Mosiah 28–29

Pasiuna

Human sa ilang pagkakabig, ang mga anak nga lalaki ni Mosiah mibati og dakong tinguha sa pagsangyaw sa ebanghelyo ngadto sa mga Lamanite. Si Haring Mosiah misuporta sa ilang desisyon, apan wala nay nabilin kaniya nga usa ka sumusunod sa iyang trono ug tig-atiman sa mga rekord sa kasulatan. Iyang gihatag kang Alma (anak nga lalaki ni Alma) ang responsibilidad alang sa mga rekord. Imbis nga motudlo og lain nga hari, mi-establisar siya og sistema sa mga maghuhukom isip bag-ong matang sa pangagamhanan.

Mosiah 28:1–9

Ang mga anak nga lalaki ni Mosiah nagtinguha sa pagsangyaw ngadto sa mga Lamanite

Tupad sa matag pamahayag sa ubos, graduhi ang imong mga tinguha sa mosunod nga mga aspeto. Paggamit og sukdanan nga gikan 1 ngadto 10 (ang 1 nagpasabut nga “walay tinguha,” ug ang 10 nagpasabut og “hilabihan ka dako nga tinguha”).

Aduna koy sinsero nga tinguha sa pagtabang sa uban nga makakaplag og mahangturong kalipay.
Andam ko nga mosakripisyo aron sa pagtabang sa uban.
Aduna koy tinguha sa pagpakigbahin sa ebanghelyo ngadto sa uban.
Kon batan-on ka nga lalaki, timbang-timbanga ang imong tinguha nga moserbisyo og full-time nga misyon. (Kon batan-on ka nga babaye, mahimo usab kang mopili sa pagtimbang-timbang sa imong mga tinguha.)

Ribyuha ang Mosiah 27:8–10, ug hibaloi kon unsa kaha ang grado ni Alma ug sa anak nga mga lalaki ni Mosiah sa mga pamahayag sa ibabaw sa wala pa sila makabig.

Karon basaha ang Mosiah 28:1–3, ug hibaloi kon sa unsang paagi nausab ang anak nga mga lalaki ni Mosiah sa mga aspeto nga gihisgutan sa ibabaw. Samtang magbasa ka, hinumdumi nga ang pulong nga malaglag nagpasabut nga mawala sa espirituhanong paagi.

Isulat ang imong mga tubag sa mosunod nga mga pangutana:

Ngadto kang kinsa gustong mopakigbahin sa ebanghelyo ang anak nga mga lalaki ni Mosiah?

Gikan sa unsay imong natun-an diha sa Basahon ni Mormon hangtud karon, unsa nga mga kalisud o peligro ang posibleng masugatan sa anak nga mga lalaki ni Mosiah sa ilang misyon ngadto sa mga Lamanite?

Basaha ang Mosiah 28:4, ug ikonsiderar kon unsaon nimo pagsulti niini sa imong kaugalingong mga pulong. Timan-i kon sa unsang paagi ang pagkakabig sa anak nga mga lalaki ni Mosiah miimpluwensya sa ilang tinguha sa pagpakigbahin sa ebanghelyo. Sa Mosiah 28:1–4 atong nakat-unan ang baruganan: Samtang nagkalawom ang atong pagkakabig, ang atong tinguha sa pagpakigbahin sa ebanghelyo magkadako.

Basaha ang mosunod nga pamahayag gikan ni Elder Dallin H. Oaks sa Korum sa Napulog Duha ka mga Apostoles (mahimo nimo kining isulat diha sa margin sa imong mga kasulatan tupad sa Mosiah 28:1–4): “Ang gikusgon sa atong tinguha sa pagpakigbahin sa ebanghelyo maoy usa ka mahinungdanon nga timailhan sa gilawumon sa atong personal nga pagkakabig” (“Sharing the Gospel,” Ensign, Nob. 2001, 7).

Sa unang sentence sa Mosiah 28:4, markahi kon sa unsang paagi ang anak nga mga lalaki ni Mosiah naimpluwensyahan diha sa ilang tinguha sa pagpakigbahin sa ebanghelyo. Timan-i nga ang Espiritu sa Ginoo adunay importante nga tahas sa pagpadako sa atong tinguha sa pagpakigbahin sa ebanghelyo.

Tubaga ang usa sa mosunod nga mga pangutana diha sa imong scripture study journal:
1. Sa unsang paagi ang imong tinguha sa pagpakigbahin sa ebanghelyo midako samtang imong napalig-on ang imong pagpamatuod?
2. Unsa nga mga kasinatian sa imong kinabuhi ang nakahimo kanimo nga ganahang mopakigbahin sa ebanghelyo ngadto sa uban?
3. Kon wala ka mobati nga aduna kay dakong tinguha sa pagpakigbahin sa ebanghelyo niining higayona, unsay imong mabuhat aron mapalig-on kana nga tinguha? (Basaha ang Alma 17:2–3.)

Hunahunaa ang usa ka batan-ong lalaki nga miyembro sa Simbahan apan gamay ra o walay tinguha sa pagserbisyo og full-time nga misyon. Sa imong scripture study journal, paghimo og sulat ngadto kaniya, nga magsugyot og unsay iyang mabuhat aron madugangan ang iyang tinguha sa pagpakigbahin sa ebanghelyo. Mahimo nimong hinumduman kon unsay nakapalawom sa imong pagkakabig ngadto sa ebanghelyo ni Jesukristo ug mosugyot og susama nga mga kalihokan o mga kasinatian alang niining batan-ong lalaki. Hinumdumi samtang magsulat ka nga ang mas mahinungdanon nga pagkakabig mosangpot ngadto sa mas dakong tinguha sa pagpakigbahin sa ebanghelyo ngadto sa uban.

Samtang magpadayon ka sa imong pagtuon sa Mosiah 28, hunahunaa kon unsay imong bation kon ang usa ka tawo nga imong gihigugma gustong mopuyo taliwala sa mapintas nga mga tawo kinsa nasilag niadtong dili sama kanila. Basaha ang Mosiah 28:5–9, ug hibaloi kon nganong gitugutan ni Mosiah ang iyang mga anak anak nga mga lalaki nga mohimo sa ingon ka makuyaw nga misyon. Diha sa basahon ni Alma, makakat-on ka mahitungod sa “daghan [nga] motuo diha sa ilang mga pulong” (Mosiah 28:7)—ang liboan ka mga Lamanite nga nakabig isip resulta sa mga paningkamot sa anak nga mga lalaki ni Mosiah.

Mosiah 28:10–20

Si Mosiah mihubad sa mga palid sa Jaredite ug mihatag sa tanang mga rekord nga iyang gitipigan ngadto ni Alma

Ang sumpay sa Mosiah 28 nagrekord nga si Haring Mosiah nagkatigulang na ug mibati sa panginahanglan nga mopili sa sunod nga tig-atiman sa sagrado nga mga rekord sa dili pa siya mamatay. Sa nangaging duha ka mga henerasyon, ang hari mihatag sa mga palid ngadto sa sunod nga hari. Apan tungod kay ang mga anak nga lalaki ni Haring Mosiah miadto og mga misyon, wala siyay anak nga lalaki nga mopanunod sa trono ug busa walay tig-atiman sa mga rekord. Gilakip niini nga mga rekord ang Jaredite nga mga palid, nga gihubad ni Mosiah pinaagi sa gahum sa Dios (tan-awa sa Mosiah 28:11–19).

Kon kinahanglan kang mopili og usa ka tawo nga moatiman sa sagradong mga rekord, unsa nga mga kinaiya ang gusto nimo nga anaa nianang tawhana?

Ihulagway kon unsay imong bation kon adunay tawo nga mipili kanimo nga mo-atiman sa mga palid.

Basaha ang Mosiah 28:20, ug pangitaa ang ngalan sa tawo nga gipili ni Mosiah nga maoy mo-atiman sa mga palid.

Isulat sa imong scripture study journal kon unsay gitudlo kanimo sa desisyon ni Haring Mosiah mahitungod sa kausaban sa kasingkasing ni Alma. (Aron matubag kini nga pangutana, mahimo nimong ribyuhon ang miaging mga buhat ni Alma, nga narekord sa Mosiah 27.) Usab, ipasabut kon sa unsang paagi ang pagsalig ni Mosiah kang Alma makahatag og paglaum niadtong naghinulsol.

Mosiah 29

Ang katawhan ni Mosiah mipili og usa ka sistema sa mga maghuhukom isip usa ka bag-ong matang sa pangagamhanan

Sumala sa narekord sa Mosiah 29, si Haring Mosiah misugyot nga ang pangagamhanan nga Nephite dili na kinahanglang pagadumalahon sa usa ka hari, apan sa usa ka sistema sa mga maghuhukom. Basaha ug itandi ang Mosiah 23:7–8 ug Mosiah 29:13, 16–18. Sumala niini nga mga kasulatan, ubos sa unsa nga mga kahimtang o kondisyon nga ang usa ka monarkiya (gidumala sa usa ka hari o rayna) usa ka maayo nga matang sa pangagamhanan? Nganong mitambag man si Mosiah sa mga Nephite batok sa pagpadayon sa ilang monarkiya?

Basaha ang Mosiah 29:11, 25, ug lingini ang mosunod nga mga tubag nga nagpasabut kon unsay gisulti ni Mosiah mahitungod sa paagi nga ang mga maghuhukom mohukom sa katawhan: (a) uban sa dako nga kalooy, (b) sumala sa mga balaod, (c) sumala sa mga sugo sa Dios, (d) uban sa kahigpit.

Basaha ang Mosiah 29:26, 30, 33–34, 37–38, ug diskubrihi ang tahas sa katawhan diha sa bag-ong matang sa pangagamhanan nga gisugyot ni Haring Mosiah.

Isulat sa imong scripture study journal nganong mituo ka nga importante alang sa matag lumulupyo sa usa ka nasud nga “mopas-an sa iyang bahin” sa pagserbisyo sa iyang nasud (Mosiah 29:34).

Si Alma gitudlo nga mahimong unang labaw nga maghuhukom, ug gituman niya ang iyang tahas diha sa pagkamatarung (tan-awa sa Mosiah 29:41–43).

Sa imong kaugalingong mga pulong, pagsulat og usa ka baruganan nga imong nakat-unan gikan sa Mosiah 29:

Usa ka baruganan nga gitudlo niini nga kapitulo mao ang: Ang matag tawo adunay katungdanan sa pagsuporta sa matarung nga mga balaod ug mga lider.

Isulat sa imong scripture study journal ang usa ka paagi nga makasuporta ka sa matarung nga mga balaod ug mga lider sa imong nasud.
Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Mosiah 28–29 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: