Unit 8: Day 4

2 Nephi 31

Pasiuna

Si Nephi mitudlo sa doktrina ni Kristo: kinahanglan kitang mopakita og hugot nga pagtuo kang Jesukristo, maghinulsol sa atong mga sala, magpabunyag, modawat sa Espiritu Santo, ug molahutay hangtud sa katapusan. Siya usab mipamatuod nga samtang atong gamiton kining mga pagtulun-an, ang Dios mopanalangin kanato og pakig-uban sa Espiritu Santo ug mogiya kanato ngadto sa kinabuhing dayon.

2 Nephi 31:1–21

Si Nephi nagtudlo nga ang Manluluwas mihimo sa hingpit nga ehemplo alang kanato

Si Jesus miadto ni Juan Bautista aron magpabunyag. Tungod kay si Jesus walay nabuhat nga bisan unsang sala, ngano kaha nga gibunyagan Siya? Nganong gibunyagan man ka? Ang pagpamalandong niini nga mga pangutana makatabang kanimo sa pagpangandam alang niini nga leksyon.

Basaha ang 2 Nephi 31:2, 21, ug markahi ang mga pulong nga “doktrina ni Kristo.” Timan-i nga sa bersikulo 2, si Nephi miingon nga siya “kinahanglan nga mamulong mahitungod sa doktrina ni Kristo.” Dayon diha sa bersikulo 21 miingon siya nga iyang gipamulong ang “doktrina ni Kristo.” Sa 2 Nephi 31:3–20 nakakat-on kita mahitungod sa mga kamatuoran nga gitawag ni Nephi og “ang doktrina ni Kristo.” Duha ka mga kamatuoran nga atong nakat-unan mao ang: Si Jesukristo mituman sa tanang pagkamatarung pinaagi sa pagsunod sa mga sugo sa Amahan, ug kinahanglan kitang mosunod sa ehemplo sa pagkamasulundon ni Jesukristo pinaagi sa pagpabunyag ug sa pagdawat sa Espiritu Santo.

1. Isulat ang mosunod nga mga ulohan diha sa magkatapad nga kolum sa imong scripture study journal: Mga Rason Nganong Gibunyagan si Jesus ug Mga Rason Nganong Kita Bunyagan. Dayon basaha ang 2 Nephi 31:4–12, ug ilista ang imong nakat-unan ubos sa matag usa niadto nga mga ulohan.

Sumala sa 2 Nephi 31:11, unsa ang kinahanglang mag-una sa bunyag?

Aron makatabang sa pagpasabut nganong gikinahanglan ang bunyag pinaagi sa tubig, basaha ang mosunod nga pamahayag ni Propeta Joseph Smith: “Ang bunyag usa ka timailhan ngadto sa Dios, ngadto sa mga anghel, ug ngadto sa langit nga kita mobuhat sa kabubut-on sa Dios, ug walay laing paagi ubos sa kalangitan diin ang Dios mi-ordinar sa tawo sa pagduol ngadto Kaniya ug maluwas, ug sa pagsulod ngadto sa gingharian sa Dios, gawas sa hugot nga pagtuo diha ni Jesukristo, paghinulsol, ug bunyag alang sa kapasayloan sa mga sala, ug ang bisan unsang lain nga mga paagi makawang; dayon kamo makaangkon sa saad sa gasa sa Espiritu Santo” (Mga Pagtulun-an sa mga Presidente sa Simbahan: Joseph Smith [2007], 108).

2. Hunahunaa nga ang usa ka higala kinsa dili miyembro sa Simbahan nangutana kanimo nganong importante kaayo ang bunyag. Isulat kon unsaon nimo pagtubag diha sa imong scripture study journal.

3. Isulat sa imong scripture study journal kon sa unsang paagi ang pagsunod sa ehemplo ni Jesukristo pinaagi sa pagpabunyag nakaimpluwensya ug nakapanalangin sa imong kinabuhi.

Daghan pa kitang buhaton human kita mabunyagan. Basaha ang 2 Nephi 31:13, ug markahi ang mga pulong nga naghulagway sa kinaiya nga gikinahanglan sa usa ka tawo samtang nagsunod sila sa ehemplo sa Manluluwas.

Sumala sa 2 Nephi 31:13, kon motuman kita sa atong mga pakigsaad uban ang hingpit nga katuyoan sa kasingkasing ug uban sa tinuod nga katuyoan, unsa ang gisaad kanato sa atong Amahan sa Langit agi og balos? (Mahimo nimo kining markahan sa imong mga kasulatan.) Basaha ang katapusang mga pulong sa 2 Nephi 31:17, ug hibaloi nganong gikinahanglan natong makadawat sa Espiritu Santo. Diha sa luna nga giandam, pagsulat og usa ka doktrinal nga pamahayag o usa ka baruganan nga gibase sa kasulatan nga nagpasabut kon unsa ang buhaton sa Espiritu Santo alang kanato.

Ang kalayo gamiton sa pagpalunsay sa mga materyales sama sa mga metal. Mosunog kini sa mga kahugaw, nga mas limpyo nga materyal ang mahabilin. Susama kini sa unsay mahitabo kanato sa espirituhanong paagi kon modawat kita sa gasa sa Espiritu Santo. Nailhan usab kini isip ang “bunyag sa kalayo” (tan-awa sa 2 Nephi 31:13). Ang Espiritu Santo mosaksi sa Amahan ug sa Anak ug magdala og kapasayloan sa mga sala. Si Presidente Marion G. Romney sa Unang Kapangulohan mitudlo, “Kini nga bunyag sa kalayo ug sa Espiritu Santo … naglimpyo, nag-ayo, ug naglunsay sa kalag” (Learning for the Eternities, comp. George J. Romney [1977], 133).

Aron mangita og laing bahin sa “doktrina ni Kristo,” basaha ang 2 Nephi 31:15–16, ug i-highlight ang imong nakit-an. Ikonektar ang mga pulong nga imong nadiskubrihan diha sa 2 Nephi 31:13 ngadto sa instruksyon nga gihatag diha sa 2 Nephi 31:15–16, ug hunahunaa kon unsaon nimo sa paglahutay hangtud sa katapusan uban sa “tinuod nga katuyoan” ug “hingpit nga katuyoan sa kasingkasing.”

4. Tubaga ang mosunod nga mga pangutana diha sa imong scripture study journal:

   1. Sa unsang paagi ang mga pulong nga “uban ang hingpit nga katuyoan sa kasingkasing,” “sa walay pagpakaaron-ingnon”, ug “uban sa tinuod nga katuyoan” magamit sa mga kalihokan sama sa inadlaw-adlaw nga pagtuon sa kasulatan o pagtambong sa Simbahan?

   2. Unsay kalainan tali sa tawo nga “mosulti sa ilang mga pag-ampo” ug sa tawo nga mag-ampo “uban ang hingpit nga katuyoan sa kasingkasing”?

   3. Unsay kalainan tali sa tawo nga “moambit sa sakrament” ug sa tawo nga moambit sa sakrament “uban sa tinuod nga katuyoan”?

Basaha ang 2 Nephi 31:18, ug tan-awa kon asa na kita human kita moagi sa ganghaan sa paghinulsol ug bunyag. Kon mopakita kita og hugot nga pagtuo, maghinulsol, mabunyagan, ug modawat sa Espiritu Santo, misulod kita sa “higpit ug pig-ot nga dalan.” Ang higpit nagpasabut nga pig-ot, estrikto, mapiuton, ug walay pagtipas. Sumala sa 2 Nephi 31:18, unsaon nato pagkahibalo kon anaa kita sa higpit ug pig-ot nga dalan?

Ang pagsinati sa gasa sa Espiritu Santo dili lamang usa ka nindot nga pagbati nga atong madawat matag karon ug unya. Ang pagpakig-uban sa Espiritu Santo maoy usa ka saksi gikan sa Dios nga kita anaa sa dalan padulong sa kinabuhing dayon.

5. Tubaga ang mosunod nga mga pangutana diha sa imong scripture study journal:

   1. Sa unsang paagi ang pagpakig-uban sa Espiritu Santo mitabang kanimo nga magpabilin diha sa higpit ug pig-ot nga dalan?

   2. Unsa ang ubang mga paagi nga mipanalangin ang Espiritu Santo sa imong kinabuhi?

Pagmarka sa mga Lista

Kon makakita ka og mga lista sa mga kasulatan, mahimo nimo kining markahan aron sa pagtabang kanimo nga makasabut unsa ang gitudlo sa Ginoo ug sa Iyang mga propeta. Ang pagnumero sa matag item makatabang kanimo nga daling makakita sa matag usa diha sa teksto. Ang pagpili og yano nga ngalan alang sa lista ug pagnumero sa matag item makatabang kanimo nga daling makakita sa matag usa ug makatabang kanimo sa paghinumdom sa imong nakat-unan.

Basaha ang 2 Nephi 31:19–21, ug paghimo og lista pinaagi sa pagnumero diha sa imong mga kasulatan sa mga butang nga kinahanglan natong buhaton aron magpabilin diha sa dalan. (Timan-i nga ang 2 Nephi 31:19–20 usa ka scripture mastery passage. Mahimo nimo kining markahan sa lahi nga paagi aron makit-an nimo kini sa umaabut.)

6. Sa imong scripture study journal, pagsulat og usa ka sentence nga naghulagway kon unsay kahulugan sa kanimo nga “mopadayon sa unahan uban ang pagkamakanunayon kang Kristo” (2 Nephi 31:20).

Diha sa mga luna nga giandam, i-summarize ang 2 Nephi 31:19–20 pinaagi sa usa ka pamahayag sa baruganan:

Kon kita , niana kita . (Mahimo nimo kining isulat sa imong mga kasulatan.)

Si Elder Russell M. Nelson sa Korum sa Napulog Duha ka mga Apostoles mihatag niining malaumon nga tambag niadtong mibati nga sila nahisalaag gikan sa higpit ug pig-ot nga dalan: “Sa inyong panaw sa kinabuhi, makasugat kamo og daghang mga babag ug makahimo og pipila ka mga sayop. Ang giya gikan sa pagbasa sa mga kasulatan makatabang kaninyo sa pag-ila sa sayop ug sa paghimo sa gikinahanglang pagkorihir. Mohunong kamo sa pagpadulong sa sayop nga direksyon. Mainampingon ninyong tun-an ang mga kasulatan. Dayon mopadayon ngadto sa paghinulsol ug pag-uli [restitution] nga gikinahanglan aron maanaa sa ‘higpit ug pig-ot nga dalan nga mopadulong sa kinabuhi nga dayon’ [2 Nephi 31:18]” (”Living by Scriptural Guidance,” Ensign, Nob. 2000, 17).

Pamalandungi kon sa unsang paagi kini nga pamahayag ug ang mga kasulatan nga imong gitun-an karon nagdala kanimo og “kahayag sa paglaum” (2 Nephi 31:20).

Scripture Mastery—2 Nephi 31:19–20

7. Paggahin og lima ka minuto nga maningkamot sa pagsag-ulo sa 2 Nephi 31:20. Pasulayi sa usa ka sakop sa pamilya o higala ang imong kahibalo sa kasulatan, o mahimo nimong tabunan sa imong kamot ang bersikulo ug sulayan kini sa pag-recite nga dili motan-aw niini. Sulayi ang pagsulat sa bersikulo gikan sa panumduman diha sa imong scripture study journal.

8. Gamit ang 2 Nephi 31:20, pagpili og usa sa mga butang nga kinahanglan natong buhaton aron magpabilin sa husto nga dalan nga maayo nimong gibuhat. Dayon pagsulat og usa ka paghulagway sa imong scripture study journal kon giunsa nimo kini pagbuhat. Dayon pagpili og usa ka aspeto nga gusto ka nga molambo, ug isulat kon unsaon nimo kini pagbuhat.

Komentaryo ug Background nga Impormasyon

Unsaon nato paglikay sa pagpakaaron-ingnon?

Si Nephi mipasidaan batok sa pagpakaaron-ingnon diha sa 2 Nephi 31:13. Ang pagpakaaron-ingnon nagpasabut nga magpatuo-tuo o molihok aron makita sa uban apan wala maghulagway sa atong tinuod nga pagkatawo. Si Elder Joseph B. Wirthlin sa Korum sa Napulog Duha ka mga Apostoles namulong kabahin sa paglihok nga walay pagpakaaron-ingnon:

“Tinud-anay ba kita nga nagsunod sa ebanghelyo, o nagpakita lang sa dagway sa pagkamatarung aron kadtong naglibut kanato magtuo nga kita matinud-anon bisan kon, sa pagkatinuod, ang tinud-anay natong mga pagbati ug dili makitang mga binuhatan wala magsubay sa mga pagtulun-an sa Ginoo?

“Nagbaton lang ba kita sa ‘hulagway sa pagkadiosnon’ samtang nanghimakak sa ‘gahum niana’ [tan-awa sa Joseph Smith—Kasaysayan 1:19]?

“Tinud-anay ba kitang matarung, o nagpakaaron-ingnon lang ba kita nga masulundon kon sa atong hunahuna adunay nagtan-aw?

“Giklaro sa Ginoo nga dili Siya mailad sa mga panagway, ug mipasidaan Siya kanato nga dili manglimbong Kaniya o sa uban. Mipasidaan Siya kanato nga magmabinantayon niadtong nagpakita og mini nga imahe, nga adunay matarung nga panagway sa gawas nga nagtago sa ilang dautan nga kinaiya. Nasayud kita nga ang Ginoo ‘nagatan-aw sa kasingkasing’ ug dili sa ‘panagway sa gawas’ [tan-awa sa 1 Samuel 16:7]” (“True to the Truth,” Ensign, Mayo 1997, 15–16).

Unsaon nato sa “paglahutay hangtud sa katapusan”?

Ang mga pulong nga “molahutay hangtud sa katapusan” (2 Nephi 31:16) kanunay nga gigamit sa pagsugyot sa panginahanglan nga mapailubong moantus sa mga kalisdanan sa tibuok natong kinabuhi. Si Elder Joseph B. Wirthlin mipasabut nga ang paglahutay hangtud sa katapusan nagpasabut usab nga mopadayon sa pagkamatinud-anon kang Kristo hangtud sa katapusan sa atong kinabuhi:

“Ang paglahutay hangtud sa katapusan mao ang doktrina sa pagpadayon diha sa agianan paingon sa kinabuhing dayon human nga ang usa ka tawo misulod ngadto sa agianan pinaagi sa pagtuo, paghinulsol, bunyag, ug pagdawat sa Espiritu Santo. Ang paglahutay hangtud sa katapusan nanginahanglan sa atong tibuok kasingkasing. …

“Ang paglahutay hangtud sa katapusan nagpasabut nga maayo natong pagkatisok ang atong mga kinabuhi diha sa mga doktrina sa Ebanghelyo, nagtuman sa gidawat nga mga doktrina sa Simbahan, mapainubsanong nagserbisyo sa atong isigkatawo, nagpuyo og mga kinabuhi nga sama kang Kristo, ug nagtuman sa atong mga pakigsaad. Kadtong molahutay balansyado, mapadayunon, mapainubsanon, kanunayng naglambo, ug walay pagkamalimbungon. Ang ilang pagpamatuod wala gibase sa kalibutanon nga mga rason—gibase kini sa kamatuoran, kahibalo, kasinatian, ug sa Espiritu” (“Magpadayon,” Liahona, Nob. 2004, 101).

9. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang 2 Nephi 31 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: