Mormon 3–6

Pasiuna

Human makuha og balik ang ilang mga yuta gikan sa mga Lamanite, ang mga Nephite nangandam na usab alang sa gubat. Nangamuyo si Mormon sa mga Nephite nga maghinulsol; hinoon, nanghambog sila sa ilang kaugalingong kusog ug nanganti nga ipanimalos ang nangamatay nila nga mga kaigsoonan. Tungod kay ang gidid-an sa Ginoo ang Iyang katawhan sa pagtinguha og panimalos, midumili si Mormon sa pagpangulo sa ilang kasundalohan, ug napildi sila. Samtang nagpadayon ang mga Nephite diha sa pagkadautan, gipadangat sa Dios ang Iyang mga paghukom ngadto kanila ug ang mga Lamanite misugod sa paglaglag kanila gikan sa yuta. Sa katapusan, mibalik si Mormon sa pagpangulo sa mga Nephite diha sa gubat, apan tungod kay midumili sila nga maghinsulsol, nalaglag sila sa mga Lamanite. Nagbangutan si Mormon sa ilang pagkapukan ug sa ilang pagkadili andam nga mobalik ngadto ni Jesukristo. Nanagna siya nga ang rekord sa katawhan mogawas sa katapusang mga adlaw, ug iyang giawhag kadtong mobasa niini nga maghinulsol ug mangandam alang sa ilang kaugalingong paghukom sa atubangan sa Dios.

Mormon 3–4

Tungod kay nagkagrabe ang pagkadautan sa mga Nephite, nagdumili si Mormon sa pagpangulo sa ilang kasundalohan, ug ang mga Lamanite misugod sa paglaglag sa mga Nephite gikan sa yuta

Gibati na ba nimo nga gusto sa Ginoo nga duna kay usbon sa imong kinabuhi? Sa imong hunahuna Siya mitabang o miawhag ba nimo nga duna kay usbon sa imong kinabuhi nga wala ka makaamgo niini?

Atol sa panahon ni Mormon, ang mga Nephite kanunayng mapakyas sa pagkaamgo o pagpasalamat kon giunsa pag-impluwensya sa Ginoo sa ilang mga gubat batok sa mga Lamanite. Human nakahimo ang mga Nephite og kasabutan uban sa mga Lamanite ug sa mga tulisan ni Gadianton, gitugutan sila sa Ginoo nga makasinati og 10 ka tuig nga walay panagbingkil. Atol niadong mga tuiga nangandam sila sa pisikal nga paagi alang sa umaabut nga mga pag-ataki (tan-awa sa Mormon 2:28; 3:1).

Basaha ang Mormon 3:2–3, ug pangitaa ang mas importante nga paagi diin gusto sa Ginoo nga ang mga Nephite mangandam sa ilang kaugalingon alang sa mga pag-ataki sa mga Lamanite. Unsay reaksyon sa mga Nephite? Sumala sa Mormon 3:3, nganong giluwas man sa Ginoo ang mga Nephite sa ilang bag-ohay lang nga mga gubat bisan pa man sa ilang pagkadautan?

Sama sa narekord diha sa Mormon 3:4–8, gipanalipdan sa Ginoo ang mga Nephite og kaduha pa ka higayon sa gubat. Usa ka doktrinal nga kamatuoran nga atong makat-unan gikan sa pagdumala sa Ginoo kalabut sa dautan nga nasud sa mga Nephite mao nga diha sa Iyang kalooy, ang Ginoo naghatag kanato og igong mga oportunidad nga maghinulsol sa atong mga sala. Kini nga mga oportunidad mga ebidensya sa pagpailub ug pagkamabination sa Dios ug sa Iyang tinguha nga ang tanan Niyang mga anak magpuyo sa ingon nga paagi aron mahimong angayan alang sa hingpit nga mga panalangin sa Pag-ula.

Tubaga ang mosunod nga mga pangutana diha sa imong scripture study journal (mahimo nimo kining tubagan diha sa imong personal nga journal kon ang mga tubag sagrado o kumpidensyal):
1. Sa unsang paagi ka gi-awhag sa Ginoo nga maghinulsol ug gihatagan og mga oportunidad sa pagbuhat sa ingon? Unsa ang gitudlo niini nimo bahin sa Iyang kinaiya?
2. Unsay mabuhat nimo aron mahilayo sa pagbaliwala o pagmagahi sa imong kasingkasing batok niining pag-awhag, sama sa gibuhat sa mga Nephite diha sa Mormon 3:3?

Ang mga oportunidad ug mga pagdapit gikan sa Ginoo nga mohimo og mga kausaban sa imong kinabuhi mahimong mas kanunayng moabut kay sa imo tingaling maamguhan. Pananglitan, mahimo kining moabut kon moambit ka sa sakrament o kon mobati ka og pag-aghat gikan sa Espiritu Santo sa pagpalambo sa imong kaugalingon o sa pagserbisyo sa uban. Samtang mangita ka niadtong mga oportunidad ug motubag pinaagi sa paghimo og dinaliang mga kausaban, madapit nimo ang matubsanong gahum sa Ginoo nganha sa imong kinabuhi. Aron matabangan ka nga masabtan ang pagbatok sa mga Nephite sa mga pagsulay sa Ginoo nga makatabang kanila, basaha ang Mormon 3:9–10 ug pangitaa kon unsay ilang gibuhat agig reaksyon sa daghan nilang mga kadaugan batok sa mga Lamanite. (Samtang magbasa ka, mahimong makatabang nga masayran nga ang pulong nga manimalos diha sa bersikulo 9 nagpasabut nga mobalos tungod kay nasakitan.)

Unsay reaksyon sa mga Nephite human sa ilang mga kadaugan batok sa mga Lamanite? Basaha ang Mormon 3:11–13, ug pangitaa ang reaksyon ni Mormon sa panumpa sa kasundalohan nga nagtinguha og panimalos (manimalos).

Gipangulohan ni Mormon ang kasundalohan sa Nephite og sobra sa 30 ka tuig, bisan pa man sa kagrabe sa ilang pagkadautan Unsay gitudlo sa pagdumili ni Mormon nga pangulohan ang kasundalohan nianang higayuna bahin sa kabug-at sa pagtinguha nga manimalos?

Basaha ang Mormon 3:14–16, ug markahi ang mga pulong nga nagpahayag kon unsay gitudlo sa Ginoo kang Mormon bahin sa pagbalos (o pagtinguha og panimalos). Usa ka kamatuoran nga atong makat-unan gikan niini nga mga bersikulo mao nga gidili sa Ginoo nga kita manimalos.

Tubaga ang mosunod nga mga pangutana diha sa imong scripture study journal:
1. Gusto ka ba nga manimalos o makabalos sa usa ka tawo tungod sa gibuhat nianang tawhana kanimo? Sa imong hunahuna ngano nga peligro man kini o dili maayo nga reaksyon? Sa imong hunahuna kinsa man ang mas madaut tungod kay manimalos ka?
2. Nganong kinahanglan man natong itugyan ang paghukom ug panimalos ngadto sa mga kamot sa Ginoo imbis nga kita mismo ang mangunay niini?

Bisan tuod nga mahimong nahibalo kita nga kinahanglan natong ipadaplin ang mga pagbati sa pagpanimalos ug dunay tinguha sa pagbuhat sa ingon, usahay mahagiton ang pagbuntog niining mga pagbati kon moabut na kini. Samtang magbasa ka sa mosunod nga tambag gikan ni Presidente James E. Faust sa Unang Kapangulohan, badlisi ang mga pulong nga makatabang nimo nga masayud kon unsay imong mabuhat aron mabuntog ang mga pagbati sa panimalos kon masugatan nimo kini:

“Kinahanglan natong ilhon ug sabton ang masuk-anon nga mga pagbati. Ang paghimo niini magkinahanglan og pagpaubos, apan kon moluhod ug mohangyo ta sa Langitnong Amahan alang sa usa ka pagbati nga mopasaylo, Siya motabang kanato. Ang Ginoo nagsugo kanato sa ‘pagpasaylo sa tanan nga mga tawo’ [D&P 64:10] alang sa atong kaayohan kay ang ‘kasilag mopugong sa espirituhanong pagtubo’ [Orson F. Whitney, Gospel Themes (1914), 144]. Kon ato lamang tangtangon gikan sa atong kaugalingon ang kasilag ug kalagot ang Ginoo makahupay sa atong mga kasingkasing. …

“… Kon ang trahedya moigo, kinahanglang dili kita motubag pinaagi sa pagpanimalos, apan hinoon tugutan ang hustisya nga mohimo sa iyang bahin ug dayon magpadayon. Dili sayon ang pagpadayon ug haw-angon ang atong kasingkasing sa nagkadako nga kalagot. Ang Manluluwas midalit kanatong tanan og bililhon nga kalinaw pinaagi sa Iyang Pag-ula, apan moabut lamang kini samtang kita andam mopapahawa sa dili maayo nga mga pagbati sa kasuko, kasilag, o panimalos. Alang kanato kinsa mopasaylo ‘sa mga nakautang kanato’ [Hubad ni Joseph Smith, Mateo 6:13], bisan kadtong nakalapas og seryuso nga mga krimen, ang Pag-ula makahatag og dakong kalinaw ug kahupayan” (“Ang Makaalim nga Gahum sa Pagpasaylo,” Ensign o Liahona, Mayo 2007, 69).

Pamalandunga kon unsaon nimo paggamit niini nga tambag aron palabyon ang bisan unsang mga pagdumot, kasuko, o dili maayo nimo nga mga pagbati ngadto sa uban.

Human mibalibad sa pagpangulo sa kasundalohan sa Nephite, gibaling ni Mormon ang iyang pagtagad ngadto sa pagsulat alang niadtong makabasa sa iyang mga pulong sa katapusang mga adlaw. Gusto niya nga ang matag usa kanato maghinulsol ug mangandam nga “mobarug sa atubangan sa hukmanan ni Kristo” (tan-awa sa Mormon 3:18–22).

Basaha ang Mormon 4:1–2, ug pangitaa kon unsay nahitabo sa kasundalohan sa Nephite samtang nagtinguha sila nga manimalos ngadto sa mga Lamanite. Basaha ang Mormon 4:4, ug pangitaa nganong ang kasundalohan sa Nephite wala molampus (makadaug). Basaha ang Mormon 4:5, ug itino ang bisan unsang mga kamatuoran bahin sa mga resulta sa pagpadayon diha sa pagkadautan. Unsa man ang imong nakit-an?

Usa sa mga kamatuoran nga tingali imong nakita mao nga ang mga paghukom sa Dios mopatigbabaw sa dautan. Sa kasagaran “pinaagi sa mga dautan ang mga dautan silutan” (Mormon 4:5). Ang dautan mosalikway sa tabang sa Dios ug magdumili sa pagtinguha sa Iyang balaanong proteksyon. Basaha ang Mormon 4:11–14, 18, ug pangitaa kon sa unsang paagi nga ang mga paghukom sa Dios gipahamtang ngadto sa mga Nephite.

Sa imong scripture study journal, tubaga ang mosunod nga mga pangutana:
1. Sa imong opinyon, unsa ang labing makapaguol nga bahin sa sitwasyon sa mga Nephite diha sa Mormon 3–4?
2. Sa unsang paagi kaha nga ang mga doktrina o mga kamatuoran nga imong gitun-an karong adlawa may kalabutan sa usag usa? (Ikonsiderar ang relasyon tali sa paghinulsol, panimalos, ug sa mga paghukom sa Dios.)

Pamalandunga kon unsa ang ipabuhat sa Ginoo nimo aron magamit kini nga mga kamatuoran.

Mormon 5–6

Nakahukom si Mormon nga mangulo pag-usab sa kasundalohan sa Nephite, apan mipatigbabaw ang mga Lamanite; nagbangutan si Mormon sa pagkalaglag sa iyang katawhan

Duna bay kalainan tali sa kasubo nga mag-uban sa kamatayon sa usa ka tawo nga nagpuyo og matarung nga kinabuhi ug sa usa ka tawo nga namatay nga nagpuyo sa dautang paagi? Sa imong hunahuna unsa man ang kalainan?

Human sa sobra sa 13 ka tuig nga pagdumili nga mangulo sa kasundalohan sa Nephite, si Mormon na usab ang nagmando. Hinoon, gipangulohan niya sila nga walay paglaum tungod kay ang mga tawo mibalibad nga maghinulsol ug manawag sa Ginoo alang sa Iyang tabang. Human mapugngi ang pipila ka pagpangataki sa mga Lamanite, mipalayo ang mga Nephite. Kadtong wala dayon makapalayo nalaglag. Misulat si Mormon ngadto sa hari sa mga Lamanite nga naghangyo nga tugutan niya og panahon ang mga Nephite nga magkapundok alang sa usa ka katapusang gubat (tan-awa sa Mormon 5:1–7; 6:1–6).

Basaha ang Mormon 6:7–11, sulayi sa pagsabut ang kasubo ni Mormon samtang nasaksihan niya ang kalaglagan sa iyang katawhan. Sa imong hunahuna nganong ang kamatayon makahahadlok niadong nagpuyo sa dautang paagi?

Basaha ang Mormon 6:16–22, ug tubaga ang duha ka pangutana diha sa imong scripture study journal:
1. Nganong ang mga propeta, mga lider, ug mga ginikanan makugihon kaayong moawhag nato nga maghinulsol?
2. Sa unsang paagi nga ang paglaum sa paghangup sa Ginoo makatabang nimo nga maghinulsol? (tan-awa sa Mormon 6:17).

Pamalandunga kon duna bay bisan unsang butang nga gusto sa Ginoo nga imong hinulsulan karon dayon sa imong kinabuhi. Mahimo kang magsulat bahin niini diha sa imong personal nga journal ug magtakda og mga tumong aron matuman kini.

Isulat ang mosunod diha sa ubos sa mga buluhaton karong adlawa sa imong scripture study journal:

Akong natun-an ang Mormon 3–6 ug nahuman kini nga leksyon niadtong (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: