Unit 10: Day 1

Jacob 5–6

Pasiuna

Ang Jacob 5 naglangkob sa pasumbingay sa maayo ug ihalas nga mga kahoy nga oliba, nga orihinal nga gihatag pinaagi sa usa ka propeta nga ginganlan og Zenos. Si Jacob migamit niini nga pasumbingay aron sa pagtudlo nga ang Ginoo kanunay nga naglihok sa pagdala og kaluwasan ngadto sa Iyang mga katawhan sa pakigsaad, bisan kon sila mopahilayo gikan Kaniya. Ang pasumbingay nagpakita nga ang Ginoo mipatibulaag og mga porsyon sa balay ni Israel—Iyang mga katawhan sa pakigsaad—sa tibuok yuta ug nga Siya mopundok sa Iyang katawhan sa ulahing mga adlaw. Ang pasumbingay adunay piho ug personal nga gamit alang kanato karon isip mga sakop sa balay ni Israel ug mga sulugoon sa Ginoo. Sa Jacob 6, si Jacob mipasabut og maayo sa kalooy ug kaangayan sa Ginoo samtang nag-awhag sa iyang katawhan—ug kanato—sa paghinulsol.

Jacob 5:1–12

Si Jacob nagkutlo kang Zenos, kinsa mipahisama sa balay ni Israel ngadto sa usa ka maayo nga kahoy nga oliba

Nakaila ka ba og usa ka higala o minahal kinsa mikuwestyon sa gugma sa Dios alang kaniya, ilabi na sa panahon sa pagsulay sa dihang ang tawo tingali mipalayo gikan Kaniya? Ikonsiderar ang mosunod nga mga ehemplo:

• Usa ka batan-on nga tighupot sa priesthood nagpalambo og usa ka makasasala nga kinaiya. Nagtuo siya nga ang uban mahimong mapasaylo, apan nagduha-duha siya nga ang Ginoo modawat sa iyang paghinulsol.

• Usa ka batan-ong babaye nakalapas og usa ka sugo. Siya nakasinati og kahasol sa konsensya, mibati og dili maayo sa iyang kaugalingon, ug nangutana kon gihigugma pa ba gihapon siya sa Ginoo.

Si Jacob nanagna nga ang mga Judeo mosalikway ni Jesukristo (tan-awa sa Jacob 4:15). Nanagna usab siya nga si Jesukristo magpadayon sa pagtrabaho alang sa kaluwasan sa Iyang katawhan bisan human sila misalikway Kaniya. Aron sa paghulagway niini nga kamatuoran, si Jacob mikutlo og usa ka pasumbingay nga gihatag sa usa ka propeta nga ginganlan og Zenos (tan-awa sa Jacob 5:1). Ang usa ka pasumbingay, sama sa usa ka sambingay, mao ang usa ka istorya nga naggamit og simbolikanhong mga tawo, mga butang, ug mga lihok sa pagtudlo og mga kamatuoran. Samtang magtuon ka sa Jacob 5, hunahunaa kon sa unsang paagi ang Ginoo kanunay nga gustong motabang kanimo bisan kon nakasala ka.

Basaha ang Jacob 5:2, ug markahi diha sa imong mga kasulatan kon kang kinsa gitumong ni Zenos kini nga pagtulun-an.

Tungod kay ikaw mihimo og mga pakigsaad uban sa Ginoo pinaagi sa bunyag, sakop ka sa balay ni Israel. Kabahin ka sa istorya nga gisugilon sa Jacob 5. Basaha ang Jacob 5:3, ug markahi kon unsay gigamit ni Zenos sa iyang pasumbingay nga nagrepresentar sa balay ni Israel. Markahi usab kon unsay misugod sa pagkahitabo ngadto sa maayo nga kahoy nga oliba.

Timan-i nga ang footnote d sa Jacob 5:3 nagpasabut nga ang pagkadunot sa kahoy nagrepresentar sa hingpit nga pagbiya [apostasiya]. Ang apostasiya mahitabo kon ang mga indibidwal o mga grupo sa katawhan motalikod gikan sa Ginoo ug sa Iyang ebanghelyo.

Ang mosunod nga tsart naglista sa mga simbolo nga makatabang kanato nga makasabut sa kahulugan sa pasumbingay ni Zenos. Gilista usab ang mga bersikulo diin unang nakita kini nga mga simbolo. Markahi kini nga mga simbolo diha sa imong mga kasulatan. Mahimo usab nimong isulat ang kahulugan sa pipila sa mga simbolo diha sa mga margin sa imong mga kasulatan.

Jacob 5: Ang Pasumbingay sa Maayo ug Ihalas nga mga Kahoy nga Oliba
Simbolo	Kahulugan
Maayo nga kahoy nga oliba (bersikulo 3)	Ang balay ni Israel, mga katawhan sa pakigsaad sa Dios
Ang ubasan (bersikulo 3)	Ang kalibutan
Pagkadunot (bersikulo 3)	Sala ug apostasiya
Agalon sa ubasan (bersikulo 4)
Pagpul-ong, pagkalot, ug pag-alima (bersikulo 4)	Ang mga paningkamot sa Ginoo sa pagtabang kanato nga mahimong matarung ug makahatag og maayong mga buhat
Mga sanga (bersikulo 6)	Mga grupo sa katawhan
Ihalas nga kahoy nga oliba (bersikulo 7)	Mga Hentil—kadtong wala makahimo og mga pakigsaad sa Ginoo. Sa ulahing bahin sa pasumbingay, ang natural nga mga kahoy nga oliba, nga nagrepresentar sa mga porsyon sa balay ni Israel nga nag-apostasiya, gihulagway usab isip “ihalas.”
Pagbali ug pagsumbak sa mga sanga (mga bersikulo 7–8)	Ang pagkatibulaag ug pagpundok sa mga katawhan sa pakigsaad sa Ginoo. Dugang pa, ang pagsumbak sa mga sanga sa ihalas nga kahoy nga oliba ngadto sa maayo nga kahoy nga oliba naglarawan sa pagkakabig sa mga Hentil kinsa nahimong kabahin sa mga katawhan sa pakigsaad sa Ginoo pinaagi sa bunyag.
Nasunog nga mga sanga (bersikulo 7)	Ang paghukom sa Dios sa mga dautan
Bunga (bersikulo 8)	Ang kinabuhi o mga buhat sa katawhan
Mga gamut sa maayo nga kahoy nga oliba (bersikulo 11)	Ang mga pakigsaad nga gihimo sa Ginoo niadtong nagsunod Kaniya. Ang mga gamut mahimo usab nga nagrepresentar sa mga indibidwal kinsa mipakigsaad ang Ginoo kaniadto, sama kang Abraham, Isaac, ug Jacob (tan-awa sa Jacob 6:4).

Basaha ang Jacob 5:4–6, ug markahi kon unsay unang gibuhat sa Agalon sa ubasan aron sa pagluwas sa maayo nga kahoy nga oliba. Tan-awa ang tsart sa ibabaw, ug timan-i kon kinsa ang Agalon sa ubasan ug unsay girepresentaran sa Iyang mga buhat sa pagpul-ong, pagkalot, ug pag-alima.

Si Elder Jeffrey R. Holland sa Korum sa Napulog Duha ka mga Apostoles mipasabut kon unsa ang tuyo sa pasumbingay. Samtang magbasa ka sa iyang pagpasabut, linyahi kon unsay iyang gitudlo nga mas lawom nga kahulugan niini nga pasumbingay.

“Kini nga pasumbingay nga gisaysay ni Jacob gituyo na sa sinugdanan pa nga mahitungod ni Kristo [ang Agalon sa ubasan]. …

“Bisan kon ang Ginoo sa ubasan ug ang iyang mga mamumuo naningkamot sa paglig-on, pagpul-ong, paglunsay, ug paghimong mabungahon sa ilang mga kahoy nga mikabat og usa ka kapitulo nga summary sa kasaysayan sa pagkatibulaag ug pagpundok sa Israel, ang mas lawom nga kahulugan sa Pag-ula nagdasig ug nag-impluwensya sa ilang mga paghago” (Christ and the New Covenant: The Messianic Message of the Book of Mormon [1997], 165).

Samtang ang Jacob 5 makita nga mahitungod sa mga kahoy nga oliba, kini nga pasumbingay mao ang mahitungod sa mga tawo nga mibiya sa Ginoo tungod sa sala ug sa mga paningkamot sa Ginoo sa pagtabang kanila nga mobalik ngadto Kaniya. Kini nga kapitulo nagtudlo nga ang Ginoo nahigugma kanato ug makugihon nga naghago alang sa atong kaluwasan. Samtang mopadayon ka sa pagtuon sa pasumbingay, pangita og ebidensya niini nga kamatuoran pinaagi sa pagbantay og maayo sa mga pagbati sa Ginoo alang sa Israel—ang maayo nga kahoy nga oliba—ug ang Iyang walay hunong nga paningkamot sa pagluwas niini. Sama pananglit, basaha ang Jacob 5:7, ug pamalandungi ang mga pulong nga “Kini nakapaguol kanako nga Ako mawad-an niini nga kahoy.” Unsa kaha nga mga emosyon ang gipadayag sa Ginoo dinhi, ug ngano?

Basaha pag-usab ang mga pulong, ug niining higayuna isukip ang imong pangalan puli sa “niini nga kahoy”: “Kini nakapaguol kanako nga ako mawad-an ni [imong ngalan].” Pinaagi sa pagsukip sa imong ngalan sa tibuok Jacob 5 sa mga dapit nga makahuluganon ug tukma, mahimo nimong makonektar ang pasumbingay nganha sa imong kaugalingon ug dugang nga makat-on sa kabalaka sa Ginoo alang kanimo.

Pagpuli sa Imong Ngalan diha sa mga Bersikulo nga Imong Gitun-an

Mahimo usab nimong isukip ang pulong nga ako o kanako sa angay nga mga dapit diha sa mga kasulatan. Kini nga buhat makatabang kanimo sa paghimo og makahuluganong pagtuon sa kasulatan ug makita kon sa unsang paagi ang piho nga mga tudling mahimong magamit diha kanimo.

Basaha ang Jacob 5:7–11, ug pangitaa kon unsay sunod nga gibuhat sa Ginoo sa ubasan aron maluwas ang maayo nga kahoy nga oliba.

1. Gamit ang kahulugan sa mga simbolo diha sa tsart, pagsulat og usa ka pagpasabut diha sa imong scripture study journal sa gibuhat sa Ginoo sa ubasan ug sa Iyang mga sulugoon sa Jacob 5:7–11 aron maningkamot ug luwason ang mga anak sa Langitnong Amahan.

Kuhaon sa Ginoo ang mga tawo nga dili sakop sa balay ni Israel ug isumbak sila ngadto sa Israel, nga maghimo kanila nga kabahin sa Iyang mga katawhan sa pakigsaad. Aron sa pagluwas sa balay ni Israel, Iyang gibali ang labing dautan nga mga sanga (mga tawo) ug milaglag kanila.

Basaha ang Jacob 5:13–14, ug pangitaa kon unsay gibuhat sa Ginoo sa dabong ug linghod nga mga sanga gikan sa maayo nga kahoy sa oliba nga gihisgutan sa bersikulo 6. Mahimo nimong isulat sa imong margin nga ang kinaubsan nagpasabut nga dili kaayo makita.

2. Gamit ang mga kahulugan sa mga simbolo diha sa tsart, ipasabut diha sa imong scripture study journal kon sa unsang paagi ang pamilya ni Lehi ikatandi ngadto sa dabong ug linghod nga sanga nga gitagoan sa kinaubsan nga bahin sa ubasan.

Si Presidente Joseph Fielding Smith mipasabut nga ang mga sulugoon sa Ginoo “mikuha sa pipila ka mga sanga ug misumbak niini ngadto sa tanan nga mga ihalas nga kahoy nga oliba. Kinsa man ang ihalas nga mga kahoy nga oliba? Ang mga Hentil. Ug sa ingon ang Ginoo mipadala sa iyang mga sulugoon sa tanan nga mga bahin sa iyang ubasan, nga mao ang kalibutan, ug mitanom niini nga mga sanga sa kahoy. …

“Karon niana nga sambingay ang kahoy nga oliba mao ang Balay ni Israel. … Sa yutang natawhan niini nagsugod kini sa pagkamatay. Busa ang Ginoo nanguha og mga sanga sama sa mga Nephite, sama sa nahisalaag nga mga tribo, ug sama sa uban nga gigiyahan sa Ginoo nga wala kitay nasayran bisan unsa, ngadto sa laing mga bahin sa kalibutan. Mitanom Siya kanila sa tibuok niyang ubasan, nga mao ang kalibutan. Walay pagduda nga iyang gipadala ang pipila niini nga mga sanga ngadto sa Japan, ngadto sa Korea, ngadto sa China. Sigurado gayud kini, tungod kay gipadala niya sila ngadto sa tanang bahin sa kalibutan” (Answers to Gospel Questions, comp. Joseph Fielding Smith Jr., 5 vols. [1957–66], 4:204–5).

Si Presidente Smith mitudlo usab nga “ang paghubad niini nga sambingay … mao ang usa ka istorya kabahin sa pagkatibulaag sa Israel ug ang pagkasagul sa dugo sa Israel sa ihalas nga mga kahoy nga oliba, o Hentil nga mga katawhan, sa tanang bahin sa kalibutan. Busa atong makita sa China, Japan, India, ug sa ubang mga nasud nga gipuy-an sa mga Hentil nga ang dugo sa Israel natibulaag, o ‘nasumbak,’ taliwala kanila” (Answers to Gospel Questions, 4:40–41).

Jacob 5:15–77

Ang Ginoo sa ubasan ug ang iyang mga sulugoon naghago sa pagtabang sa ubasan nga makahatag og maayong bunga

Daghan sa mga bersikulo sa Jacob 5 naghulagway og lain-laing mga panahon ug mga panghitabo mahitungod sa nagkalainlaing mga bahin sa balay ni Israel nga natibulaag sa tibuok kalibutan ug ang buhat sa Manluluwas sa pagpundok kanila. Ang kapitulo natapos sa Milenyum ug ang katapusan nga paglimpyo sa yuta.

Aron hatagan og gibug-aton ang kabalaka sa Ginoo alang sa mga kahoy sa Iyang ubasan ug sa Iyang makanunayon nga paningkamot sa pagluwas niini, gibalik-balik ni Zenos ang pipila ka importanting mga pulong sa tibuok niyang pasumbingay. Basaha ang Jacob 5:20, 23–25, 28, 31, ug markahi ang matag higayon nga ang Ginoo mihisgut sa Iyang mga paningkamot sa pag-alima sa mga kahoy sa Iyang ubasan.

Bisan pa sa mga paningkamot sa Ginoo ug sa Iyang sulugoon sa pagtabang sa ubasan nga makahatag og maayong bunga, sa katapusan ang tanan nga mga bunga sa ubasan nahimo nga mga dautan (tan-awa sa Jacob 5:39). Basaha ang Jacob 5:41–42, 46–47, ug markahi ang mga pulong sa imong mga kasulatan nga nagpakita sa gugma, kabalaka, o kaguol sa Ginoo alang sa Iyang ubasan.

Tungod kay ang mga kahoy namunga og ngil-ad nga mga bunga bisan pa sa tanan Niyang gihimo, ang Ginoo sa ubasan nakahunahuna sa pagputol sa tanang mga kahoy (tan-awa sa Jacob 5:49). Basaha ang Jacob 5:50–51. Ang nahibilin sa Jacob 5 nagrepresentar sa mga paningkamot sa Ginoo ug sa Iyang mga sulugoon sa pagluwas niadtong nagpuyo sa katapusang mga adlaw. Iyang gipundok ang iyang katawhan ug mialima kanila sa katapusang higayon (tan-awa sa Jacob 5:52–77).

Si Presidente Joseph Fielding Smith mitudlo nga ang pagpundok sa Israel nga gihulagway sa Jacob 5 nagpanghitabo na karon: “Niining panahon sa pagpundok ang Ginoo nagtuman sa iyang mga katuyoan ug gipangtawag og balik ngadto sa panon sa Tinuod nga Magbalantay, ang mga anak ni Abraham” (Answers to Gospel Questions, 4:41).

3. Isulat sa imong scripture study journal kon unsay imong nakat-unan gikan sa Jacob 5 mahitungod sa gugma sa Ginoo alang kanimo. Pagsulat og usa ka ehemplo kon sa unsang paagi imong nakita ang Iyang gugma nga gipakita diha sa imong kinabuhi o sa kinabuhi sa imong kaila.

Jacob 6

Si Jacob nagtudlo sa kalooy ug kaangayan sa Dios ug nagdapit kanato sa paghinulsol

Ang Jacob 6 naglangkob sa summary ni Jacob sa importanting mga kamatuoran gikan sa pasumbingay sa mga kahoy nga oliba. Basaha ang Jacob 6:4–6, ug tan-awa kon unsay gihatagan ni Jacob og gibug-aton mahitungod sa kinaiya sa Dios. Unsa nga pulong ang imong gamiton sa pag-summarize kon unsay gusto ni Jacob nga atong makat-unan mahitungod sa Dios?

Si Jacob mitapos sa iyang mensahe sa Jacob 6:7–13 pinaagi sa pagpamatuod nga maalamon nga mangandam kita karon alang sa paghukom pinaagi sa paghinulsol ug pagdawat sa kalooy sa Ginoo.

4. Ribyuha ang Jacob 6:5. Timan-i nga si Jacob nag-awhag kanato nga “magmatinud-anon ngadto sa Dios ingon nga siya nagmatinud-anon nganha kaninyo.” Ang magmatinud-anon nagpasabut nga makig-unong o monunot. Tubaga ang mosunod nga mga pangutana diha sa imong scripture study journal:

   1. Unsay imong nakat-unan gikan sa pasumbingay sa mga kahoy nga oliba nga naghulagway kon sa unsang paagi ang Dios nagmatinud-anon nganha kanimo?

   2. Unsay imong mabuhat aron mas lig-on nga magmatinud-anon ngadto Kaniya sama nga Siya nagmatinud-anon nganha kanimo?

5. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Jacob 5–6 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: