Pasiuna sa Programa sa Home-Study Seminary

Ang programa sa home-study seminary gidesenyo aron sa pagtabang nimo sa pagpalambo sa imong pagsabut sa ebanghelyo ni Jesukristo ug paggamit sa mga pagtulun-an niini diha sa imong inadlaw nga kinabuhi pinaagi sa pagtuon sa mga kasulatan. Alang sa imong pagtuon niining tuiga, una nimong kompletuhon ang mga reading assignment gikan sa teksto sa kasulatan alang niini nga kurso—ang Basahon ni Mormon—ug dayon imong kompletuhon ang indibidwal nga mga leksyon. Kausa sa matag semana makigkita ka sa imong seminary teacher aron isumiter ang imong trabaho ug moapil sa sinemana nga leksyon.

Ang seminary usa ka inadlaw nga programa sa relihiyoso nga edukasyon. Kinahanglan inadlaw nga gimbuhaton ang imong mainampoong pagtuon sa mga kasulatan. Kinahanglan nimong buhaton ang imong mga seminary assignment kada adlaw, bisan og ikaw dili motambong sa klase sa seminary kada adlaw. Dunay 32 ka mga unit nga kompletuhon nini nga kurso. Ang tsart sa pagbasa sa pahina viii nagpakita unsay imong tun-an alang sa matag unit. Ang imong magtutudlo motabang nimo nga makasabut kanus-a ang matag unit isumiter. Ang mga leksyon niining giya sa pagtuon molungtad og mga 30 minutos sa pagkompleto, dugang sa imong inadlaw nga pagtuon sa kasulatan.

Kinahanglan nga ikaw dunay duha ka mga scripture study journal (o duha ka mga notebook), lahi sa imong personal journal, diin nimo isulat ang imong mga assignment gikan sa mga kalihokan sa giya sa pagtuon. Matag semana nga ikaw makigkita sa imong magtutudlo, kinahanglan nga imong ihatag ang scripture study journal nga dunay nakompleto nga mga assignment gikan sa mga kalihokan sa giya sa pagtuon nga imong nakompleto alang niana nga semana. Ang imong magtutudlo mobasa ug motubag sa mga assignment ug mouli sa scripture study journal nganha nimo sa sunod nga semana. Mahimo usab nga isulat nimo ang imong mga tubag diha sa usa ka notebook nga matangtang ra ang pahina ug ihatag ang mga pahina nga imong gibuhat niana nga semana. Dayon, dihang iuli sa imong magtutudlo ang mga pahina, mahimo nimo kining ibutang og balik ngadto sa notebook.

Ang Paggamit Niini nga Manwal sa Programa sa Daily Seminary

Kini nga manwal mahimong gamiton sa mga magtutudlo ug mga estudyante sa programa sa daily seminary aron sa pagpalambo sa mga leksyon o alang sa make-up work. Hinoon, dili tuyo ihatag ngadto sa matag estudyante sa daily seminary. Kon ang estudyante kinahanglan nga mag-make up og leksyon aron magraduhan, ang magtutudlo mahimong mo-assign niya sa pagkompleto sa leksyon sa home-study nga motukma sa leksyon nga wala matambungi.

Ang Paggamit sa Manwal sa Estudyante sa Home-Study

Tsart sa Pagbasa sa Basahon ni Mormon

Welcome sa Basahon ni Mormon

Unsa ang Basahon ni Mormon?

Ang Basahon ni Mormon mao ang lain nga tugon ni Jesukristo. Naglangkob kini sa mga sinulat sa karaang mga propeta, nag-asoy sa pakiglabot sa Dios uban sa usa ka sanga sa balay ni Israel sa kontinente sa Amerika. Alang sa mga Santos sa Ulahing mga Adlaw ang Basahon ni Mormon nagbarug tupad sa Biblia, sa Doktrina ug mga Pakigsaad, ug sa Perlas nga Labing Bililhon isip balaan nga kasulatan. Ang Basahon ni Mormon usa ka talaan sa bantugang karaang mga sibilisasyon sa Amerika.

Sukad kini namantala sa Iningles niadtong 1830, ang Basahon ni Mormon gihubad ngadto sa daghang mga pinulongan, ug ang naimprinta nga mga kopya mosobra sa 150 ka milyon. Gihulagway kini sa mga propeta sa Dios isip ang “sukaranang bato” sa Ang Simbahan ni Jesukristo sa mga Santos sa Ulahing mga Adlaw.

Nganong Importante man ang Pagtuon sa Basahon ni Mormon ngari Kanako?

Si Presidente Ezra Taft Benson mitudlo nga ang panalangin nga mapaduol sa Dios mahitabo kanimo samtang magtuon ka sa Basahon ni Mormon uban ang sinsero nga kasingkasing:

“Aduna bay usa ka butang sulod sa atong kasingkasing nga naghandom nga mas mapaduol ngadto sa Dios, mas mahisama Kaniya sa atong matag adlaw nga pagpakabuhi, mobati sa Iyang presensya kanunay? Kon mao, ang Basahon ni Mormon makatabang gayud kanato sa pagbuhat niini kaysa uban pang basahon.

“Ang Basahon ni Mormon wala lamang magtudlo kanato sa kamatuoran, bisan tuod naghimo kini niana. Ang Basahon ni Mormon wala lamang magpamatuod kang Kristo, bisan tuod naghimo kini niana, usab. Apan adunay mga butang nga mas labaw pa. Adunay gahum sa basahon nga magsugod sa pagdagayday sa inyong mga kinabuhi sa higayon nga sugdan ninyo ang tinuoray nga pagtuon sa basahon. Makaplagan ninyo ang mas dako nga gahum sa pagpakigbatok sa pagsulay. Makaplagan ninyo ang gahum sa paglikay sa panglingla. Makaplagan ninyo ang gahum nga magpabilin sa higpit og pig-ot nga dalan. Ang mga kasulatan mao ang gitawag og ‘mga pulong sa kinabuhi’ (tan-awa sa D&P 84:85), ug walay laing mas tinuod pa kay sa Basahon ni Mormon. Kon kamo magsugod sa pagkagutom ug pagkauhaw niadto nga mga pulong, kamo makakaplag sa kinabuhi nga mas mabungahon” (“Ang Basahon ni Mormon—Ang Sukaranang Bato sa Atong Tinuohan,” Liahona, Okt. 2011, 56-57).

Ang Basahon ni Mormon gisulat alang kanato karon. Si Mormon, ang karaang propeta kang kinsa gipanganlan ang basahon, ug ang iyang anak nga si Moroni mipamubo sa mga talaan nga sulod sa mga siglo dihang nagtigum sa bulawang mga palid kon diin gikan gihubad ni Propeta Joseph Smith ang Basahon ni Mormon. Ang Dios, kinsa nasayud sa katapusan gikan sa sinugdanan, midasig sa Iyang mga propeta kon unsay ilakip sa pagpamubo nga atong kinahanglanon alang sa atong panahon. Si Moroni, ang katapusan sa mga propeta nga misulat diha sa Basahon ni Mormon, nakakita sa atong panahon: “Tan-awa, ako namulong nganha kaninyo ingon og kamo ania, ug gani kamo wala. Apan tan-awa, si Jesukristo mipakita kaninyo ngari kanako, ug ako nasayud sa inyong binuhatan” (Mormon 8:35).

Si Presidente Benson mitudlo usab nga ang pagtuon sa Basahon ni Mormon motabang kanimo nga makaila tali sa maayo ug dautan:

“Ang Basahon ni Mormon modala sa mga tawo ngadto kang Kristo pinaagi sa duha ka nag-una nga mga pamaagi. Una, nagsulti kini mahitungod ni Kristo ug sa iyang ebanghelyo sa yano nga paagi. Nagpamatuod kini sa iyang kabalaan ug sa panginahanglan alang sa usa ka Manunubos ug ang panginahanglan sa atong pagbutang og pagsalig diha kaniya. Nagpamatuod kini sa Pagkapukan ug sa Pag-ula ug sa unang mga baruganan sa ebanghelyo, lakip ang atong panginahanglan sa usa ka masulub-on nga kasingkasing ug mahinulsulon nga espiritu ug sa espirituhanon nga pagkatawo pag-usab. Nagpahayag kini nga gikinahanglan gayud natong molahutay hangtud sa katapusan diha sa pagkamatarung ug magpakabuhi sa moral nga kinabuhi sa usa ka Santos.

“Ikaduha, ang Basahon ni Mormon nagbutyag sa mga kaaway ni Kristo. Kini molibug sa sayop nga mga doktrina ug nagtapos sa mga panagbingkil. (Tan-awa sa 2 Ne. 3:12.) Naglig-on kini sa mapainubsanong sumusunod ni Kristo batok sa dautang mga plano, mga estratehiya, ug mga doktrina sa yawa sa atong panahon. Ang matang sa mga miapostasiya diha sa Basahon ni Mormon kay susama sa matang sa mga miapostasiya karon. Ang Dios, uban sa Iyang walay kinutuban nga nahibaloan nang daan, mihulma sa Basahon ni Mormon nga unta atong makita ang sayop ug makahibalo unsaon sa pagpakigbatok sa sayop nga edukasyon, politikal, relihiyon, ug pilosopikanhon nga mga konsepto sa atong panahon” (“The Book of Mormon Is the Word of God,” Ensign, Mayo 1975, 64).

Mahitungod sa Basahon ni Mormon

Ang Basahon ni Mormon naglangkob og 15 ka mas gagmay nga mga basahon. Walo niini nga mga basahon nagsugod sa usa ka ulohan nga nasulat sa orihinal nga bulawang mga palid nga gihubad ni Propeta Joseph Smith: 1 Nephi, 2 Nephi, Jacob, Alma, Helaman, 3 Nephi, 4 Nephi, ug Ether. Ang pipila ka mga kapitulo diha sa Basahon ni Mormon giunhan usab og usa ka ulohan nga nalakip sa orihinal nga bulawang mga palid (gawas lamang sa mga han-ay sa mga pulong mahitungod sa nalakip nga mga kapitulo): Mosiah 9, Mosiah 23, Alma 5, Alma 7, Alma 9, Alma 17, Alma 21, Alma 36, Alma 38, Alma 39, Alma 45, Helaman 7, Helaman 13, 3 Nephi 11, ug Moroni 9.

Sa sinugdanan sa matag kapitulo diha sa Basahon ni Mormon dunay mubo nga summary sa kapitulo nga naimprinta sa italics. Kini nga mga summary sa kapitulo gisulat ug gidugang ubos sa direksyon sa Unang Kapangulohan ug dili kabahin sa orihinal nga teksto sa Basahon ni Mormon gikan sa bulawang mga palid.