Mormon 1–2

Pasiuna

Bisan tuod nga si Mormon nagdako sa usa ka panahon sa hilabihan nga pagkadautan, mipili siya nga magmatinud-anon. Tungod sa iyang pagkamatinud-anon, gitawag siya aron moatiman sa mga rekord sa mga Nephite. Sa dihang 15 anyos pa siya, si Mormon “giduaw sa Ginoo, ug nakatagamtam ug nasayud sa kaayo ni Jesus” (Mormon 1:15). Sa sama nga tuig, ang mga Nephite mitudlo niya nga mangulo sa ilang kasundalohan (tan-awa sa Mormon 2:1). Nagtinguha siya nga tabangan ang mga Nephite nga maghinulsol, apan tungod sa ilang tinuyo nga pagsukol, gidid-an siya sa Ginoo sa pagsangyaw ngadto kanila. Nawad-an ang mga Nephite sa gasa sa Espiritu Santo ug sa uban pang mga gasa sa Dios ug gipasagdan nga sila ra samtang nakiggubat sila sa mga Lamanite.

Mormon 1:1–5

Si Mormon gihatagan og responsibilidad sa pagtipig sa sagradong mga rekord

Unsa ang pipila ka pulong nga ganahan nimo nga gamiton sa mga tawo kon maghulagway nimo?

Nahulagway ka na ba isip usa ka Mormon? Unsay kahulugan niini nganha kanimo nga dunay tawo nga mohulagway nimo isip usa ka Mormon?

Namulong si Presidente Gordon B. Hinckley bahin sa angga nga Mormon, nga gigamit sa ubang tawo kon magpasabut sa mga miyembro sa Ang Simbahan ni Jesukristo sa mga Santos sa Ulahing mga Adlaw:

“Samtang usahay magmahay ko nga ang mga tawo dili motawag niini nga simbahan sa tukma nga ngalan niini, malipayon ko nga ang angga nga ilang gigamit usa sa dakong pasidungog nga gihimo sa usa ka talagsaong tawo ug usa ka basahon nga naghatag og dili hitupngan nga pagpamatuod kalabut sa Manunubos sa kalibutan.

“Bisan kinsa nga makaila sa tawo nga si Mormon, pinaagi sa pagbasa ug pagpamalandong sa iyang mga pulong, bisan kinsa nga makabasa niining bililhong koleksyon sa mga sinulat nga kasaysayan nga gihugpong ug gipreserbar pinaagi sa dako niyang tabang, masayud nga ang Mormon dili usa ka pulong sa kawalay dungog, apan nagrepresentar kini sa hilabihan gayud nga kaayo—kanang kaayo nga iya sa Dios” (“Mormon Should Mean ‘More Good,’” Ensign, Nob. 1990, 52–53).

Si Mormon, ang propeta, natawo sa usa ka panahon sa dihang hapit tanan sa yuta nagpuyo sa pagkadautan. Niining panahona usa ka propeta nga ginganlan og Ammaron gisugo nga taguan ang tanang sagrado nga mga rekord (tan-awa sa 4 Nephi 1:47–49). Si Ammaron mibisita ni Mormon nga nianang panahona 10 anyos pa ug mihatag kaniya og mga instruksyon kalabut sa iyang umaabut nga responsibilidad sa pagtipig sa mga rekord. Basaha ang Mormon 1:2, ug pangitaa ang mga pulong nga gigamit ni Ammaron sa paghulagway sa batan-on nga si Mormon.

Usa ka pulong nga gigamit ni Ammaron sa paghulagway ni Mormon mao ang maligdong. Ang pulong nga maligdong nagpasabut nga seryuso, solemne, matarung, o diosnon. Mahimo nimong isulat kini nga kahulugan diha sa margin sa imong mga kasulatan. Unsa nga mga hilisgutan o mga sitwasyon sa kinabuhi ang sa imong hunahuna nga kinahanglang magmaligdong? Importante nga masabtan nga ang maligdong nga mga tawo mahimo usab nga maglingaw-lingaw ug mokatawa, apan nakasabut sila kon kanus-a magkomedya ug kanus-a mas magseryuso.

Gihulagway usab ni Ammaron si Mormon nga “dali sa pagpaniid” (Mormon 1:2). Sa imong hunahuna unsa man ang gipasabut sa dali sa pagpaniid? Si Elder David A. Bednar sa Korum sa Napulog Duha ka mga Apostoles mipasabut nga ang pulong pagpaniid gigamit diha sa mga kasulatan sa duha ka paagi:

“[Ang] lain pang daw simple ug tingali wala kaayo mapasalamati nga espirituhanong gasa—ang kapasidad nga mahimong ‘dali sa pagpaniid’ [makaobserbar] (Mormon 1:2)—hilabihan ka importante alang kaninyo ug alang kanako sa kalibutan nga ato karong gipuy-an ug atong pagapuy-an sa umaabut. …

“Palihug hunahunaa ang kahulugan niining importante nga espirituhanong gasa. Sama sa paggamit diha sa mga kasulatan, ang pulong nga obserbar dunay duha ka nag-unang gigamitan. Ang usa nagpasabut og ‘sa pagpangita’ o ‘sa pagtan-aw’ o ‘sa pagbantay’—sama sa atong makat-unan sa Isaias 42:20. …

“Ang ikaduhang gigamitan sa pulong nga obserbar nagsugyot og ‘sa pagtuman’ o ‘sa paghupot’—sama sa giklaro diha sa [Doktrina ug mga Pakigsaad 54:6]. …

“Mao nga kon kita dali nga makaobserbar, dali kitang makakita o makabantay ug motuman. Kining duha ka sukaranang [fundamental] mga elemento—pagpangita ug pagtuman—mahinungdanon sa pagkahimong dali nga makaobserbar. Ug si propeta Mormon usa ka makapadasig nga ehemplo niining gasa nga makita sa buhat” (“Dali nga Makaobserbar,” Liahona, Dis. 2006, 15–16).

Sa imong scripture study journal, isulat ang imong mga hunahuna kon sa unsang paagi nga kini nga kinaiya nga dali sa pagpaniid makatabang nimo sa imong inadlaw nga kinabuhi.

Basaha ang Mormon 1:3–5, ug hibaloi ang mga instruksyon ni Ammaron ngadto ni Mormon. Sa unsang paagi nga ang mga kinaiya ni Mormon nga maligdong ug dali sa pagpaniid nakatabang niya niining mga responsibilidad?

Mormon 1:6–19

Gidid-an si Mormon sa Ginoo sa pagsangyaw tungod sa tinuyo nga pagsukol sa mga tawo

Nawad-an ka na ba og butang nga bililhon kaayo? Samtang batan-on pa, nakasaksi si Mormon og mga gubat tali sa mga Nephite ug mga Lamanite ug ang pagkaylap sa grabe nga pagkadautan diha sa yuta (tan-awa sa Mormon 1:6–13). Tungod kay ang pagkadautan sa mga Nephite hilabihan na gayud, girekord ni Mormon nga nawad-an sila og daghang bililhon nga mga gasa gikan sa Ginoo.

Paghimo og duha ka kolum diha sa imong scripture study journal. Sulati og ulohan ang unang kolum og “Mga Gasa nga Nawala sa mga Nephite.” Basaha ang Mormon 1:13–14, 18, ug pangitaa kon unsa nga mga gasa ang gikuha sa Ginoo gikan sa mga Nephite. Isulat ang imong mga nakit-an diha sa unang kolum. Sulati og ulohan ang ikaduhang kolum og “Nganong Gikuha sa Ginoo ang Iyang mga Gasa.” Basaha ang Mormon 1:14, 16–17, 19, ug pangitaa ang mga rason nganong gikuha sa Ginoo ang Iyang mga gasa gikan sa mga Nephite. Isulat ang imong mga nakit-an diha sa ikaduhang kolum.

Gikan niining mga bersikulo atong makat-unan nga ang pagkadautan ug ang kawalay pagtuo moabug sa mga gasa sa Ginoo ug sa impluwensya sa Espiritu Santo. Bisan tuod nga grabe kaayo ang pagsukol sa mga Nephite, kini nga baruganan magamit usab ngari nato sa tagsa-tagsa kon mosupak kita sa bisan unsa nga mga sugo sa Dios.

Kon nabuhi pa ka sa panahon ni Mormon, hain sa mga gasa sa Dios nga gihisgutan diha sa Mormon 1:13–14, 18 ang mahayan gayud nimo og dako nga mawala?

Basaha ang Mormon 1:15, ug pangitaa kon unsay nasinati ni Mormon samtang ang nahabilin sa mga Nephite nawad-an sa gasa sa Espiritu Santo ug sa ubang mga gasa sa Dios. Sa imong hunahuna giunsa man ni Mormon pagbaton og espirituhanong mga kasinatian bisan pa man nga anaa siya taliwala sa grabe nga pagkadautan?

Mormon 2:1–15

Gipangulohan ni Mormon ang kasundalohan sa Nephite ug nagsubo tungod sa ilang pagkadautan

Ikonsiderar ang mosunod nga sitwasyon: Usa ka 30 anyos nga lalaki ang nagpuyo sa balay uban sa iyang mga ginikanan ug mipili nga dili mangita og trabaho. Hinoon, nabuhi siya sa pinaningkamutan sa iyang mga ginikanan ug nag-usik-usik sa iyang panahon sa dili mapuslanong mga kalihokan sama sa paggahin sa kasagaran sa iyang panahon sa pagdula og mga video game. Itandi kini nga sitwasyon sa paghulagway sa bata nga si Mormon samtang magtuon ka sa Mormon 2.

Basaha ang Mormon 2:1–2, ug pangitaa kon unsa nga resposibilidad ang gihatag ngadto ni Mormon ug pila ang iyang edad sa dihang nadawat niya kini.

Wala madugay human sa pagkatudlo ni Mormon isip lider sa kasundalohan sa Nephite, ang kasundalohan sa Lamanite misulong sa mga Nephite sa ingon kagrabe nga pwersa nga ang mga Nephite nangahadlok ug nangatras. Ang mga Lamanite miabug kanila gikan sa matag siyudad hangtud nga ang mga Nephite napundok sa usa ka dapit. Sa katapusan, nasanta sa kasundalohan ni Mormon ang mga Lamanite ug mipalayas kanila (tan-awa sa Mormon 2:3–9).

Basaha ang Mormon 2:10–15, ug pangitaa ang espirituhanong kahimtang sa mga Nephite human niining mga gubat. Dayon tubaga ang mosunod nga mga pangutana diha sa imong scripture study journal:
1. Nganong nagsubo man ang mga Nephite?
2. Sumala sa Mormon 2:14, giunsa pagkasayud ni Mormon nga ang ilang kasubo wala magpakita sa tinuod nga paghinulsol?
3. Unsay kalainan nga imong makita diha sa Mormon 2:13–14 tali niadtong nagsubo ngadto sa paghinulsol ug niadtong kansang kasubo miresulta sa panghimaraut (napugngan sa ilang pag-uswag)?

Kini nga mga bersikulo nagtudlo nga kon ang atong kasubo tungod sa sala magpaingon sa paghinulsol, modala kini kanato sa pagduol kang Kristo uban sa mapainubsanong kasingkasing. Naghulagway usab kini sa baruganan nga ang kasubo lamang alang sa mga sangputanan sa sala moresulta sa panghimaraut (o mapugngan sa atong pag-uswag paingon sa kinabuhing dayon).

Tubaga ang mosunod nga mga pangutana diha sa imong scripture study journal:
1. Sa unsa kaha nga paagi nga ang usa ka tawo nga nakasala mopakita og kalibutanong kasubo—ang matang sa kasubo nga moresulta sa panghimaraut?
2. Sa unsa kaha nga paagi nga ang usa ka tawo nga nakasala mopakita sa matang sa kasubo nga moresulta sa paghinulsol?

Pamalandunga kon unsay imong reaksyon kon imong maamguhan nga nakahimo ka og mga sayop o nakasala ka. Kon moduol ka sa Manluluwas nga dunay mapainubsanong kasingkasing ug maghinulsol, makasinati ka og kalinaw ug pagpakig-uli ngadto sa Dios.

Mormon 2:16–29

Nabatunan ni Mormon ang mga palid ug mirekord og usa ka istorya bahin sa pagkadautan sa iyang katawhan

Samtang nagpadayon ang mga gubat batok sa mga Lamanite, nabantayan ni Mormon nga anaa siya duol sa bungtod diin gitago ni Ammaron ang mga rekord sa mga Nephite. Gikuha niya ang mga palid ni Nephi ug nagsugod sa pagrekord kon unsay iyang naobserbahan diha sa katawhan sukad sa panahon nga bata pa siya (tan-awa sa Mormon 2:16–18). Basaha ang Mormon 2:18–19, ug markahi ang ubang mga pulong nga naghulagway sa espirituhanong mga kahimtang nga nadak-an ni Mormon.

Gikan sa unsay imong nakat-unan bahin ni Mormon, sa imong hunahuna nganong masaligon man siya nga siya “pagabayawon sa katapusan nga adlaw”? (Mormon 2:19). (Niini nga konteksto, ang “pagabayawon sa katapusan nga adlaw” nagpasabut nga pagahimayaon—mabanhaw nga dunay celestial nga lawas ug pagadad-on ngadto sa presensya sa Dios aron magpabilin uban Kaniya sa kahangturan.)

Ang kinabuhi ni Mormon usa ka pagpamatuod nga makapili kita nga magpakabuhing matarung bisan sa dautan nga katilingban.

Ikonsiderar ang mosunod nga tambag: “Kamo maoy responsable sa mga pagpili nga inyong himoon. Ang Dios naghunahuna kaninyo ug motabang kaninyo sa paghimo og maayo nga mga pagpili, bisan kon ang inyong pamilya ug mga higala naggamit sa ilang kabubut-on diha sa mga paagi nga dili matarung. Pagbaton og moral nga kaisug sa pagbarug nga lig-on sa pagsunod sa kabubut-on sa Dios, bisan kon kamo kinahanglang mobarug nga mag-inusara. Sa inyong pagbuhat niini, kamo nagpakita og ehemplo nga pagasundon sa uban” (Alang sa Kalig-on sa mga Kabatan-onan [booklet, 2011], 2).

Sa imong scripture study journal, pagsulat kabahin sa usa ka higayon sa dihang imong nakit-an ang usa ka higala o sakop sa pamilya nga nagbarug nga lig-on sa pagsunod sa kabubut-on sa Dios bisan kon ang uban wala mobuhat. Isulat usab ang imong mga hunahuna kon sa unsang paagi nga ang ehemplo nianang tawhana ug ang ehemplo ni Mormon nakatabang nimo.

Ang motto sa Young Women mao ang “Pagbarug alang sa Kamatuoran ug Pagkamatarung.” Usa man ikaw ka batan-ong babaye o batan-ong lalaki, paghunahuna og piho nga bahin sa imong kinabuhi diin mahimo kang mas determinado nga mobarug alang sa unsay matarung. Ang Ginoo motabang nimo samtang maningkamot ka nga mobarug alang sa unsay matarung bisan kon ang uban sa imong palibut tingali dili mobuhat.

Isulat ang mosunod diha sa ubos sa mga buluhaton karong adlawa sa imong scripture study journal:

Akong natun-an ang Mormon 1–2 ug nahuman kini nga leksyon niadtong (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: