Pasiuna sa 1 Nephi
Nganong Kinahanglang Tun-an Kini nga Basahon?
Sa imong pagtuon sa 1 Nephi, imong madiskobrehan nga “ang malumo nga mga kalooy sa Ginoo anaa ibabaw sa tanan kinsa siya mipili, tungod sa ilang hugot nga pagtuo, aron mahimo sila nga malig-on” (1 Nephi 1:20). Sama pananglit, imong makita giunsa sa Dios pagtabang kang Nephi nga maangkon ang tumbaga nga mga palid aron ang iyang pamilya makaangkon sa mga kasulatan, giunsa pagluwas sa Dios si Nephi gikan sa pisikal nga mga hulga sa iyang kinabuhi, ug giunsa pagluwas sa Dios si Lehi ug iyang katawhan gikan sa kagutom didto sa kamingawan ug kalaglagan sa kadagatan, pagdala kanila nga luwas ngadto sa gisaad nga yuta.
Si Lehi ug iyang katawhan nakasinati og kalooy sa Dios ug tabang samtang nagsunod sila sa kasugoan. Si Lehi ug Nephi nangita sa giya gikan sa Dios ug nakadawat niini pinaagi sa mga kasulatan, mga damgo, mga panan-awon, ug ang Liahona. Si Nephi nakadawat ug mirekord og usa ka panan-awon sa kasaysayan sa yuta nga nakapakita kaniya sa gahum sa Dios nga nakahibalo sa tanan. Pinaagi sa mga panan-awon, si Nephi nakakita sa umaabot nga pagbunyag, pagpangalagad, ug paglansang kang Jesukristo.
Samtang magtuon ka sa mga kasinatian ni Nephi ug Lehi niini nga basahon, makakat-on ka unsaon pagpangita ug pagdawat sa mga panalangin sa langit sa imong kinabuhi.
Kinsa ang Nagsulat Niini nga Basahon?
Ang anak nga lalaki ni Lehi nga si Nephi misulat niini nga basahon agi og tubag sa sugo sa Ginoo nga siya mohupot og talaan sa iyang katawhan. Si Nephi tingali natawo sa o duol sa Jerusalem. Nagpuyo siya atol sa pagpangalagad ni propeta Jeremias ug ang paghari ni Haring Sedechias.
Si Nephi nangita sa iyang kaugalingon nga saksi bahin sa mga pulong sa iyang amahan kabahin sa pagkalaglag sa Jerusalem ug ang kadinalian sa ilang pamilya nga mobiya. Sa iyang pagpadayon sa pagpangita ug pagsunod sa tambag sa Ginoo, si Nephi nahimong instrumento diha sa mga kamot sa Dios. Siya masulundon nga mibalik sa Jerusalem uban sa iyang mga igsoong lalaki sa makaduha—una sa pagkuha sa mga palid nga tumbaga ug dayon sa pagdani sa pamilya ni Ishmael sa pagkuyog sa pamilya ni Lehi ngadto sa kamingawan. Uban sa tabang sa Ginoo, si Nephi mihimo og barko nga midala sa iyang pamilya tabok sa kadagatan paingon sa gisaad nga yuta. Pagkamatay ni Lehi, si Nephi nahimong lider sa iyang mga katawhan.
Kanus-a ug Diin Kini Gisulat?
Si Nephi misulat sa istorya nga nahimong 1 Nephi nga gibana-bana nga mga 570 B.C.—30 ka tuig human siya ug iyang pamilya mibiya sa Jerusalem (tan-awa sa 2 Nephi 5:28–31). Iya kining gisulat niadtong didto siya sa yuta nga Nephi.