Alma 59–63

Pasiuna

Misulat si Helaman ngadto ni Kapitan Moroni, nagsulti kaniya mahitungod sa paningkamot sa mga sundalo ug pagpangayo og tabang gikan sa Nephite nga gobyerno. Gikalipay ni Kapitan Moroni ang pagkahibalo mahitungod sa mga kalampusan ni Helaman, apan nasuko siya sa gobyerno sa wala pagpadala og suporta. Misulat si Kapitan Moroni og usa ka pagbadlong ngadto sa labaw nga maghuhukom, si Pahoran. Sa iyang tubag, gisulti ni Pahoran ang usa ka pagsukol batok sa gobyerno. Mimartsa si Moroni sa pagsulong aron tabangan si Pahoran ug gipildi ang mga misukol o mirebelde. Dayon ang mga sundalo nga Nephite nagkahiusa sa pagbuntog sa mga Lamanite. Human sa 14 ka tuig nga gubat, ang mga Nephite may kalinaw na usab sa yuta, nagtugot nga si Helaman ug iyang mga kaigsoonan makatutok sa pagpalig-on sa Simbahan.

Alma 59

Ang mga Nephite nawad-an og usa ka kota, ug si Kapitan Moroni nagsubo tungod sa kadautan sa mga tawo

Dihang nadawat ni Kapitan Moroni ang sulat gikan ni Helaman nga naghulagway sa mga kalampusan sa iyang mga sundalo, si Moroni ug ang iyang mga katawhan naglipay. Mipadala og sulat si Moroni ngadto ni Pahoran, ang lider nga Nephite sa Zarahemla, naghangyo nga padad-an niya og suporta ug probisyon si Helaman. Apan walay suporta nga gipadala. Mao nga, dihang ang mga Lamanite misulong sa siyudad sa Nephihah, ang mga tawo sa Nephihah napugos sa paglayas ug ang mga Lamanite mibuntog sa siyudad.

Basaha ang Alma 59:9–12 aron mahibaloan ang reaksyon ni Moroni sa kadaugan sa mga Lamanite. Ikonsiderar ang pagmarka sa imong mga kasulatan niini nga mga pulong sa Alma 59:9: “labaw pa ka sayon ang pagpanalipod sa dakbayan gikan sa pagkahulog ngadto sa mga kamot sa mga Lamanite kay sa pagkuha pag-usab niini gikan kanila.” Gikan niini nga mga pulong, atong makat-unan kini nga baruganan: Mas sayon ug mas maayo ang pagpabiling matinud-anon kay sa pagbalik sa pagtuo human sa pagkahisalaag.

Tun-i ang mga pulong nga imong gimarkahan diha sa Alma 59:9 ug ang lig-ong baruganan sa nag-una nga paragraph. Tubaga ang mosunod nga mga pangutana diha sa imong scripture study journal:
1. Nganong mas sayon man ang paglikay sa mga pagkaadik sa makadaot nga mga substansya kay sa pagbuntog sa pagkaadik?
2. Nganong mas sayon man ang pagmentinar sa pagpamatuod kay sa pagpabalik niini human kini mawala?
3. Ngano kaha nga mas sayon sa usa ka tawo ang pagpabiling aktibo sa Simbahan kay sa pagbalik sa Simbahan gikan sa pagkadili na aktibo?

Alma 60–62

Nangutana si Moroni kang Pahoran sa hinungdan sa pagpasagad sa gobyerno

Human nabuntog ang siyudad sa Nephihah sa mga Lamanite, nakahukom si Kapitan Moroni nga mosulat og usa ka hangyo ngadto ni Pahoran, ang labaw nga maghuhukom sa Zarahemla. Basaha ang Alma 60:17–24, ug pangitaa ang mga akusasyon nga gihimo ni Moroni mahitungod ni Pahoran ug sa mga tawo sa Zarahemla.

Basaha ang Alma 60:23 pag-usab, ug timan-i ang gipasabut ni Moroni nga limpyuhan pag-una ang “sulod sa sudlanan”. Ang iyang gipasabut mao ang panginahanglan sa paglimpyo sa kurapsyon sa Nephite nga gobyerno ug sa mga tawo niini. Hinoon, kini nga bersikulo magamit usab sa atong kinabuhi. Hunahuna nga nagbutang ka og yuta o lapok sulod sa usa ka baso. Bisan og gihugasan nimo ang gawas sa baso, komportable ka bang moinom gamit ang baso?

Tubaga ang mosunod nga mga pangutana diha sa imong scripture study journal:
1. Kon gihunahuna nato ang atong kaugalingon isip “mga sudlanan,” unsa kaha ang buot ipasabut sa paglimpyo sa sulod sa sudlanan?
2. Ngano nga ang paglimpyo sa sulod sa sudlanan makatabang kanato alang sa mas dako nga pagserbisyo sa gingharian sa Ginoo?

Sumala sa narekord sa Alma 60:33–36, giingnan ni Kapitan Moroni si Pahoran nga magpadala dayon og mga tawo ug mga probisyon para sa iyang mga sundalo ug sa mga sundalo ni Helaman. Kon dili kini buhaton ni Pahoran, miingon si Moroni nga magpadala siya og pwersa sa sundalo ngadto sa Zarahemla ug pugson siya sa paghimo niining mga butanga. Nadawat ni Pahoran ang sulat ni Moroni ug misulat dayon siya og balik kaniya. Basaha ang Alma 61:1–5 aron mahibaloan unsa ang nanghitabo sa Zarahemla.

Basaha ang Alma 61:9–14, ug hunahunaa kon giunsa sa pagtubag ni Pahoran ang mga akusasyon ni Moroni. Hunahunaa ang pagmarka sa mga pamahayag nga nagtug-an sa katalagsaon sa kinaiya ni Pahoran. Imbis mobalos, gidapit ni Pahoran si Moroni nga makig-alayon kaniya diha sa kusog sa Ginoo sa pagpakigbatok sa kaaway. Basaha ang Alma 62:1 aron mahibaloan unsay gibati ni Moroni dihang nadawat niya ang tubag ni Pahoran.

Hunahunaa ang pagsulat sa mosunod nga mga kamatuoran diha sa imong scripture study journal: Makapili kita nga dili masilo sa mga pulong o mga buhat sa uban. Kon maghiusa kita sa pagkamatarung kauban sa uban, mas lig-on kita sa atong pagpakig-away batok sa dautan.

Si Elder David A. Bednar sa Korum sa Napulog Duha ka mga Apostoles mitudlo:

“Pinaagi sa makalig-ong gahum sa Pag-ula ni Jesukristo, kamo ug ako mapanalanginan sa paglikay ug pagbuntog batok sa pagkasilo. ‘Ang mga nahigugma sa imong kasugoan adunay pakigdait nga daku; Ug kanila walay makapasilo kanila’ (Salmo 119:165). …

“… Si Moroni … misulat kang Pahoran ‘pinaagi sa pagpanghimaraut’ (Alma 60:2) ug grabeng miakusar kaniya sa walay paghunahuna, pagtapul, ug pagpasagad. Si Pahoran unta sayon ra kaayo nga masuko kang Moroni ug sa iyang mensahe, apan mipili nga dili masilo. …

“Usa sa pinakamahinungdanong timailhan sa atong kaugalingon espirituhanong kahingkod makita diha kon unsa kita motubag sa mga kahuyang, sa pagkawalay kasinatian ug sa posibleng makapasakit nga binuhatan sa uban. Ang usa ka butang, panghitabo o sulti mahimong makapasilo,—ug sa pinulongan ni Pahoran, ‘kini walay sapayan’ [Alma 61:9]” (“Ug Walay Makapasilo Kanila,” Ensign o Liahona, Nob. 2006, 90–91).

Hunahunaa ang usa ka panahon dihang mipili ka nga dili masilo sa mga pulong o mga buhat sa uban. Pagsulat og mubo nga paragraph mahitungod sa kaimportante sa pagpili nga dili masilo.

Sumala sa narekord sa Alma 62, gidala ni Kapitan Moroni ang iyang mga sundalo ngadto sa Zarahemla aron tabangan si Pahoran sa pagpalagput sa mga tawo nga makihari—masupilon nga mga Nephite kinsa gustong moestablisar og hari ug nakig-alayon sa mga Lamanite. Ang mga tawo nga makihari mipugong kang Pahoran sa pagpadala og mga tawo ug mga suplay nga tabang kang Moroni ug ni Helaman. Gihiusa dayon ni Moroni ug Pahoran ang ilang pwersa ug nakadawat og tabang gikan sa ubang mga sundalo nga Nephite aron mapalayas ang mga Lamanite palayo sa dapit. Atol niini nga panahon daghang mga Lamanite ang naghinulsol ug mitipon sa mga katawhan ni Ammon.

Hunahunaa ang pipila ka mga hagit nga tingali anaa sa mga pamilya ug mga indibidwal dapit sa katapusan sa sama niana nga gubat. Basaha ang Alma 62:39–41 aron makita sa unsang paagi naapektuhan ang mga Nephite sa mga pagsulay tungod sa gubat. Samtang imong basahon, pangitaa ang mga kamatuoran nga imong mailhan dinhi niini nga mga bersikulo.

Isulat ang mosunod nga mga baruganan o kamatuoran diha sa imong mga kasulatan dapit sa Alma 62: 39–41 o sa imong scripture study journal: Mas mahiduol kita sa Ginoo atol sa atong mga pagsulay.

Isulat ang tubag sa mosunod nga mga pangutana diha sa imong scripture study journal:
1. Ngano kaha nga ang ubang mga tawo mas moduol man sa Ginoo kon nag-atubang og mga pagsulay samtang ang uban motalikod man hinoon Kaniya?
2. Unsa ang natudlo sa mga kapitulo bahin sa gubat mahitungod sa pagkadisipulo ni Jesukristo sa mga panahon sa kalisud o pagsulay?

Alma 63

Daghang mga Nephite mibiyahe padulong sa amihanan nga yuta

Human sa pagkamatay ni Helaman (tan-awa sa Alma 62:52), ang igsoon niyang si Shiblon ang migunit sa sagradong mga rekord. Basaha ang Alma 63:1–2 aron makita kon unsa nga matang sa tawo si Shiblon. Sumala sa narekord sa Alma 63, si Moroni ug Shiblon namatay, ug ang anak ni Moroni, si Moronihah, maoy nagmando sa mga sundalo nga Nephite.

Basaha ang Alma 63:10–13. Sa wala pa siya mamatay, si Shiblon mihatag ni Helaman, kinsa anak ni Helaman, og katungdanan sa sagradong mga rekord. Gipreserbar ni Helaman ang mga rekord nga nasulat na ug gisugdan sa pagtipig ang rekord nga nahimo nga basahon ni Helaman.

Ang Alma 63:5–8 nagrekord sa daghang mga pagbiyahe sa mga Nephite pinaagi sa barko ngadto sa mga kayutaan padulong sa norte ug wala na igdungog pag-usab. Usab, ang dapit sa katapusan sa Alma 63 nagpadayag nga sa makausa nagsugod ang pipila ka panagbangi tali sa mga Lamanite ug sa mga Nephite, sa ingon natapos ang taas ug makadasig nga basahon ni Alma.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Alma 59–63 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: