Sumala sa narekord sa Alma 37, gipadayon ni Alma ang pagtambag sa iyang anak nga si Helaman ug misangon diha kaniya sa sagradong mga rekord. Iyang gipahinumduman si Helaman nga ang mga kasulatan daan nang nahimong paagi sa pagdala og liboan ka mga Lamanite ngadto sa Ginoo, ug iyang gipanagna nga ang Ginoo duna pay laing mahinungdanon nga mga katuyoan sa mga rekord alang sa umaabut. Gitudloan ni Alma ang iyang anak kon unsay angay niyang itudlo sa mga tawo, ug gitudloan niya si Helaman sa kaimportante sa pagpangita sa mga pulong ni Jesukristo alang sa giya pinaagi sa pagkumpara sa mga pulong sa Manluluwas ngadto sa Liahona.
Gisalig ni Alma kang Helaman ang mga rekord, mitambag kaniya sa pagtuman sa mga sugo, ug gipahinumduman siya sa unsang paagi molihok ang Liahona sumala sa hugot nga pagtuo
Ikonsiderar ang mosunod nga diagram:
Imahe
arrow
Paghunahuna og duha o tulo ka gagmayng mga butang nga may dakong nahimo sa kalibutan, sama sa bombilya. Paghunahuna og pipila ka gagmayng mga butang nga nakahimo og dakong kalainan alang sa kaayuhan sa imong kinabuhi. Isulat ang duha niining duha ka gagmayng butang diha sa wala nga bahin sa diagram diha sa ibabaw. Sa tuo nga dapit, isulat ang pipila ka mga pulong nga naghulagway sa dakong epekto niining ginagmayng butang nga anaa sa imong kinabuhi.
Sumala sa narekord sa Alma 37, nag-andam si Alma sa iyang anak nga si Helaman nga mahimong sunod nga tagatipig sa sagradong mga rekord. Gitudloan ni Alma og usa ka baruganan si Helaman mahitungod sa tahas sa ginagmayng mga butang sa plano sa Ginoo. Basaha ang Alma 37:6–7, ug dayon kompletuha ang mosunod nga baruganan: Aron sa pagpahitabo sa Iyang mahangturon nga mga katuyoan, ang buluhaton sa Ginoo pinaagi sa .
Basaha ang Alma 37:1–7, ug pangitaa ang gihulagway ni Alma isip gamay ug yano nga butang. Siksika usab ang Alma 37:8–10, nga mangita og mga paagi nga ang palid nga mga tumbaga (nga gilangkuban sa mga kasulatan) misangput sa talagsaong mga butang alang sa mga tawo sa Basahon ni Mormon. Samtang imong basahon, markahi diha sa imong mga kasulatan kon asa niini nga mga panalangin ang imo usab nga nadawat pinaagi sa kaugalingon nimong pagtuon sa kasulatan.
Tubaga ang mosunod nga pangutana diha sa imong scripture study journal: Unsa ang duha o tulo ka paagi nga ang mga kasulatan maoy hinungdan nga ang talagsaong mga butang nahitabo sa imong kinabuhi?
Ang Alma 37:13–16 nagrekord sa tambag ni Alma nga iyang gihatag kang Helaman dihang iyang gisangon sa iyang anak ang mga rekord. Tun-i kini nga mga bersikulo, ug pangitaa ang mga baruganan nga gitudlo ni Alma. Ang usa niini nga baruganan mao: Kon kita mosunod sa mga sugo sa Ginoo, kita mouswag. Pamalandunga sa unsang paagi kini nga baruganan may kalabutan sa diagram sa sinugdanan niini nga leksyon.
Sumala sa narekord sa Alma 37:35–47, gisugo ni Alma si Helaman nga tudloan ang mga tawo sa pagbuntog sa kadautan ug tintasyon pinaagi sa hugot nga pagtuo sa Ginoo nga si Jesukristo. Sa ubos mao ang outline sa duha ka leksyon nga gilangkuban niini nga mga pagtulun-an. Tun-i ang matag leksyon ug ang mga kasulatan nga kauban niini. Dayon pangandam sa pagtudlo og usa sa mga leksyon ngadto sa usa ka sakop sa pamilya, sa tibuok nimong pamilya (tingali isip kabahin sa inyong family home evening nga leksyon), o sa usa ka higala. Mahimo kang mohimo og mga pag-adjust sa leksyon mag-agad kon si kinsa ug asa ka magtudlo. I-iskedyul ang oras, ug itudlo ang leksyon sa gipili nga adlaw. Usab, dad-a ang outline sa imong leksyon sa sunod nimong klase sa home-study ug pangandam, kon tawagon ka, nga motudlo sa leksyon diha sa klase.
Pasabta ang imong mga tudloan nga komon sa mga tigtanom og kahoy nga ihigot sa usa ka ugsok ang gamay pa nga kahoy ug tangtangon kini sa kadugayan kon mohingkod na ang kahoy. Pangutan-a: Ngano kaha ang kahoy nagkinahanglan man og ugsok para isuporta samtang gamay pa kini ug nagtubo?
Basaha ang mosunod nga kasinatian gikan sa kinabuhi ni Presidente Gordon B. Hinckley:
Imahe
lopsided tree
Si Presidente Gordon B. Hinckley mitanom og kahoy duol sa iyang balay diha dayon human siya maminyo. Wala kaayo niya kini matagad samtang milabay ang katuigan. Usa ka adlaw nabantayan niya nga nagbaliko ang kahoy ug nagbahirig padulong sa kasadpan tungod kay ang hangin gikan sa sidlakan mipabawog niini samtang kini gamay pa ug maglubay-lubay. Iyang giadto ug gisulayan kini sa pagtul-id, apan ang punoan dako na kaayo. Gisulayan niyang mogamit og pisi ug puleya sa pagtul-id niini, apan dili na madala og bawog. Sa katapusan, mikuha siya og gabas ug giputol ang dakong sanga sa kasadpang bahin, nga nagbilin og bati nga uwat. Sa kadugayan miingon siya mahitungod sa kahoy:
Imahe
pruned tree
“Kapin sa katunga sa siglo ang milabay sukad gitanom nako kadto nga kahoy. Karon nagpuyo didto ang akong anak nga babaye ug iyang pamilya. Sa miaging adlaw gitan-aw nako og balik ang kahoy. Dako kini. Mas maayo na ang porma. Dako kini nga tabang sa panimalay. Apan pagkadako sa samad dihang mitubo na kini ug pagkasakit sa tambal nga akong gigamit sa pagtul-id niini.
Imahe
tree with scarred trunk
“Sa gamay pa kini, ang usa ka higot unta magpugong batok sa mga pwersa sa hangin. Ug unta kadto nga higot akong nasuplayan og bisan gamay kaayong paningkamot. Apan wala nako himoa, ug nabawog kini tungod sa mga pwersa nga nagduso niini” (“Bring up a Child in the Way He Should Go,” Ensign, Nob. 1993, 59).
Imahe
young tree with support
Ipabasa ang tambag ni Alma ngadto ni Helaman sa Alma 37:35, ug hisguti sa unsang paagi kini nga bersikulo may kalabutan sa kasinatian ni Presidente Hinckley sa kahoy. (Ang Alma 37:35 usa ka scripture mastery passage. Mahimo nimong markahan kini sa lahi nga paagi aron mapangita nimo kini sa umaabut.)
Dapita ang imong tudloan sa pagsulti og usa ka baruganan nga nag-summarize sa Alma 37:35. (Mahimo nga kini susama niining mosunod: Kinahanglan nga sa atong pagkabatan-on magkat-on kita sa pagtuman sa mga sugo sa Dios.) Mahimo nimong ipangutana sa usa o labaw pa ang mosunod nga mga pangutana:
Unsa kaha nga kalainan ang mahimo niini sa kinabuhi sa mga tawo kon makakat-on sila sa pagtuman sa mga sugo sa Dios samtang batan-on pa sila?
Sa unsang paagi ang pagtuman sa mga sugo samtang batan-on pa mihimo og kalainan kanimo o kaninyo?
May mahunahunaan ka ba o kamo nga tawo kinsa napanalanginan sa ilang kinabuhi tungod kay nakakat-on sila sa pagsunod sa mga sugo samtang batan-on pa? Sa unsang paagi napanalanginan kining tawhana?
Ipabasa og kusog ang Alma 37:36–37 ug ipapangita ang piho nga tambag nga makatabang sa usa ka tawo sa pagtuman sa mga sugo. Ipangutana ang sama sa mga mosunod:
Sa unsang paagi ang pagsunod niini nga tambag sa matag adlaw makatabang nimo sa pagtuman sa mga sugo?
Sa unsang mga paagi gisulayan nimo nga ibutang og una ang Ginoo sa imong mga hunahuna ug mga lihok? Sa unsang paagi ka molambo?
Unsa nga mga saad ang gihatag ngadto sa mga nagmainampoon?
Ipaambit ang imong pagpamatuod kon sa unsang paagi ang pagpakitambag sa Ginoo nakatabang nimo sa pagtuman sa mga sugo. Dapita ang imong mga gitudloan sa pagsunod sa mga pulong ni Alma kabahin sa pagpakitambag sa Ginoo.
Hangyoa ang imong mga gitudloan kon nahibalo ba sila unsay ngalan sa kompas nga gihatag sa Ginoo sa pamilya ni Lehi nga nakatabang nila sa pagbiyahe sa gisaad nga yuta. Dayon ipabasa ang Alma 37:38. Pasabta nga ang Liahona maoy gipasabut ni Alma sa pagtudlo kang Helaman sa importanting baruganan kon sa unsang paagi mogiya ang Ginoo sa Iyang mga anak.
Patubaga ang imong mga gitudloan sa mosunod nga mga pangutana pinaagi sa pagbasa sa mga bersikulo nga gihisgutan ug sa pagpangita sa tubag:
Sumala sa Alma 37:38–40, sa unsang paagi molihok ang Liahona?
Sumala sa Alma 37:41–42, nganong usahay dili man molihok ang Liahona?
Sumala sa Alma 37:43–45, sa unsang paagi ang Liahona susama sa mga pulong ni Kristo?
Ipasabut nga ang mga pulong nga anino ug naghulagway (Alma 37:43, 45) nagpasabut nga gigamit ang usa ka butang isip simbolo sa mas dako nga ideya. Sama pananglit, ang kamasulundon o pagka dili masulundon sa pamilya ni Lehi sa mga direksyon sa Liahona usa ka simbolo sa atong mga pagpili sa pagsunod o pagsupak sa mga pulong ni Kristo. Sama nga ang pamilya ni Lehi miabut sa gisaad nga yuta pinaagi sa pagsunod sa Liahona, atong madawat ang kinabuhing dayon kon atong sundon ang mga pulong ni Kristo.
Pangutana og usa ka tawo nga mopasabut kon asa nato makaplagi ang mga pulong ni Jesukristo sa atong kinabuhi. (Ang pipila ka posibling mga tubag mao tingali ang mga kasulatan, pulong sa modernong mga propeta, patriyarkal nga panalangin, ug mga pag-aghat sa Espiritu.)
Pangutan-a: Unsang mga baruganan ang gitudlo ni Alma kang Helaman pinaagi sa paggamit sa ehemplo sa Liahona? (Ang mga tubag tingali susama sa mosunod nga baruganan: Kon patalinghugan nato ang mga pulong ni Jesukristo, kini mogiya kanato sa pagkadawat og kinabuhing dayon.) Mahimo kang mopaambit sa imong pagpamatuod nga ang pagpaminaw ug pagsunod sa mga pulong sa Ginoo magdala og dagkong mga panalangin sa atong kinabuhi.
Sa imong scripture study journal, pagsulat og pipila ka sentence nga naghulagway unsay imong nakat-unan gikan sa pagtuon sa leksyon nga imong gipili nga itudlo.
Isulat ang mosunod diha sa imong scripture study journal: Nakahukom ko nga akong itudlo ang leksyon sa Alma 37: (isulat asa nga bersikulo ang imong itudlo). Akong itudlo ang (isulat kon kinsa ang gipili nimong tudloan) inig ka (isulat ang petsa nga imong gi-iskedyul nga itudlo kini nga leksyon).
Markahi ang Alma 37:35. Sulayi sa pagmemorya kini nga bersikulo. Dayon i-recite kini o basaha kini ngadto sa usa ka ginikanan o laing hamtong nga kasaligan. Pangutan-a kining tawhana sa mosunod nga mga pangutana:
Sa unsang paagi ang kamasulundon sa mga sugo sa Dios nakatabang sa imong kinabuhi?
Unsay imong itambag ngari nako aron matabangan ko nga mahimong mas manggialamon sa akong kabatan-on?
Isulat sa imong scripture study journal ang imong nakat-unan gikan sa tawo nga imong gisultihan mahitungod sa Alma 37:35.
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang Alma 37 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: