Unit 26: Day 3

3 Nephi 19

Pasiuna

Ang hitabo nga narekord sa 3 Nephi 11–18 nahitabo ang tanan nianang adlawa. Sa pagtapos nianang adlaw, ang balita sa pagbisita sa Manluluwas ug sa Iyang pagbalik pagkasunod adlaw nahibaloan sa katawhan, ug sila “naghago sa hilabihan nianang tibuok gabii, nga aron unta sila sa pagkabuntag anaa sa dapit diin si Jesus mopakita sa iyang kaugalingon ngadto sa pundok sa mga katawhan” (3 Nephi 19:3). Pagkabuntag, ang napulog duha ka mga disipulo nagtudlo sa katawhan ug nag-ampo uban kanila. Dayon si Nephi mibunyag sa napulog duha ka mga disipulo, ug ilang nadawat ang Espiritu Santo ug gilibutan sa mga anghel. Atol niini nga pagpakita, si Jesukristo nagpakita ug misugo sa mga disipulo sa pag-ampo, ug nag-ampo usab Siya ngadto sa Amahan alang sa pundok sa katawhan. Tungod sa ilang pagtuo, ang mga disipulo napuno sa Espiritu Santo. Nahimo silang putli, ug nahimo silang usa sa Amahan ug sa Anak.

3 Nephi 19:1–14

Ang napulog duha ka mga disipulo nangalagad sa katawhan sumala sa sugo sa Manluluwas

Hunahunaa unsay imong bation ug unsay imong buhaton kon ikaw nasayud nga ugma si Jesukristo moabut ngadto sa templo nga dili layo gikan nimo. Maningkamot ba gayud ka nga makaadto didto? Gusto ba nimong modala og ubang mga tawo? Unsay imong buhaton sa pag-andam alang niini nga kasinatian?

Basaha ang 3 Nephi 19:1–3, nga mangita sa tubag sa mga Nephite ngadto sa saad sa Manluluwas nga mobalik Siya pagkasunod adlaw. Human nagkatigum ang pundok sa katawhan, ang napulog duha ka mga disipulo mibahin sa pundok sa katawhan ngadto sa dose ka grupo ug nagsugod sa pagtudlo kanila. Gisultihan nila ang pundok sa katawhan sa pagluhod aron mag-ampo ug mitudlo nila sa samang mga kamatuoran nga gitudlo sa Manluluwas sa miaging adlaw. (Tan-awa sa 3 Nephi 19:4–7.)

1. Basaha ang 3 Nephi 19:8–9, ug tubaga ang mosunod nga mga pangutana diha sa imong scripture study journal:

   1. Unsa ang labing gitinguha sa mga disipulo? Gikan sa imong kasinatian, ngano nga ang gasa sa Espiritu Santo maoy gitinguha pag-ayo?

   2. Ang napulog duha ka mga disipulo mao ang midumala sa mga kalihokan sa Simbahan sa Amerika human mibiya ang Manluluwas. Ngano nga importante nga anaa nila ang Espiritu Santo sa paggiya kanila?

Human nimo makompleto ang imong buluhaton sa scripture study journal, pamalandunga kini nga mga pangutana: Unsa ang pipila ka mga butang nga imong labing gitinguha kon ikaw mag-ampo? Kanunay ba ikaw nga mag-ampo alang sa Espiritu Santo?

Basaha ang 3 Nephi 19:10–12, ug pangitaa unsay gibuhat sa mga disipulo human sila mag-ampo. Ang bunyag nga gihulagway sa mga bersikulo 10–12 mao ang ikaduha nga bunyag alang sa napulog duha ka mga disipulo. Ang Simbahan naestablisar sulod sa daghang tuig diha sa mga Nephite, ug kining kaigsoonan sa priesthood nabunyagan na kaniadto, bisan og ang ilang unang bunyag wala marekord diha sa mga kasulatan. Kining ikaduhang bunyag usa ka espesyal nga sirkumstansya, sumala sa gipasabut ni Presidente Joseph Fielding Smith: “Ang Manluluwas misugo ni Nephi ug sa katawhan nga magpabunyag pag-usab, tungod kay gibag-o niya pag-organisar ang Simbahan ubos sa ebanghelyo. Sa wala pa kana naorganisar ubos sa balaod [ni Moises]” (Doctrines of Salvation, ed. Bruce R. McConkie, 3 vols. [1954–56], 2:336).

Hinumdumi nga ang mga disipulo ug ang ubang mga Nephite takus nga maanaa sa presensya sa Manluluwas. Basaha ang 3 Nephi 19:13, nga mangita unsay gihatag ngadto sa napulog duha ka mga disipulo tungod sa pagbaton og matarung nga mga tinguha.

2. Paghimo og lista diha sa imong scripture study journal sa mga panalangin nga moabut sa kinabuhi sa usa ka tawo kinsa dunay gasa sa Espiritu Santo ug magpakabuhi nga takus niini. Dayon itandi ang imong lista sa mosunod nga kinutlo ni Elder Robert D. Hales sa Korum sa Napulog Duha ka mga Apostoles, ug idugang sa imong lista ang bisan unsa nga bag-ong mga ideya nga imong makit-an:

   

   “Ang Espiritu Santo mihatag nato sa kalig-on ug kaisug sa pagdumala sa atong kinabuhi sa mga paagi sa gingharian sa Dios ug mao ang tinubdan sa atong pagpamatuod sa Amahan ug sa Anak. …

   “Nagkinahanglan kita sa Espiritu Santo isip atong kanunay nga kauban aron sa pagtabang nato sa paghimo og mas maayo nga mga pagpili sa mga desisyon nga atong atubangon kada adlaw. Ang atong batan-ong mga lalaki ug mga babaye gihan-ukan sa dili maayo nga butang sa kalibutan. Ang pagpakig-uban sa Espiritu mohatag nila sa kusog sa pagbatok sa dautan ug, kon gikinahanglan, sa paghinulsol ug pagbalik ngadto sa higpit ug pig-ot nga dalan. Walay usa kanato ang luwas gikan sa mga tintasyon sa kaaway. Kinahanglan kitang tanan sa panalipod nga anaa pinaagi sa Espiritu Santo. … Ang pagbaton sa gasa sa Espiritu Santo makatabang sa mga sakop sa pamilya sa paghimo og maalamon nga mga pagpili—mga pagpili nga makatabang nila nga makabalik uban sa ilang mga pamilya ngadto sa ilang Amahan sa Langit ug sa Iyang Anak, nga si Jesukristo, sa pagpuyo uban Kanila sa kahangturan” (“The Covenant of Baptism: To Be in the Kingdom and of the Kingdom,” Ensign, Nob. 2000, 8).

Base sa imong pagtuon sa 3 Nephi 19:1–14, pamalandunga unsa nga mga panalangin nga gusto kaayo nimo sa imong kinabuhi ug nganong gusto nimo kini.

Kompletuha ang mosunod nga pamahayag sa baruganan base sa 3 Nephi 19:9, 13: Pinaagi sa tinuod nga mga tinguha ug pag-ampo, kita mahimong .

3 Nephi 19:14–36

Ang Manluluwas nagpakita ug nag-ampo alang sa katawhan nga mahimong putli pinaagi sa ilang pagtuo

Basaha ang 3 Nephi 19:14–16 aron makahibalo unsay nahitabo human mabunyagi ug mapuno sa Espiritu Santo ang napulog duha ka mga disipulo .

Human miluhod ang mga disipulo ug ang pundok sa katawhan, ang Manluluwas misugo sa Iyang napulog duha ka mga disipulo sa pag-ampo. Basaha ang istorya sa ilang pag-ampo sa 3 Nephi 19:17–18, 24–26, 30. Dinhi lamang nga dapit sa narekord nga kasulatan diin ang katawhan nag-ampo direkta ngadto ni Jesukristo. Sa atong mga pag-ampo mag-ampo kita ngadto sa Dios nga Amahan pinaagi sa pangalan sa Iyang Anak, nga si Jesukristo. Wala sa kasulatan diin gitudloan kita nga mag-ampo ngadto ni Jesus.

Si Elder Bruce R. McConkie sa Korum sa Napulog Duha ka mga Apostoles misugyot og rason ngano nga ang mga disipulo tingali nag-ampo ngadto ni Jesus niining talagsaong higayon: “Gitudloan na sila ni Jesus sa pag-ampo pinaagi sa iyang pangalan ngadto sa Amahan, nga maoy ilang gihimo [tan-awa sa 3 Nephi 19:8–9]. … Apan niining higayuna ‘sila nag-ampo ngadto kang Jesus, nagtawag kaniya nga ilang Ginoo ug ilang Dios.’ [3 Nephi 19:18.] Si Jesus anaa kanila isip simbolo sa Amahan. Ang pagkakita kaniya, ingon og sila nakakita sa Amahan; ang pag-ampo ngadto kaniya, ingon og nag-ampo sila ngadto sa Amahan. Espesyal ug talagsaon kadto nga sitwasyon” (The Promised Messiah: The First Coming of Christ [1978], 560–61). Ang Manluluwas Mismo miingon, “Sila nag-ampo ngari kanako tungod kay Ako nag-uban kanila” (3 Nephi 19:22).

3. Samtang nagluhod ang mga tawo, nakasaksi sila ni Jesukristo nga mihalad og tulo ka talagsaong mga pag-ampo alang sa Iyang mga disipulo ug alang kanila. Kopyaha ang mosunod nga tsart diha sa imong scripture study journal. Basaha ang gi-assign nga mga pakisayran sa kasulatan ug kompetuha ang tsart.

Tudling sa kasulatan	Alang sa unsa ang giampo sa Manluluwas?	Unsaon nimo paggamit sa imong nakat-unan sa pag-ampo sa Manluluwas sa imong kinabuhi?
3 Nephi 19:19–23
3 Nephi 19:27–29
3 Nephi 19:31–34

Basaha ang 3 Nephi 19:24. Unsa sa imong hunahuna ang gipasabut sa “wala mobalik-balik sa daghan nga mga pulong”? Kabahin sa mga pag-ampo diin ang mga pulong gihatag nato aron makahibalo unsay iampo, si Elder Bruce R. McConkie mitudlo, “Ang hingpit nga mga pag-ampo mao kadtong mga dinasig, diin ang Espiritu mopadayag sa mga pulong nga angayang gamiton” (Mormon Doctrine, 2nd ed. [1966], 586).

Aron sa pagtabang nga mas makasabut sa pipila ka mga baruganan nga gitudlo sa Manluluwas sa Iyang mga pag-ampo, ribyuha ang 3 Nephi 19:28 ug markahi ang mga pulong nga nagtudlo niini nga baruganan: Sa atong pagpakita og pagtuo ni Jesukristo, mahimo kitang putli. Pamalandunga ang mga paagi diin ang mga disipulo nagpakita og pagtuo sa tibuok mga kasinatian nga narekord sa 3 Nephi 19. Isip resulta sa ilang pagtuo, ang mga disipulo napuno sa Espiritu Santo (tan-awa sa 3 Nephi 19:13), ug ang pagdawat sa Espiritu Santo gikinahanglan aron mahimong putli.

Basaha ang mosunod nga mga pamahayag ni Presidente Marion G. Romney sa Unang Kapangulohan, ug pangitaa kon unsay ipasabut nga mahimong putli: “‘Dayon moabut ang bunyag sa kalayo ug sa Espiritu Santo.’ [2 Nephi 31:13.] Kini nga bunyag sa kalayo ug sa Espiritu Santo nga gihisgutan dinhi ni Nephi makaapekto og dakong kausaban diha sa mga kasingkasing sa mga tawo nga gihisgutan ni Alma [tan-awa sa Alma 5:14]. Nagkabig kini nila gikan sa pagka-kalibutanon ngadto sa pagka-espirituhanon. Kini naglimpyo, nag-ayo, ug nagputli sa kalag. … Ang hugot nga pagtuo kang Ginoong Jesukristo, paghinulsol, ug bunyag sa tubig mga pasiuna ug gikinahanglan ngadto niini, apan kini ang katumanan [katapusan]. Ang pagdawat niini mao ang paghugas sa saput pinaagi sa maulaong dugo ni Jesukristo” (Learning for the Eternities, comp. George J. Romney [1977], 133).

4. Pamalandunga unsay gipasabut nga mahimong putli, ug tubaga ang mosunod nga pangutana diha sa imong scripture study journal: Sa unsa nga paagi nga ang pagpakita og pagtuo kang Jesukristo makatabang nato nga mahimong putli ug limpyo?

Mihalad si Jesus og mahinungdanon nga pag-ampo sa gabii sa Iyang maulaong sakripisyo nga susama kaayo sa mga pag-ampo nga Iyang gihalad taliwala sa mga Nephite sa ikaduhang adlaw sa Iyang pagbisita kanila. Basaha ang 3 Nephi 19:23, 29 ug Juan 17:9, 11, 21–22. Markahi ang mga pulong “nga unta kita magkahiusa.” Pamalandunga kon sa unsa nga paagi nga si Jesukristo ug ang Amahan usa. Unsa ang atong makat-unan gikan niini nga mga bersikulo mahitungod kon unsaon nato nga mahimong usa uban ni Jesukristo?

Usa sa mga baruganan nga gitudlo niini nga mga bersikulo mao nga: Pinaagi sa pagtuo kita mahimong putli ug mahimong usa uban ni Jesukristo, sama nga Siya usa uban sa Amahan. Basaha ang mosunod nga pamahayag gikan ni Elder D. Todd Christofferson sa Korum sa Napulog Duha ka mga Apostoles mahitungod kon sa unsa nga paagi kita mahimong usa uban sa Amahan ug sa Anak: “Sa pagkatinuod dili kita mahiusa sa Dios ug ni Kristo hangtud nga atong himoon ang Ilang kabubut-on ug kagustuhan nga maoy atong pinakadakong tinguha. Ang ingon ka pagkamanunuton dili mahitabo sa usa ka adlaw, apan pinaagi sa Balaang Espiritu, ang Ginoo maoy motudlo kanato kon kita mouyon hangtud sa pagdagan sa panahon, mamahimong tukma ang pag-ingon nga Siya anaa kanato ingon nga ang Amahan anaa Kaniya. Usahay ako mahadlok nga maghunahuna kon unsa ang gikinahanglan, apan ako nasayud nga niini lang nga hingpit nga panaghiusa nga ang hingpit nga kalipay mahimong makit-an.” (“Aron Nga Sila Mausa Ngari Kanato,” Liahona, Nob. 2002, 73).

Tapusa ang pagtuon karong adlawa pinaagi sa pagbasa ug pagpamalandong sa 3 Nephi 19:35–36.

5. Isulat ang mosunod diha sa ubos sa mga buluhaton karong adlawa sa imong scripture study journal:

   Akong natun-an ang 3 Nephi 19 ug nahuman kini nga leksyon niadtong (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: