sa mga kasko. Tun-i ang mga bersikulo sa kasulatan diha sa tsart, ug dayon gamita ang impormasyon aron masulatan ang “Solusyon sa Problema” nga kolum sa tsart.
|
Mga Bersikulo sa Kasulatan |
Problema kalabut sa mga Kasko |
Solusyon sa Problema |
|---|---|---|
|
Walay hangin | ||
|
Walay makagiya | ||
|
Walay kahayag |
Unsay gibuhat sa Ginoo ug unsay Iyang gipangayo nga buhaton sa igsoon nga lalaki ni Jared lahi alang sa matag problema. Gikan sa matag problema ug solusyon, makakat-on kita og laing kamatuoran bahin sa unsang paagi kita tabangan sa Ginoo kon magkinahanglan kita og tabang. Itandi ang mga solusyon nga imong gisulat sa tsart niadtong sa mosunod nga lista:
Walay hangin (Ether 2:20–21). Aron masulbad kini nga problema, gisultihan sa Ginoo ang igsoon nga lalaki ni Jared kon unsay kinahanglan niyang buhaton. Ang igsoon nga lalaiki ni Jared nianang higayuna dunay hugot nga pagtuo nga mosunod sa mga instruksyon sa Ginoo.
Walay makagiya (Ether 6:4–9). Aron masulbad kini nga problema, ang Ginoo Mismo ang mihatag sa tubag sa problema.
Walay kahayag (Ether 2:22–3:6). Aron masulbad kini nga problema, ang Ginoo mihatag og pipila ka direksyon ngadto sa igsoon nga lalaki ni Jared. Ang igsoon nga lalaki ni Jared nianang higayuna kinahanglang maghunahuna og solusyon sa problema—base sa impormasyon nga duna siya—ug mihangyo alang sa pagtugot ug tabang sa Ginoo sa pagbuhat niini.
Gikan sa kasinatian sa igsoon nga lalaki ni Jared, atong makat-unan kini nga baruganan: Samtang maningkamot kita sa pagbuhat sa atong bahin aron masulbad ang atong mga problema, makadawat kita og tabang sa Ginoo. Maghunahuna bahin sa personal nga desisyon nga imong nahunahunaan kaganina, sa unsang paagi nga ang pagkahibalo niini nga baruganan makatabang nimo aron makadawat og tabang o giya kalabut niini nga desisyon? Sa imong hunahuna unsa kaha ang gipaabut sa Ginoo nga imong buhaton sa paghimo sa imong desisyon?
-
-
Akong natun-an ang Ether 1–2 ug nahuman kini nga leksyon niadtong (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: