Alma 36

Pasiuna

Human nakauli si Alma gikan sa iyang misyon ngadto sa mga Zoramite, iyang gipundok ang iyang tulo ka anak nga mga lalaki ug gihatagan og tinagsa nga tambag ang matag usa (tan-awa sa Alma 35:16). Ang iyang tambag ngadto kang Helaman narekord sa Alma 36–37, ang iyang tambag ngadto kang Shiblon narekord sa Alma 38, ug ang iyang tambag ngadto kang Corianton narekord sa Alma 39–42. Mipamatuod si Alma ngadto ni Helaman nga ang Dios moluwas niadtong kinsa mobutang sa ilang pagsalig diha Kaniya. Sa paghulagway niini nga kamatuoran, gihulagway ni Alma sa unsang paagi siya giluwas gikan sa kasakit sa iyang mga sala daghang tuig nang milabay. Human mitawag sa pangalan ni Jesukristo, siya natawo sa Dios ug napuno sa kalipay. Dayon naghago siya sa pagdala sa uban ngadto kang Jesukristo.

Alma 36:1–5

Gitudloan ni Alma ang iyang anak nga si Helaman mahitungod sa gahum sa Dios nga mosuporta kanato sa atong mga pagsulay

Pamalandunga sa unsang paagi ang pagpamatuod o piho nga pagtudlo ngadto sa usa ka sakop sa pamilya, higala, o lider sa Simbahan mipanalangin sa imong kinabuhi.

Basaha ang Alma 36:1–5, ug hunahunaa nga ikaw si Helaman samtang naminaw siya sa pagpamatuod sa iyang amahan. Unsay gusto ni Alma nga hinumduman ni Helaman? (Tan-awa sa bersikulo 2.) Unsay gusto ni Alma nga makat-unan ni Helaman gikan kaniya? (Tan-awa sa bersikulo 3.)

Isulat ang mosunod nga baruganan diha sa imong mga kasulatan tupad sa Alma 36:3: Kon ibutang nato ang atong pagsalig sa Dios, Siya mosuporta kanato sa tanan natong mga pagsulay ug mga kasakit. Paghunahuna og panahon nga duna kay pagsulay sa imong kinabuhi. Sa luna nga giandam, isulat ang pipila ka mga paagi diin ang Dios mitabang ug misuporta kanimo nianang higayuna.

Alma 36:6–22

Gihulagway ni Alma ang iyang pagsupil ug mipasabut sa unsang paagi iyang nadawat ang kapasayloan

Gihulagway ni Alma ngadto sa iyang anak nga si Helaman sa unsang paagi ang Dios mihaw-as kaniya gikan sa mga kasakit sa iyang mga sala. Basaha ang Alma 36:6–10, ug ribyuha kon unsay nahitabo ni Alma sa iyang kabatan-on samtang miadto siya kauban sa anak nga mga lalaki ni Mosiah nagtinguha sa paglaglag sa Simbahan.

Diha sa Basahon ni Mormon dunay tulo ka istorya kabahin sa anghel nga mibisita ni Alma ug sa anak nga mga lalaki ni Alma. Ang Alma 36 naglangkob sa pinakadetalyadong istorya sa mga nasinati ni Alma atol sa tulo ka adlaw ug gabii dihang dili siya makalihok o makasulti. (Aron mabasa ang uban pang mga istorya, tan-awa sa Mosiah 27 ug Alma 38.) Basaha ang Alma 36:11–16, ug markahi ang mga pulong o hugpong sa mga pulong nga gigamit ni Alma sa paghulagway sa kahadlok o kasakit nga iyang nasinati human mipakita ang anghel.

Si Presidente Boyd K. Packer sa Korum sa Napulog Duha ka mga Apostoles mitabang kanato sa pagpasabut kon unsay ipasabut sa gisakit ug gihasol:

“Ang gisakit nagpasabut nga ‘gipasakitan.’ Sa karaan ang rack [pasakitanan] usa ka porma diin ang biktima may buol-buol sa tiil ug ang mga kamot sa may pulso ihigot sa usa ka buburanan unya lubagon aron maghatag og dili maagwanta nga kasakit.

“Ang harrow [paghasol] usa ka porma nga dunay mga talinis nga gipamutang niini. Kon guruyon kini sa yuta, modulot kini ug mobuak sa yuta. Ang mga kasulatan sagad nga mamulong kabahin sa mga kalag ug hunahuna nga ‘gihasol’ sa sala” (“The Touch of the Master’s Hand,” Ensign, Mayo 2001, 23).

Sa imong scripture study journal, isulat kon ngano kaha nga migamit man si Alma og ingon ka bug-at nga mga pulong sa paghulagway sa iyang gibati. Isulat usab sa unsang paagi kining mga pulonga naghulagway sa pagbati ug kasakit sa tawo nga nakasala ug wala maghinulsol.

Mahimo nimong isulat ang mosunod nga kamatuoran diha sa imong mga kasulatan duol sa Alma 36:11–16: ang sala mosangput sa kasakit ug pagmahay.

Basaha ang Alma 36:17–18, ug tan-awa kon unsay nahinumduman ni Alma nga gipanagna sa iyang amahan. Tan-awa kon unsay gihimo ni Alma dihang nahinumduman niya ang gitudlo sa iyang amahan kaniya.

Si Elder Jeffrey R. Holland sa Korum sa Napulog Duha ka mga Apostoles mihatag sa mosunod nga mga panabut sa kasinatian ni Alma: “Si Alma natandog tungod sa pagtudlo sa iyang amahan, apan labawng importante nga ang panagna nga iyang nahinumduman mao ang kabahin sa ‘pag-anhi sa usa ka Jesukristo, usa ka anak sa Dios, aron sa pag-ula sa mga sala sa kalibutan.’ (Alma 36:17.) Mao kana ang pangalan ug mao kana ang mensahe nga kinahanglang madunggan sa matag tawo. Nadungog kini ni Alma, ug misinggit siya gumikan sa kasakit sa impyerno nga padayong nagdilaab ug sa konsensya nga walay kaayuhan. ‘O Jesus, ikaw nga Anak sa Dios, malooy ka kanako.’ (Alma 36:18.) … Bisan unsa pa nga pag-ampo ang atong ihalad, bisan unsa pay lain natong panginahanglan, ang tanan mag-agad ra niana nga pangamuyo: ‘O Jesus, ikaw nga Anak sa Dios, malooy ka kanako.’ Andam Siya nga mohatag niana nga kalooy. Gibayad Niya ang iya gayud nga kinabuhi aron ikahatag kini” (However Long and Hard the Road [1985], 85).

Hunahunaa ang milabayng panahon dihang nag-ampo ka aron madawat ang mga panalangin sa Pag-ula ni Jesukristo, lakip ang mga panalangin sa kapasayloan sa usa ka sala. Sa imong scripture study journal, isulat kon ngano kaha nga importante ang pagpangayo sa Ginoo og mga panalangin sa Pag-ula sa imong kinabuhi.
Basaha ang Alma 36:19–22, ug markahi ang mga pulong ug hugpong sa mga pulong nga naghulagway sa unsang paagi nausab si Alma human siya nag-ampo alang sa kalooy. Isulat ang pipila niini nga mga pulong diha sa imong scripture study journal, ug ipasabut unsay gitudlo niini kanimo mahitungod sa gahum sa Pag-ula sa Manluluwas.

Gikan niini nga mga kasulatan atong nakat-unan kini nga baruganan: Kon atong gamiton ang hugot nga pagtuo diha sa Pag-ula ni Jesukristo, nan Siya mohaw-as kanato gikan sa kasakit sa mga sala ug mopuno kanato og kalipay. Pamalandunga kon unsay imong mahimo aron mas magamit ang hugot nga pagtuo kang Jesukristo aron, sama ni Alma, ikaw mahaw-as gikan sa mga pagbati sa kasakit o pagbati nga sad-an tungod sa imong mga sala.

Basaha ang mosunod nga sitwasyon, ug ikonsiderar kon unsaon kaha nimo sa pagtubag: Usa ka higala nga nagbasa na sa basahon ni Mormon nangayo nimo og tabang sa pagsabut sa mga pulong ni Alma diha sa Alma 36:19. Nangutana ang imong higala, “Kon mahinumdom ko sa akong mga sala ug naguol gihapon ko niini, nagpasabut ba nga wala ako mapasaylo?”

Basaha ang mosunod nga pamahayag ni Presidente Dieter F. Uchtdorf sa Unang Kapangulohan, ug markahi ang bisan unsang mga pulong nga gituohan nimong makatabang sa imong higala:

“Si Satanas mosulay sa pagpatuo kanato nga ang atong mga sala wala mapasaylo tungod kay ato man kining mahinumduman. Si Satanas bakakon; mosulay siya sa pagpahanap sa atong panan-aw ug modala kanato palayo sa dalan sa paghinulsol ug kapasayloan. Ang Dios wala mosaad nga dili kita mahinumdom sa atong mga sala. Ang paghinumdom motabang kanato nga malikayan nato ang pagbuhat pag-usab sa samang mga sayop. Apan kon magpabilin kita nga matinuoron ug matinud-anon, ang paghinumdom sa atong mga sala magkaanam og kawala sa paglabay sa panahon. Mahimo kining kabahin sa gikinahanglan nga proseso sa pag-ayo ug paglimpyo. Si Alma nagpamatuod nga human siya mituaw ngadto kang Jesus para kaloy-an, makahinumdom pa gihapon siya sa iyang mga sala, apan ang paghinumdom sa iyang mga sala wala na mohasol ug mosakit pa kaniya, tungod kay nasayud siya nga siya gipasaylo ( tan-awa sa Alma 36:17–19).

“Ato kining responsibilidad ang paglikay sa bisan unsang butang nga makapabalik sa karaang mga paghinumdom sa pagkamakasasala. Kon magpadayon kita sa pagbaton og ‘masulub-on nga kasingkasing ug mahinulsulon nga espiritu’ (3 Nephi 12:19), mahimo kitang mosalig nga ang Dios ‘dili na mahinumdom sa [atong mga sala]’ [D&P 58:42]” (“Punto sa Luwas nga Pagbalik,” Ensign o Liahona, Mayo 2007, 101).

Importante usab nga hinumduman nga si Alma wala moingon nga wala na niya mahinumdumi ang iyang mga sala apan dili na niya mahinumduman ang kasakit sa iyang mga sala, ug siya wala na “samoka” sa panumduman niini (Alma 36:19). Ang tinuoray nga paghinulsol magwagtang sa kasakit ug sa pagbati nga sad-an (tan-awa sa Enos 1:6–8).

Sa imong scripture study journal, pagsulat og tubag para sa higala nga gihisgutan sa ibabaw, ug paggamit og mga ideya nga imong naangkon gikan sa pagpasabut ni Presidente Uchtdorf. Ilakip sa imong tubag kon ngano kaha nga usa man ka panalangin nga kita mahinumdom gihapon sa atong mga sala, bisan og kita “wala na samoka sa panumduman sa [atong] mga sala” (Alma 36:19) human sa atong paghinulsol.

Alma 36:23–30

Gipasabut ni Alma nganong padayon siyang naghago aron madala ang uban ngadto sa paghinulsol

Unsay imong bation kon makapaambit ka og lamiang pagkaon ngadto sa imong higala? Kon makadawat ka og makahinam nga bahin sa balita, unsay una nimong gustong buhaton? Ngano man kaha nga kadaghanan sa mga tawo magtinguha man dayon nga ipakigbahin dayon ang ilang nadungog ngadto sa uban? Basaha ang Alma 36:23–24, ug tan-awa kon sa unsang paagi ang mga pagbati nga gihulagway niini nga mga pangutana may kalabutan sa kasinatian ni Alma human sa iyang pagkakabig. Unsay gusto ni Alma nga masinati sa ubang mga tawo?

Basaha ang Alma 36:25–26, ug ilha kon sa unsang paagi ang paningkamot ni Alma sa pagtudlo sa ebanghelyo nakaapekto kaniya ug sa uban. Kompletuha ang mosunod nga baruganan, base sa unsay imong nakat-unan mahitungod sa pagpaambit sa ebanghelyo gikan niini nga mga bersikulo: Kon mopaambit kita sa ebanghelyo ngadto sa uban, kita makadawat og .

Isulat ang nakompleto na nimo nga pamahayag sa baruganan diha sa imong scripture study journal, ug ipasabut nganong nagtuo ka nga tinuod kini nga baruganan. Isip kabahin sa imong pagpasabut, mahimo nimong ilakip ang mga kasinatian diin mibati ka og kalipay gumikan sa pagpaambit sa ebanghelyo ngadto sa uban.

Hunahunaa ang tawo nga imong nailhan—usa ka higala, sakop sa pamilya, o miyembro sa ward o branch—kinsa tingali makabenipisyo sa imong pagpamatuod kabahin sa Manluluwas ug sa Iyang gipahiuli nga ebanghelyo. Pamalandunga kon sa unsang paagi imong mapaambit niining tawhana ang imong pagpamatuod kon giunsa ni Jesukristo sa paghaw-as kanato gikan sa kasakit ug pagpuno kanato og kalipay. Mahimo nimong ikonsiderar ang paghimo og sulat o i-email kini ngadto niini nga tawo, o mahimo kang mohimo og mugbo nga mga sulat aron maandam alang sa piho nga panahon nga ikaistorya nimo kana nga tawo.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Alma 36 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: