Moroni 1–5

Pasiuna

Human makompleto ang iyang pagminubo sa mga palid ni Ether, gipasabut ni Moroni nga siya “nagtuo nga dili na mosulat og dugang pa” (Moroni 1:1). Hinoon, napreserbar siya aron “mosulat og dugang nga pipila ka mga butang, nga tingali sila mahimo nga bililhon” niadtong anaa sa katapusang mga adlaw (Moroni 1:4). Gipamatud-an sa Moroni 1–5 ang pagkamatinud-anon ni Moroni ngadto ni Jesukristo. Gitakda usab niini ang mga instruksyon alang sa importante nga mga ordinansa sa ebanghelyo, lakip na ang pagdumala sa sakrament.

Moroni 1

Nagtago-tago si Moroni alang sa kaluwasan sa iyang kinabuhi ug nagpadayon sa iyang mga sinulat

Si Elder David E. Sorenson, usa ka emeritus nga sakop sa Seventy, misaysay sa mosunod nga istorya bahin sa usa ka batan-ong babaye nga dunay kaisug sa pagbarug alang sa iyang mga gituohan:

“Ang akong apo nga babaye nga si Jennifer gidapit nga manihapon ug manan-aw og sine kauban sa pipila sa iyang mga higala sa eskwelahan. Ang tanang batan-ong babaye miuyon sa salida nga ilang tan-awon, ug komportable ra si Jennifer nga motambong. Hinoon, ang batan-ong babaye nga mibiya sa panihapon aron mopalit og mga tiket sa sine alang sa grupo mibalik nga nagdala og mga tiket sa lahi nga salida kay sa unsay naplanuhan! Miingon siya, ‘Nindot kini nga salida, ug R-rated kini.’

“Si Jennifer, kinsa nasurprisa, dili makatuo nga dali ra kaayong nausab ang sitwasyon. Apan maayo na lang kay nakadesisyon na siya sa wala pa siya mabutang niini nga sitwasyon nga dili gayud siya motan-aw og R-rated nga mga salida. Nakahimo siya sa pagbarug nga lig-on ug miingon sa iyang mga higala, ‘Dili ko makakuyog sa pagtan-aw og R-rated nga salida. Dili mosugot ang akong mga ginikanan.’ Diin mitubag ang mga batan-ong babaye, ‘Ah, sige na! Dili bitaw mahibalo ang imong mga ginikanan!’ Nag-atubang niini, mipadayon si Jennifer sa pag-ingon, ‘Kanang, sa tinuod lang dili igsapayan kon mahibalo ang akong mga ginikanan. Dili lang gyud ko motan-aw og R-rated nga mga salida!’

“Nasagmuyo ang iyang mga higala ug misulay sa pagpugos kaniya. Ila siyang giingnan nga siya ang ‘miguba sa tanan.’ Sa dihang wala gayud siya magpadala, ilang gilabay ang tiket ug sukli sa iyang nawong ug mibiya niya aron motan-aw og R-rated nga salida. Nahimo kadtong usa ka magul-anong kagabhion nga puno sa pagsalikway gikan sa iyang mga higala. Apan usa kadto ka talagsaong higayon alang ni Jennifer ug sa among pamilya. Nakabaton siya og pagsalig, bili sa kaugalingon, ug espirituhanong gahum” (“You Can’t Pet a Rattlesnake,” Ensign, Mayo 2001, 42).

Basaha ang Moroni 1:1–3, ug pangitaa kon giunsa ni Moroni nga nag-inusarang nagbarug alang sa iyang mga gituohan. Sila si Moroni ug ang apo nga babaye ni Elder Sorensen nagpakita sa mga paagi diin ang mga indibidwal makapili sa pagbarug alang sa unsay ilang nahibaloan nga matarung. Ikaw usab makahimo og daw ginagmay nga mga desisyon kada adlaw nga nagpakita sa imong hugot nga pagtuo, pagkamasulundon, ug tinguha nga mosunod kang Kristo.

Isulat sa imong scripture study journal ang bahin sa usa ka panahon sa dihang ikaw mipili nga mobarug alang sa imong mga gituohan o mipakita sa imong hugot nga pagtuo pinaagi sa pagkamasulundon.

Hunahunaa kon sa unsang paagi nga mas makabarug ka alang sa imong pagtuo kang Jesukristo. Basaha ang Moroni 1:4 aron madiskubrihan kon nganong gipili ni Moroni nga magsulat pa og dugang. Unsa ang atong makat-unan gikan sa ehemplo ug kadasig ni Moroni nga magsulat pa og dugang ngadto sa mga kaliwatan niadtong nagtinguha sa iyang kinabuhi? Unsa man unta ang imong isulat sa kaugalingon nimong mga kaliwatan nga mahimong usa ka panalangin ngadto kanila? Samtang magtuon ka sa Moroni 2–5, ikonsiderar kon sa unsang paagi nga ang mga butang nga gipili nga isulat ni Moroni “bililhon” nganha kanimo (Moroni 1:4).

Moroni 2

Girekord ni Moroni ang mga instruksyon bahin sa pagtugyan sa gasa sa Espiritu Santo

Hunahunaa ang imong kasinatian nga nakumpirmahan nga usa ka miyembro sa Simbahan ug dunay mipandong sa ilang mga kamot diha sa imong ulo aron madawat nimo ang gasa sa Espiritu Santo. Unsa ang imong mahinumduman bahin niini nga ordinansa? Basaha ang Moroni 2:1–3, ug ikonsiderar kon sa unsang paagi nga ang gasa sa Espiritu Santo nahimong usa ka panalangin sa imong kinabuhi.

Usa ka kamatuoran sa ebanghelyo nga gitudlo niining mga bersikulo mao kini: Ang takus nga mga miyembro nga naghupot og tukma nga awtoridad sa priesthood makahatag sa gasa sa Espiritu Santo sa nabunyagan nga mga miyembro pinaagi sa pagpandong sa mga kamot.

Moroni 3

Girekord ni Moroni ang mga instruksyon bahin sa pag-orden sa mga indibidwal ngadto sa mga priesthood office

Nakakita ka na ba og rekord sa linya sa awtoridad sa priesthood sa usa ka tawo? Kini nga rekord nagpakita kinsa ang nag-orden sa usa ka indibidwal ngadto sa priesthood ug kinsa ang mi-orden niana nga tawo ug balik ngadto kang Jesukristo. Tingali ikaw dunay kopya sa imong kaugalingong linya sa awtoridad sa priesthood o nakakita og usa nga iya sa imong igsoong lalaki o amahan. Hunahunaa ang kamahinungdanon nga makasubay sa linya sa awtoridad direkta ngadto kang Jesukristo samtang magbasa ka sa mosunod nga pamahayag gikan ni Elder Jeffrey R. Holland sa Korum sa Napulog Duha ka mga Apostoles:

“Klaro, nga ang pagbuhat nga may balaanong awtoridad nagkinahanglan og labaw pa kay sa pagsabut-sabut sa mga tawo. Dili kini makuha pinaagi sa teyolohikal nga pagtuon o tinudlo sa kongregasyon. Dili, diha sa gitugutan nga buhat sa Dios kinahanglan adunay gahum nga mas dako pa kay sa niadtong naangkon na niadtong mga tawo nga anaa sa kongregasyon o anaa sa kadalanan o anaa sa seminaryo—kamatuoran nga dugay nang nahibaloan sa daghang matinuoron nga relihiyusong mga tigpangita ug bukas nga giila sulod sa mga henerasyon padulong ngadto sa Pagpahiuli. …

“… Kita dinhi sa gipahiuli nga Simbahan ni Jesukristo makasubay sa linya sa awtoridad sa priesthood nga gihuptan sa pinakabag-o nga deacon sa ward, sa bishop nga nangulo kaniya, ug sa propeta nga nangulo kanatong tanan. Kana nga linya masubay sa walay pagkaputol nga kadena ngadto sa mga anghel nga mianhi gikan sa Anak sa Dios Mismo, nga nagdala niining dili hitupngang gasa gikan sa langit” (“Ang Atong Talagsaong Hiyas,” Ensign o Liahona, Mayo 2005, 44).

Ang matag tawo nga nakadawat sa Aaronic o Melchizedek priesthood gi-ordinahan usab ngadto sa usa ka priesthood office nga naglakip sa piho nga mga katungdanan. Basaha ang Moroni 3:1–4, ug pangitaa kon sa unsang paagi nga ang mga indibidwal naordinahan ngadto sa mga priesthood office, lakip na ang office sa priest o teacher.

Mahimo nimong isulat ang mosunod nga kamatuoran diha sa imong mga kasulatan tupad niining mga bersikulo: Ang mga indibidwal ordinahan ngadto sa mga priesthood office pinaagi sa pagpandong sa mga kamot niadtong dunay awtoridad.

Tubaga ang mosunod nga mga pangutana diha sa imong scripture study journal:
1. Ngano kaha nga gikinahanglan man nga ang usa ka indibidwal maordinahan ngadto sa priesthood office pinaagi sa usa ka tawo nga naghupot na og priesthood?
2. Sa unsang paagi nga ang pagbaton og awtoridad sa priesthood diha sa Simbahan o sa inyong pamilya bililhon nganha kanimo?

Moroni 4–5

Gipasabut ni Moroni kon sa unsang paagi ipahigayon ang sakrament

Hunahunaa ang mga simbolo sa sakrament ug ang imong kasinatian sa pag-ambit sa sakrament. Dayon buhata ang mosunod diha sa imong scripture study journal:
1. Kutob sa imong mahinumduman, isulat ang usa sa mga pag-ampo sa sakrament, alang sa pan o alang sa tubig.
2. Human maribyu kining sagradong mga pag-ampo (tan-awa sa Moroni 4:3; 5:2) ug masusi kon unsay imong gisulat sa unang bahin niining assignment, pagsulat bahin sa usa ka parte sa mga pag-ampo sa sakrament nga mas nakapatandog nimo, ug ipasabut ngano nga kana nga porsyon sa pag-ampo makahuluganon nganha nimo.

Gilakip ni Moroni ang mga pag-ampo alang sa pagdumala sa sakrament diha sa iyang rekord tungod kay gibati niya nga kini “bililhon” sa mga tawo “sa umaabut nga adlaw” (Moroni 1:4). Basaha ang Moroni 4:1–3 ug 5:1–2, ug hibaloi ang mga pulong nga nagpasabut sa unsay girepresentar sa pan ug tubig sa sakrament. Samtang magbasa ka, mahimong makatabang kini nga hinumduman nga karon ang Simbahan naggamit og tubig diha sa sakrament imbis nga bino isip resulta sa pinadayag nga gihatag ngadto kang Propeta Joseph Smith (tan-awa sa D&P 27:2).

I-summarize ang katuyoan sa sakrament pinaagi sa pagkompleto niini nga pamahayag: Ang mga simbolo sa sakrament makatabang nga atong mahinumduman.

Pamalandunga nganong ang lawas ug dugo sa Manluluwas mahinungdanon nganha kanimo.

Ang pisikal nga pag-antus, kamatayon, ug Pagkabanhaw sa lawas sa Manluluwas ug sa Iyang hilabihan nga espirituhanong pag-antus, nga gipamatud-an pinaagi sa pag-agas sa Iyang dugo, nakapahimong posible sa kapasayloan sa mga sala alang sa tanang katawhan nga mopakita og hugot nga pagtuo diha Kaniya ug maghinulsol. Ang mga simbolo sa sakrament makatabang nato nga mahinumdom sa Pag-ula ni Jesukristo.

Tubaga ang usa o duha ka mga pangutana diha sa imong scripture study journal:
1. Sa unsang paagi nga ang sinserong pagpamalandong sa Pag-ula sa Manluluwas atol sa sakrament nakatabang o nakapalig-on kanimo sa espirituhanong paagi?
2. Unsa ang imong mahimo aron mas maka-focus sa paghinumdom sa Pag-ula sa Manluluwas atol sa sakramentt?

Aron matabangan ka nga masabtan kon unsay imong gisaad nga buhaton samtang nag-ambit ka sa sakrament, ribyuha ang Moroni 4:3 ug kompletuha ang mosunod nga tsart:

Unsay akong gisaad nga buhaton	Unsa sa akong hunahuna ang buot ipasabut sa pagtuman niining bahina sa pakigsaad	Unsay akong mabuhat aron mas matuman kining bahina sa pakigsaad
1.
2.
3.

Ato usab nga nakat-unan gikan sa Moroni 4:3 nga samtang matinud-anon kitang nagtuman sa atong bahin sa pakigsaad sa sakrament, kita sa kanunay makabaton sa Espiritu sa Ginoo uban kanato.

Samtang magbasa ka sa mosunod nga pamahayag gikan ni Elder David A. Bednar sa Korum sa Napulog Duha ka mga Apostoles, hunahunaa kon giunsa nimo pagsinati ang gasa sa Espiritu Santo sa mga paagi nga iyang gihisgutan: “Ang Espiritu sa Ginoo mahimo natong giya ug mopanalangin kanato sa paggiya, panudlo, ug espirituhanong proteksyon panahon sa atong mortal nga panaw” (“Nga Kita Unta sa Kanunay Makabaton sa Iyang Espiritu Uban Kanato,” Ensign o Liahona, Mayo 2006, 31).

Pamalandunga ang Pag-ula sa Manluluwas samtang mag-ambit ka sa sakrament sa Dominggo. Sulayi pagtuman ang mga bahin sa pakigsaad nga imong natino diha sa tsart aron sa kanunay makabaton ka sa Espiritu sa Ginoo uban kanimo.

Isulat ang mosunod diha sa ubos sa mga buluhaton karong adlawa sa imong scripture study journal:

Akong natun-an ang Moroni 1–5 ug nahuman kini nga leksyon niadtong (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: