3 Nephi 28–30

Pasiuna

Sa wala pa Siya mobiya, nangutana si Jesukristo sa matag usa sa Iyang napulog duha ka mga disipulo kon unsay ilang gusto Kaniya. Siyam kanila ang mihangyo nga mobalik dayon ngadto Kaniya kon mahuman na ang ilang pangalagad dinhi sa yuta. Tulo ang mihangyo nga magpabilin sa yuta aron mopadayon sa pagdala og mga kalag ngadto ni Kristo hangtud Siya mobalik. Ang Ginoo miuyon niining matarung nga mga tinguha. Si Mormon mihatag og pipila ka mga detalye mahitungod sa pangalagad sa Tulo ka Nephite dinhi sa yuta.

Sa pagtapos ni Mormon sa iyang istorya sa pagbisita sa Manluluwas sa mga Nephite, gipasabut niya nga ang pag-abut sa Basahon ni Mormon mao ang timailhan nga ang Ginoo mituman sa Iyang pakigsaad sa balay ni Israel. Nagtapos sa 3 Nephi, girekord ni Mormon ang mga pulong ni Jesukristo, nagdapit sa tanang mga tawo nga maghinulsol ug magpasakop sa balay ni Israel.

3 Nephi 28:1–11

Si Jesukristo mihatag sa mga tinguha sa Iyang napulog duha ka mga disipulo

Pamalandunga unsaon nimo pagtubag kon si Jesukristo magpakita kanimo ug mangutana, “Unsa ang imong gitinguha kanako?”

Sa lakbit isulat hain sa imong matarung nga mga tinguha ang imong ipakigbahin Kaniya.

Basaha ang 3 Nephi 28:1–3, ug pangitaa kon unsay gitubag sa siyam ka Nephite nga mga disipulo sa dihang ang Ginoo nangutana kanila, “Unsa ang inyong gitinguha kanako?” Timan-i kon unsay gibati sa Manluluwas mahitungod sa ilang tinguha.

Basaha ang 3 Nephi 28:4–7, ug pangitaa unsay gitinguha sa nahabiling tulo ka mga disipulo sa Manluluwas. Timan-i unsay gibati ni Jesukristo sa tinguha niining tulo ka mga disipulo. Pamalandunga ngano sa imong hunahuna nga ang Ginoo miingon nga sila “labaw pa nga bulahan” tungod sa ilang tinguha.

Basaha ang 3 Nephi 28:8–10 aron makita kon giunsa sa Manluluwas sa paghulagway ang mga panalangin nga madawat sa Tulo ka mga Nephite tungod sa ilang mga tinguha sa paghago diha sa mortal nga mga tawo. Ikonsiderar ang pagsulat sa mosunod nga kamatuoran diha sa margin sa imong kasulatan o sa imong scripture study journal: Ang Ginoo mopanalangin nato sumala sa atong matarung nga mga tinguha. Basaha ang mosunod nga pamahayag ni Elder Neal A. Maxwell sa Korum sa Napulog Duha ka mga Apostoles aron makita ang kaimportante sa matarung nga mga tinguha:

“Kon unsa ang atong gitinguha pag-ayo, paglabay sa panahon, maoy atong makab-ot sa katapusan ug maoy atong madawat didto sa kahangturan. …

“Kinahanglang walay paglunga ang matarung nga mga tinguha, busa, tungod kay, miingon si Presidente Brigham Young, ‘ang mga lalaki ug mga babaye, kinsa nagtinguha nga makaangkon og dapit sa celestial nga gingharian, makahibalo nga sila kinahanglan gayud nga makigbisog kada adlaw’ (sa Journal of Discourses, 11:14)” (“According to the Desire of [Our] Hearts,” Ensign, Nob. 1996, 21–22).

Tubaga ang usa o duha sa mosunod nga mga pangutana diha sa imong scripture study journal:
1. Kanus-a ikaw mibati nga gipanalanginan sa Ginoo samtang imong gihimo ang imong matarung nga mga tinguha?
2. Unsay imong sugdan nga buhaton karon aron sa pag-amuma sa matarung nga mga tinguha sa imong kaugalingong kinabuhi aron ikaw mahimong kwalipikado sa mga panalangin sa Ginoo?

3 Nephi 28:12–35

Gihulagway ni Mormon ang pangalagad sa Tulo ka mga Nephite

Daghang mga tawo nakadungog og mga sugilanon, istorya-istorya, ug mga huhungihong mahitungod sa mga pagbisita sa Tulo ka mga Nephite. Kay sa magsalig sa mga minamao-mao, susiha unsa ang gisulti sa mga kasulatan bahin sa ilang misyon ug sa unsa nga paagi sila nangalagad uban ang gahum “ingon sa mga anghel sa Dios” (3 Nephi 28:30).

Basaha ang 3 Nephi 28:12–17 sa pagkat-on unsay nahitabo sa Tulo ka mga Nephite. Sumala sa 3 Nephi 28:15, unsa ang usa ka rason nga kinahanglang agian sa mga disipulo niini nga kausaban?

Basaha ang 3 Nephi 28:18–23, nga mangita kon giunsa pagpanalangin sa Ginoo ang Tulo ka mga Nephite aron sila makapadayon sa ilang matarung nga mga tinguha. Hunahunaa kon unsay gitudlo niining mga bersikulo kanato mahitungod sa pagkaandam sa Ginoo sa pagpanalangin nato kon kita magpuyo sumala sa atong matarung nga mga tinguha.

Tun-i ang 3 Nephi 28:25–31, ug hibaloi kinsa ang nakabenepisyo ug makabenepisyo sa pangalagad sa Tulo ka mga Nephite. Mahimo nimong markahan ang unsay imong makit-an.

3 Nephi 28:36–40

Nahibaloan ni Mormon mahitungod sa matang sa nabalhin sa pagkahimaya nga mga binuhat

Hunahunaa ang usa ka panahon nga ikaw adunay pangutana mahitungod sa ebanghelyo o hagit nga imong giatubang. Basaha ang 3 Nephi 28:36, ug pangitaa kon unsay wala masabti ni Mormon mahitungod sa pisikal nga kondisyon sa Tulo ka mga Nephite human sa kausaban nga ilang nasinati. Pamalandunga ang imong tubag sa mosunod nga pangutana: Kinsa sa kasagaran ang imong duolon kon ikaw dunay pangutana mahitungod sa ebanghelyo? Basaha ang 3 Nephi 28:36–37 aron makat-on unsay gihimo ni Mormon sa pagpangita og tubag sa iyang pangutana.

Tun-i ang 3 Nephi 28:37–40, ug pangitaa unsay nakat-unan ni Mormon mahitungod sa kausaban nga nahitabo sa mga lawas sa Tulo ka mga Nephite. Ang kahimtang o kondisyon nga natagamtaman sa Tulo ka mga Nephite gitawag og “nabalhin sa pagkahimaya,” nga susama sa transpigurasyon (tan-awa sa 3 Nephi 28:17) nga mas taas ang gidugayon. Ang nabalhin sa pagkahimaya nga mga binuhat mortal gihapon, apan, sama sa gitudlo ni Propeta Joseph Smith, ang ilang pisikal nga mga lawas nausab gikan sa telestial nga kondisyon ngadto sa terrestrial nga kondisyon; wala silay pisikal nga pag-antus sa ilang mortal nga mga lawas (tan-awa sa History of the Church, 4:210). Ang nabalhin sa pagkahimaya nga mga binuhat mahimong magpakita ug mawala sumala sa ilang gusto ug sumala sa kabubut-on sa Dios (tan-awa sa 3 Nephi 28:27–30). Motabang sila sa pagdala og mga kalag ngadto sa kaluwasan, ug magpabilin sila sa kahimtang nga nabalhin sa pagkahimaya hangtud sa Ikaduhang Pag-anhi ni Jesukristo, sa higayon nga sila moagi og laing kausaban aron mabanhaw, mahimaya nga mga personahe (tan-awa sa 3 Nephi 28:7–8, 39–40).

Gikan sa kasinatian ni Mormon, makat-unan nga kon kita mangutana sa Ginoo aron makasabut, makadawat kita og pagpadayag. Mahimo nimong isulat kini nga baruganan diha sa imong mga kasulatan o sa scripture study journal.

Diha sa imong scripture study journal, irekord ang kasinatian diin ikaw o ang usa ka tawo nga imong nailhan nangayo sa Ginoo og mga tubag pinaagi sa kinasingkasing nga pag-ampo.

3 Nephi 29

Nagpamatuod si Mormon nga ang Ginoo motuman sa Iyang pakigsaad sa balay ni Israel sa katapusang mga adlaw

Human mosulat si Mormon mahitungod sa pagbisita sa Manluluwas ngadto sa katawhan sa Basahon ni Mormon, nanagna siya sa katumanan sa mga saad sa Ginoo sa katapusang mga adlaw. Pamalandunga ang imong tubag sa mosunod nga pangutana: Kanus-a ikaw nakat-on o nakasaksi sa katumanan sa usa sa mga saad sa Dios?

Ikonsiderar ang pagmarka sa mga pulong kanus-a ug dayon samtang ikaw magtuon sa 3 Nephi 29:1–3. Kini nga mga pulong makatabang nimo mahibaloan ang panghitabo nga nagmatuod nga ang Ginoo mituman sa Iyang mga saad ngadto sa balay ni Israel sa katapusang mga adlaw. (Ang mga pulong nga “kini nga mga pamahayag” sa 3 Nephi 29:1 nagpasabut sa mga sinulat sa Basahon ni Mormon.)

Makat-unan nato sa 3 Nephi 29:1–3 nga ang pag-abut sa Basahon ni Mormon usa ka timailhan nga ang Ginoo nagtuman sa Iyang pakigsaad sa balay ni Israel.

Ang Basahon ni Mormon misiguro nato nga ang Ginoo nag-andam sa Iyang katawhan alang sa Iyang pag-anhi (tan-awa sa 3 Nephi 29:2). Samtang basahon nimo ang mosunod nga pamahayag gikan ni Elder Russell M. Nelson sa Korum sa Napulog Duha ka mga Apostoles, markahi sa unsa nga paagi nga ang Basahon ni Mormon makatabang nato sa pag-andam alang sa pag-anhi sa Manluluwas:

“Ang Basahon ni Mormon usa ka makita nga ebidensya nga ang Ginoo nagsugod na sa pagpundok sa Iyang mga anak sa pakigsaad ni Israel. …

“Sa tinuod, ang Ginoo wala makalimot! Siya mipanalangin nato ug sa uban sa tibuok kalibutan sa Basahon ni Mormon. … Kini nakatabang kanato sa paghimo og mga pakigsaad ngadto sa Dios. Kini nagdapit nato sa paghinumdom Kaniya ug sa pag-ila sa Iyang Pinalanggang Anak. Kini ang lain nga tugon ni Jesukristo” (“Mga Pakigsaad,” Ensign o Liahona, Nob. 2011, 88).

Basaha ang 3 Nephi 29:4-6, ug buhata ang usa o duha sa mosunod nga mga kalihokan diha sa imong scripture study journal:
1. Hibaloi ang tulo ka piho nga mga tudling sa Basahon ni Mormon nga sa imong hunahuna makatabang sa uban nga moduol ngadto ni Jesukristo. Alang sa matag tudling, pagsulat og usa o duha ka sentence nga magpasabut nganong imong gipili kana nga tudling.
2. Pagsulat og paragraph kon sa unsang paagi nga sa imong hunahuna ang Basahon ni Mormon makatabang sa usa ka tawo nga makasabut ug modawat sa mga gasa sa pagpadayag, panagna, ug mga pinulongan o sa gahum sa Espiritu Santo.

3 Nephi 30

Ang Ginoo miawhag sa mga Hentil sa paghinulsol ug moduol ngadto Kaniya

Gitapos ni Mormon ang iyang rekord sa pangalagad sa Manluluwas pinaagi sa pagsulat sa pipila ka piho nga mga instruksyon nga iyang nadawat gikan ni Jesukristo kabahin sa mga Hentil. Basaha ang 3 Nephi 30:1–2, ug ikonsiderar ang pagmarka sa daghang mga instruksyon sa Manluluwas ngadto sa mga Hentil kutob sa imong makit-an. Ikonsiderar ang pagmarka usab sa mga panalangin nga alang sa mga Hentil kon sila moduol ngadto kang Kristo. Bisan kon ang 3 Nephi 30:2 gisulti ngadto niadtong anaa sa gawas sa Simbahan, magamit nato ang imbitasyon ni Jesukristo sa pagsukod sa atong kaugalingong pagkaandam sa pagsunod sa mga gikinahanglan sa Iyang pakigsaad.

Isulat ang mosunod nga baruganan diha sa imong scripture study journal: Kon moduol kita ngadto ni Kristo, pagaiphon kita uban sa Iyang katawhan. Isulat diha sa imong scripture study journal ngano nga panalangin kini sa Ginoo nga “pagaiphon uban sa [Iyang] mga katawhan kinsa mga sakop sa balay ni Israel” (3 Nephi 30:2).
Isulat ang mosunod nga pahinumdom diha sa ubos sa mga buluhaton karong adlawa sa imong scripture study journal:

Akong natun-an ang 3 Nephi 28–30 ug nahuman kini nga leksyon niadtong (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: