Pasiuna sa Ether
Nganong Kinahanglang Tun-an Kini nga Basahon?
Samtang magtuon ka sa basahon ni Ether, imong mahibaloan ang bahin sa mga Jaredite—usa ka grupo sa katawhan nga mibiyahe ngadto sa Western Hemisphere ug mipuyo didto sulod sa daghang mga siglo sa wala pa moabut ang katawhan ni Lehi. Kini nga basahon makatabang nimo aron makakat-on og importante nga mga baruganan kalabut sa pag-ampo, pagpadayag, ug sa relasyon tali sa pagpakita og hugot nga pagtuo kang Jesukristo ug sa pagdawat og espirituhanong kahibalo. Makatabang usab kini aron imong masabtan ang tahas sa mga propeta sa pagdani sa mga tawo nga maghinulsol ug sa mga sangputanan nga moabut niadtong mosalikway kang Jesukristo ug sa Iyang mga propeta.
Kinsa ang Nagsulat Niini nga Basahon?
Giminubo ni Moroni kining basahon gikan sa 24 ka bulawang mga palid nga gitawag og mga palid ni Ether. Gipangalan kini kang propeta Ether, nga mao ang katapusang propeta sa mga Jaredite ug mihimo og usa ka rekord sa ilang kasaysayan (tan-awa sa Ether 15:33–34). Sa panahon ni Haring Mosiah, ang ubang mga tawo ni Limhi nakadiskubre sa mga palid ni Ether samtang nangita sila sa yuta sa Zarahemla (tan-awa sa Mosiah 8:7–11; Ether 1:2). Ang Nephite nga mga propeta ug mga tigtipig sa rekord mipasa-pasa sa mga palid ni Ether hangtud nga miabut kini ni Moroni. Gisulti ni Moroni nga wala niya giapil “ang ikagatusan nga bahin” sa rekord sa iyang pagminubo (Ether 15:33).
Kanus-a ug Diin Kini Gisulat?
Ang orihinal nga mga tinubdan nga gigamit sa paghimo sa basahon ni Ether gisulat mga siglo na ang milabay sa wala pa mahimo ni Moroni ang iyang pagminubo. Ang unang rekord sa mga Jaredite nahimo sa dihang ang igsoon nga lalaki ni Jared misulat sa panan-awon nga iyang nadawat sa wala pa mitabok ang iyang katawhan sa kadagatan (tan-awa sa Ether 4:1). Walay laing mga tigtipig sa rekord diha sa mga Jaredite nga nahisgutan hangtud kang Ether (tan-wa sa Ether 13:3; 15:33). Giminubo ni Moroni ang basahon ni Ether (tan-awa sa Mormon 8:3–6; Moroni 10:1). Wala gisulti ni Moroni kon diin siya sa dihang gihimo niya ang pagminubo, bisan tuod nga misulat siya nga ang mga Jaredite nalaglag “niini nga amihan nga nasud” (Ether 1:1), nga nagpasabut nga mahimong diha siya sa yuta diin sila nalaglag.