2 Nephi 26–27

Pasiuna

Si Nephi nakakita nang daan sa pagbisita ni Jesukristo sa Amerika ug sa kalaglagan nga sa dili madugay moabut sa iyang mga katawhan. Si Nephi usab nakakita nang daan niadtong magpuyo sa katapusang mga adlaw ug mipasidaan kanila batok sa garbo, tinago nga mga kalihokan, ug panapi sa mga pari. Aron sa paghulagway kon sa unsang paagi ang Ginoo mohatag kanato og paagi aron mabuntog ang mga epekto sa kadautan ug apostasiya, gilakip ni Nephi ang mga panagna ni Isaias mahitungod sa Pagpahiuli sa ebanghelyo ni Jesukristo sa ulahing mga adlaw.

2 Nephi 26

Si Nephi nanagna kabahin sa katapusang mga adlaw ug nagdapit sa tanan sa pagduol ngadto kang Kristo

Nakasinati ka na ba og linog, grabing unos ug pagpangilat, o uban pang makagun-ob nga panghitabo o nakakita og mga litrato o mga video niini? Nakita ni Nephi nga sa ulahing mga adlaw ang mga lumulupyo sa yuta “duawon sa mga dugdog, ug sa mga kilat, ug sa mga linog, ug sa tanan nga matang sa kalaglagan” (2 Nephi 26:6). Unsay mosulod sa imong hunahuna kon magbasa ka mahitungod “sa kasuko sa Ginoo” (2 Nephi 26:6) o “sa mga paghukom sa Dios” (2 Nephi 25:3)? Ang mga paghukom sa Dios gituyo aron sa pagpanalangin sa Iyang mga anak—aron sa pagpahinulsol sa mga dautan ug aron sa pagpanalipod sa mga matarung. Sa 2 Nephi 26:1–11, si Nephi nanagna sa mga kalaglagan nga mag-una sa pagbisita ni Jesukristo sa Amerika ug sa umaabut nga kalaglagan sa iyang mga katawhan tungod sa ilang pagkadautan. Basaha ang 2 Nephi 26:8–9, ug pangitaa ang mga panalangin nga gisulti ni Nephi nga moabut ngadto sa iyang matarung nga kaliwatan. Dayon basaha ang 2 Nephi 26:12–13, ug pangitaa kon unsa ang gisaad ngari kanato samtang mopakita kita og hugot nga pagtuo diha ni Jesukristo.

Si Jesukristo magpakita sa iyang Kaugalingon ngadto niadtong magpakita og hugot nga pagtuo sa Kaniya ug molahutay sa pagkamatarung. I-rekord ang imong mga tubag sa mosunod nga mga pangutana diha sa imong scripture study journal:
1. Sa unsang paagi si Jesukristo magpakita sa iyang Kaugalingon ngadto niadtong magpakita og hugot nga pagtuo sa Kaniya? (Tan-awa sa 2 Nephi 26:13.)
2. Sa unsang paagi nimo nasaksihan o nasinati ang pipila niining mga pagpakita ni Jesukristo?

Sa 2 Nephi 26:14–19, si Nephi nanagna nga sa ulahing mga adlaw, human nga ang iyang mga katawhan ug ang binhi sa iyang mga igsoon maluya tungod sa pagkawalay pagtuo, ang Basahon ni Mormon motunga. Sa 2 Nephi 26:20–22, siya mihulagway unsa ka daghan sa katawhan sa ulahing mga adlaw ang mapuno sa garbo, mosalikway sa mga milagro sa Dios, ug mosalig sa ilang kaugalingong kaalam ug kahibalo. Sa unsang paagi nakakita ka og mga ehemplo nga natuman ang panagna ni Nephi?

Si Nephi mipasidaan kanato nga ang yawa mogamit sa garbo, kadalo, ug tinago nga mga buhat sa pagdaut o paglaglag kanato. Sa inyong mga kasulatan diha sa 2 Nephi 26:22, markahi kon sa unsang paagi si Satanas nagtinguha sa paghigot kanato. Ang linino nga pisi mao ang usa ka nipis nga hilo sa panapton nga daling maputol. Hinoon, kon daghang mga hilo ang hiusahon paglalik mamahimo kining lig-on nga pisi. Basaha ang 2 Nephi 26:32, ug timan-i ang mga ehemplo sa “mga buhat sa kangitngit” nga gimando sa Ginoo kanato nga likayan. Pamalandungi kon sa unsang paagi ang usa ka lanot sa hilo mahimong “malig-on nga pisi” diha sa 2 Nephi 26:32.

Hunahunaa nga nagtudlo ka og usa ka higala unsaon sa paglikay sa mga lit-ag sa yawa (Satanas). Gamit ang 2 Nephi 26:20–22, 32, pagsulat og paragraph diha sa imong scripture study journal nga nagpasabut sa proseso nga ang yawa nagtinguha sa paghigot kanato. Sa piho nga paagi tan-awa sa 2 Nephi 26:22 kon sa unsang paagi ang kaaway naggamit og linino nga pisi hangtud nga ang iyang biktima nahigtan na sa mas lig-on nga mga pisi, ug paghatag og ehemplo.

Nakita ni Nephi ang kalaglagan nga nahimo sa kaaway ug nagpasidaan sa mga lit-ag ug impluwensya ni Satanas sa katapusang mga adlaw. Sukwahi sa mga buhat ni Satanas sa kangitngit, si Nephi mitudlo nga ang gugma sa Dios gihatag ngadto sa tanan ug nga ang Iyang katuyoan mao ang pagluwas kutob sa moduol Kaniya. Basaha ang 2 Nephi 26:23–24, ug i-highlight ang mga pulong nga naghulagway kon sa unsang paagi ang Dios nakigtambayayong sa Iyang mga anak. Sumala sa 2 Nephi 26:24, unsa man ang katuyoan sa Dios sa tanan Niyang gibuhat? Mahimo nimong i-highlight ang mga pulong nga nagtudlo niini nga doktrina: Ang tanan nga gibuhat sa Ginoo alang sa kaayohan sa kalibutan.

Tubaga ang mosunod nga pangutana diha sa imong scripture study journal: Sa unsang paagi ang pagsabut nga ang tanan nga gibuhat sa Ginoo nga alang sa kaayohan sa kalibutan makatabang kanimo nga madugangan ang imong pagtuo diha sa atong Langitnong Amahan ug mohatag kanimo og kalinaw ug kasiguroan niini nga kinabuhi?Basaha kadali

ang 2 Nephi 26:25–28, 33, ug markahi sa matag higayon nga makita ang mga pulong nga tanan, bisan kinsa, ug wala. Dayon baliki ug basaha pag-usab kini nga mga bersikulo, hatagan og maayong pagtagad kini nga mga pulong ug sa unsang paagi si Nephi mitudlo nga ang Ginoo nahigugma sa tanan nga mga katawhan ug nagdapit sa tanan sa pagduol ngadto Kaniya ug pag-ambit sa Iyang kaluwasan. Pamalandungi kon sa unsang paagi kini nga baruganan makaapekto sa paagi sa imong pagtan-aw sa mga sugo, mga sumbanan, ug ubang mga tawo.

Basaha ang 2 Nephi 26:29–31. Sa imong scripture study journal, paglista og duha o tulo ka mga kinaiya sa panapi sa mga pari nga gilista sa bersikulo 29, ug dayon tubaga ang mosunod nga mga pangutana:
1. Ngano kaha nga makadaot sa Simbahan ang mga panapi sa mga pari?
2. Sumala sa 2 Nephi 26:30, sa unsang paagi mapugngan ang mga panapi sa mga pari?

2 Nephi 27:1–23

Si Nephi nanagna sa pagtungha sa Basahon ni Mormon

Tubaga ang mosunod nga pangutana sa imong scripture study journal: Giunsa nimo pagkahibalo (o nganong nagtuo man ka) nga ang Basahon ni Mormon mao ang pulong sa Dios?

Ang Ginoo mipadayag og mga detalye ngadto ni propeta Isaias kabahin sa pagtungha sa Basahon ni Mormon, nga girekord ni Nephi sa 2 Nephi 27. Human nanagna si Isaias nga sa katapusang mga adlaw daghang mga tawo ang mapuno sa kadautan ug mosalikway sa mga propeta, siya mitudlo nga ang Dios mopadayag sa usa ka basahon sa karaang mga sinulat (tan-awa sa 2 Nephi 27:1–7). Basaha ang 2 Nephi 27:12–14, ug pangitaa kon unsay gitudlo niini nga buhaton sa Ginoo aron sa pag-establisar sa kamatuoran sa basahon nga motungha sa katapusang mga adlaw.

Usa ka paagi nga giestablisar sa Ginoo ang katinuod sa Basahon ni Mormon mao ang pagtugot sa ubang mga indibidwal nga mahimong mga saksi sa mga palid nga bulawan. Si Oliver Cowdery, David Whitmer, ug Martin Harris gipili isip ang Tulo ka mga Saksi ug gihisgutan diha sa 2 Nephi 27:12. (Tan-awa ang “Ang Pagpamatuod sa Tulo ka mga Saksi” sa atubangan sa Basahon ni Mormon.)

Ang “pipila” nga gihisgutan diha sa 2 Nephi 27:13 naglakip sa Walo ka mga Saksi (tan-awa ang “Ang Pagpamatuod sa Walo ka mga Saksi” diha sa atubangan sa Basahon ni Mormon). Ikonsiderar ang pagmarka sa mga pulong nga “sa ingon ka daghan nga mga saksi nga iyang nakita nga maayo” sa 2 Nephi 27:14. Samtang makadawat ka ug mopakigbahin sa imong pagpamatuod sa Basahon ni Mormon, nahimo ka usab nga saksi sa katinuod niini nga basahon. Mahimo nimong isulat ang imong pangalan duol sa 2 Nephi 27:14 isip usa niining dugang nga mga saksi sa katinuod sa Basahon ni Mormon.

Si Elder Jeffrey R. Holland sa Korum sa Napulog Duha Ka mga Apostoles namulong sa iyang kaugalingong saksi sa Basahon ni Mormon:

“Ako mopamatuod nga ang usa dili makaangkon sa kinahugtan nga pagtuo niining buluhaton sa ulahing mga adlaw—ug unya makakaplag sa kinatas-ang sukod sa kalinaw ug kahupayan alang sa atong panahon—gawas lang kon siya mohangop sa kabalaan sa Basahon ni Mormon ug ni Ginoong Jesukristo, kinsa mao ang gipamatud-an niini. …

“Akong gipangayo nga ang akong pagpamatuod sa Basahon ni Mormon ug tanan nga nalakip niini, nga gihatag karon ubos sa akong kaugalingong panumpa ug [office sa priesthood], marekord pinaagi sa mga tawo dinhi sa yuta ug sa mga anghel sa langit. … Gusto nakong maklaro gayud nga sa pagbarug unya nako atubangan sa hukmanan sa Dios nga ako gayud mipahayag ngadto sa kalibutan, sa pinakadirekta nga pagkasulti ako makapahayag, nga ang Basahon ni Mormon tinuod, nga miabut kini sa paagi nga giingon ni Joseph nga miabut ug gihatag kini aron modala og kalipay ug paglaum ngadto sa mga matinud-anon nga kahago sa ulahing mga adlaw” (“Kasiguroan alang sa Kalag” Liahona, Nob. 2009, 89–90).

Hunahunaa kon unsay imong mabuhat sa paglig-on sa imong kombiksyon sa katinuod sa Basahon ni Mormon.

Sa imong scripture study journal, isulat kon unsay imong buhaton karong tuiga aron sa paglig-on sa imong pagsaksi sa katinuod sa Basahon ni Mormon.

Aron makompleto ang mosunod nga kalihokan, kinahanglan ka nga motan-aw sa Joseph Smith—Kasaysayan, nga anaa diha sa Perlas nga Labing Bililhon. Basaha ang Joseph Smith—Kasaysayan 1:63–65, ug ilha ang mga indibidwal diha sa istorya. Dayon basaha ang gi-assign nga mga tudling gikan sa 2 Nephi 27 diha sa tsart sa ubos, ug itakdo ang ngalan sa matag hugpong sa mga bersikulo.

Charles Anthon
Joseph Smith
Martin Harris

Tawo nga dili maalamon (tan-awa sa 2 Nephi 27:9, 15, 19–20)
Ang tawo nga midala sa mga pulong, o mga sinulat, ngadto sa maalamon nga tawo (tan-awa sa 2 Nephi 27:15, 17)
Ang maalamon nga tawo (tan-awa sa 2 Nephi 27:15, 18)

Ang pulong nga mga sinulat diha sa Joseph Smith—Kasaysayan 1:63–65 nagpasabut sa mga inusab nga Ehiptohanon nga mga letra nga gikopya ug gihubad ni Joseph Smith gikan sa bulawang mga palid nga gipresentar ni Martin Harris ngadto ni Propesor Charles Anthon. Si Charles Anthon usa ka magtutudlo sa Columbia College ug usa ka tawo nga nabantog nga suhito sa karaan nga mga pinulongan. Human misaysay ug mipamatuod pinaagi sa sulat nga ang hubad ni Joseph Smith sa mga sinulat husto, si Propesor Charles Anthon migisi sa iyang pag-endorso sa paghubad sa dihang gisultihan siya sa milagrusong paagi nga nakuha ang mga palid. Mitanyag siya nga siya mismo ang mohubad sa rekord. Dihang gipasabut ni Martin Harris nga ang pipila sa mga palid gisilyohan, si Professor Anthon miingon nga dili siya makabasa og sinilyohan nga basahon. Sumala sa 2 Nephi 27:16, unsay atong makat-unan mahitungod sa motibo ni Charles Anthon nga gustong mohubad sa mga palid?

Basaha ang 2 Nephi 27:20–23, ug markahi ang mga pulong nga gibalik-balik sa mga bersikulo 20 ug 21.

Isulat sa imong scripture study journal kon sa unsang paagi ang imong natun-an hangtud karon diha sa 2 Nephi 27:1–23 nagmatuod nga ang Dios makahimo sa pagbuhat sa Iyang buhat. (Kon nagkinahanglan ka og dugang nga impormasyon mahitungod sa pagtungha sa Basahon ni Mormon, tan-awa sa D&P 20:8–12.)

Mahimo nimong isulat ang mosunod nga kamatuoran sa imong mga kasulatan: Ang pagtungha sa Basahon ni Mormon maoy usa sa mga paagi nga tumanon sa Dios ang Iyang buluhaton sa ulahing mga adlaw.

Tubaga ang mosunod nga pangutana diha sa imong scripture study journal: Sa unsang paagi ang katumanan sa karaang panagna mahitungod sa Basahon ni Mormon molig-on sa imong pagpamatuod sa basahon ug sa tahas niini diha sa Pagpahiuli sa Simbahan sa Ginoo?

2 Nephi 27:24–35

Nanagna si Nephi sa positibong epekto sa gipahiuli nga ebanghelyo ni Jesukristo

Mipili ang Dios og batan-ong lalaki nga ginganlan og Joseph Smith nga mahimong propeta sa Pagpahiuli ug pagpahinabo sa Iyang kahibulongan nga buhat sa katapusang mga adlaw. Ang “kahibulongan nga buhat” nga gipasabut diha sa mga kasulatan mao ang Pagpahiuli sa ebanghelyo ni Jesukristo, nga naglakip sa pagtungha sa Basahon ni Mormon. Basaha ang 2 Nephi 27:25–26, markahi ang mga pulong nga “kahibulongan nga buhat ug usa ka katingalahan,” ug hibaloi ang pipila ka mga kahimtang nga maanaa sa dihang gisugdan sa Ginoo kining kahibulongan nga buhat. Pamalandungi kon sa unsang paagi ang Basahon ni Mormon ug ang Pagpahiuli nakatabang kanimo sa paglikay niana nga mga kondisyon.

Basaha ang 2 Nephi 27:29–30, 34–35, ug markahi ang mga panalangin nga moabut tungod sa pagtungha sa Basahon ni Mormon ug sa Pagpahiuli sa ebanghelyo. Ang Basahon ni Mormon ug ang gipahiuli nga ebanghelyo magdala og kalipay ug panabut niadtong magtuon ug modawat niini.

Irekord ang imong tubag sa mosunod nga pangutana diha sa imong scripture study journal: Sa unsang paagi ang Pagpahiuli sa ebanghelyo, nga naglakip sa pagtungha sa Basahon ni Mormon, nahimong usa ka “kahibulongan nga buhat” diha sa imong kinabuhi?
Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 2 Nephi 26–27 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: