3 Nephi 23

Pasiuna

Human makakutlo sa mga pulong ni Isaias, si Jesukristo misugo sa mga Nephite sa pagsiksik sa mga pulong sa mga propeta. Ang Manluluwas mikorihir usab sa mga Nephite tungod kay wala magkugi sa ilang pagtipig og rekord.

3 Nephi 23:1–5

Misugo si Jesukristo sa katawhan sa pagsiksik sa pulong sa mga propeta

Pamalandunga ang imong mga kasinatian sa pagtuon sa mga kasulatan niining miaging tuig. Isulat ang pipila ka mga pulong nga naghulagway sa mga panalangin nga miabut sa imong kinabuhi isip resulta sa imong pagtuon sa mga kasulatan.

Samtang magtan-aw ka sa imong lista, ikonsiderar unsay mahimong matudlo niini nga mga panalangin kanimo mahitungod sa kaimportante sa pagbasa sa kasulatan.

Human makutlo ang mga pagtulun-an ni Isaias (tan-awa sa 3 Nephi 22), gisugo sa Manluluwas ang katawhan nga magmakugihon sa pagsiksik sa mga pulong ni Isaias ug sa mga propeta. Basaha ang 3 Nephi 23:1–5, ug ilha ngano nga ang Manluluwas miingon nga kinahanglan nga atong siksikon ang mga pulong ni Isaias ug sa mga propeta. Ikonsiderar ang pagmarka sa mga pulong nga makatabang nimo nga mahinumdom sa unsay imong nakat-unan.

Usa ka rason nga kita gisugo sa pagtuon sa mga pulong ni Isaias tungod kay “siya namulong bahin sa tanan nga mga butang mahitungod sa mga katawhan [sa pakigsaad sa Ginoo] nga sakop sa balay ni Israel” (3 Nephi 23:2). Tungod kay ikaw mihimo og mga pakigsaad ngadto sa Ginoo, sakop ka sa balay ni Israel. Ang mga sinulat ni Isaias dunay kalabutan nimo. Laing rason nga kinahanglang magtuon kita sa mga pulong ni Isaias tungod kay kining tanan matuman (tan-awa sa 3 Nephi 23:3).

Timan-i sa 3 Nephi 23:1 nga si Jesukristo misugo gayud sa mga Nephite nga “mosiksik [sa mga pulong ni Isaias] nga makugihon.”

Tubaga ang mosunod nga mga pangutana diha sa imong scripture study journal:
1. Unsa sa imong hunahuna ang kalainan tali sa pagbasa sa mga pulong sa mga propeta ug makugihong mosiksik niini?
2. Unsa nga mga paagi sa pagtuon sa kasulatan ang makatabang nimo sa pagsiksik sa mga pulong ni Isaias ug sa mga propeta sa epektibo ug makahuluganong paagi? (Mahimo nimong ribyuhon ang leksyon sa Unit 1: Day 1, “Pagtuon sa mga Kasulatan,” sa paghinumdom sa pipila ka importante nga mga tabang sa pagtuon sa kasulatan.)

Si Elder Merrill J. Bateman, usa ka emeritus nga sakop sa Seventy, miila sa pipila ka mga panalangin nga moabut sa atong kinabuhi kon kita mosiksik sa mga pulong sa mga propeta: “Adunay piho nga mga panalangin nga maangkon kon ang usa ka tawo mosiksik sa mga kasulatan. Samtang ang usa ka tawo magtuon sa mga pulong sa Ginoo ug mosunod niini, siya nagpaduol ngadto sa Manluluwas ug makaangkon og mas dako nga tinguha sa pagpuyo og matarung nga kinabuhi. Ang gahum sa pagbatok sa tintasyon modako, ug ang espirituhanong mga kahuyang mabuntog. Ang espirituhanong mga samad mamaayo” (“Coming unto Christ by Searching the Scriptures,” Ensign, Nob. 1992, 28).

Basaha ang 3 Nephi 23:5, ug pangitaa ang saad sa Manluluwas nga gihatag natong tanan kon kita magtuon ug molihok sumala sa imbitasyon sa kasulatan.

Hunahunaa nga ikaw adunay usa ka higala o sakop sa pamilya kinsa naglisud sa pagtuon kanunay sa mga kasulatan. Gamit ang unsay imong nakat-unan sa 3 Nephi 23:1–5, isulat unsay imong isulti sa pag-awhag niini nga tawo sa pagtuon sa mga pulong sa mga propeta sa makugihong paagi ug makabaton og makahuluganong kasinatian sa mga kasulatan.

3 Nephi 23:6–14

Gipanton ni Jesukristo ang Iyang mga disipulo sa pagkapakyas sa pagrekord sa importante nga mga panghitabo

Basaha ang mosunod nga pamahayag gikan ni Presidente Spencer W. Kimball:

“Si Ginoong Jesukristo Mismo mihatag og gibug-aton sa pagka-importante sa pagtipig og rekord sa mga Nephite ug mga Lamanite [tan-awa sa 3 Nephi 23:6–13]. …

“Nalipay ko nga dili ako ang gikasab-an, bisan og hinay ug mabination, tungod sa wala pagtuman sa obligasyon sa paghimo sa akong rekord. …

“… Hinumdumi, ang Manluluwas mipanton niadtong napakyas sa pagrekord sa importante nga mga panghitabo” (“The Angels May Quote from It,” New Era, Peb. 2003, 32, 34–35).

Ang nahabilin sa 3 Nephi 23 naglangkob sa istorya nga gihulagway ni Presidente Kimball, sa dihang ang Manluluwas mipanton sa mga Nephite sa wala pag-apil sa pipila ka importante nga mga panghitabo diha sa ilang mga rekord. Basaha ang 3 Nephi 23:6-11, ug hibaloi unsay wala marekord sa mga Nephite. Ngano sa imong hunahuna nga importante alang sa mga Nephite sa pagrekord sa katumanan niini nga panagna nga gihimo ni Samuel ang Lamanite? Sa unsa nga paagi nga ang pagbaton niana nga rekord diha sa Basahon ni Mormon makatabang nato sa atong panahon?

Tubaga ang mosunod nga pangutana diha sa imong scripture study journal: Ngano kaha nga importante alang nimo ang pagsulat sa espirituhanong mga panghitabo ug mga pag-aghat nga mahitabo sa imong kinabuhi?

Kon dunay bag-o nga espirituhanon nga panghitabo sa imong kinabuhi nga wala nimo marekord, ikonsiderar ang pagsulat niini sa imong personal nga journal karon. Usa ka yano nga notebook o papel igo na nga mahimong personal nga journal. Basaha ang 3 Nephi 23:12–14, ug pangitaa unsay gihimo sa Manluluwas human mosunod ang mga Nephite sa sugo sa pagsulat sa katumanan sa panagna ni Samuel ang Lamanite.

Ang Manluluwas “nakapatin-aw sa tanan nga mga kasulatan,” nga nagpasabut nga Siya mipasabut sa kahulugan sa mga kasulatan.

Basaha ang 3 Nephi 24:1, ug timan-i ang pagkasusama tali sa unang bahin niini nga bersikulo ug unsay nahitabo sa 3 Nephi 23:12–14. Timan-i nga human narekord sa mga Nephite ang unsay gitudlo ni Jesukristo kanila, mihatag Siya nila og dugang nga kahibalo ug pagpadayag pinaagi sa pagpatin-aw niadtong mga butanga.

Base sa unsay imong nakat-unan gikan sa 3 Nephi 23:6–14, kompletuha ang mosunod nga baruganan: Samtang magsulat ko sa sagrado nga mga pag-aghat ug mga panghitabo, gidapit nako .

Lakip sa ubang mga posibilidad, mahimo nimong kompletuhon ang baruganan sa ibabaw niini nga paagi: Samtang magsulat ko sa sagrado nga mga pag-aghat ug mga panghitabo, gidapit nako ang Ginoo sa paghatag nako og dugang nga pagpadayag.

Aron mas hingpit nga masabtan ang kamatuoran nga imong nakat-unan, basaha ang mosunod nga duha ka pamahayag gikan ni Elder Richard G. Scott sa Korum sa Napulog Duha ka mga Apostoles:

“Ang kahibalo nga mainampingon nga girekord maoy usa ka kahibalo nga magamit sa panahon sa panginahanglan. Ang sensitibong espirituhanon nga impormasyon kinahanglan nga tipigan sa usa ka sagradong dapit nga nagpakita ngadto sa Ginoo giunsa kini ninyo sa pagmahal. Kini nga batasan nagpalambo sa kalagmitan sa inyong pagdawat og dugang nga kahayag’ (“Acquiring Spiritual Knowledge,” Kini nga batasan nagpalambo sa kalagmitan sa inyong pagdawat og dugang nga kahayag’ (“Acquiring Spiritual Knowledge,” ” Ensign, Nob. 1993,88).

“Isulat diha sa usa ka luwas nga dapit ang importanting mga butang nga inyong nakat-unan gikan sa Espiritu. Inyong makaplagan nga samtang magsulat kamo sa bililhon nga mga impresyon, kasagaran adunay daghan pa nga moabut. Usab, ang kahibalo nga inyong naangkon maanaa sa inyong tibuok kinabuhi” (“To Acquire Knowledge and the Strength to Use It Wisely,” Ensign, Hunyo 2002, 32).

Tubaga ang mosunod nga mga pangutana diha sa imong scripture study journal:
1. Ngano sa imong hunahuna nga ang pagsulat sa mga pagpadayag nga atong nadawat gikan sa Ginoo makatabang nato sa pagdawat og dugang pa nga pagpadayag?
2. Sa unsa nga paagi nga ang paggahin og panahon sa pagsulat bahin sa impluwensya sa Ginoo sa atong kinabuhi makatabang nato nga mobati nga mapasalamaton sa atong mga panalangin ug mopadayag sa atong pasalamat ngadto Kaniya?

Tingali nabalaka ka nga ikaw walay espesyal o sagrado nga mga kasinatian nga bililhon kaayo nga irekord. Si Elder John H. Groberg, usa ka emeritus nga sakop sa Seventy, mitubag niini nga kabalaka: “Ang ubang mga tawo moingon, ‘Wala man koy irekord. Walay espirituhanon nga nahitabo nako.’ Moingon ko, ‘Sugdi ang pagrekord, ug ang espirituhanong mga butang mahitabo. Anaa ra kana sa tanang higayon, apan mas masensitibo kita niini kon kita mosulat’” (“Writing Your Personal and Family History,” Ensign, Mayo 1980, 48).

Makasugod ka sa paggamit sa unsay imong nakat-unan mahitungod sa pagrekord sa espirituhanong mga kasinatian pinaagi sa pagdala nimo og piraso sa papel, notebook, o journal alang sa sunod semana. Irekord ang imong bisan unsa nga mga pag-aghat, mga impresyon, mga kasinatian, o mga pagbati sa tibuok semana. Irekord usab unsay imong gibati nga buhaton sa mga pag-aghat nga imong nadawat. Human nimo sunda kadto nga mga aksyon, isulat ang imong kasinatian.

Sultihi ang usa ka tawo (usa ka sakop sa pamilya, higala, o lider sa Simbahan) mahitungod sa imong plano sa paghimo og rekord sa imong espirituhanong mga kasinatian. Ikonsiderar ang pagdapit niini nga tawo sa pag-apil nimo niini nga paningkamot pinaagi sa pagrekord sa iyang pipila ka kaugalingong mga kasinatian. Pinaagi sa pagdapit og laing tawo sa pagbuhat niini nga proyekto uban nimo, ikaw makaawhag ug makareport sa imong kalamboan ngadto sa usag usa. Hinoon, kinahanglan nga hinumduman nimo nga dili kinahanglan—ug tingali dili angay—nga pagpakigbahin ang imong mga kasinatian sa usag usa.

Isulat ang mosunod nga pahinumdom diha sa ubos sa mga buluhaton karong adlawa sa imong scripture study journal:

Akong natun-an ang 3 Nephi 23 ug nahuman kini nga leksyon niadtong (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: