Pasiuna sa Ang mga Pulong ni Mormon

Nganong Kinahanglang Tun-an Kini nga Basahon?

Pinaagi sa pagtuon sa mga Pulong ni Mormon, madugangan ang imong pagtuo nga “ang Ginoo nasayud sa tanan nga mga butang” (Mga Pulong ni Mormon 1:7) ug nga Siya naggiya sa Iyang mga sulugoon aron sa pagpahinabo sa Iyang mga katuyoan. Isip usa ka istorya sa kasaysayan, ang basahon nagsilbi nga koneksyon tali sa gagmay nga mga palid ni Nephi (1 Nephi–Omni) ug sa pagpamubo ni Mormon sa dagko nga mga palid ni Nephi (Mosiah–4 Nephi). Ang mga pulong ni Mormon makatabang nimo nga mas makasabut kon unsa nga mga rekord ang gipamub-an ni Mormon samtang iyang gitipun ang Basahon ni Mormon. Nagpaila usab kini kanimo sa hugot nga pagtuo ug mga kalampusan ni Haring Benjamin.

Kinsa ang Nagsulat Niini nga Basahon?

Si Mormon ang misulat niini nga basahon. Siya usa ka propeta, usa ka tigtipig og rekord, ug tigpamubo ug tigtipon sa kadaghanan sa Basahon ni Mormon. Ang Basahon ni Mormon gipangalan kaniya. Usa usab siya ka heneral nga Nephite ug usa ka matarung nga amahan. Si propeta Moroni iyang anak.

Kanus-a ug Diin Kini Gisulat?

Si Mormon misulat niini nga basahon mga A.D. 385, human “nakasaksi hapit sa tanan nga mga kalaglagan sa [iyang] mga katawhan, ang mga Nephite” (Mga Pulong ni Mormon 1:1). Wala girekord ni Mormon kon asa siya sa dihang iyang gisulat kini nga basahon.