Jacob 3–4

Pasiuna

Ang Jacob 3 naglangkob sa panapos sa usa ka wali nga gihatag ni Jacob sa iyang katawhan. Niini nga panapos, si Jacob daklit nga mitanyag og mga pulong sa kahupayan ug saad ngadto sa mga putli og kasingkasing. Gibadlong usab niya ang mga mapasigarbuhon ug dili putli diha sa iyang mga katawhan, nagpasidaan kanila sa mga sangputanan kon dili sila maghinulsol. Ang Jacob 4 naglangkob sa mga pulong nga gidasig si Jacob sa pagsulat alang sa katawhan nga sa umaabut mobasa sa iyang rekord. Mipamatuod siya sa Pag-ula ni Jesukristo ug miawhag sa iyang mga magbabasa nga ipakig-uli (mahiuyon og balik) ang ilang mga kaugalingon ngadto sa Dios nga Amahan pinaagi sa Pag-ula. Uban sa pagpasidaan, namulong siya kabahin sa mga Judeo kinsa mosalikway ni Jesukristo ug sa kayano sa Iyang ebanghelyo.

Jacob 3

Si Jacob nag-awhag sa mga putli og kasingkasing, ug nag-awhag siya sa uban sa paghinulsol

Hunahunaa kon unsa nga tambag ang imong ihatag ngadto sa usa ka batan-ong lalaki o babaye sa mosunod nga mga sitwasyon:

Usa ka batan-ong babaye nga naningkamot sa pagpuyo nga matarung nag-antus tungod kay ang iyang amahan naadik sa alkohol.
Usa ka batan-ong lalaki kinsa nagbuhat sa iyang pinakamaayo sa pagsunod sa ebanghelyo naglisud tungod sa pagdiborsyo sa iyang mga ginikanan.
Usa ka batan-ong babaye makugihong naningkamot sa paghigugma sa iyang pamilya, apan naglisud siya sa panimalay tungod sa kahakog ug kawalay paghunahuna nga mga lihok sa iyang igsoong babaye.

Pamalandungi ang usa ka panahon nga nakasinati ka og mga pagsulay bisan kon naningkamot ka nga magpuyo nga matarung. Si Jacob mitudlo kanato kon unsay buhaton sa ingon nga mga sitwasyon. Basaha ang unang sentence sa Jacob 3:1, ug ilha kon kinsa ang unang gitumong ni Jacob sa kapitulo 3.

Si Jacob miingon nga tungod sa garbo ug imoralidad sa uban (diin mipasidaan siya kaniadto, sumala sa narekord sa Jacob 2) nag-antus ang mga putli og kasingkasing. Basaha ang Jacob 3:1–2, ug sulati ang mosunod nga tsart:

Unsay gi-awhag ni Jacob nga buhaton sa mga putli og kasingkasing?	Unsay gisaad sa Dios sa mga putli og kasingkasing?

Ribyuha ang imong mga tubag sa una nga kolum. Aron sa pagtabang kanimo nga hunahunaon pa kini nga baruganan, tubaga ang duha sa mosunod nga mga pangutana sa imong scripture study journal:
1. Unsaon kaha sa usa ka batan-ong tawo ang “[pag]tan-aw ngadto sa Dios uban ang kalig-on sa hunahuna”?
2. Unsa kaha ang gipasabut sa pag-ampo ngadto sa Dios “uban sa hilabihan nga hugot nga pagtuo” panahon sa pagsulay?
3. Unsa kaha ang mabuhat sa usa ka batan-ong tawo aron “[madawat] ang makapahimuot nga pulong sa Dios”?
Ribyuha ang imong mga tubag sa ikaduha nga kolum. Kini nga mga bersikulo nagtudlo nga ang Dios mohupay sa mga putli og kasingkasing sa ilang mga kasakit. Aron sa pagtabang kanimo nga hunahunaon pa kini nga baruganan, tubaga ang usa o sobra pa sa mosunod nga mga pangutana diha sa imong scripture study journal:
1. Sa unsang paagi ang Dios mihupay kanimo sa imong mga kasakit samtang naningkamot ka sa pagsunod Kaniya?
2. Sa unsang paagi ang pag-ampo “uban sa hilabihan ka hugot nga pagtuo” nakatabang kanimo sa usa ka panahon sa pagsulay?
3. Kanus-a nga ang pagdawat sa pulong sa Dios nakatabang kanimo nga mobati sa Iyang gugma?

Human mamulong ngadto sa mga putli og kasingkasing, si Jacob namulong ngadto sa mga dili putli og kasingkasing. Basaha ang Jacob 3:3–4, 10–12, ug hibaloi kon unsay giawhag ni Jacob nga buhaton sa mga tawo. Tingali makatabang nga masayran nga ang mga pulong nga “pukawa ang mga galamhan” nagpasabut sa pagpukaw sa atong mga abilidad ug mga emosyon, ug ang mga pulong nga gidili nga panghilawas ug pagkamaulagon nagpasabut sa sekswal nga mga sala ug kahigal.

Sa Jacob 3:3–4, 10–12, mabasa usab nato ang mga pasidaan ni Jacob mahitungod sa unsay mahitabo kon ang iyang katawhan dili maghinulsol. Human magtuon niini nga mga bersikulo, lingini ang mga hugpong sa pulong nga naghulagway sa mosunod nga mga sangputanan: (a) Ang mga Lamanite molaglag kanila. (b) Ang ilang ehemplo modala sa ilang mga anak ngadto sa kalaglagan. (c) Ilang masinati ang ikaduha nga kamatayon, o sa laing pagkasulti, pagkahimulag gikan sa Dios.

Hunahunaa sa makadiyot kon sa unsang paagi ang pasidaan ni Jacob makonsiderar nga usa ka dakong panalangin sa iyang katawhan.

Sumala sa narekord diha sa Jacob 3:5–7, si Jacob maisugong mipahayag nga ang mga Lamanite “labaw pa nga matarung” kay sa mga Nephite tungod kay ang “ilang mga bana naghigugma sa ilang mga asawa, ug ang ilang mga asawa naghigugma sa ilang mga bana; ug ang ilang mga bana ug ang ilang mga asawa naghigugma sa ilang mga anak.” Ang mga Nephite kinahanglan nga maghinulsol sa tanan nilang mga sala, ilabi na niadtong mipaminos sa gugma ug pagsalig sa ilang mga pamilya.

Pamalandungi ang Jacob 3:11–12, ug i-summarize ang mensahe sa imong kaugalingong mga pulong.

Gahini kadiyot og panahon sa paghunahuna sa mga tintasyon nga imong giatubang ug unsang makalilisang nga mga sangputanan ang imong nalikayan samtang naghinulsol ka sa imong mga kasaypanan.

Jacob 4

Si Jacob nag-awhag sa iyang katawhan sa pag-angkon og paglaum nga sila makabalik ngadto sa presensya sa Dios

Aron mangandam sa pagtuon sa Jacob 4, alsaha ang imong bolpen o lapis og dili mominos duha ka tiil o usa ka metros ibabaw sa imong manwal, ug sulayi kini pagtagak nga maigo niini ang sentro sa target—“ang tumong.” Mahimo nimo kining sulayan sa pipila ka higayon. Hunahunaa kon unsa ka dili epektibo ang imong mga paningkamot kon nagtan-aw ka sa laing dapit imbis nga sa target. Unsa kaha ka maayo ang mga tawo diha sa archery kon dili gayud sila motan-aw sa target, o tumong, samtang motira sila o kon nagtan-aw sila lapas sa tumong? Basaha ang Jacob 4:14, ug hibaloi ang mga kinaiya sa katawhan nga gipanagna ni Jacob nga motan-aw “lapas sa tumong.”

Mahimo nimong isulat sa imong mga kasulatan tupad sa Jacob 4:14 nga “ang tumong mao si Kristo” (Neal A. Maxwell, “Jesus of Nazareth, Savior and King,” Ensign, Mayo 1976, 26). Sa samang paagi, si Pablo mitudlo, “Ako nagapadayon paingon sa dauganan, ngadto sa ganti nga mao ang sa langitnong pagtawag kanato sa Dios diha kang Kristo Jesus” (Mga Taga-Filipos 3:14).

Si propeta Jacob nagpasabut ngadto sa mga Judeo kinsa nasayop sa pagsabut sa balaod ni Moises ug sa katuyoan niini sa pagdala kanila ngadto sa Manluluwas. Daghan sa mga Judeo nagpaabut og lahi nga matang sa kaluwasan kay sa matang nga gitanyag ni Jesus, ang Mesiyas, ngadto kanila—nagpaabut sila og kaluwasan gikan sa pagdumala ug pagdaug-daog sa mga langyaw.

Tubaga ang mosunod nga mga pangutana diha sa imong scripture study journal:
1. Unsa kaha ang gipasabut sa pagtan-aw lapas sa tumong (Jesukristo)?
2. Unsa nga mga kinaiya ug mga lihok nga nalista sa Jacob 4:14 ang mibuta sa mga Judeo ug mipugong kanila sa pagdawat ni Jesukristo?
3. Unsa kaha ang pipila ka mga ehemplo sa pagtan-aw lapas sa tumong, o kapakyas sa pagtutok ngadto sa Manluluwas, karon?

Gusto ni Jacob nga kadtong mobasa sa iyang rekord adunay kinaiya nga hingpit nga lahi kay sa kinaiya sa mga Judeo nga wala makakita sa tumong. Basaha ang Jacob 4:4, ug hibaloi kon unsay gusto ni Jacob nga masayran sa tanan nga mobasa sa iyang rekord. Basaha usab ang Jacob 4:12, ug markahi ang mga pulong nga “ngano nga dili mamulong mahitungod sa pag-ula ni Kristo.” Sumala sa narekord sa Jacob 4:4–12, si Jacob mihatag og pipila ka mga rason nganong mituo siya kang Jesukristo ug nganong gibati niya nga importanting mahibaloan sa uban ang Pag-ula.

Isulat ang mosunod nga mga scripture reference diha sa imong scripture study journal, ug dayon pagsulat og mugbo nga mga summary sa gitudlo ni Jacob mahitungod ni Jesukristo o sa Pag-ula sa matag reference:

Unsa nga mga pulong o mga hugpong sa pulong diha sa Jacob 4:4–6 ang nagpakita nga ang katawhan ni Jacob nakasabut sa kinaiya sa Dios nga Kapangulohan?

Tingali makatabang nga masayud nga ang “ipaila ingon nga unang mga bunga ni Kristo ngadto sa Dios” (Jacob 4:11) nagpasabut sa pagbarug atubangan sa Dios nga takus sa pagsulod sa celestial nga gingharian. Usab, importante nga masabtan nga aron kita adunay “usa ka paglaum sa … himaya [sa Manluluwas]” (Jacob 4:4), kinahanglan nga motuo kita nga si Jesukristo mihatag og paagi aron kita matubos gikan sa atong mga sala ug mabanhaw aron kita makabalik ngadto sa presensya sa Langitnong Amahan.

Usa ka kamatuoran nga atong makat-unan sa Jacob 4 mao kini: Pinaagi sa Pag-ula ni Jesukristo, kita mahimong mapuno sa paglaum ug makipag-uli sa atong mga kaugalingon ngadto sa Dios.

Pagsulat og mugbong mga tubag sa mosunod diha sa imong scripture study journal:
1. Ribyuha ang mga kamatuoran mahitungod ni Jesukristo nga imong gitun-an sa Jacob 4:4–12, ug pagpili og usa nga labing nagdasig kanimo nga gustong mamulong mahitungod sa Pag-ula. Isulat kana nga kamatuoran, ug ipasabut nganong imo kining gipili.
2. Unsa ang ubang personal nga mga rason nga nagdasig kanimo nga gustong mamulong mahitungod ni Jesukristo ug sa Pag-ula?

Sa imong pagtapos niini nga leksyon, pamalandungi nganong mapasalamaton ka sa Manluluwas. Ikonsiderar ang pagpakigbahin sa imong mga rason ngadto sa usa ka sakop sa pamilya o suod nga higala.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Jacob 3–4 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: