Unit 17: Day 3
Alma 21–22
Pasiuna
Si Aaron, usa sa igsoong mga lalaki ni Ammon, misulay sa pagtudlo sa mga Amalekite ug mga Amulonite mahitungod ni Jesukristo ug sa Pag-ula, apan ang mga tawo misalikway kaniya. Siya ug ang pipila sa iyang mga kaubanan nalandig sa prisohan sa yuta sa Middoni. Pabilin silang nagmatinud-anon atol sa panahon sa ilang kalisdanan. Human masiguro ni Ammon ug ni Haring Lamoni nga makagawas sila, gitudloan ni Aaron ang amahan ni Lamoni unsaon nga “matawo sa Dios” (Alma 22:15). Nakat-unan sa hari nga pinaagi sa paghinulsol sa iyang mga sala, mailhan niya ang Dios ug sa katapusan madawat ang kinabuhing dayon. Ang kamatinud-anon ni Aaron ug sa iyang kaigsoonan nakatabang sa daghang Lamanite nga makaila sa Dios ug sa Iyang paagi sa katubsanan.
Alma 21:1–23
Si Aaron ug ang iyang kaigsoonan misangyaw sa ebanghelyo bisan sa mga pagsulay ug sa pagkapriso
Paghunahuna og usa ka higayon nga ikaw naningkamot gayud sa pagtuman sa mga sugo ug sa gihapon nag-atubang og mga kalisdanan. Dayon pamalandunga ang mosunod nga mga pangutana: Unsay imong gihimo aron magmatinud-anon bisan sa mga pagsulay nga giatubang? Kon tan-awon nimo og balik ang kasinatian, sa unsang paagi nimo mabati nga ang Ginoo mipanalangin kanimo nianang higayuna?
Samtang nagtudlo si Ammon ni Haring Lamoni ug sa iyang mga tawo (tan-awa sa Alma 17–19), si Aaron ug iyang mga kaubanan nakasinati ug grabing mga kalisud samtang misulay sila sa pagtudlo sa lahi nga bahin sa yuta. Alang sa mubo nga overview sa mga pagsulay nga giantus ni Aaron ug sa iyang mga kauban samtang gibilanggo, tan-awa ang Alma 20:28–30. Dayon basaha ang mga tudling gikan sa Alma 21:1–17 nga gipakita sa kalihokan diha sa ubos. Tan-awa kon giunsa sa pag-atubang ni Aaron ug sa iyang kaigsoonan ang mga pagsulay.
-
Kopyaha ang mosunod nga tsart diha sa imong scripture study journal, nga magbilin og luna para sa imong mga komentaryo human sa matag kasulatan:
Hagit o Kalisud
Giunsa ni Aaron ug sa Iyang Kompanyon sa Pagsanong
Human og basa sa matag tudling sa kasulatan, diha sa walang bahin sa tsart, isulat ang mga hagit o kalisdanan nga giatubang nila ni Aaron ug sa iyang mga kaubanan. Sa tuong bahin, isulat giunsa ni Aaron ug sa iyang mga kaubanan sa pagsanong. Dayon tubaga ang mosunod nga mga pangutana:
-
Ngano kaha nga sayon ra unta para nila ang pagkaluya, pagkawala sa paglaum, ug mobalik sa mas mahigalaong dapit ngadto sa mga Nephite?
-
Sa unsang paagi kita, isip member missionaries, makabenipisyo sa pagtuon niini nga istorya?
-
Basaha ang Alma 21:16–17, ug pangitaa kon giunsa sa Ginoo sa pagtabang kang Aaron ug sa iyang kaigsoonan sa paghimo sa Iyang buluhaton samtang nagpadayon sila uban sa pagtuo. Pinaagi kang Aaron ug sa iyang kaigsoonan, atong makat-unan kini nga baruganan: Kon matinud-anon kitang magpadayon latas sa atong mga pagsulay, tabangan kita sa Ginoo nga mahimo ang Iyang buluhaton. Mahimo nimong isulat kini nga baruganan diha sa imong mga kasulatan o sa scripture study journal.
Hunahunaa kon unsa nga mga matang sa buluhaton sa Dios ang ipahimo kanimo karon ug sa umaabut ug unsang mga hagit ang tingali imong atubangon sa paningkamot nga matuman kini nga buluhaton. Basaha ang mosunod nga pamahayag gikan ni Presidente Thomas S. Monson, kinsa mitudlo nga kita adunay mga pagsulay samtang maningkamot kita sa paghimo sa buluhaton sa Ginoo:
Ang pagtabang, pagtudlo, pagtandog sa bililhong mga kalag nga giandam sa Amahan alang sa Iyang mensahe usa ka dako nga buluhaton. Ang kalampusan talagsa ra kaayo nga sayon. Sa kinatibuk-an unhan kini og mga luha, pagsulay, pagsalig, ug pagpamatuod. …
“… Ang mga sulugoon sa Dios makabaton og kahupayan gikan sa kasiguroan sa Agalon: ‘Ako magauban kaninyo sa kanunay’ (Mateo 28:20). Kini nga talagsaong saad makasuporta kanimo. … Mohupay kanimo atol sa mga panahon nga mawad-an ka sa paglaum, nga moabut sa tanan” (“Tears, Trials, Trust, Testimony,” Ensign, Mayo 1987, 43).
-
Basaha ang Alma 21:18–23 aron makita kon unsay gihimo ni Ammon sa pagtabang ni Aaron ug sa iyang mga igsoon nga makagawas sa bilanggoan. Tan-awa kon sa unsang paagi ang kinabuhi sa mga Lamanite nausab tungod kay gitudloan sila ni Ammon sa ebanghelyo.
Hunahunaa kon sa unsang paagi ang ebanghelyo ni Jesukristo nakausab sa kinabuhi sa usa ka tawo nga imong nailhan. Pamalandunga kon unsaon nimo sa pagpakigbahin ang ebanghelyo ngadto sa tawo nga imong nailhan, o paghunahuna og tawo kinsa mahimong maimpluwensya sa mga ehemplo ni Aaron ug sa iyang kaigsoonan. Ikonsiderar ang pagpakigbahin niana nga tawo unsay imong nakat-unan gikan sa ehemplo ni Aaron ug sa iyang kaigsoonan samtang nagmatinud-anon sila nga nagpadayon sa buluhaton sa Ginoo.
Alma 22
Ang amahan ni Lamoni, kinsa mao ang hari sa tibuok yuta, mituo sa ebanghelyo nga gitudlo ni Aaron
Hinumdumi ang pakig-atubang ni Ammon sa amahan ni Lamoni, nga giribyu sa milabay nga leksyon. Basaha og usab ang piho nga hangyo sa hari ngadto kang Ammon, nga narekord sa Alma 20:27. Samtang imong basahon ang Alma 22:1–3, pangitaa kon giunsa pagsanong sa hari ang pagbisita ni Aaron.
Basaha ang Alma 22:4–6, ug hibaloi kon unsay nakahasol sa amahan ni Haring Lamoni. Basaha ang Alma 22:7–14 ug pangitaa ang mga kamatuoran nga gitudlo ni Aaron sa amahan ni Lamoni.
Pamalandungi ang mosunod nga mga pangutana (tingali makatabang ang paghinumdom sa susamang diskusyon mahitungod ni Haring Lamoni diha sa Alma 17–18):
-
Ngano nga gikinahanglan man nga motuo ang hari sa Dios aron masabtan ang paghinulsol?
-
Sa unsang paagi ang pagkahibalo mahitungod sa Pagkapukan nakatabang sa hari nga masabtan ang paghinulsol?
-
Basaha ang Alma 22:15, nga mangita kon unsay andam nga isakripisyo sa amahan ni Lamoni aron madawat ang hingpit nga kalipay ug kinabuhing dayon, ug ikonsiderar ang pagmarka niini diha sa imong mga kasulatan.
-
Basaha ang Alma 22:16 aron makita giunsa ni Aaron sa pagtubag ang pangutana sa hari kon unsaon sa pag-angkon og kinabuhing dayon. (Ikonsiderar ang pagmarka sa importanting mga kamatuoran nga imong nakita nga gitudlo niini nga bersikulo.) Sa unsang paagi ang pagdawat ug pagsunod sa mga kamatuoran nga gitudlo ni Aaron magdala sa tawo aron makadawat og kinabuhing dayon?
Basaha ang Alma 22:17–18, nga mangita kon sa unsang paagi misanong ang hari sa mga instruksyon ni Aaron. Pamalandunga ang mosunod nga pangutana: Unsa ang atong makat-unan gikan sa amahan ni Haring Lamoni mahitungod sa magpakatawo sa Dios?
Mahimo nimong markahan kini nga mga pulong sa Alma 22:18: “ako mobiya sa tanan kong mga sala aron makaila kanimo.” Pamalandunga ang mosunod nga kamatuoran, ug isulat kini diha sa imong mga kasulatan sa imong scripture study journal: Kinahanglan nga andam kitang mobiya sa atong mga sala aron sa espiritwal nga paagi mausab ug matawo sa Dios.
Basaha ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles: “Ang ebanghelyo ni Jesukristo naghagit kanato nga mag-usab. ‘Paghinulsol’ mao ang pirmi nga mensahe niini, ug ang paghinulsol nagpasabut sa pagsalikway sa tanan natong mga binuhatan—ma-personal, pamilya, kaliwat, ug nasudnon—nga kanang sukwahi sa mga sugo sa Dios. Ang katuyoan sa ebanghelyo mao ang pag-usab sa kasarangang mga nilalang ngadto sa celestial nga mga lungsuranon, ug kana nagkinahanglan og kausaban” (“Paghinulsol ug Kausaban,” Ensign o Liahona, Nob. 2003, 37).
Pamalandunga kon unsay kinahanglan nimong buhaton sa imong kinabuhi karon aron mausab sa espirituhanong paagi.
Basaha ang Alma 22:19–22 aron makita unsay nanghitabo human sa pag-ampo sa hari. Basaha ang Alma 22:23–27, nga mangita unsay gihimo sa amahan ni Lamoni tungod kay nadawat niya ang kausaban sa kasingkasing ug nakadawat sa Espiritu sa Ginoo diha sa iyang kaugalingon.
-
-
Akong natun-an ang Alma 21–22 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: