Unit 6: Day 1

2 Nephi 4–5

Pasiuna

Sa 2 Nephi 4 imong mabasa kon sa unsang paagi gitawag ni Lehi ang iyang kaliwatan aron mohatag kanila sa iyang katapusang tambag ug panalangin sa wala pa siya mamatay. Human sa kamatayon ni Lehi, si Laman ug Lemuel nasuko ni Nephi tungod sa pagsangyaw ngadto kanila “sa mga pahimangno sa Ginoo” (tan-awa sa 2 Nephi 4:13–14). Nahasol tungod sa mga kinaiya ug binuhatan sa iyang mga igsoong lalaki ug tungod sa iyang kaugalingong mga kahuyang ug mga sala, si Nephi mirekord sa iyang mga pagbati sa kusganon ug balaknon nga pinulongan (tan-awa sa 2 Nephi 4:15–35). Sumala sa narekord sa 2 Nephi 5, ang Ginoo mipasidaan kang Nephi ug niadtong misuporta kaniya sa paglayas gikan ni Laman, Lemuel, ug mga anak nga lalaki ni Ishmael. Human niini nga pagkabulag, ang mga Nephite nagpakabuhi diha sa pagkamatarung ug kalipay, samtang kadtong nagpabilin uban ni Laman ug Lemuel nagpahimulag sa ilang mga kaugalingon sa espirituhanong paagi gikan sa Ginoo. Ang debosyon ni Nephi ngadto sa Ginoo naglig-on kaniya aron mabuntog ang sala ug kawalay kadasig. Si Nephi dayon mirekord kon sa unsang paagi siya ug ang iyang mga katawhan “mipuyo subay sa matang sa pagkamalipayon” (2 Nephi 5:27).

2 Nephi 4:3–11

Si Lehi mitambag ug mipanalangin sa iyang pamilya

Paghunahuna og higayon sa dihang nakadawat ka og tambag o pahimangno gikan sa imong inahan, amahan, o mga lider. Gisunod ba nimo ang tambag? Ngano o nganong wala nimo sunda ang tambag? Aduna ka bay mga pagmahay? Sa 2 Nephi 4:1–11, si Nephi mirekord sa katapusang tambag ug panalangin ni Lehi ngadto sa iyang pamilya. Basaha ang 2 Nephi 4:4–5, ug hibaloi ang tambag nga gihatag ni Lehi ngadto sa iyang mga anak nga magamit usab nimo. Ang imong mga ginikanan, mga sakop sa pamilya, o mga lider nakahatag ba nimo og susama nga tambag?

Lehi holding brass plates

1. Paghimo og lista sa imong scripture study journal sa pipila ka mga panalangin nga miabut sa imong kinabuhi gumikan sa pagpaminaw sa tambag niadtong nagpakabana kanimo. Unsa nga mga panalangin ang miabut gumikan sa pagkamasulundon sa mga sugo sa Ginoo?

2 Nephi 4:12–35

Si Nephi nagpahayag sa iyang pagsalig sa Ginoo ug miila sa iyang mga kahuyang

Sa 2 Nephi 4:12–35, si Nephi misulat sa “mga butang sa [iyang] kalag” (2 Nephi 4:15). Basaha ang 2 Nephi 4:15–16, ug pangitaa kon unsa ang gikalipayan ni Nephi.

Hunahunaa ang maayong mga butang nga naghatag kanimo og dakong kalipay. Kompletuha ang mosunod nga mga pulong sa pipila ka mga tubag: Ang akong kalag nalipay sa .

2. Isulat sa imong scripture study journal kon unsa kaha ang gipasabut nga malipay sa mga butang sa Ginoo.

Si Nephi miingon nga ang iyang “kasingkasing namalandong” (2 Nephi 4:15) sa mga kasulatan. Ang pagpamalandong nagpasabut dili lamang sa paghinuktok ug paghunahuna og maayo sa mga kasulatan apan usab sa pag-abli sa atong mga kasingkasing ngadto sa mga pagpadayag ug pagsabut.

Pamalandungi ang mga Pulong sa Kasulatan

Adunay dakong bili sa pagpamalandong kon unsay gipasabut sa mga pulong sa kasulatan. Kon magpraktis ka sa pagpamalandong ug dayon balikon og sulti sa imong kaugalingong mga pulong kon unsa sa imong hunahuna ang gipasabut sa usa ka hugpong sa mga pulong sa kasulatan, makatabang kini kanimo nga makaangkon og mas dakong panabut niana nga kamatuoran.

Si Nephi nakasinati og mga higayon sa hilabihang kalipay sa iyang kinabuhi; hinoon, siya usab nakasugat og lisud nga mga higayon. Baliki ang 2 Nephi 4:12–13 aron madiskubrihan ang pipila ka lisud nga mga hagit nga gisagubang ni Nephi niana nga panahon sa iyang kinabuhi.

Basaha ang 2 Nephi 4:17–18, ug pangitaa kon unsa pay nakapaguol ni Nephi. Samtang magbasa ka, hinumdumi ang mosunod nga mga kahulugan: Ang pagkaalaot nagpasabut sa pagkamakalolooy o walay pulos. Ang pagkahuyang nagpasabut sa kahuyang sa atong mortal nga kahimtang. Ang mohasol nagpasabut nga tuyukan o libutan, aron sa pagsamok, o paglupig. Bisan tuod si Nephi mibati og kasubo tungod sa iyang mga sala, dili kini angay nga saypon pagsabut nga nakahimo siya og dagkong mga kalapasan.

Hunahunaa ang usa ka panahon sa imong kinabuhi nga susama ka og pagbati ni Nephi (sama sa dihang nawad-an ka og usa ka minahal, nasuko ang uban kanimo tungod sa pagsunod sa Ginoo, nag-atubang ka og kalisud o kasagmuyo, o mibati ka og kasubo tungod sa imong mga sala, kahuyang, ug mga pagtintal). Basaha ang 2 Nephi 4:19, ug pangitaa ang mga pulong nga nagpahayag sa paglaum ni Nephi bisan pa sa iyang mga kagul-anan. Unsa kaha ang gipasabut ni Nephi sa dihang miingon siya, “Ako nasayud kang kinsa ako mosalig”? Unsaon nimo pagbutang og mas dakong pagsalig sa Dios?

Samtang magpadayon ka sa imong pagtuon, pangita og ebidensya sa baruganan sa ebanghelyo nga ang Dios mosuporta niadtong mosalig Kaniya.

3. Sa imong scripture study journal, tubaga ang mga pangutana sa mosunod nga tsart:

Pakisayran nga Kasulatan	Sa Unsang Paagi Kini nga mga Bersikulo Nagamit kang Nephi	Sa Unsang Paagi Kini nga mga Bersikulo Mahimong Magamit Kanimo
2 Nephi 4:20–25	Sa unsang paagi ang Ginoo mipanalangin ni Nephi kaniadto tungod sa iyang pagsalig diha Kaniya?	Sa unsang paagi gipanalanginan ka sa Ginoo dihang misalig ka Kaniya?
2 Nephi 4:26–30	Sa unsang paagi ang paghinumdom sa iyang mga panalangin nakaapekto sa mga tinguha ni Nephi nga mahimong matarung?	Sa unsang paagi ang mga panalangin sa Ginoo nakaapekto sa imong tinguha nga mahimong matarung?
2 Nephi 4:31–33	Alang sa unsa ang pag-ampo ni Nephi?	Unsaon nimo paggamit kini nga mga bersikulo diha sa imong mga pag-ampo?

Basaha ang 2 Nephi 4:34–35, ug markahi ang mga pulong nga nagpakita sa pagsalig ni Nephi sa Ginoo.

4. Isulat sa imong scripture study journal kon unsay imong nakat-unan gikan sa pagtuon sa 2 Nephi 4:17–35 ug mga paagi nga gusto nimong madugangan ang imong pagsalig sa Ginoo.

2 Nephi 5:1–8

Gibulag sa Ginoo ang mga Nephite gikan sa mga Lamanite

Samtang magtuon ka sa 2 Nephi 5, hunahunaa ang lisud nga mga problema ug mga desisyon nga tingali imong gisinati o nasinati. Niini nga kapitulo gipasabut ni Nephi nga ang iyang mga igsoon nga lalaki “mitinguha sa paghunos sa akong kinabuhi” (2 Nephi 5:2). Tan-awa sa 2 Nephi 5:1 kon unsay gihimo ni Nephi sa pagpangita og solusyon sa problema. Dayon markahi diha sa imong mga kasulatan kon unsay gibuhat sa Ginoo sa pagtabang ni Nephi diha sa 2 Nephi 5:5.

group of Nephites

Isip resulta niini nga pasidaan, si Nephi ug “tanan … kinsa mituo sa mga pasidaan ug mga pagpadayag sa Dios” (2 Nephi 5:6) mibiya sa yuta sa ilang unang kabilin. Sila mipanaw “sulod sa pipila ka mga adlaw” (2 Nephi 5:7) ug mipuyo sa dapit nga ilang gitawag og Nephi. Kini nga kasinatian naghulagway nga ang kasiguroan nagagikan sa pagsunod sa mga pagpadayag sa Dios.

Basaha ang mosunod nga pagpamatuod gikan ni Elder Paul V. Johnson sa Seventy: “Dili ikatingala nga atubangan niining makalilisang nga kadautan ug tintasyon wala kita pasagdi sa Ginoo sa pagsugakod niini sa atong kaugalingon. Sa pagkatinuod, adunay sobra pa sa daghang tabang alang sa tanan kon maminaw lamang kita. Nadawat ninyo ang gasa sa Espiritu Santo nga mogiya ug modasig kaninyo. Aduna kamoy mga kasulatan, ginikanan, mga lider ug titser sa Simbahan. Anaa usab kaninyo ang mga pulong sa propeta, manalagna, ug tigpadayag nga mipuyo ning atong panahon. Adunay daghan kaayong mga giya ug direksyon aron dili kamo makahimo sa dinagko nga sayop sa kinabuhi gawas lang kon tuyuon ninyo sa pagbaliwala ang mga giya nga inyong nadawat” (“Ang mga Panalangin sa Kinatibuk-ang Komperensya,” Liahona, Nob. 2005, 51).

5. Sa imong scripture study journal, pagsulat og usa ka pasidaan nga imong nadawat gikan sa Ginoo, Iyang mga propeta, o ubang mga lider sa Simbahan. Unsay imong gibuhat aron sa pagsunod niana nga pasidaan? Sa unsang paagi ang pagsunod niana nga pasidaan nakatabang kanimo sa imong kinabuhi, ug sa unsang paagi kini makatabang kanimo sa umaabut?

2 Nephi 5:9–18, 26–27

Ang mga Nephite nagpuyo subay sa matang sa pagkamalipayon

Human misaysay sa mga kahimtang nga miresulta sa pagkabahin-bahin sa pamilya ni Lehi, gihulagway ni Nephi kon sama sa unsa ang kinabuhi sa “mga katawhan ni Nephi” (2 Nephi 5:9). Basaha ang 2 Nephi 5:27, ug markahi ang mga pulong nga nagpakita kon sa unsang paagi nagpuyo ang mga Nephite. Unsa kaha ang gipasabut nga magpuyo “subay sa matang sa pagkamalipayon”?

6. Ayoha pagbasa ang 2 Nephi 5:10–18, 26, ug markahi diha sa imong mga kasulatan kon unsa ang anaa o ang gibuhat sa mga Nephite nga nakatampo sa ilang kalipay. Pagpili og usa niining mga butanga, ug isulat sa imong scripture study journal kon sa unsang paagi kana nga lihok o kinaiya nakatampo sa imong kalipay. Sama pananglit, kon imong gipili ang kamatuoran nga ang mga Nephite mitukod og templo (tan-awa sa 2 Nephi 5:16), mahimo kang mosulat kon sa unsang paagi ang templo nakahatag og mas dakong kalipay nganha kanimo o sa imong pamilya.

Ang mga lihok ug mga kinaiya nga imong nahibaloan mga parte sa pagsunod sa ebanghelyo ni Jesukristo. Mahimo nimong isulat ang mosunod nga baruganan diha sa imong mga kasulatan tupad sa 2 Nephi 5:27: Samtang ang ebanghelyo ni Jesukristo mamahimong paagi sa atong pagpakabuhi, magkadako ang atong kalipay. Nahitabo kini sa mga Nephite bisan sa panahon sa dakong kalisud. Susiha ang imong kinabuhi ug pagtino og usa ka butang nga imong buhaton aron mas magpakabuhi subay sa dalan sa pagkamalipayon. Isulat kini sa imong personal journal o sa imong mga kasulatan. Ang mga baruganan nga imong gitun-an karon mosangput sa kalipay.

7. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang 2 Nephi 4–5 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: