3 Nephi 13

Pasiuna

Sumala sa narekord sa 3 Nephi 13, ang Manluluwas nagpadayon sa Iyang wali didto sa templo sa yuta sa Bountiful. Mipasidaan Siya sa katawhan batok sa pagpakaaron-ingnon ug mitudlo nila nga ang ilang matarung nga mga buhat makapahimuot sa Langitnong Amahan. Misugo usab siya sa pundok sa katawhan sa pagtigum og mga bahandi didto sa langit ug dayon mimando sa Iyang napulog duha ka mga disipulo sa pagpangita sa gingharian sa Dios pag-una sa dili pa mabalaka sa ilang kaugalingong temporal nga mga problema.

3 Nephi 13:1–18

Ang Manluluwas mipasidaan sa mga Nephite batok sa pagpakaaron-ingnon ug nagtudlo nila sa pagbuhat og matarung nga mga buhat nga makapahimuot sa Langitnong Amahan

Kompletuha ang mosunod nga self-assessment sa imong hunahuna pinaagi sa pagpili hain nga mga pulong ang labing nindot nga mihulagway sa imong kadasig sa paghatag og limos (paghatag ngadto sa uban), pag-ampo, ug pagpuasa:

Mohatag ko og limos tungod kay:

Kinahanglan nakong buhaton.
Gihigugma nako ang Ginoo ug malingaw ko nga motabang sa ubang tawo.
Gusto ko nga maghunahuna ang uban og maayo nako.

Mag-ampo ko tungod kay:

Dili ko gustong mosulti og “dili” sa atubangan sa ubang tawo kon tawagon ko nga mag-ampo.
Kabahin lang kini sa akong inadlaw nga buluhaton.
Gusto ko nga makigsulti sa akong Langitnong Amahan.

Magpuasa ko tungod kay:

Ang pagpuasa makatabang nako nga mas mahiduol sa Ginoo.
Ang ubang mga tawo maghunahuna nga dautan ko kon dili nako buhaton.
Dili ko pakan-on sa akong mga ginikanan kon kinahanglan kong magpuasa.

Sa 3 Nephi 13, mitudlo si Jesukristo sa katawhan nga Nephite mahitungod sa kaimportante sa motibo sa tawo sa paghatag og limos, pag-ampo, ug pagpuasa. Ang mga tubag nga gilista niining self-assessment nagpakita sa atong lain-laing mga motibo sa pagbuhat niini o sa ubang mga buhat sa relihiyuso nga debosyon.

Tubaga ang mosunod nga mga pangutana diha sa imong scripture study journal: Igsapayan ba ngano nga kita mohimo og matarung nga mga buhat? Ngano o nganong dili man?

Kopyaha ang mosunod nga tsart diha sa imong scripture study journal, ug kompletuha kini pinaagi sa pagbasa sa matag pakisayran sa kasulatan ug motubag sa duha ka pangutana. Samtang basahon nimo, tingali makatabang nga makahibalo nga ang nagpakaaron-ingnon mao ang usa ka tawo kinsa magpakamatarung o kinsa mosulti og butang ug lain ang buhaton.

Kalihokan	Unsa nga motibo ang gipasidaan sa Ginoo kon buhaton nato kini nga kalihokan?	Sa unsa nga paagi gisulti sa Ginoo nga buhaton nato ang kalihokan?
Hatag og limos (3 Nephi 13:1–4)
Pag-ampo (3 Nephi 13:5–6)
Pagpuasa (3 Nephi 13:16–18)

Ikonsiderar ang mosunod nga mga pangutana:

Sa unsa nga paagi nga ang atong mga motibo sa paghimo og matarung nga mga buhat makaapekto sa paagi sa atong paghimo niini?
Unsa ang pipila ka matarung nga mga motibo nga tingali makadasig sa usa ka tawo sa paghatag og limos, pag-ampo, o pagpuasa sa tago?

Usa sa matarung nga motibo sa paghimo niining mga butanga mao ang pagpahimuot sa Langitnong Amahan. Basaha ang 3 Nephi 13:4, 6, 18, ug pangitaa unsa ang gisaad sa Ginoo niadtong kinsa matarung nga naglihok sa tago.

Usa ka importante nga baruganan nga gitudlo sa Manluluwas niini nga bersikulo mao ang: Kon maglihok kita sa matarung nga paagi tungod kay atong gihigugma ang Langitnong Amahan, gantihan kita Niya sa dayag.

Diha sa imong scripture study journal, isulat sa dihang ikaw mibati nga napanalanginan sa pagtinguha sa pagbuhat og butang nga makapahimuot sa Langitnong Amahan kay sa aron makita lang sa uban.

Sa daklit ribyuha ang imong self-assessment sa sinugdanan sa leksyon ug timbang-timbanga ang imong mga motibo sa paghatag og limos, pag-ampo, ug pagpuasa. Ikonsiderar unsaon nimo sa paggamit sa mga pagtulun-an sa Manluluwas sa pagpalambo sa imong mga motibo sa paghimo niini o sa ubang mga buhat sa debosyon ngadto sa Ginoo.

Ang Manluluwas mihatag og dugang nga instruksyon ngadto sa mga Nephite mahitungod sa pag-ampo. Basaha ang 3 Nephi 13:7, ug pangitaa kon giunsa sa paghulagway sa Ginoo ang pagbalik-balik o daghang mga pulong nga gipahayag nga dili sinsero sa pag-ampo. Ang pulong nga kawang nagpasabut nga walay pulos, walay hunahuna o pagbati. Ang kawang nga pagbalik-balik nagpasabut usab og walay paghunahuna nga pagbalik-balik sa samang mga pulong o pag-ampo nga walay hugot nga pagtuo.

Tubaga ang mosunod nga mga pangutana diha sa imong scripture study journal:
1. Ngano sa imong hunahuna nga importante nga likayan ang kawang nga pagbalik-balik sa atong mga pag-ampo ngadto sa Langitnong Amahan?
2. Unsa ang pipila ka mga butang nga imong mahimo aron malikayan ang kawang nga pagbalik-balik samtang ikaw mag-ampo?

Basaha ang 3 Nephi 13:8, ug pangitaa ang baruganan nga gipahayag ni Jesukristo mahitungod sa Langitnong Amahan. Mahimo nimong markahan kini nga baruganan diha sa imong mga kasulatan. Usa sa tumong sa atong mga pag-ampo mao ang “pagsiguro sa atong kaugalingon ug sa uban sa mga panalangin nga giandam na sa Dios nga ihatag kon kita mangayo niini pinaagi sa hugot nga pagtuo” (Bible Dictionary, “Prayer”).

Basaha ang 3 Nephi 13:9–15, ug pamalandunga unsay gusto sa Ginoo nga imong makat-unan mahitungod sa imong mga pag-ampo. Paghunahuna og mga paagi sa pagpalambo sa imong mga pag-ampo pinaagi sa paggamit unsay imong nakat-unan gikan sa mga pagtulun-an sa Manluluwas.

3 Nephi 13:19–24

Si Jesukristo mitudlo sa panon sa katawhan sa pagtigum og mga bahandi didto sa langit

Nakabasa o nakadungog na ba ikaw og istorya mahitungod sa nawala o nalubong nga bahandi? Usahay niini nga mga istorya ang mga nangita sa bahandi sa katapusan nakaabut sa ilang tumong nga nakaamgo nga ang bahandi wala diha o wala gayuy bahandi. Basaha ang 3 Nephi 13:19–20, ug hibaloi ang duha ka matang sa bahandi nga gihisgutan sa Ginoo. Hain niadto nga mga bahandi ang Iyang gisulti nga anaa kanunay alang nato kon kini atong pangitaon?

Tubaga ang mosunod nga mga pangutana diha sa imong scripture study journal:
1. Unsa ang kalainan tali sa “mga bahandi sa yuta” ug “mga bahandi sa langit”?
2. Gikan sa unsay imong nakat-unan sa 3 Nephi 13:21–24, unsa ang pipila ka mga kamatuoran nga gitudlo sa Manluluwas mahitungod sa pagpangita og yutan-ong mga bahandi ug langitnong mga bahandi? (Makatabang kini nimo nga mas makasabut niini nga mga bersikulo nga makahibalo nga ang pulong katigayunan mao ang termino alang sa pagka-kalibutanon o mga bahandi.)
3. Sa unsa nga paagi nga ang pagpangita og mga bahandi sa yuta makabalda nato sa pagtinguha sa mga bahandi sa langit?

Ang Manluluwas wala motudlo nga ang kwarta o yutan-ong kabtangan dautan. Apan gihatagan Niya og gibug-aton ang kaimportante sa pagbutang sa atong mga kasingkasing diha sa langitnong mga bahandi nga molahutay ug dili sa yutan-ong katigayunan.

Usa ka baruganan nga atong makat-unan gikan sa 3 Nephi 13:19–24 mao ang: Aron ang Dios mao ang atong agalon, kinahanglang higugmaon ug alagaran nato Siya labaw sa mga butang sa kalibutan.

Unsa ang pipila ka mga ehemplo sa pagpaningkamot sa pagserbisyo sa Dios ug katigayunan sa samang higayon? Ngano kaha nga lisud ang paghigugma ug pagserbisyo kanunay sa Dios kay sa mga butang sa kalibutan? Ngano nga ang pag-una sa Dios angayan lamang sa paningkamot?

Basaha ang mosunod nga mga ehemplo. Diha sa imong scripture study journal, isulat kon kinsa sa imong hunahuna ang giserbisyuhan sa tawo: ang Dios o katigayunan (pagka-kalibutanon).
1. Ang usa ka batan-ong lalaki mibalibad sa trabaho nga makapalta niya sa mga miting sa Dominggo ug mipili hinoon og gamay og suweldo nga walay trabaho sa Dominggo.
2. Ang usa ka batan-ong babaye kanunayng moreklamo sa iyang mga ginikanan sa iyang panginahanglan og bag-ong mga sinina. Ang mga sinina nga iyang gitinguha mas mahal kay sa makaya sa iyang pamilya.
3. Ang usa ka batan-ong lalaki mibayad sa iyang ikapulo kanunay sa kwarta nga iyang nadawat gikan sa iyang trabaho. Apan iyang gamiton ang nahabilin nga kinitaan sa pagpalit og mga butang nga makalingaw lakip sa dili maayo nga mga salida ug mga kanta, ug wala siya magtigum alang sa iyang misyon o edukasyon.
4. Ang usa ka batan-ong babaye sa kanunay mogamit sa iyang kinitaan sa pagpalit og gagmayng mga gasa sa pagpakita sa iyang gugma alang sa uban.

3 Nephi 13:25–34

Ang Manluluwas misugo sa napulog duha ka mga disipulo sa pagpangita sa gingharian sa Dios sa dili pa ang ilang kaugalingong temporal nga mga panginahanglan

Samtang sila nangalagad taliwala sa katawhan, si Jesukristo misugo sa Iyang napulog duha ka Nephite nga mga disipulo nga dili mabalaka sa ilang temporal nga mga panginahanglan alang sa pagkaon ug sinina (tan-awa sa 3 Nephi 13:25–31). Basaha ang 3 Nephi 13:32–33, ug pangitaa unsay gisulti sa Manluluwas sa Iyang mga disipulo mahitungod sa ilang temporal nga mga panginahanglan. Unsay Iyang gisaad niadtong kinsa mouna sa Dios ug sa Iyang gingharian sa ilang kinabuhi?

Usa ka baruganan nga atong makat-unan gikan niini nga mga bersikulo mao nga: Kon unahon nato sa pagpangita ang gingharian sa Dios, motabang Siya nato sa atong mga panginahanglan.

Tubaga ang mosunod nga mga pangutana diha sa imong scripture study journal:
1. Sa unsa nga paagi nga ang usa ka tawo “[m]angita … [pag-]una sa gingharian sa Dios”? (3 Nephi 13:33).
2. Sa unsang mga paagi nga ang Ginoo miatiman sa imong panginahanglan sa dihang imong giuna Siya sa imong kinabuhi?

Si Presidente Ezra Taft Benson mipamatuod sa mga panalangin nga moabut sa pag-una sa Dios sa atong kinabuhi (mahimo nimong isulat kini nga kinutlo sa usa ka papel ug tipigi kini sa imong kasulatan aron ribyuhon o ipakigbahin sa umaabut):

“Kon atong unahon ang Dios, ang tanan nga butang mapahimutang sa tukma nilang dapit o mawala kini sa atong kinabuhi. Ang atong gugma sa Ginoo modumala sa mga pangangkon sa atong pagbati, sa kapuno sa atong panahon, sa mga kaayohan nga atong gitinguha, ug sa pagpahimutang sa atong mga prayoridad. …

“Kinahanglan nga atong ihatag sa Dios, ang Amahan sa atong mga espiritu, ang eksklusibo nga kahalangdon diha sa atong kinabuhi” (“The Great Commandment—Love the Lord,” Ensign, Mayo 1988, 4–5).

Pamalandunga sa unsa nga paagi nga ikaw o kadtong imong nailhan napanalanginan sa pag-una sa Dios sa inyong kinabuhi.

Isulat ang mosunod diha sa ubos sa mga buluhaton karong adlawa sa imong scripture study journal:

Akong natun-an ang 3 Nephi 13 ug nahuman kini nga leksyon niadtong (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: