Pasiuna sa 2 Nephi
Nganong Kinahanglang Tun-an Kini nga Basahon?
Ang basahon nga 2 Nephi makatabang kanimo sa pagsabut sa sukaranang mga doktrina sa ebanghelyo, sama sa Pagkapukan ni Adan ug Eva, sa Pag-ula ni Jesukristo, ug kabubut-on. Dugang pa, kini nga basahon puno sa mga panagna gikan ni Nephi, Jacob, ug Isaias, kinsa mga linain nga saksi sa Manluluwas. Sila nanagna sa Pagpahiuli sa ebanghelyo sa ulahing mga adlaw, sa pagpundok sa mga katawhan sa pakigsaad sa Dios, sa Ikaduhang Pag-anhi ni Jesukristo, ug sa Milenyum. Ang basahon nga 2 Nephi naglakip sa pagpasabut ni Nephi sa doktrina ni Kristo ug natapos sa pagpamatuod ni Nephi kabahin sa Manluluwas.
Kinsa ang Nagsulat Niini nga Basahon?
Si Nephi, ang anak ni Lehi, ang misulat sa 2 Nephi. Si Nephi usa ka propeta ug ang unang talagsaon nga pangulo sa katawhan nga Nephite. Ang iyang mga sinulat nagpadayag nga iyang nasinati ang matubsanong gahum sa Ginoo (tan-awa sa 2 Nephi 4:15–35; 33: 6) ug nagtinguha uban sa tibuok niyang kalag nga modala og kaluwasan ngadto sa iyang mga katawhan (tan-awa sa 2 Nephi 33:3–4). Aron matuman kini nga katuyoan, siya mitukod og templo ug mitudlo sa iyang katawhan sa pagtuo kang Jesukristo.
Kanus-a ug Diin Kini Gisulat?
Si Nephi nagsugod sa pagsulat sa istorya nga nahimong 2 Nephi sa gibana-bana nga 570 B.C.—30 ka tuig human siya ug ang iyang pamilya mibiya sa Jerusalem (tan-awa sa 2 Nephi 5:28–31). Iya kining gisulat sa dihang anaa siya sa yuta sa Nephi (tan-awa sa 2 Nephi 5:8, 28–34).