2 Nephi 6–8

Pasiuna

Ang rekord ni Nephi sa unang parte sa usa ka wali nga gitudlo sa iyang manghud nga si Jacob makita sa 2 Nephi 6–8. (Ang ikaduhang parte sa wali ni Jacob makita sa 2 Nephi 9–10.) Si Jacob nanagna nga sukad sa panahon nga si Lehi mibiya sa Jerusalem, ang mga Judeo nahimong bihag ug nagkatibulaag tungod sa ilang pagkadautan. Hinoon, ang Ginoo uban sa kalooy mopundok og balik sa mga Judeo ngadto sa Jerusalem. Si Jacob nanagna usab nga ang mga Judeo magkatibulaag sa ikaduhang higayon human ilang gisalikway ang Manluluwas atol sa Iyang mortal nga pangalagad; ang Ginoo mopakita pag-usab og kalooy ug mopundok kanila sa katapusang mga adlaw samtang mahibalo sila kabahin sa Manluluwas. Dugang pa, si Jacob mikutlo sa mga panagna ni Isaias nga nagpakita sa pagkamaunungon sa Manluluwas ngadto sa Iyang mga katawhan sa pakigsaad, sa Iyang kalooy, ug sa kahalangdon sa Iyang mga saad ngadto sa mga matinud-anon.

2 Nephi 6

Si Jacob nanagna sa pagkatibulaag ug pagkapundok sa Israel

Unsay imong buhaton kon ang mga tawo nga imong gimahal dili maayo ang pagtratar kanimo? Unsa kaha kon ilang gipakita pinaagi sa ilang mga lihok o kinaiya nga ang inyong relasyon dili na importante ngadto kanila? Pamalandungi kon nakabuhat ka ba niini nga paagi ngadto sa Ginoo. Sa 2 Nephi 6–8, si Jacob mitudlo kon unsaon sa pagresponde sa Ginoo niadtong kinsa, pinaagi sa ilang mga kinaiya ug mga lihok, mipalayo Kaniya.

Basaha ang 2 Nephi 6:3–5; 9:1, 3, ug pangita og mga rason nganong si Jacob mihatag niini nga wali.

Samtang magtuon ka karon, tan-awa kon sa unsang paagi ang mga pagtulun-an ni Jacob makatabang kanimo nga “makakat-on ug maghimaya sa ngalan sa inyong Dios” (2 Nephi 6:4), mas makasabut sa mga pakigsaad nga imong gihimo uban sa Ginoo (tan-awa sa 2 Nephi 9:1), ug makahatag kanimo og rason nga “magmaya, ug ihangad ang inyong mga ulo sa kahangturan” (2 Nephi 9:3).

Tubaga ang mosunod nga mga pangutana diha sa imong scripture study journal:
1. Gisugdan ni Jacob ang iyang wali pinaagi sa pagpanagna kon unsay nahitabo sa mga Judeo human si Lehi mibiya sa Jerusalem tungod kay sila misalikway sa Ginoo. Giunsa niya kini paghulagway diha sa 2 Nephi 6:8?
2. Si Lehi, Jeremias, ug ubang mga propeta nanagna mahitungod niini nga kalaglagan. Sa dihang ang mga taga-Babelonia mibuntog sa mga Judeo niadtong mga 587 B.C., daghan ang gipamatay ug ang uban gidala nga bihag ngadto sa Babelonia. Ang mga Judeo sa katapusan mipahumok sa ilang mga kasingkasing ngadto sa Ginoo. Sumala sa unang sentence sa 2 Nephi 6:9, unsa ang gipanagna ni Jacob nga mahitabo kanila?
3. Si Jacob nanagna nga ang Manluluwas mopuyo sa Iyang mortal nga kinabuhi taliwala sa mga Judeo human sila mouli gikan sa pagkabihag. Sumala sa 2 Nephi 6:9–10, unsay buhaton ug bation sa mga Judeo ngadto sa Manluluwas?
4. Sumala sa 2 Nephi 6:10–11, unsay mahitabo sa mga Judeo nga misalikway sa Manluluwas?

Basaha ang 2 Nephi 6:11, 14, ug pangitaa ang mga pulong nga naghulagway kon unsay gibati sa Ginoo mahitungod sa balay ni Israel bisan tuod misalikway sila Kaniya. Mahimo nimong linginan ang mga pulong nga “magmaloloy-on ngadto kanila” ug “pagbawi kanila” sa imong mga kasulatan.

Sa imong scripture study journal, isulat ang imong mga tubag sa mosunod nga mga pangutana:
1. Unsay gipasabut sa “pagbawi” sa usa ka tawo o usa ka butang?
2. Sa unsang paagi ang kaandam sa Ginoo sa pagbawi sa Israel sa ikaduhang higayon nagpakita sa Iyang kalooy?

Dinhi gihapon nga mga bersikulo si Jacob mitudlo kon unsay kinahanglang buhaton sa mga Judeo aron makadawat niini nga mga panalangin gikan sa Ginoo. Basaha ang 2 Nephi 6:11, 14 pag-usab, ug pangitaa ang mga pulong “nga sila” sa matag bersikulo. I-highlight ang mga pulong nga nagkompleto sa hugpong sa mga pulong. Sumala niini nga mga bersikulo, unsaon pagkahimong takus sa Israel alang sa kalooy sa Ginoo? Kini nga mga bersikulo nagtudlo sa baruganan: Ang Ginoo magmaloloy-on niadtong mobalik Kaniya.

Pamalandong og mga pamaagi dihang imong nasaksihan ang kalooy ug kaandam sa Ginoo sa pagpasaylo niadtong mobalik ngadto Kaniya. Sa imong scripture study journal isulat ang: Nasayud ko nga ang Ginoo maloloy-on tungod kay … Dayon kompletuha ang pamahayag gamit ang imong kaugalingong mga hunahuna ug pagbati. Mahimo nimong balikon kini nga kalihokan samtang maghunahuna ka sa lain-laing pamaagi nga ang Ginoo mipakita nga Siya maloloy-on.

Sa 2 Nephi 6 adunay dakong saad sa paglaum alang sa Israel—nga naglakip kanatong tanan. Basaha ang 2 Nephi 6:17–18, ug kompletuha ang mosunod nga mga saad nga gihimo sa Manluluwas:

“Ang Dios nga Makagagahum ” (2 Nephi 6:17).

“Ang tanan nga tawo masayud nga ” (2 Nephi 6:18).

2 Nephi 7–8

Si Jacob mikutlo sa mga panagna ni Isaias mahitungod sa pagkamaunungon sa Manluluwas ngadto sa mga katawhan sa pakigsaad ug sa Iyang abilidad sa pagtubos kanato

Sumala sa narekord sa 2 Nephi 7–8, si Jacob mikutlo sa mga panagna ni Isaias kabahin sa tinguha ug abilidad sa Ginoo sa pagtubos sa Israel gikan sa mga pag-antus nga resulta sa ilang mga sala. Basaha ang 2 Nephi 7:1–2, ug hibaloi ang mga pangutana nga gipangutana sa Ginoo ngadto sa Israel nga nagpasabut nga nahigugma gihapon Siya kanila ug gusto nga motubos kanila.

Makatabang ang pagsabut nga ang Ginoo migamit og simbolikanhong pinulongan kalabut sa diborsyo ug pagkaulipon, ug sa sosyal nga mga kustombre nga pamilyar sa mga katawhan nianang panahona, aron sa pagtudlo kanila sa epektibo ug dili makalimtan nga paagi. Ang mga pulong nga “mipiyal kaninyo,” “kalig-unan sa panagbulag sa kaminyoon sa inyong inahan,” ug “mibaligya kaninyo” nagpasabut sa ideya sa paglapas o pagputol sa usa ka pakigsaad. Ang mga pangutana mahimong usbon sama sa mosunod: “Mipalayo ba Ako gikan kaninyo? Gisalikway Ko ba ang pakigsaad nga atong gihimo?” Ang tubag niini nga mga pangutana mao ang, “Wala.” Ang Ginoo dili gayud mopalayo gikan kanato o kalimtan ang mga pakigsaad nga Iyang gihimo. Ang Iyang mga pangutana usa ka paagi sa pagpasabut og maayo nga dili gayud Niya putlon ang Iyang pakigsaad uban sa Israel.

Sa katapusan sa 2 Nephi 7:1, linyahi ang pagpasabut sa Ginoo kon nganong nahimulag ang Israel gikan sa Dios ug nag-antus diha sa pagkabihag.

Tubaga ang usa sa mosunod nga mga pangutana diha sa imong scripture study journal:
1. Nganong importante nga masabtan nga ang atong mga hunahuna, mga desisyon, ug mga lihok makapahimulag kanato gikan sa Dios?
2. Nganong importante man nga imong masayran nga ang Ginoo dili gayud malimot o mobiya kanato, bisan tuod kita tingali makalimot ug mobiya Kaniya?

Sa 2 Nephi 7:2 ang Ginoo nangutana sa Israel og importanting pangutana nga magamit sa matag usa kanato. Pangitaa ug i-highlight ang pangutana.

Unsa kaha ang gipasabut sa Ginoo sa dihang nangutana Siya, “Ang akong bukton gipamub-an ba nga kini dili makatubos?” Aron sa pagtabang kanimo sa paghanduraw niini, hunahunaa nga imong gituyhad ang imong kamot, naningkamot sa pagkab-ot sa usa ka tawo nga nanginahanglan. Kon imong patas-an ang imong makab-ot, unsay imong gipaningkamutang buhaton alang sa tawo nga nanginahanglan? Kon imo hinoong pamub-an o i-atras ang imong kamot, unsay ikasulti niini mahitungod sa imong tinguha sa pagtabang sa tawo? Samtang anaa kini nga paglarawan sa hunahuna, ang laing paagi sa paghan-ay sa pangutana sa Ginoo ngadto sa Israel mao ang: “Nagpugong ba ko ug wala magtinguha sa pagtubos kaninyo?”

Ang mga pulong nga “Ako wala bay gahum sa pagluwas?” midapit sa Israel sa pagpamalandong sa ilang pagtuo nga ang Ginoo adunay gahum sa pagluwas kanila gikan sa pag-antus nga miresulta sa ilang mga sala.

Sa nahibilin sa 2 Nephi 7–8, si Isaias mihatag og pipila ka mga ehemplo sa tinguha ug gahum sa Manluluwas sa pagtubos sa Iyang mga katawhan sa pakigsaad.

Basaha ang 2 Nephi 7:5–7, ug pangita og hugpong sa mga pulong dinhi niini nga panagna nga nagsulti kon unsa ang buhaton ug masinati sa Mesiyas isip kabahin sa Iyang maulaong sakripisyo aron sa pagtubos kanato. Sa 2 Nephi 7:6, footnote a, adunay mga cross reference nga nagpasabut ug nagpakita sa katumanan niini nga panagna. Mahimo nimong markahan ang Mateo 27: 26 diha sa footnote; dayon basaha ang Mateo 27: 26–31, nga mangita sa mga paagi nga natuman ang panagna ni Isaias.

Tubaga ang mosunod nga pangutana sa imong scripture study journal: Unsay gipakita sa 2 Nephi 7:2, 5–7 kanato mahitungod sa tinguha ug kaandam sa Manluluwas sa pagtubos kanato?

Aron sa pagtabang kanimo sa pagdiskubre og dugang ebidensya sa kalooy ug gahum sa Ginoo diha sa nahibilin sa panagna ni Isaias, hunahunaa nga gihangyo ka sa paghatag og pakigpulong sa simbahan kabahin sa baruganan: Ang Manluluwas nagtinguha sa pagtubos sa Iyang mga katawhan sa pakigsaad ug aduna sa tanang gahum aron mabuhat kini. Aron sa pagpangandam alang sa imong pakigpulong, basaha ang 2 Nephi 8:3, 11–13, 16, 22, ug pilia ang mga pulong nga imong gibati nga nagtanyag og kasiguroan sa tinguha ug gahum sa Ginoo sa pagtubos kanato.

Paghimo og outline sa imong pakigpulong diha sa imong scripture study journal pinaagi sa:
1. Paglista og duha o tulo ka hugpong sa mga pulong nga tataw kaayo kanimo ug sa pagpasabut kon sa unsang paagi ang matag hugpong sa mga pulong usa ka ehemplo sa tinguha sa Manluluwas sa pagtubos kanato o sa Iyang gahum sa pagbuhat sa ingon.
2. Pagpili og usa niadto nga mga hugpong sa mga pulong ug paghulagway kon sa unsang paagi imong nasinati, o gustong masinati, kana nga panalangin sa imong kinabuhi.

Sa imong paghuman niini nga leksyon, hinumdumi nga si Jacob mitudlo sa mga kamatuoran nga imong natun-an karon “aron kamo makakat-on ug maghimaya sa ngalan sa inyong Dios” (2 Nephi 6:4), “aron unta kamo masayud mahitungod sa mga pakigsaad sa Ginoo” (2 Nephi 9:1), ug “nga kamo magmaya, ug ihangad ang inyong mga ulo sa kahangturan” (2 Nephi 9:3). Pangita og oportunidad karon sa pagpakigbahin sa imong pagpasalamat alang sa Ginoo ug sa Iyang gugma alang kanimo ngadto sa usa ka tawo.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 2 Nephi 6–8 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: