Gibadlong ni Alma ang sukihan niyang anak, si Corianton, kinsa mibiya sa iyang pangalagad ug mihimo og seryusong sekswal nga sala. Gitudloan ni Alma si Corianton sa gibug-aton sa iyang mga nabuhat ug mipahayag sa iyang kasagmuyo nga nahimo ni Corianton ang ingon ka seryuso nga sayop. Gisugo ni Alma si Corianton nga hunungon “[ang] mga tinguha nga dautan sa iyang mga mata” ug sa paghinulsol (Alma 39:9). Ang mensahe ni Alma kang Corianton makita sa Alma 39–42.
Gipasabut ni Alma ang kaseryuso sa sekswal nga sala ngadto sa iyang anak nga si Corianton
Hunahunaa ang mosunod nga pamahayag: Ang ubang mga sala mas seryuso pa kay sa ubang mga sala.
Tubaga ang mosunod nga mga pangutana diha sa imong scripture study journal: Uyon ka ba nga ang ubang sala mas seryuso kay sa ubang mga sala? Ngano o nganong dili man?
Sumala sa narekord sa Alma 39, mihatag si Alma og tambag sa iyang anak nga si Corianton nga makatabang nimo sa pagsabut sa seryuso nga matang sa piho nga mga sala. Gikuyugan ni Corianton si Alma ug ang iyang igsoong si Shiblon sa usa ka misyon sa pagsangyaw sa ebanghelyo ngadto sa mga Zoramite. Samtang didto, nakahimo og seryusong sekswal nga sala si Corianton.
Basaha ang Alma 39:1–4, ug pangitaa kon unsay nahimong sayop ni Corianton. Aron matabangan ka sa pagsabut niini nga mga bersikulo, makatabang ang pagkahibalo nga ang usa ka tigbaligya og dungog usa ka imoral nga babaye o prostitute. Importanting masabtan nga “ang Ginoo dili makatan-aw diha sa sala uban sa labing gamay nga matang sa pagtugot” (D&P 1:31); ang sekswal nga sala labihan ka seryuso. Timan-i usab nga si Corianton tuyo gayud nga mibiya sa iyang misyon aron moadto sa babayeng nagbaligya og dungog nga si Isabel, nga nakatampo sa kaseryuso sa iyang sala.
Basaha ang Alma 39:5, ug tan-awa kon giunsa sa pagpasabut ni Alma ang kaseryuso sa sekswal nga sala ikumpara sa ubang mga sala. Ang pagkasalawayon mao ang pagpakasala, pagkadautan, o pagkatalamayon. Gikan niini nga mga bersikulo atong nakat-unan nga ang sekswal nga sala usa ka salawayon sa panan-aw sa Ginoo. Pamalandunga kon ngano kaha nga ang sekswal nga sala gibutang man nga seryusong sala nga ikaduha sa pagpatay.
Si Elder Jeffrey R. Holland sa Korum sa Napulog Duha ka mga Apostoles mihatag niini nga pagpasabut nganong ang sekswal nga sala usa ka salawayon ngadto sa Ginoo: “Gumikan sa kaseryuso niini ngadto sa lawasnong gana nga anaa sa tibuok kalibutan, unsa man ang gustong ipasabut sa Dios ngari kanato mahitungod sa luna niini sa Iyang plano para sa tanang mga lalaki ug babaye? Moingon ko kaninyo nga haum kaayo ang Iyang gihimo nga—sa pagkomento mahitungod niana nga plano sa kinabuhi mismo. Klaro nga tali sa pinakamahinungdanon Niyang mga kabalaka kabahin sa mortalidad mao ang kabalaka kon unsaon sa usa ka tawo sa pagsulod niining kalibutana ug unsaon sa usa ka tawo sa paggawas niini. Mitakda Siya og labihan ka estriktong mga limitasyon bahin niining mga butanga” (“Personal Purity,” Ensign, Nob. 1998, 76).
Basaha ang mosunod nga mga paragraph, ug pangitaa ug markahi ang mga tubag sa mosunod nga pangutana: Unsa ang ubang mga panalangin sa pagpabiling putli sa sekwal?
“Ang pisikal nga kasuod tali sa bana ug asawa maanindot ug sagrado. Kini gi-orden sa Dios aron malalang ang mga anak ug alang sa pagpadayag og gugma tali sa bana ug asawa. Ang Dios misugo nga ang sekswal nga kasuod itagana alang sa kaminyoon.
“Kon kamo putli sa sekswal nga paagi, inyong maandam ang inyong kaugalingon sa paghimo ug pagsunod sa sagradong mga pakigsaad sulod sa templo. Inyong maandam ang inyong kaugalingon sa pagtukod og usa ka lig-on nga kaminyoon ug sa pagdala sa mga anak nganhi sa kalibutan isip kabahin sa usa ka mahangturon ug mahigugmaon nga pamilya. Kamo manalipod sa inyong kaugalingon gikan sa espirituhanon ug emosyonal nga kadaut nga moabut gikan sa pakigbahin sa sekswal nga kasuod nga gawas sa kaminyoon. Kamo makapanalipod usab sa inyong kaugalingon sa makadaut nga mga sakit. Ang pagpabilin nga putli sa sekswal nga paagi makatabang kaninyo nga mahimong masaligon ug tinuoray nga malipayon ug makapalambo sa inyong abilidad sa paghimo og maayo nga mga desisyon karon ug sa umaabut” (Alang sa Kalig-on sa mga Kabatan-onan [booklet, 2011], 35).
Karon basaha ang mosunod nga mga paragraph, nga mangita sa mga tubag sa mosunod nga pangutana: Unsa ang mga sumbanan sa Ginoo sa pagpabiling putli sa sekwal?
“Ang sumbanan sa Ginoo kalabut sa sekswal nga kaputli klaro ug dili mausab. Ayaw paghimo og bisan unsang sekswal nga mga relasyon sa wala pa ang kaminyoon, ug magmatinud-anon sa hingpit ngadto sa inyong kapikas human sa kaminyoon. Ayaw tuguti ang media, ang inyong mga kabarkada, o ang uban sa pagdani kaninyo nga ang sekswal nga kasuod sa wala pa ang kaminyoon madawat ra. Dili kana mao. Sa panan-aw sa Dios, ang sekswal nga mga sala seryuso kaayo. Kini makadaut sa sagradong gahum sa Dios nga gihatag kanato sa paglalang og kinabuhi. Si propeta Alma nagtudlo nga ang sekswal nga mga sala mas seryoso kay sa ubang mga sala gawas sa pagpatay o pagsalikway sa Espiritu Santo (tan-awa sa Alma 39:5).
“Ayaw gayud pagbuhat og bisan unsang butang nga moresulta sa sekswal nga kalapasan. Tagda kanunay ang uban inubanan sa pagtahud, dili mga butang nga pagagamiton aron pagtagbaw sa mahigalon ug hinakog nga mga tinguha. Sa dili pa ang kaminyoon, ayaw pag-apil nianang lawom nga pagbati sa paghinagkanay, pagpatong ibabaw sa lain nga tawo, o paghikap sa pribado, sagrado nga mga bahin sa lawas sa lain nga tawo, aduna o walay saput. Ayaw paghimo og bisan unsang butang nga makapukaw sa sekswal nga mga pagbati. Ayaw pukawa kana nga mga emosyon sa inyong kaugalingong lawas. Pagbantay sa mga pag-aghat sa Espiritu aron mahimo kamong limpyo ug mahiyason. Ang Espiritu sa Ginoo mobiya gikan sa tawo nga anaa sa sekswal nga kalapasan.
“Likayi ang mga sitwasyon nga modapit og dugang nga pagtintal, sama sa gabii na kaayo o magbuntagay [overnight] nga mga kalihokan nga layo sa panimalay o mga kalihokan diin kulang ang pagdumala sa hamtong. Ayaw pag-apil sa mga panaghisgutan o bisan unsa nga pamaagi nga makapukaw sa sekswal nga mga pagbati. Ayaw pag-apil sa bisan unsa nga matang sa pornograpiya. Ang Espiritu makatabang nga kamo masayud kon kamo anaa sa peligro ug mohatag kaninyo og kalig-on sa pagpahilayo sa inyong kaugalingon gikan niana nga sitwasyon. Pagbaton og hugot nga pagtuo ug magmasulundon sa matarung nga tambag sa inyong mga ginikanan ug mga lider.
“Ang kinaiya nga binayot [homosekswal] ug tinomboy usa ka grabe nga sala. Kon kamo makamatikod sa inyong kaugalingon nga nanlimbasug sa pagkaibog sa samang sekso o gidani sa pag-apil sa dili angay nga binuhatan, pangayo og tambag sa inyong mga ginikanan ug bishop. Sila motabang kaninyo.
“Ang mga biktima sa sekswal nga pang-abuso walay sala ug dili kinahanglang maghinulsol. Kon kamo biktima sa pang-abuso, hibaw-i nga kamo inosente ug ang Dios nahigugma kaninyo. Pakigsulti sa inyong mga ginikanan o sa laing masaligan nga hamtong, ug pangayo dayon og tambag sa inyong bishop. Makasuporta sila kaninyo sa espirituhanong paagi ug makatabang kaninyo nga makakuha og proteksyon ug tabang nga inyong gikinahanglan. Ang proseso sa pag-ayo mahimong molungtad og dugay-dugay. Salig sa Manluluwas. Siya moayo kaninyo ug mohatag kaninyo og kalinaw.
“Kon kamo gitintal sa pagbuhat og bisan unsang matang sa sekswal nga kalapasan, pangayo og tabang sa inyong mga ginikanan ug bishop. Pag-ampo ngadto sa inyong Amahan sa Langit, kinsa motabang kaninyo sa pagpakigbatok sa pagtintal ug sa pagbuntog sa dili angay nga mga hunahuna ug mga pagbati. Kon kamo nakahimo og sekswal nga kalapasan, pakigsulti sa inyong bishop karon ug sugdi ang proseso sa paghinulsol aron kamo makabaton og kalinaw ug makaangkon og hingpit nga pagpakig-uban sa Espiritu.
Paghimo og personal nga pasalig nga mahimong putli sa sekswal nga paagi. Pinaagi sa inyong mga pulong ug mga lihok, awhaga ang uban sa pagbuhat sa ingon.” (Alang sa kalig-on sa gma Kabatan-onan, 35–37).
Pamalandunga kon unsa kaha nga mensahe ang gustong patutukan sa Ginoo kanimo gikan sa bag-o lang nimong gibasa.
Hunahunaa nga nakigsulti ka sa imong mga ginikanan, sa mga lider sa Young Men o Young Women, o sa imong bishop o branch president mahitungod sa kaimportante sa sekswal nga kaputli. Hunahunaa kon unsa kaha ang imong reaksyon kon tambagan ka sa imong mga ginikanan o mga lider sa Simbahan mahitungod sa kaimportante sa pagpabiling putli sa sekswal nga paagi. Basaha ang Alma 39:7–8 aron makita kon unsay tuyo ni Alma sa pagtudlo kang Corianton mahitungod sa kaseryuso sa iyang sala. Pamalandunga sa unsang paagi kaha ang imong reaksyon sa tambag sa imong mga ginikanan o mga lider sa Simbahan maapektuhan gumikan sa pagkahibalo nga usa ka mapinanggaong pagdapit ang pagpabiling putli o ang makahinulsol ug sa paglikay sa mga paghukom sa Dios.
Imahe
Elder D. Todd Christofferson
Si Elder D. Todd Christofferson sa Korum sa Napulog Duha ka mga Apostoles mihulagway kon nganong ang mga ginikanan, sama ni Alma, midapit sa ilang mga anak sa paghinulsol: “Ang pagdapit sa paghinulsol usa ka pagpahayag sa gugma. … Kon kita dili modapit sa uban sa pag-usab o kon kita wala momando og paghinulsol sa atong kaugalingon, pakyas kita sa mahinungdanong katungdanan nga kita obligado ngadto sa usag usa ug sa atong kaugalingon. Ang ginikanan nga motugot ra sa ilang mga anak nga makasala, ang walay pagpakabana nga higala, ang mahadlukon nga lider sa Simbahan sa tinuoray mas nagpakabana sa ilang kaugalingon kay sa kaayohan ug kalipay niadtong ila untang matabangan. Oo, ang tawag sa paghinulsol usahay gitan-aw nga dili matugtanon o makapasilo, ug gani gikasilagan, apan giniyahan sa Espiritu, sa tinuoray kini usa ka buhat sa tiunay nga pagpangga” (“Ang Balaan nga Gasa sa Paghinulsol,” Ensign or Liahona, Nob. 2011, 39).
Isulat ang mosunod diha sa imong scripture study journal: Ang paghinulsol naglakip sa … Dayon, samtang magtuon ka sa Alma 39:9–14, paghimo og lista diha sa imong scripture study journal kon unsay gitudlo ni Alma kang Corianton mahitungod sa paghinulsol nga makatabang sa pagkompleto niini nga pamahayag.
Gamita ang mga pangutana ug komentaryo aron matabangan ka sa pagsabut ug sa paggamit sa tambag ni Alma. Sulayi sa pag-ila ug pagsulat bisan usa lang ka kamatuoran alang sa matag bersikulo nga gilista sa ubos nga makatabang sa pagkompleto sa pamahayag diha sa imong scripture study journal. Wala kinahanglana nga imong tubagon ang mga pangutana diha sa imong scripture study journal.
Basaha ang Alma 39:9. (Ang Alma 39:9 usa ka scripture mastery nga bersikulo. Mahimo nimong markahan kini sa lahi nga paagi aron mapangita nimo kini sa umaabut.) Unsay kalabutan sa mga pulong nga “ayaw na pagsunod sa mga tinguha nga dautan sa imong mga mata” ug sa “wad-a sa imong kaugalingon kini nga mga butang” mahitungod sa pagbiya sa sala?
Sa atong panahon, ang mga pulong nga “mga tinguha nga dautan sa imong mga mata” dunay dakong kalabutan sa imoralidad ug sa mga imahe o kalingawan nga dunay matang sa pornograpiya. Ang mga pulong nga “wad-a sa imong kaugalingon,” nga gigamit sa Alma 39:9, nagpasabut sa paglimud sa imong kaugalingon sa usa ka butang. Kini nga pulong dili ingon ka pamilyar sa ato karon. Hinoon, sa panahon ni Joseph Smith, ang mga kahulugan sa verb nga wad-a mao ang pag-papas; o pagkansela. … Sa pagbatok … ; sa paghunong” (Noah Webster’s First Edition sa American Dictionary sa English nga Pinulongan, facsimile ed. [1967]). Kon gamiton nato kini nga mga depinisyon kon unsay gitudlo ni Alma sa iyang anak, atong masabtan ang kaimportante sa pagwagtang sa tanang aspeto sa imoralidad (lakip ang mga tinubdan sa tintasyon sa pagka-imoral nga kita ang nagkontrolar) gikan sa atong kinabuhi, aron kita “makapanunod sa gingharian sa Dios.” Unsa ang ubang mga paagi diin ang batan-ong mga Santos sa Ulahing mga Adlaw karon may kaisug sa pagpadayon sa ilang kaugalingon kabahin sa sekswal nga kaputli ug makalikay sa mga tinguha nga dautan sa ilang mga mata?
Basaha ang Alma 39:10. Sa unsang paagi ang pagtinguha og espirituhanong pag-amuma—gikan sa mga ginikanan, mga lider sa Simbahan, mga igsoon, o kasaligang mga higala—makatabang og tawo sa paghinulsol?
Basaha ang Alma 39:11–12, ug pamalandunga ang mosunod nga mga pangutana:
Unsay kinahanglang mausab sa kasingkasing sa usa ka tawo atol sa proseso sa paghinulsol aron siya dili matintal pagbalik sa yawa aron makasala?
Sa unsang paagi ang pagtinguha sa walay kapuslanan ug binuang nga mga butang makatabang sa usa ka tawo aron makahinulsol?
Basaha ang Alma 39:13. Hinumdumi nga gisultihan ni Alma si Corianton nga dihang nakita sa mga Zoramite ang kinaiya ni Corianton dili na sila motuo sa mga pulong ni Alma (tan-awa Alma 39:11). Tingali makatabang ang pagkasabut nga diha sa mga kasulatan, ang mga pulong nga “mobalik sa Ginoo” nagpasabut sa paghinulsol. Ang paghinulsol mao ang “pag-usab sa kasingkasing ug kabubut-on ngadto sa Dios” (Bible Dictionary, “Repentance”).
Unsa kaha ang ipasabut sa paghinulsol uban sa tibuok nimong “hunahuna, gahum, ug kusog”?
Kon ang atong mga sala makaapekto sa uban, unsay kinahanglan gayud natong buhaton isip kabahin sa atong paghinulsol?
Kon nahimo ang usa ka seryusong sala, nganong gikinahanglan man ang pagpangayo og tabang sa bishop o branch president?
Gikan sa Alma 39:9–13 atong makat-unan: Ang paghinulsol naglakip sa pag-ila ug pagbiya sa atong mga sala ug pagbalik ngadto sa Ginoo sa tibuok natong hunahuna, gahum ug kusog.
Pamalandunga kon unsay imong gibati nga gusto sa Ginoo nga ipabuhat kanimo aron mas hingpit ang pag-usab sa imong kasingkasing ug kabubut-on ngadto Kaniya. Unsa ang imong mahimo karon aron masugdan sa paghimo kini nga mga pag-aghat?
Kon wala si Jesukristo ug ang Iyang Pag-ula, imposible nga ikaw mapasaylo sa imong mga sala. Basaha ang Alma 39:15–16, 19, ug pangitaa kon giunsa sa paghulagway ni Alma ang kahibalo nga si Jesukristo moanhi aron sa pagkuha sa mga sala sa kalibutan.
Diha sa imong scripture study journal, isulat kon nganong ang pag-anhi ni Jesukristo usa ka maayong balita para ni Corianton ug kanimo.
Si Elder Richard G. Scott sa Korum sa Napulog Duha ka mga Apostoles misulti mahitungod sa pagmemorya og mga kasulatan:
“Ang pagkat-on, pagpamalandong, pagsiksik, ug pagmemorya sa kasulatan sama ra sa pagdugang og mga higala, mga hiyas, ug mga kamatuoran nga masaligan bisan kanus-a, bisan asa sa kalibutan.
“Talagsaong gahum moabut gikan sa pagmemorya og mga kasulatan. Ang pagmemorya og kasulatan mao ang paghulma og bag-ong pakighigala. Sama sa pagdiskobre og bag-ong tawo nga makatabang panahon sa panginahanglan, makahatag og inspirasyon ug kahupayan, ug mahimong tinubdan sa kadasig sa gikinahanglan nga kausaban” (“Ang Gahum sa Kasulatan,” Ensign o Liahona, Nob. 2011, 6).
Sulayi sa pagmemorya ang Alma 39:9. Sa imong scripture study journal, pagsulat og usa ka sentence o duha kon sa unsang paagi ang pagmemorya niini nga bersikulo mamahimo nga panalipud alang nimo panahon sa tintasyon.
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang Alma 39 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: