Unit 2: Day 4

1 Nephi 5–6; 9

Pasiuna

Ang asawa ni propeta Lehi, si Sariah, nahadlok nga ang iyang anak nga mga lalaki dili makabalik gikan sa Jerusalem. Si Lehi mihupay kaniya pinaagi sa pagpahayag sa iyang hugot nga pagtuo sa Ginoo. Sa dihang nabalik nga luwas ang iyang anak nga mga lalaki dala ang mga palid nga tumbaga, si Sariah nakaangkon og mas lig-on nga pagsaksi sa impluwensya sa Dios sa paggiya ug pagpreserbar sa iyang pamilya. Samtang gitun-an ni Lehi ang mga palid nga tumbaga, siya “napuno sa Espiritu, ug misugod sa pagpanagna mahitungod sa iyang binhi” (1 Nephi 5:17). Samtang ikaw magtuon niini nga leksyon, hunahunaa ang imong personal nga pagtuon sa kasulatan ug unsa ang imong mabuhat aron makadawat sa gahum nga gikan sa pagsiksik sa pulong sa Dios.

1 Nephi 5:1–9

Ang anak nga mga lalaki ni Lehi luwas nga nahibalik sa ilang pamilya sa kamingawan

Ang panaw paingon sa Jerusalem ug balik tingali nakuha og pila ka semana nila ni Nephi ug sa iyang igsoon nga mga lalaki. Pamalandungi ang usa ka panahon sa dihang ang usa ka igsoon nga lalaki, igsoon nga babaye, ginikanan, o lain nga tawo nga imong nailhan mibiya sa panimalay sa dugay nga panahon—sama sa paingon sa usa ka misyon, eskwela, o pagserbisyo sa militar. Unsa nga mga kabalaka o kaguol ang imong gibati (o unsa nga mga kabalaka sa imong hunahuna ang maanaa sa usa ka ginikanan) kon mahilayo gikan sa mga minahal sulod sa dugay nga panahon? Basaha ang 1 Nephi 5:1–3, ug ilha ang mga kabalaka nga gisulti ni Sariah kabahin sa pagbalik sa Jerusalem sa iyang anak nga mga lalaki.

Basaha ang 1 Nephi 5:4–6, ug tan-awa sa unsang paagi gitubag ni Lehi ang mga kabalaka ni Sariah.

Isulti og Usab sa Imong Kaugalingon nga mga Pulong

Usa ka paagi sa pagsabut sa mga kasulatan mao ang pagsulti sa mga baruganan sa imong kaugalingon nga mga pulong. Isulat man o isulti, ang pagbalik-balik sa unsay imong nabasahan makatabang nimo nga mas masabtan ang mga kamatuoran nga naa sa mga kasulatan. Naghatag usab kini og oportunidad alang sa Espiritu sa Ginoo nga mopamatuod sa mga kamatuoran.

1. Sa imong scripture study journal, balik-balika sa imong kaugalingon ang mga pulong sa tubag ni Lehi ngadto sa iyang asawa.

Pamalandungi ang mosunod nga mga pangutana:

• Unsay nakapadani kanimo mahitungod sa paagi ni Lehi sa pagtubag sa mga kabalaka ni Sariah?

• Sa unsang paagi ang mga pulong ni Lehi mipakita sa hugot nga pagtuo ug kaisug nga nakuha gikan sa mga pagpadayag nga gihatag kaniya sa Dios?

Sumala sa 1 Nephi 5:6, unsa ang epekto sa pagpamatuod ni Lehi ngadto kang Sariah?

Duha ka mga kamatuoran ang atong makat-unan gikan niini nga kasinatian ni Lehi ug Sariah nga ang Ginoo mopanalangin kanato uban sa kasiguroan sa atong pagsunod sa Iyang inspirasyon ug makahupay kita ug makapalig-on sa uban kon kita mopakita sa atong hugot nga pagtuo sa Dios.

2. Sa imong scripture study journal, paghulagway og usa ka higayon nga imong gibati ang makahupay nga kasiguroan sa Dios atol sa usa ka malisud nga panahon, mipakigbahin sa imong pagpamatuod sa paghupay ug paglig-on sa laing tawo, o nahupay ug nalig-on pinaagi sa mga pulong sa hugot nga pagtuo sa laing tawo.

Basaha ang 1 Nephi 5:7–9, nga mangita sa epekto niini nga kasinatian sa pagtuo ni Sariah.

• Unsa man ang nakat-unan ni Sariah gikan niini nga kasinatian?

3. Tubaga ang mosunod nga pangutana diha sa imong scripture study journal: Sa unsang paagi ang pagpamatuod ni Sariah sa 1 Nephi 5:8 susama sa pagpamatuod ni Nephi sa 1 Nephi 3:7?

1 Nephi 5:10–22

Nangita si Lehi sa mga palid nga tumbaga

Si Nephi ug iyang igsoon nga mga lalaki mirisgo sa ilang mga kinabuhi, misakripisyo sa mga katigayunan sa ilang pamilya, mipanaw og layo, ug balaanong naprotektahan sa ilang pagpanaw aron makuha ang mga palid nga tumbaga. Kon ikaw sakop sa pamilya ni Lehi, sa unsang paagi ang ilang mga paningkamot makaimpluwensya sa imong kinaiya bahin sa pagtuon sa unsay anaa sa mga palid nga tumbaga?

Human nauli nga luwas ang iyang anak nga mga lalaki, si Lehi misugod sa pagsiksik sa mga sulod sa mga palid nga tumbaga. Basaha ang 1 Nephi 5:11–14, ug linyahi kon unsa ang sulod sa mga palid nga tumbaga.

Basaha ang 1 Nephi 5:17–20, mangita kon sa unsang paagi ang pagtuon sa mga palid nga tumbaga nakaapekto kang Lehi. Base sa unsay imong nakat-unan sa mga bersikulo, unsaon man nimo paghuman og sulti ang mosunod nga baruganan? (tan-awa sa 1 Nephi 5:17): Samtang mosiksik kita sa mga kasulatan, kita mahimong ma

Si Elder Robert D. Hales sa Korum sa Napulog Duha ka mga Apostoles mipanghimatuod niini nga kamatuoran:

“Kon kita gustong makigsulti sa Dios, mag-ampo kita. Ug kon kita gusto nga Siya makigsulti kanato, mosiksik kita sa mga kasulatan; kay ang Iyang mga pulong gisulti pinaagi sa Iyang mga propeta. Unya siya dayon motudlo kanato samtang kita maminaw sa mga pag-aghat sa Balaang Espiritu.

“Kon kamo wala makadungog sa Iyang tingog nga misulti karong bag-o pa, balik ngadto sa mga kasulatan nga morag primero pang nakakita ug morag primero pang nakadungog. Sila mao ang atong espiritwal nga sumpay sa kinabuhi” (“Balaan nga mga Kasulatan: Ang Gahum sa Dios alang sa Atong Kaluwasan,” Ensign o Liahona, Nob. 2006, 26).

4. Isulat sa imong scripture study journal ang kabahin sa usa ka panahon sa dihang ikaw misiksik sa mga kasulatan ug mibati sa Espiritu sa Ginoo.

Basaha ang 1 Nephi 5:21–22, ug pangitaa ngano nga ang mga palid “labi nga bililhon” ngadto kang Lehi ug sa iyang pamilya.

Pakli ngadto sa himno “As I Search the Holy Scriptures” (Hymns, nu. 277), ug tan-awa ang mga panalangin nga mahimong moabut pinaagi sa pagsiksik sa mga kasulatan. Pamalandungi ang imong matag adlaw nga pagbasa sa mga kasulatan. Sa unsang paagi ka makapalambo sa imong pagtuon sa mga kasulatan?

Adunay kaalam sa pagtuon sa mga kasulatan samtang kita magpanaw sa mortalidad—ang atong kamingawan. Hinumdumi nga ang mga palid nga tumbaga nakuha pinaagi sa hugot nga pagtuo ug sakripisyo ug nga kon wala ang mga palid nga tumbaga si Lehi ug ang iyang pamilya dili unta makadawat sa gikinahanglan nga mga panalangin sa ilang pagpanaw (tan-awa sa 1 Nephi 5:22). Samtang magsiksik ka sa mga kasulatan, ikaw mahimong mapuno sa Espiritu sa Ginoo ug makadawat sa kalig-on ug hugot nga pagtuo sa paghupot sa Iyang mga sugo.

1 Nephi 6:1–6

Misulat si Nephi aron sa pagdani sa tanan sa pagduol ngadto kang Jesukristo

Pagpili og usa ka basahon sa imong panimalay o paghunahuna og usa ka basahon nga pamilyar nimo. Unsa sa imong hunahuna ang katuyoan sa tagsulat sa pagsulat niana nga basahon? Sa unsang paagi ang pagkahibalo sa katuyoan sa tagsulat makatabang samtang ikaw mobasa?

Basaha ang 1 Nephi 6:3–6, ug linyahi ang katuyoan ni Nephi sa pagsulat sa iyang talaan. Ang mga pulong nga “sa Dios ni Abraham, ug sa Dios ni Isaac, ug sa Dios ni Jacob” (bersikulo 4) nag-refer kang Jehova, kinsa mao si Jesukristo. Ang katuyoan ni Nephi napadayon niadtong tanan kansang mga sinulat makita diha sa Basahon ni Mormon: Usa ka katuyoan sa Basahon ni Mormon mao ang pagdani sa tanang katawhan sa pagduol ngadto kang Jesukristo.

5. Sa imong scripture study journal, ihulagway sa unsang paagi ang pagsabut sa katuyoan ni Nephi sa pagsulat sa iyang talaan makaapekto sa paagi sa imong pagtuon sa Basahon ni Mormon.

Nephi making plates

1 Nephi 9

Si Nephi naghimo og duha ka hut-ong sa mga palid

Sa 1 Nephi 9 (tan-awa usab sa kapitulo 6), si Nephi mipasabut nga siya gisugo sa paghimo og duha ka hut-ong sa mga talaan—kini nailhan nga gagmay nga mga palid ug ang dagko nga mga palid ni Nephi. Ang gagmay nga mga palid naglangkob sa sagrado nga kasaysayan sa iyang katawhan—ang pagpangalagad sa mga propeta ug ang mga pagpadayag sa Ginoo—ug ang dagko nga mga palid naglangkob sa sekular nga kasaysayan (tan-awa sa 1 Nephi 9:2–4). Si Nephi migamit sa mga pulong nga “kini nga mga palid” ug “ubang mga palid” sa pag-refer niini ngadto sa duha ka hut-ong sa mga palid nga ang Ginoo misugo kaniya sa paghimo. Diha sa margin sa imong mga kasulatan sa 1 Nephi 9, pagsulat og mubo nga sulat sama sa mosunod aron sa pagtabang kanimo sa paghinumdom asa nga hut-ong sa mga palid ang gi-refer ni Nephi: “kini nga mga palid” = gagmay nga mga palid (sagrado); “ubang mga palid” = dagko nga mga palid (sekular).

Samtang ikaw magtuon sa Basahon ni Mormon imong masabtan ngano nga si Nephi mitipig og duha ka hut-ong sa mga talaan. Si Nephi nadasig sa paghimo og minubo, usa ka minubo nga bersyon, sa istorya sa iyang amahan (nga makita sa 1 Nephi 1–8) sa gagmay nga mga palid. Human dul-an sa 1,000 ka tuig si propeta Mormon gigiyahan sa Ginoo sa paglakip sa gagmay nga mga palid ni Nephi uban sa mga palid nga bulawan (tan-awa sa Mga Pulong ni Mormon 1:7). Ang duha ka mga lalaki wala mahibalo nganong gipabuhat sila sa unsay ilang gibuhat (tan-awa sa 1 Nephi 9:5), apan sila misunod sa sugo sa Ginoo.

6. Samtang magbasa ka sa 1 Nephi 9 sa imong personal nga pagtuon, pamalandungi ug irekord sa imong scripture study journal nganong importante ang pagsunod sa Ginoo bisan og wala nato hingpit nga masabti ang Iyang mga rason.

7. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang 1 Nephi 5–6 ug 9 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: