Mormon 9

Pasiuna

Gihuman ni Moroni ang rekord sa iyang amahan pinaagi sa panawagan niadtong wala motuo ni Jesukristo nga modangup ngadto sa Dios pinaagi sa paghinulsol. Gitudlo niya nga ang Dios usa ka Dios sa mga milagro nga dili mag-usab-usab. Gitudlo usab niya nga ang mga milagro mohunong lamang kon ang mga tawo mohunong sa pagbaton og hugot nga pagtuo. Giawhag niya ang tanang katawhan nga mag-ampo sa Amahan sa ngalan ni Jesukristo aron makadawat niadtong mga butang nga ilang gikinahanglan.

Mormon 9:1–6

Nanawagan si Moroni niadtong wala motuo ni Jesukristo nga maghinulsol

Hunahunaa kon unsa kaha ang imong mahunahunaan ug bation kon ikaw mosulod na ngadto sa presensya sa Dios karon. Unsa sa imong hunahuna ang bation sa dautang mga tawo diha sa Iyang presensya? Basaha ang Mormon 9:1–5, ug tan-awa nga gihulagway ni Moroni kon unsay mahitabo kon ang mga tawo nga mipili nga dili motuo kang Jesukristo sa katapusan pagadad-on ngadto sa presensya sa Dios.

Gipasabut ni Presidente Joseph Fielding Smith nga daghang mga tawo ang sayop nga nagtuo nga mahimo silang komportable sa presensya sa Dios bisan kon wala sila maghinulsol sa ilang mga sala:

“Walay kaluwasan kon walay paghinulsol. Ang tawo dili makasulod sa gingharian sa Dios diha sa iyang mga sala. Dili gayud kini haum nga butang nga ang usa ka tawo moadto sa presensya sa Amahan ug magpuyo sa presensya sa Dios diha sa iyang mga sala. …

“Sa akong hunahuna dunay daghan kaayong mga tawo sa yuta, daghan kanila tingali naa sa Simbahan—ang pipila anaa sa Simbahan—kinsa dunay ideya nga makatabok sila niining kinabuhia nga magbuhat kon unsay ilang gusto, magsupak sa mga sugo sa Ginoo, ug sa gihapon sa katapusan makaadto sila sa iyang presensya. Naghunahuna sila nga maghinulsol sila, siguro didto sa kalibutan sa espiritu.

“Kinahanglan silang mobasa niining mga pulong ni Moroni: ‘Kamo nagtuo ba nga kamo makapuyo uban kaniya [Kristo] ubos sa usa ka kasayuran sa inyong kasaypanan? Kamo nagtuo ba nga kamo magmalipayon sa pagpuyo uban niana nga balaan nga Binuhat, kon ang inyong kalag gihasol uban sa kasayuran sa kasaypanan nga kamo naggamit sa dili maayo sa iyang mga balaod?

“‘Tan-awa, ako moingon nganha kaninyo nga kamo labaw pa nga mauyamot nga mopuyo uban sa usa ka balaan ug makiangayon nga Dios, ubos sa usa ka kasayuran sa inyong pagkahugaw sa iyang atubangan, kay sa kamo mopuyo uban sa mga sinilutan nga kalag sa impyerno. Kay tan-awa, kon kamo pagadad-on aron motan-aw sa inyong pagkahubo diha sa atubangan sa Dios, ug usab sa himaya sa Dios, ug sa pagkabalaan ni Jesukristo, kini mosugod sa pagsiga sa usa ka walay pagkapalong nga kalayo diha kaninyo.’ [Mormon 9:3–5]” (Doctrines of Salvation, comp. Bruce R. McConkie, 3 vols. [1954–56], 2:195–96).

Tubaga ang mosunod nga pangutana sa imong scripture study journal: Sa imong hunahuna nganong sayop man nga maghulat nga maghinulsol niining kinabuhia, nga nagtuo nga makahinulsol ra ka sa sunod nga kinabuhi? (Mahimo nimong gamiton ang unsay imong nakat-unan gikan sa Mormon 9:1–5; Alma 12:14; ug Alma 34:32–34 diha sa imong tubag.)

Basaha ang Mormon 9:6, ug pangitaa kon unsay kinahanglang buhaton sa “dili matuohon” aron makalikay sa tumang kasakit nga gihulagway ni Moroni. Ikonsiderar ang pagmarka sa mga pulong diha sa Mormon 9:6 nga naghulagway sa kahimtang sa mga tawo nga midangup sa Dios ug nangayo Kaniya og kapasayloan. Gikan niining bersikulo atong nakat-unan nga: Kon maghinulsol kita ug motawag sa Dios, mamahimo kita nga walay lama kon moadto na kita sa Iyang presensya. Mahimo nimong isulat kini nga baruganan diha sa imong mga kasulatan o sa imong scripture study journal.

Diha sa imong scripture study journal, pagsulat og pipila ka sentence bahin kon unsay imong bation diha sa presensya sa Dios kon nasayud ka nga nahimo kang putli ug walay lama pinaagi sa Pag-ula sa Manluluwas.

Pinaagi sa paghinulsol ug matarung nga pagpuyo, makaandam ka nga mahimong komportable sa presensya sa Dios. Pamalandunga ang labing importante nga butang nga sa imong pamati imong mahimo karon aron maandam sa pagsugat sa Dios.

Mormon 9:7–20

Namahayag si Moroni nga ang Dios nagpahigayon og mga milagro ug nagatubag sa mga pag-ampo sa matinud-anon

Nakasaksi o nakasinati ka na ba og usa ka milagro? Isulat ang imong depinisyon sa pulong nga milagro:

Pangitaa ang pulong nga milagro diha sa Bible Dictionary o sa Giya ngadto sa mga Kasulatan aron maklaro o madugang sa imong depinisyon. Sa imong hunahuna ngano nga ang ubang mga tawo karon dili motuo og mga milagro?

Sama sa narekord sa Mormon 9:7–8, misulat si Moroni sa katawhan sa katapusang mga adlaw kinsa molimud nga buhi ang Dios, nga Siya mohatag og mga pinadayag, ug nga Siya mobu-bu og mga gasa ngadto sa mga matinud-anon. Si Moroni kusganong mitudlo nga dunay Dios ug nga Siya sama ra “kagahapon, karon, ug sa kahangturan” (Mormon 9:9). Ang Dios nagpadayon sa paghimo og mga milagro taliwala sa matinud-anong katawhan sa tanang kapanahonan. Basaha ang Mormon 9:9–11, 15–19, ug hibaloi kon unsay gitudlo ni Moroni bahin sa kinaiyahan sa Dios aron makatabang siya sa katawhan nga motuo nga ang Dios nagpadayon gihapon sa paghimo og mga milagro.

Sa imong scripture study journal, isulat unsay imong nakat-unan gikan sa Mormon 9:9–11, 15–19 bahin sa kinaiyahan sa Dios. Isulat usab ang imong tubag niini nga pangutana: Unsa ang gitudlo niining mga bersikulo kanimo bahin sa kaandam ug abilidad sa Dios sa paghimo og mga milagro sa kinabuhi sa katawhan karon?

Basaha ang Mormon 9:20, ug pangitaa ang mga rason nganong ang ubang mga tawo mahimong dili makasinati og mga milagro.

Ang mga pulong ni Moroni nga narekord diha sa Mormon 9:9–19 nagtudlo niini nga baruganan: Tungod kay ang Dios dili mausab, mohatag Siya og mga milagro sumala sa hugot nga pagtuo sa Iyang mga anak. Mahimo nimong isulat kining baruganan tupad sa Mormon 9:19–20 diha sa imong mga kasulatan.

Makasinati kita sa milagrusong gahum sa Dios sa daghang paagi sa atong kinabuhi. Human maribyu ang pipila ka dagkong mga milagro nga gihulagway diha sa mga kasulatan, si Sister Sydney S. Reynolds, kinsa miserbisyo sa kinatibuk-ang kapangulohan sa Primary, nagtudlo:

“Sama ka importante niining ‘dagko nga mga milagro’ mao ang mas gagmay nga ‘pribadong mga milagro’ nga nagtudlo sa matag usa kanato nga magbaton og hugot nga pagtuo diha sa Ginoo. Moabut kini samtang kita moila ug mopatalinghug sa mga pag-aghat sa Espiritu sa atong kinabuhi. …

“Ako mituo nga kitang tanan makahatag og pagsaksi niining ginagmay nga mga milagro. Nakaila kita og mga bata nga nag-ampo alang sa tabang nga makit-an ang nawala nga butang ug nakit-an kini. Nakaila kita og mga batan-on nga nakabaton og kaisug sa pagbarug isip saksi sa Dios ug mibati sa Iyang matinabangong mga kamot. Nakaila kita og mga higala nga nagbayad sa ilang ikapulo gamit ang katapusan nilang kwarta ug dayon, pinaagi sa usa ka milagro, nakita nila mismo nga nakahimo ra sila sa pagbayad sa ilang bayranan sa eskwelahan o sa ilang abangan o tingali nakakita og pagkaon alang sa ilang pamilya. Mahimo kitang mopakigbahin og mga kasinatian bahin sa mga pag-ampo nga natubag ug mga panalangin sa priesthood nga nakahatag og kaisug, nakadala og kahupayan, o nakapabalik sa kahimsog. Kining inadlaw nga mga milagro mopakita kanato sa kamot sa Ginoo sa atong kinabuhi” (“A God of Miracles,” Ensign, Mayo 2001, 12).

Isulat sa imong scripture study journal ang bahin sa usa nimo ka kasinatian o usa nga imong nahibaloan nga nagmatuod nga ang Dios usa gihapon ka Dios sa mga milagro karon.

Mormon 9:21–37

Nagtudlo si Moroni bahin sa pag-ampo ug bahin sa katuyoan sa rekord sa mga Nephite

Makahinumdom ka ba og higayon sa dihang mibati ka nga ang Langitnong Amahan mihatag nimo sa tabang nga imong gikinahanglan tungod kay nag-ampo ka? Basaha ang Mormon 9:21, ug pangitaa kon unsay gitudlo ni Moroni bahin sa pag-ampo ngadto sa Langitnong Amahan alang sa tabang.

Basaha ang mosunod nga pamahayag, ug pangitaa kon unsay gipasabut sa mag-ampo diha sa pangalan ni Kristo: “Kita nag-ampo diha sa pangalan ni Kristo kon ang atong hunahuna mao ang hunahuna ni Kristo, ug ang atong mga tinguha mao ang tinguha ni Kristo—kon maanaa kanato ang Iyang mga pulong (Juan 15:7). Kita dayon mangayo sa mga butang nga posibleng ihatag sa Dios. Daghang mga pag-ampo ang nagpabiling wala matubag tungod kay dili kini pinaagi sa pangalan ni Kristo; wala gayud kini nagrepresentar sa iyang hunahuna, apan nagagikan sa kahakog sa kasingkasing sa tawo” (Bible Dictionary, “Prayer”).

Ikonsiderar ang imong kaugalingong mga pag-ampo base sa unsay bag-o lang nimong nabasahan. Unsa may imong mabuhat aron mas hingpit nga makaampo diha sa pangalan ni Jesukristo?

Sa paghatag og ehemplo sa katawhan nga mituo sa Manluluwas ug nakahimo og mga milagro, gikutlo ni Moroni kon unsay gitudlo ni Jesukristo sa Iyang Nephite nga mga disipulo. Sama sa narekord diha sa Mormon 9:22–25, gimanduan sa Manluluwas ang Iyang mga disipulo nga moadto sa tibuok kalibutan ug isangyaw ang ebanghelyo, ug misaad Siya nga ang milagrusong “mga timailhan mosunod kanila nga motuo” (Mormon 9:24). Dayon si Moroni mipadayon sa iyang mga pagtulun-an bahin sa pag-ampo.

Basaha ang Mormon 9:27–29, ug hibaloi unsay gitudlo ni Moroni bahin kon unsaon gayud nato sa pag-ampo uban sa hugot nga pagtuo. Isulat ang mga butang nga imong mahibaloan diha sa imong scripture study journal. Dayon pagsulat og pipila ka sentence nga naghulagway kon unsaon nimo paggamit ang usa niining mga pagtulun-an sa pagpalambo sa kaugalingon nimong mga pag-ampo.

Mahimo nimong isulat ang mosunod nga baruganan diha sa imong mga kasulatan tupad sa Mormon 9:27: Kon mag-ampo kita uban sa hugot nga pagtuo ngadto sa Langitnong Amahan diha sa pangalan ni Jesukristo, Siya mohatag kanato og mga panalangin nga makatabang nato sa pagpaninguha sa atong kaluwasan.

Sa pagtapos ni Moroni sa iyang mga pulong, iyang gipahayag ang kabalaka nga ang ubang mga tawo sa katapusang mga adlaw mosalikway sa Basahon ni Mormon tungod sa pagkadili hingpit niadtong misulat niini (tan-awa sa Mormon 9:30–34). Basaha ang Mormon 9:35–37, ug pangitaa kon unsay gipamahayag ni Moroni bahin sa mga katuyoan sa Basahon ni Mormon.

Ikonsiderar kon sa unsang paagi nga ang pagtungha sa Basahon ni Mormon dugang nga ebidensya nga ang Dios usa ka Dios sa mga milagro ug nga Siya motubag sa mga pag-ampo.

Isulat ang mosunod diha sa ubos sa mga buluhaton karong adlawa sa imong scripture study journal:

Akong natun-an ang Mormon 9 ug nahuman kini nga leksyon niadtong (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: