Unit 5: Day 1

1 Nephi 20–22

Pasiuna

Sa 1 Nephi 20–21, mikutlo si Nephi sa mga panagna sa propeta sa Daang Tugon nga si Isaias, kansang mga sinulat anaa sa mga palid nga tumbaga diin si Nephi ug ang iyang igsoon nga mga lalaki gipabalik sa Jerusalem aron kuhaon gikan kang Laban. Si Isaias mitudlo nga bisan ang karaang Israel wala mohupot sa ilang mga pakigsaad, ang Ginoo sa gihapon nahigugma kanila ug midapit kanila sa paghinulsol ug pag-adto Kaniya. Samtang magtuon ka niini nga mga kapitulo, tutuki ang unsay gitudlo ni Isaias kabahin ni Jesukristo ug ang Iyang tinguha sa pagtubos sa Iyang mga katawhan.

Isaiah Writes of Christ’s Birth

1 Nephi 20

Ang Ginoo mibadlong sa Israel ug midapit kanila sa pagbalik ngadto Kaniya

Makahunahuna ka ba og higayon nga mibuhat ka og butang nga sukwahi sa mga pakigsaad nga imong nahimo o sa sumbanan sa Simbahan? Unsa man ang imong gibati kabahin sa imong desisyon? Basaha ang 1 Nephi 20:1–2 (ang “magpabilin” sa bersikulo 2 nagpasabut nga magsalig). Kinsa ang gipakigsultian ni Isaias? Kinsa ang “balay ni Jacob”?

Sa Daang Tugon, si Jacob mao ang anak nga lalaki ni Isaac ug ang apo ni Abraham. Gihatagan siya sa ngalan nga Israel sa Ginoo (tan-awa sa Genesis 32:28). “Ang balay ni Israel” nag-refer sa iyang mga kaliwat ug usahay gitawag nga “balay ni Jacob.” Nag-refer usab kini ni bisan kinsa nga tinuod nga mga tumutuo ni Jesukristo. (Tan-awa sa Giya Ngadto sa mga Kasulatan, “Israel”.) Sama sa karaan nga mga panahon, kadtong mihimo og mga pakigsaad (sama sa pagbunyag) uban sa Dios karon giila nga mga miyembro sa pakigsaad sa balay ni Israel.

Pangitaa sa 1 Nephi 20:3–4, 8, 18, ug linyahi ang mga pulong nga nagpaila nga ang balay ni Israel wala magmatinud-anon sa Ginoo. Ang mga pulong “ang inyong liog ingon ka lig-on sa puthaw, ug ang inyong mga agtang ingon sa tumbaga” (1 Nephi 20:4) nagsimbolo og usa ka kondisyon nga gibalik-balik og tawag sa mga kasulatan “pagkatikig og liog.” Usa ka posible nga pagpatin-aw niini nga mga pulong mao nga ang mga hayop sama sa mga baka ug mga asno mipatikig sa ilang mga liog aron dili sila magiyahan sa ilang mga amo. Lain nga pagpasabut mao nga ang mga tawo nga dili andam nga moduko sa ilang mga ulo mao ang mga tikig og liog. Sa samang paagi, ang balay ni Israel mipatikig sa ilang mga liog pinaagi sa garbo ug pagkadautan ug midumili nga magiyahan sa Ginoo.

Aron masabtan pag-ayo kini nga mga bersikulo ug ipahisama kini sa atong panahon, hunahunaa sa unsang paagi kini nga mga paghulagway sa balay ni Israel naghulagway sa mga buhat sa uban nga mga tawo karon.

Pagpamalandong

Si Presidente Henry B. Eyring sa Unang Kapangulohan mitudlo: “Apan ang pagbasa, pagtuon, ug pagpamalandong dili pareho. Mahimo kitang mobasa sa mga pulong ug tingali makakuha kita og mga ideya. Magtuon kita ug tingali makadiskubre og mga sundanan ug mga koneksyon diha sa kasulatan. Apan kon kita mamalandong, atong gidapit ang pagpadayag pinaagi sa Espiritu. Ang pagpamalandong, alang kanako, mao ang paghunahuna ug pag-ampo nga akong buhaton human sa mainampingon nga pagbasa ug pagtuon sa mga kasulatan” (“Pagserbisyo uban sa Espiritu,” Ensign o Liahona, Nob. 2010, 60). Ang pagtuon sa mga kasulatan sa mahilum nga lugar diin makapamalandong ka niini makatabang kanimo nga mabati ang impluwensya sa Espiritu Santo.

Samtang magbasa ka sa 1 Nephi 20:9–14, 16, pamalandong unsa ang gitudlo niini nga mga bersikulo kabahin sa Ginoo ug unsa Siya nahisama.

1. Pagsulat og mubo nga mga tubag sa mosunod nga mga pangutana diha sa imong scripture study journal:

   1. Bisan og ang mga tawo nagmasinupakon sa una, sa unsang paagi ang Ginoo mitubag kanila? Ngano? (Tan-awa sa 1 Nephi 20:9–11, 14.)

   2. Unsa ang gusto sa Ginoo nga buhaton sa Iyang katawhan sa pakigsaad? (Tan-awa sa 1 Nephi 20:12, 16.)

Gikan niini nga mga bersikulo atong nakat-unan nga ang Ginoo nagdapit niadtong dili masulundon sa paghinulsol ug mobalik ngadto Kaniya. Sa imong pagbasa sa mosunod nga pamahayag gikan ni Presidente Dieter F. Uchtdorf sa Unang Kapangulohan, linyahi ang usa o labaw pa nga hugpong sa mga pulong nga nagpamatuod niini nga kamatuoran:

“[Si Satanas] gusto nga mobati kita nga dili na gayud kita mapasaylo (tan-awa sa Pinadayag 12:10). Si Satanas gusto nga kita maghunahuna nga kon kita makasala nakalabang na kita sa usa ka “punto nga wala nay pagbalik”—nga ulahi na kaayo aron sa pag-usab sa atong padulngan. …

“Si Kristo miabut aron sa pagluwas kanato. Kon sayop nga dalan ang atong gitaak, ang Pag-ula ni Jesukristo makahatag kanato sa kasiguroan nga ang sala dili usa ka punto nga wala nay pagbalik. Ang luwas nga pagbalik posible kon atong sundon ang plano sa Dios alang sa atong kaluwasan” (“Punto sa Luwas nga Pagbalik,” Ensign o Liahona, Mayo 2007, 99).

1 Nephi 21:1–17

Si Isaias nanagna nga ang Mesiyas dili malimot sa iyang mga katawhan sa pakigsaad

Sa 1 Nephi 21:1–13, si Nephi mirekord sa usa sa mga panagna ni Isaias kabahin ni Jesukristo, kinsa mahimong Mesiyas.Ang Kristo (usa ka Griyego nga pulong) ug ang Mesiyas (usa ka Hebreohanon nga pulong) ang duha nagpasabut og “ang Dinihogan” o “ang Usa nga Pinili.” Si Jesukristo gipili nga mahimong Manunubos sa Israel ug sa mga Hentil.

Samtang magbasa ka sa 1 Nephi 21:6–13, markahi ang imong mga kasulatan niadto nga hugpong sa mga pulong nga naghulagway kang Jesukristo ug unsa ang Iyang buhaton isip ang Manunubos sa Israel.

Isip sangputanan sa ilang mga sala, ang mga anak sa Israel mipalayo sa ilang mga kaugalingon gikan sa Ginoo ug mibati nga gikalimtan ug gisalikway Kaniya (tan-awa sa 1 Nephi 21:14). Bisan og mibati sila nga gisalikway sa Ginoo, siksika ang 1 Nephi 21:14–16 ebidensya nga ang Ginoo nahigugma kanato, ug Siya dili gayud malimot kanato. Mahimo nimong markahan ang bisan asa nga mga pulong niini nga mga bersikulo nga makahuluganon kanimo.

Jesus Shows His Wounds

Si Elder Jeffrey R. Holland sa Korum sa Napulog Duha ka mga Apostoles mipasabot kon sa unsang paagi ang Manluluwas mipabilin sa mga samad sa Iyang pagkalansang isip ebidensya nga dili gayud Siya malimot kanato: “Si Kristo dili gayud malimot sa mga anak nga iyang gitubos o ang pakigsaad nga iyang gihimo uban kanila alang sa kaluwasan sa Zion. Ang sakit nga mga pahinumdom sa [Iyang] mapinanggaong pag-atiman ug pakigsaad mao ang mga marka sa mga lansang sa taga Roma nga gikulit sa mga palad sa iyang mga kamot” (Christ and the New Covenant [1997], 84).

2. Pagsulat og mubo nga mga tubag sa mosunod nga mga pangutana diha sa imong scripture study journal:

   1. Ngano kaha nga ang mga tawo usahay mobati nga ang Ginoo nakalimot na kanila?

   2. Unsa kaha ang ipasabut sa gikulit sa mga palad sa mga kamot sa Manluluwas? Sa unsang paagi kini nagtabang kanimo nga magpasalamat sa pag-antus sa Manluluwas diha sa krus?

   3. Unsa nga mga kasinatian ang nakatabang kanimo nga mahibalo nga ang Ginoo wala malimot kanimo?

3. Paghunahuna nga aduna kay higala nga miingon nga siya wala na mobati nga takus sa pagtambong sa simbahan tungod sa mga sala nga nangagi. Sa imong scripture study journal, pagsulat og usa ka mubo nga sulat sa pag-awhag ngadto sa usa ka higala, gamit ang imong nakat-unan gikan sa 1 Nephi 20–21 ug sa pamahayag ni Presidente Uchtdorf sa seksyon sa pagtuon sa 1 Nephi 20.

1 Nephi 21:18–22:22

Si Nephi mipasabut sa panagna ni Isaias sa pagkatag ug pagpundok sa Israel

Si Nephi milakip sa usa sa mga panagna ni Isaias kabahin sa pagpundok sa Israel sa iyang talaan. Kini makita sa 1 Nephi 21:18–26. Sa 1 Nephi 22, si Nephi mihatag sa iyang kaugalingon nga pagpasabut ug komentaryo sa panagna ni Isaias. Sa imong pagbasa sa 1 Nephi 22:4–12, pangitaa ang pagpasabut ni Nephi kon sa unsang paagi ang Israel pagapundokon sa katapusan nga mga adlaw.

Makatabang nga mahibalo nga sa Basahon ni Mormon ang termino nga “mga Hentil” kasagaran nag-refer sa mga katawhan nga dili mga kaliwat ni Judah. Ang mga pulong nga “usa ka katingalahan nga buhat” nag-refer sa Pagpahiuli sa ebanghelyo sa katapusan nga mga adlaw. Tan-awa usab kapila si Nephi naghisgut sa mga pakigsaad—mahimo nimong markahan kini diha sa imong mga kasulatan.

Ang Ginoo misaad sa pagpahiuli sa ebanghelyo ug pagpundok sa Israel sa katapusan nga mga adlaw. Markahi ang imong mga kasulatan unsay mahitabo ni Satanas tungod sa kamatarung sa mga katawhan samtang magtuon ka sa 1 Nephi 22:17, 19–22, 25–28.

4. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang 1 Nephi 20–22 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: