Unit 20: Day 3

Alma 42

Pasiuna

Gitapos ni Alma ang iyang tambag sa nanglimbasug niyang anak nga si Corianton pinaagi sa pagpasabut nga ang Langitnong Amahan mihatag og paagi niadtong mga nakasala aron kaloy-an. Gitudloan niya ang iyang anak mahitungod sa mga silot nga gipangayo sa hustisya alang sa sala. Mipamatuod dayon siya nga si Jesukristo “[mo]tagbaw sa mga gipangayo sa kaangayan” (Alma 42:15) pinaagi sa pag-antus alang sa tanan nga nakasala ug andam nga maghinulsol. Ang Ginoo mohatag og kalooy sa mahinulsulon.

Alma 42:1–14

Gitudloan ni Alma si Corianton mahitungod sa balaod sa kaangayan

Ipiyong ang imong mga mata sa makadiyot ug pamalandunga kon unsa kaha ang kahimtang kon moabut na ang panahon alang sa imong Katapusang Paghukom. Kon ribyuhon nimo ang imong kinabuhi, gusto ka ba nga patas ang Katapusang Paghukom? Ngano nga gusto ka man nga patas ang paghukom?

Karon, hunahunaa kon unsa ang buot ipasabut sa pulong nga patas. Ang usa ka depinisyon sa patas naglakip sa pag-angkon sa unsay angay nimong maangkon; ang ideya sa pagkapatas may kalabutan sa eskriptural nga termino nga kaangayan.

balance scale

1. Pagdrowing og yano nga timbangan diha sa imong scripture study journal sama sa usa nga gipakita dinhi. Dayon isulat ang pulong nga Kaangayan ubos sa imong drowing. Pagbilin og luna sa imong journal aron sa paglakip sa ubang label diha sa imong drowing samtang ipadayon nimo ang leksyon.

Aron mas masabtan nimo kini nga konsepto sa kaangayan, basaha ang mosunod nga pagpasabut gikan ni Elder Dallin H. Oaks sa Korum sa Napulog Duha ka mga Apostoles:

Elder Dallin H. Oaks

“Ang kaangayan dunay daghang kahulugan. Ang usa mao ang timbangan. Usa ka popular nga simbolo sa kaangayan mao ang mga sukod sa timbangan. …

“… Ang ideya sa kaangayan nga angay nga madawat sa usa ka tawo mao ang sukaranang basihan sa tanang mga kasulatan nga naghisgot sa mga tawo nga gihukman sumala sa ilang mga binuhatan” (“Sins, Crimes, and Atonement” [mga pakigpulong sa CES religious educators, Peb. 7, 1992], 1).

Ang anak ni Alma nga si Corianton nabalaka kaayo mahitungod sa pagkapatas sa Katapusang Paghukom. Basaha ang Alma 42:1, ug markahi unsay gihunahuna ni Corianton nga dili patas o walay kaangayan mahitungod sa Katapusang Paghukom.

Hinumdumi nga si Corianton nakahimo og lain-laing mga sala, ang uban niini grabe kaayo (tan-awa sa Alma 39:2–3); mao nga, si Corianton nanghinaot nga dili makiangayon nga kadtong mga nakasala silutan.

2. Sa imong scripture study journal, isulat kon ngano kaha nga kadtong wala maghinulsol sa ilang mga sala mabalaka man mahitungod sa pagdawat sa “angay nga madawat sa usa ka tawo” atol sa paghukom.

Sa Alma 42:2–11, gihisgutan ni Alma ang problema ni Corianton pinaagi sa pagpasabut nga ang Pagkapukan ni Adan nagdala og pisikal nga kamatayon (panagbulag sa lawas ug sa espiritu sa pagkamatay sa lawas) ug espirituhanong kamatayon (pagkabulag gikan sa Dios tungod sa sala). Sa ingon gikinahanglan nga usa ka plano ang maestablisar aron mahibalik ang mga tawo gikan sa ilang kahimtang sa pagkapukan. Kay kon wala ang tanang tawo magpabilin sa makasasala nga kahimtang ug maalaot sa hangtud sumala sa mga gipangayo sa kaangayan.

Basaha ang Alma 42:12, ug ilha kon unsay hinungdan nga ang mga tawo mosulod sa ilang kahimtang sa pagkapukan. Karon basaha ang Alma 42:14, ug markahi ang mga sangputanan sa atong pagsupak sa gipangayo sa kaangayan. Diha sa litrato sa timbangan nga imong gidrowing diha sa imong scripture study journal, isulat ang Sala—pagsupak o sala ubos sa wala nga dapit sa timbangan ug Silot—isalikway sa presensya sa Dios ubos sa tuo nga dapit sa timbangan.

3. Basaha ang Alma 42:18. Sa imong scripture study journal, tubaga ang mosunod nga mga pangutana:

   1. Unsa kaha ang ipasabut sa makabaton og “pagbasol sa tanlag” (Alma 42:18)?

   2. Tungod sa pagbasol sa tanlag unsa man kaha ang posible natong mabuhat?

Gikan sa unsay gitudlo ni Alma, unsa man ang gikinahanglan sa balaod sa kaangayan kon ang usa ka tawo magmasinupakon? (Tungod sa kamasinupakon, ang balaod sa kaangayan nagkinahanglan nga kita makasinati og pagbasol ug isalikway sa presensya sa Dios.) Pamalandunga sa makadiyot ang usa ka panahon dihang nasinati nimo ang pagmahay ug kasubo o pagbiya sa Espiritu Santo tungod sa sayop nga imong nahimo. Hunahunaa nga nagkadako ang imong pagbati sa tanang sayop nga imong nabuhat, ug dayon hunahunaa nga nagpabilin kana nga pagbati diha nimo hangtud sa hangtud.

Base sa unsay gitudlo ni Alma, gusto ba nimo nga ang Katapusang Paghukom ibase lamang sa kaangayan? Gusto ka bang makadawat sa unsay “angay” kanimo sa mga sayop nga imong nahimo?

Alma 42:15–31

Gitudloan ni Alma si Corianton mahitungod sa plano sa kalooy

Usa sa balaanong hiyas sa Dios mao nga Siya makiangayon. Ang gipangayo sa kaangayan mohimaraot sa tanang anak sa Langitnong Amahan ug dili motugot nga bisan kinsa kanato makapuyo uban Kaniya sa atong makasasala nga kahimtang. Hunahunaa ang mosunod nga pangutana: Aduna bay laing paagi nga kining gipangayo sa kaangayan mapapas o mawagtang?

Daghang tawo tingali ang motubag niini nga pangutana pinaagi sa pagsugyot nga kon kita maghinulsol, dili na kita mag-antus sa mga sangputanan sa atong mga sala. Bisan og eksakto kaayo kini nga tubag, importante ang pagsabut nga ang pagpapas o pagwagtang sa mga sangputanan dili makiangayon tungod kay ang mga gipangayo sa kaangayan dili makab-ot. Gitudlo ni Alma nga ang pagwagtang sa silot nga walay pagtagbaw sa mga gipangayo sa kaangayan dili posible. Basaha ang Alma 42:25, ug pangitaa kon unsay mahitabo kon tangtangon ra sa Dios ang mga sangputanan sa sala ug pasagdan nga dili matagbaw ang kaangayan.

Pamalandunga ang mosunod nga pangutana sa dili pa mobasa sa Alma 42:15 sa pagpangita sa tubag: Kon ang silot sa atong mga sala dili matangtang, unsaon man nato sa pagbaton og kalinaw sa konsensya ug makabalik sa presensya sa Dios?

Ang Pagpamalandong sa Pangutana

Ang pagpamalandong sa mga pangutana samtang magtuon ka sa mga kasulatan nagkinahanglan sa imong paghunahuna, nga agig balus mopainit sa imong tinguha aron magsiksik sa mga kasulatan alang sa mga tubag. Ikonsiderar ang pagsulat sa pipila sa kaugalingon nimong mga pangutana nga mapamalandungan samtang magtuon ka sa mga kasulatan. Ang pagpamalandong sa mga kasulatan makapalambo sa imong abilidad sa pagsabut sa mga baruganan ug mga kamatuoran ug magamit kini sa kaugalingon nimong kinabuhi.

Tingali makatabang ang pagsabut nga ang mga pulong nga “pagtagbaw sa gipangayo sa kaangayan” nagpasabut sa pagtagbaw o pagasilutan nga maoy gipangayo sa kaangayan.

Gikan sa Alma 42:15 atong makat-unan nga ang: Pag-ula ni Jesukristo nagtagbaw sa mga gipangayo sa kaangayan aron ang kalooy mahatag ngadto sa mga mahinulsulon. Kompletuha ang litrato sa mga timbangan nga imong gidrowing diha sa imong scripture study journal pinaagi sa pagsulat sa Gitagbaw pinaagi sa kalooy—sa Pag-ula ni Jesukristo ubos sa “Silot …” nga mga pulong.

4. Hunahunaa nga ikaw dunay higala kinsa naglisud sa palas-anon tungod sa iyang mga sala. Sa imong scripture study journal, isulat kon unsaon nimo sa pagpasabut sa imong higala kon sa unsang paagi ang Pag-ula ni Jesukristo nagtugot nga ang kalooy mahatag nganha sa matag usa kanato.

Pamalandunga kon unsay ipasabut diha nimo sa pagkahibalo nga ang Manluluwas andam nga miantus sa mga silot nga gipangayo sa kaangayan sa imong dapit aron mahatagan ka sa kalooy?

Basaha ang Alma 42:22–24, ug markahi kon unsay gikinahanglan ni Jesukristo aron ang kalooy mahatag ngari kanato. Ang mga pulong nga “tinuod nga mahinulsulon” sa bersikulo 24 nagpsabut sa tinuoray nga paghinulsol. Base sa unsay imong nabasa, kompletuha ang mosunod nga baruganan: Kon kita maghinulsol, kita makadawat og pinaagi sa Pag-ula ni Jesukristo.

Si Presidente Boyd K. Packer, Presidente sa Korum sa Napulog Duha ka mga Apostoles, nag-refer kang Jesukristo isip ang tigpataliwala. Ang tigpataliwala mao ang tawo nga mobarug taliwala sa duha ka partido aron motabang sa pagsulbad sa kasungian. Samtang imong basahon kini nga mga pulong, tan-awa kon sa unsang paagi gikinahanglan ang Manluluwas sa paghatag og kalooy ngadto sa makasasala:

President Boyd K. Packer

“Pinaagi sa mahangturong balaod, ang kalooy dili ikahatag gawas kon adunay usa ka tawo nga andam ug makahimo sa pagdala sa atong utang ug mobayad sa bili ug mopahimutang sa mga kondisyon alang sa atong katubsanan.

“Gawas kon adunay usa ka tigpataliwala, gawas kon kita adunay higala, ang tibuok gibug-aton sa kaangayan, walay pagbati, sigurado, nga atong matagamtam. Ang hingpit nga bayad sa matag kalapasan, bisan unsa pa ka gamay o kadako, paninglon gikan kanato sa haum gayud.

Apan hibaloi kini: Ang kamatuoran, mahimayaon nga kamatuoran, nagpahayag nga adunay usa ka Tigpataliwala. …

“Pinaagi Kaniya ang kalooy hingpit nga mahatag ngadto sa matag usa kanato nga dili makapasilo sa mahangturong balaod sa kaangayan. …

“Ang paghatag og kalooy dili awtomatik. Pinaagi kini sa pakigsaad uban Kaniya. Pinaagi sa Kaugalingon Niyang kondisyon, Mga kondisyon Niya nga maaghop” (“The Mediator,” Ensign, May 1977, 55–56).

O My Father

Dihang gitapos ni Alma ang iyang pagpamulong kang Corianton, iyang gi-summarize ang tanan nga gusto niyang itudlo sa iyang anak. Basaha ang Alma 42:26–31, ug markahi ang unsay gitinguha ni Alma kang Corianton dihang nasabtan niya ang mga doktrina ug mga baruganan nga gitudlo ni Alma kaniya niini nga kapitulo. Timan-i ang tinguha ni Alma alang kang Corianton sa dili pagpangatarungan sa iyang mga sala, apan hinoon aron ang mga doktrina ug mga baruganan nga may kalabutan sa kaangayan, kalooy, ug sa Pag-ula “adunay hingpit nga luna diha sa [iyang] kasingkasing” (Alma 42:30). Sa unsang paagi ninyo matugutan nga kining mga doktrina ug mga baruganan adunay hingpit nga luna diha sa imong kasingkasing?

5. Sa imong scripture study journal, isulat ang imong mga hunahuna mahitungod sa mosunod nga pangutana: Kon personal nimong mapahayag ang imong pasalamat ngadto sa Manluluwas alang sa Iyang sakripisyo para kanimo, unsay imong isulti Kaniya?

Importante ang pagkahibalo nga si Corianton naghinulsol ug sa katapusan nakahimo og dakong epekto sa kalamboan sa Simbahan (tan-awa sa Alma 49:30).

6. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Alma 42 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: