Unit 7: Day 3

2 Nephi 21–24

Pasiuna

Daghan sa mga panagna ni Isaias diha sa Basahon ni Mormon mahitungod sa katapusang mga adlaw. Siya nanagna mahitungod sa Pagpahiuli sa ebanghelyo, ni Propeta Joseph Smith, sa Ikaduhang Pag-anhi, ug sa kalaglagan sa mga dautan. Iyang nakitang daan nga ang Ginoo “mopatindog og usa ka bandila alang sa mga nasud” aron sa pagpundok sa Iyang mga katawhan sa katapusang mga adlaw (tan-awa sa 2 Nephi 21:11–12). Si Isaias mipamatuod usab nga ang Ginoo magmadaugon batok ni Satanas ug mopasiuna sa Milenyum, usa ka panahon sa kalinaw ug kalipay.

2 Nephi 21:1–4, 10–12

Si Isaias nakakitang daan sa Pagpahiuli sa ebanghelyo ni Jesukristo sa ulahing mga adlaw

Hunong sa makadiyot, ug paghunahuna og usa ka kahayag nga nagsugod sa pagpakita kanimo. Ang kahayag nag-anam og labaw kahayag. Sa kalit usa ka sinugo nga gipadala gikan sa presensya sa Dios nagbarug diha sa imong atubangan. Siya nag-ingon kanimo nga ang karaang mga panagna hapit na matuman ug nga ikaw motabang sa katumanan niini. Unsa kaha ang una nimong reaksyon, mga hunahuna, ug mga pangutana?

Moroni Appears to Joseph Smith in His Room

Sa gabii nga unang mipakita si Moroni kang Joseph Smith—Septyembre 21, 1823—iyang gikutlo ang Isaias 11, nga makita usab sa 2 Nephi 21. Si Moroni misulti kang Joseph Smith nga ang mga panagna niana nga kapitulo hapit na “matuman” (Joseph Smith—Kasaysayan 1:40). Samtang magtuon ka niini nga mga panagna gikan ni Isaias, pamalandungi kon nganong girekord kini ni Nephi diha sa gagmay nga mga palid ug usab nganong gikutlo kini ni Moroni ngadto ni Joseph Smith.

Paggamit sa Kasulatan aron sa Pagsabut sa Kasulatan

Ang atong mga basahon sa kasulatan nagtambayayong sa pagtabang kanato nga makasabut sa mga kamatuoran sa ebanghelyo ug mga panagna. Pananglitan, kini nga leksyon naghisgut sa Doktrina ug mga Pakigsaad 113 aron sa pagtabang nga maklaro ang mga panagna ug mga pagtulun-an ni Isaias. Si Nephi mitabang usab kanato nga makasabut sa mga pulong ni Isaias. Si Elder Bruce R. McConkie sa Korum sa Napulog Duha ka mga Apostoles miobserbar nga “ang Basahon ni Mormon mao ang labing mahinungdanon nga komentaryo sa kalibutan kabahin sa basahon ni Isaias” (“Ten Keys to Understanding Isaiah,” Ensign, Okt. 1973, 81).

Si Propeta Joseph Smith nakadawat og pagpadayag nga nagklaro sa kahulugan sa mga panagna nga narekord sa 2 Nephi 21. Ang mga eskolar dugay nang naukay sa pagpaningkamot nga makasabut sa kahulugan sa mga simbolo nga gigamit dinhi niini nga kapitulo. Ang Basahon ni Mormon ug modernong mga propeta nakatabang kanato nga mas makasabut sa kahulugan. Sama pananglit, si Isaias migamit sa paghulagway sa kahoy o tanom. Basaha ang 2 Nephi 21:1, 10, ug ilha ang mga parte sa kahoy o tanum nga gihisgutan ni Isaias. Dayon basaha ang Doktrina ug mga Pakigsaad 113:1–6 aron sa pagtabang kanimo nga makasabut unsa ang kahulugan niini nga mga simbolo. Tingali makatabang ang pagsulat sa mga interpretasyon sa mga simbolo diha sa imong mga kasulatan.

Punoan ni Jese—Jesukristo

Sungkod [saha] gikan sa punoan ni Jese—Usa ka sulugoon ni Jesukristo

Gamot ni Jese—Usa ka tawo nga naghupot sa mga yawe sa priesthood

Ikonsiderar ang mosunod nga pamahayag ni Elder Bruce R. McConkie, kinsa mipasabut nga ang “gamot ni Jese” ug ang “saha gikan sa punoan ni Jese” susama nga nagpasabut ngadto ni Propeta Joseph Smith: “Nasayop ba kita sa pagsulti nga ang propeta nga gihisgutan dinhi [sa D&P 113:5–6] mao si Joseph Smith, ngadto kang kinsa miabut ang priesthood, kinsa nakadawat sa mga yawe sa gingharian, ug kinsa mipataas sa bandila alang sa pagpundok sa mga katawhan sa Ginoo sa atong dispensasyon? Ug dili ba usab siya ang ‘sulugoon diha sa mga kamot ni Kristo, kinsa mao ang usa ka bahin sa kaliwat ni Jese ingon usab ni Ephraim, o sa balay ni Jose, kang kinsa adunay gitugyan nga dakong gahum’? [D&P 113:3–4]” (Millennial Messiah [1982], 339–40).

Basaha ang 2 Nephi 21:10, 12, ug pangitaa kon unsa ang gipanagna ni Isaias nga buhaton sa Ginoo pinaagi sa “gamot ni Jese” (Joseph Smith). Ang pulong nga bandila nagpasabut ngadto sa usa ka “timailhan” diin ngadto magpundok ang katawhan.

Kini nga mga bersikulo nagtudlo sa mosunod nga kamatuoran: Ang Ginoo mipahiuli sa Iyang ebanghelyo ug sa Iyang Simbahan pinaagi ni Propeta Joseph Smith ug nagpundok na karon sa Iyang mga katawhan sa katapusang mga adlaw.

1. Tubaga ang mosunod nga pangutana diha sa imong scripture study journal: Sa unsang paagi nga ang Ang Simbahan ni Jesukristo sa mga Santos sa Ulahing mga Adlaw usa ka bandila ngadto sa kalibutan?

2 Nephi 21:6–9; 22:1–6

Si Isaias naghulagway sa Milenyum

Without Any Ire

Usa sa labing nahisgutan taliwala sa mga Kristiyano mao ang milenyal nga paghari sa Manluluwas. Nakahunahuna ba mo og maayo niini? Hunahunaa nga ang usa ka higala nangutana kanimo kon unsay imong gituohan mahitungod sa Milenyum. Unsay imong isulti?

Si Isaias nanagna nga human sa Ikaduhang Pag-anhi sa Manluluwas, adunay mga kausaban sa yuta nga molungtad og usa ka libo ka tuig. Gitawag nato kini nga panahon sa kalinaw nga Milenyum. Basaha ang 2 Nephi 21:6–9, nga mangita kon unsa kaha ang mga kahimtang sa kalibutan panahon sa Milenyum.

Sumala sa 2 Nephi 21:9, usa ka panagna mahitungod sa Milenyum mao nga “ang yuta mapuno sa kasayuran sa Ginoo.” Pamalandungi kon sa unsang paagi ang katumanan niini nga panagna makaapekto sa mga tawo sa tibuok kalibutan. Basaha ang 2 Nephi 22:1–6, ug timan-i ang espiritu sa pagsimba nga maanaa sa mga tawo panahon sa Milenyum. Unsaon nato sa pagpalambo nianang sama nga kinaiya karon?

Ang mga bersikulo nga imong gitun-an nagtudlo niini nga kamatuoran: Panahon sa Milenyum, ang yuta mahimong usa ka dapit sa kalinaw tungod kay kini mapuno sa kasayuran sa Ginoo. Unsa nga mga aspeto sa Milenyum ang gusto nimong maangkon karon sa imong kinabuhi? Pamalandungi sa makadiyot unsay imong mabuhat aron sa pagdawat sa pipila niini nga mga panalangin.

Mahimo ka nga mokanta, maminaw, o mobasa sa “The Lord is My Light” (Hymns, no. 89) aron mapun-an ang imong pagtuon sa 2 Nephi 22.

2 Nephi 23–24

Si Isaias naghulagway sa pagkapukan sa Babelonia, ang pagkapukan sa mga dautan, ug ang pagkapukan ni Lucifer

Sumala sa narekord sa 2 Nephi 23–24, gipanghimaraut ni Isaias ang pagkadautan sa balay ni Israel ug mitandi sa kalaglagan sa mga dautan sa katapusang mga adlaw ngadto sa kalaglagan sa karaang Babelon. Ang Babelon usa ka hilabihan ka dautan nga nasud sa panahon ni Isaias ug sukad niadto nahimong simbolo sa pagkadautan sa kalibutan (tan-awa sa D&P 133:14).

Tun-i kon unsay gipanagna ni Isaias nga mahitabo sa mga dautan sa katapusang mga adlaw pinaagi sa pagbasa sa 2 Nephi 23:1, 4–9, 11, 15, 19, ug 22.

Si Isaias mitandi usab sa kalaglagan sa karaang Babelon ngadto sa pagkapukan ni Lucifer (Satanas) gikan sa langit. Siya naghisgut ni Lucifer isip ang simbolikanhong hari sa Babelon, nagpasabut sa tibuok dautan nga kalibutan. Si Isaias migamit sa pagkapukan ni Lucifer sa premortal nga kalibutan isip paghulagway kon sa unsang paagi ang mga dautan mapakyas ug mapukan. Tun-i ang 2 Nephi 24:12–14, ug markahi ang mga pulong nga nagpaklaro sa pagkaarogante ug garbo ni Satanas.

Nabantayan ba nimo ang paggamit sa pulong nga Ako niini nga mga bersikulo? Mahimo nimong linginan ang mga Ako diha sa imong mga kasulatan. Si Presidente N. Eldon Tanner sa Unang Kapangulohan kausa miingon nga si Satanas “mas nabalaka sa dungog kay sa mga resulta; ang himaya ug pagdayeg maoy tinud-anay niyang tumong”(“For They Loved the Praise of Men More Than the Praise of God,” Ensign, Nob. 1975, 76).

Siksika ang 2 Nephi 24:15–16 kon unsay mahitabo ni Satanas sa katapusan ug unsay bation sa mga tawo kaniya kon makakita sila kaniya kon unsa gayud siya.

Basaha ang mosunod nga pamahayag ni Presidente Ezra Taft Benson: “Didto sa premortal nga konseho, ang garbo mao ang nakapapukan ni Lucifer, ‘anak sa kabuntagon.’ (2 Ne. 24:12–15; tan-awa usab sa D&P 76:25–27; Moises 4:3.). … Giatbang ni Lucifer ang iyang plano ngadto sa plano sa Amahan nga maoy gisuportahan ni Jesukristo. (Tan-awa sa Moises 4:1–3.) Gusto niya nga tahuron labaw sa uban. (Tan-awa sa 2 Ne. 24:13.) Sa ato pa, ang iyang magarbuhong tinguha mao ang pagkuha sa trono sa Dios. (Tan-awa sa D&P 29:36; 76:28.)” (“Beware of Pride,” Ensign, May 1989, 4–5).

Sa 2 Nephi 23:22, atong nakat-unan nga makakuha ka og kahupayan kon ikaw matarung. Ang Dios magmaloloy-on kanimo, apan ang mga dautan malaglag.

2. Tubaga ang mosunod nga mga pangutana diha sa imong scripture study journal:

   1. Unsay mahimo nakong usbon sa akong kinabuhi karon aron mahimong mas masulundon?

   2. Unsay akong mahimo aron magpabiling masulundon?

Pag-ampo alang sa mga oportunidad nga mapakigbahin ang imong pagpamatuod mahitungod sa mga kamatuoran nga imong nakat-unan sa 2 Nephi 23.

3. Isulat ang mosunod sa ubos sa mga assignment karong adlawa dilha sa imong scripture study journal:

   Akong natun-an ang 2 Nephi 21–24 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: